انخفاض مفاجئ لدواسة الدبرياج

[khaled_sabry]

السلام عليكم و رحمة الله
من شهرين او ثلاثه غيرت طقم الدبرياج علشان كانت دواسة الدبرياج تقيله اوى و الدبرياج كان واطى جداااااااااا و فى الطلعه العربيه كانت بترعش بالذات لو كانت طالع على التانى
المهم اتغير الطقم و قاعدة الفتيس (جبتها فرنساوى الاصلى ) و الفورك و كان فى اويل سيل فى حلة الفتيس اتغير كمان بالمره
بعد كده بقى كله تمام بس فى الطلعه الاقيها بتترعش اقل بكتير من الاول بس لسه الرعشه موجوده
المهم قريت هنا فى احد الموضوعات ان ممكن الموضوع ده يختفى لو حاولت تطلع بالعربيه و انتا دايس فرامل جامد -

http://www.nilemotors.net/Nile/239609-a.html

عملت الحركه دى 3 او 4 مرات فى يوم كده بعد ماجيت من الشغل - و فعلا الرعشه اختفت من عندى تماما فى الطلعه
لكن للاسف بعدها بيوم لاقيت دواسة الدبرياج وطيت اوى و بدل ماكان الدبرياج بيفصل فى اول ربع من الدواسه لازم تلزقه فى الارض علشان يفصل

ببص على زيت الدبرياج مالقتهوش نقص (او ممكن يكون نقص حاجه بسيطه )
روحت للميكانيكي الغبى اللى جنب بيتنا و قولتله على اللى عندى لاقيته نزل تحت العربيه ماعرفشى بيعمل ايه و نط فى الدواسه علشان يبص على الماستر الفوقانى و بعد كده لاقيته بيدور و ياخد الغيارات
ويقولى ماهى بتاخد الغيارات اهه يا بيه - كنت عاوز امسكه و ارميه بره العربيه

روحت لوحاد تانى عمل نفس الكلام
انا مشكلتى ان الدبرياج نزل مره واحده و باخد الغيارات لما بلزق الدواسه فى الارض
فعاوز اعرف ايه السبب و هل ممكن يوطى عن كده فجاءه و لأنى انا طريقى زحمه و بستخدم الدبرياج كتير

ملحوظه الناهرده الصبح نزلت انا بنفسى تحت العربيه ولاحظت تعريق زيت خفيف حولين المسمارين اللى رابطين االماستر التحتاتنى - هل ده معناه ان جلد الماستر ضارب و معقول الاتنين مكيانيكيه ماخدوش بالهم منه ؟؟

[khaled_sabry]

هو ماحدش لاقى تفسير و لا القسم اللى بقى نايم ؟؟

[Abo Yasso]

اعتقد والله اعلم الماستر الفوقانى

[khaled_sabry]

اتمنى ذلك انا كنت مطنش فى الاول و و بعد ما الاتنين الميكانيكيه الجهاب اللى جنب بيتى قالولى مافيش حاجه بقيت مجبر دلوقتى ان بكره اضرب مشوار لمحمد ندا ميكانيكي البيجو
لان الدواسه وطيت تانى معايا و بقيت الغيارات بتعض معايا حتى و انا دايس دبرياج على الاخر

[amrelsaqqa]

المشكلة ان الحركة اللى انت عملتها اصلا بتاعت الطلعة وانت دايس فرامل دى ممكن تفوت الاسطوانة خصوصا لو الطقم مش قد كدة ( مش اصلى )

ربنا يسترها وماتكونش اسطوانة ، هو المفروض ان حتى لو الاسطوانة حصل فيها تآكل الزيت ينزل ويعادل الفرق اللى حصل بحيث تفضل الدواسة في نفس المستوى وهو ده اهم فرق بين الدبرياج الواير والدبرياج الماستر

لو مشكلة ماستر اعتقد هتلاقى الدبرياج واطى جدا اكتر من كدة والغيارات تيجى بصعوبة ، روح لواحد فاهم وجرب واحدة واحدة من الاسهل للاصعب عشان ما تصرفش كتير ، يعنى بص على مستوى الزيت واتأكد ان مفيش هوا في الدورة بتاعته لان ممكن الاسطوانة حصل فيها تأكل بسيط ( ما يبوظهاش ) بس وجود هوا في الدورة مش مخلى الزيت ينزل يعادل الفرق

بعد كدة تبقى تشوف الاويلسيلات بتاعت الماستر الفوقانى والبستم في الماستر التحتانى وتجيب طقم اصلاح لو احتاجت ، في الاخر خالص تبقى تشوف حالة الاسطوانة والديسك بس ان شاء الله ما توصلش لاخر مرحلة دى

ولو لاقدر الله لو اضطريت تغير الطقم تانى ، ما تنساش تودي الفولام ( الـ fly wheel ) المخرطة عشان ما يبقاش عندك اي رعشة بعد كدة

[amrelsaqqa]

بعد ردك الاخير ، طالما الموضوع بيتدهور والغيارات بقت تعض يبقى 90% طقم اصلاح للماستر الفوقانى او التحتانى او الاتنين

[khaled_sabry]

بعد ردك الاخير ، طالما الموضوع بيتدهور والغيارات بقت تعض يبقى 90% طقم اصلاح للماستر الفوقانى او التحتانى او الاتنين

