استفسار في جير اوبتر اوتوماتيك لخبراء الأتوماتيك

[tayson54]

لو سمحتهم يا شباب عندي استفسار فني يا ريت حد يرد عليه
عندي التاني بيجيب لحد 40 وبعدين التالت لحد 60 والرابع لحد 80 ..
لحد دلوقتي مفيش مشكله ...المشكله بقه لما بكون علي الرابع وبعدين اهدي سرعه العربيه وعداد السرعه ينزل لحد 60 او 50 تقريبا وارجع اضغط بنزين تاني علشان ازود السرعه بلاقي العربيه لسه علي الرابع لكن العربيه مبيكنش فيها عزم كفايه للمشي علي الرابع نتيجه تخفيض السرعه فالموتور بيبرجل خفيف كده لحد ما ياخد عزمه وبعدين بيبقي طبيعي ...
السؤال بقه هل لازم في الوضع ده اسقط سرعه بحيث ابقي علي التالت (لما عملت كده العربيه مبرجلتش وكانت طبيعيه جدا)
الحركه دي سعات بتحصل في المانيوال وطبيعي كنت بنزل سرعه علشان العربيه متبرجلش فهل لازم اعمل كده في الأتوماتيك ولا المفروض العربيه تحس هي علي سرعه ايه وعزم ايه وتجيب الغيار المناسب ...ولا انا عربيتي فيها مشكله كده ؟
ارجو حد من الخبراء يهتم ويفهمني النقطه دي لاني اول مره اسوق اوتوماتيك فمعنديش خلفيه اوي ..
الف شكر

[Abdo_Eldesokey]

الموضوع ده على حسب فهمي لوصفك طبيعي

لما تكون على نقلة عالية وتهدي لو جيت تدوس بنزين تاني تلاقي العربية مش بتسحب خالص

والحل إنك تشيل رجلك من على دواسة البنزين وتدوس عليها تاني بالراحة عشان العربية تنقل على النقلة الصحيحة ... والموضوع في الآخر هيبقى تعود ... ضغطك على دواسة البنزين هوا الي بيحدد سرعة النقل في الأتوماتيك

لو دست جامد النقل بيتأخر والتسارع يزيد ... لو دست بالراحة النقل بيبقى أسرع والتسارع أقل

[Adham]

سلك الكيك داون مرخي و عاوز يتشد شوية

وبس

[chihab18]

الفتيس سليم الاوتماتيك علي وصفك ده مضبوط

[tayson54]

الف شكر يا شباب علي ارائكم انا بس محتاج اراء اكتر لاني لما رحت التوكيل قالو لي مفيش حاجه بينما انا عايز اتأكد منكم ان ده فعلا سليم لاني حاسس بغير كده
يا تري ممكن اراء تانيه حوالين المشكه دي وخصوصا من اللي عندهم عربيات اوتوماتيك من فتره طويله

[tayson54]

هو التوكيل بيقول انه مضبوط برده يا استاذ شهاب لكن انا مازال عندي استفسار .ان الموتور بيبرجل خفيف كده لحد ما العزم بتاع العربيه يزيد وده سببه لان العربيه مازلت علي الغيار الرابع
مش كان من باب اولي ان السرعه تنزل للتالت علشان يوافق العزم الضعيف ده بدل ما هي علي الرابع ..هل فيه احتمال ان الحساسات المسئوله عن وضع العربيه في الغيار المناسب تكون مش مضبوطه ؟

[sab3aawy]

سلك الكيك داون مرخي و عاوز يتشد شوية

وبس

انا معرفش الأوبترا فيها سلك كيك داون وللا لأ لأن معظم العربيات الحديثة الأوتوماتيك استغنت عما يسمى ب"سلك الكيك داون" واستبدلته بالمعلومات التى يحصل عليها الفتيس من كارتة الموتور عن مقدار ضعظ دواسة الاكسراتير من خلال حساس الTPS ، او لو كان الاكسراتير كهربائى يكون من خلال حساس دواسة البنزين،

لكن اللى اعرفه ان علشان العربية تنزل للتالت من الرابع لو كنات على 40-50 لازم تدوس البنزين جامد علشان العربية تنزل، لو انت دوست خفيف العربية بتستمر على الرابع لحد ما تجمع، كونها بترعش شوية على 50 على الرابع فدى حاجة من اتنين، اما ان الموتور عايز يتظبط (وضعية وقراءات ال TPS و ال air mass) او ان الرشاشات عايزة تتنضف ، او ان الموتور نظامه كدة، وحكاية نظامه كدة دى مش هتقدر تعرفها غير لو