هو بصراحه مستبعد ان يكون طقم الدبرياج فوت لأن العربيه سحبها فوق الممتاز و اخر مره شديت بيها على 130 و مافيش اى حاجه من اعراض طقم الدبرياج عندى
انا راضى باى حاجه بس ابعد عن انى اشيل الموتور تانى
هو فيه معلومه صغيره .. انا كنت حاطط السيخ بتاع الدبرياج كله من غير ما اقص منه و بالتالى كان عندى الدبرياج عالى اوى فى الاول- فهل ده ممكن يكون عمل ضغط على الماستر الفوقانى و هو ده اللى بوظهه ؟؟

[amrelsaqqa]

لالا مالهاش علاقة
اهم حاجة يبقى اخر البدال دايما بيلمس الدواسة ( الارضية ) عشان لو مش كدة ممكن في مرة تدوس ع البدال جامد وتلاقى السيخ ده اتكسر منك لو البدال ما بيلمسش الارضية في اخر مشواره
وطبعا من ارخم المواقف اللى ممكن تصادفها ان دواسة الدبرياج تعطل منك فجأة وانت ماشى ...


بالمناسبة السيخ ده الصنايعية بيسموه "زغاد دبرياج"
انا كان عندى الزغاد ده معمول عمولة بحيث انه نصه دكر الاووظ ونصه نتاية الاووظ عامل زي الزرجينة كدة بحيث انك تفك الصامولة وتطول وتقصر زي ما انت عايز :d

افتكاسات مصرية معرفش مين اللى كان عاملها في العربية ، بس الصراحة كانت جامدة جدا :d

[khaled_sabry]

لالا مالهاش علاقة
اهم حاجة يبقى اخر البدال دايما بيلمس الدواسة ( الارضية ) عشان لو مش كدة ممكن في مرة تدوس ع البدال جامد وتلاقى السيخ ده اتكسر منك لو البدال ما بيلمسش الارضية في اخر مشواره
وطبعا من ارخم المواقف اللى ممكن تصادفها ان دواسة الدبرياج تعطل منك فجأة وانت ماشى ...


بالمناسبة السيخ ده الصنايعية بيسموه "زغاد دبرياج"
انا كان عندى الزغاد ده معمول عمولة بحيث انه نصه دكر الاووظ ونصه نتاية الاووظ عامل زي الزرجينة كدة بحيث انك تفك الصامولة وتطول وتقصر زي ما انت عايز :d

افتكاسات مصرية معرفش مين اللى كان عاملها في العربية ، بس الصراحة كانت جامدة جدا :d

انتا عارف ان الحركه دى فعلا بفكر اعملها بس مكسل اقف على دماغ الخراط
اصل الخراط اللى اعرفه و اللى حيلحملى الصموله عباقره لازم تشرحلهم اللى انتا عاوزه و عاوزه ليه و علشان ايه و تتحايل عليهم و فى الاخر يحطولك التاتش بتاعتهم و يخربو الدنيا

[amrelsaqqa]

فكرتها نفس فكرة تطويل المساعد اللى هم على طول بيعملوها

هتخليه يقص من السيخ حتة عشان يقصره شوية ويقلوظه
وبعد كدة هيجيب من عنده قضيب حديد سمك 15 ملي مثلا ويقلوظه من جوة ويرفّعه من اخره (بشكل مدبب عشان يدخل في مكانه في الماستر )

وركب دى في دى وصامولة في الوسط عشان تحكمها عند وضع معين وشكرا على كدة

الميزة كمان انها بتبقى سهلة التركيب لانك بتقصرها لاقصر درجة وبعدين تشبطها في البدال وتنشن على فتحة الماستر وبعدين تطول للطول اللى انت عايزه ( مش محتاج تفك المسمار اللى بيصد في البدال وهو راجع عشان تكبر الرينج بتاع البدال قبل ما تفك او تركب السيخ )

[khaled_sabry]

السلام عليكم
نكمل باقيه القصتى مع دبرياج الاسد
روحت اول امبارح لميكانيكي متخصص فى البيجو - داس الدبرياج و قالى ده العادى بتاعه - يادى النيله هو كمان
المهم قولتله هو بيبقى اعلى من كده المفروض الى اخر الكلام اللى زهقت من تكراره
المهم هو نزل فى الدواسه كده و فك السيخ او الغمازه و معرفشى عمل ايه (غالبا حط صاموله تحت اخر السيخ علشان تعليه
و الدبرياج على و تانى يوم لاقيته وطى تانى و انا رايح الشغل
و انا راجع بقى الدبرايج وطى جدا و عقبال ماوصلت البيت بقيت ماشى على التانى و مش عارف اخد اى نقله تانيه
روحت للميكانيكي اللى جنب بيتي مطر بقى وقولتله اهه انا جيتلك قبل كده و قولتلى ده العادى بتاعها و دلوقتى مابقتشى تاخد اى غيار - شوفلك حل بقى
قعد يكايرك كده المهم عرفنا ان المشكله مشكلة جلد ماستر - غيره و الدبرياج وصل لعلوه السابق و الدنيا بقيت تمام اخيرا

بس الناهرده الصبح بصيت لاقيت فيه حبه زيت قليلين موجودين فى مكان السيخ لما بيتركب فى الماستر الفوقانى
فهل معنى كده ان جلد الماستر ركب غلط و لا دى بواقى زيت قبل كده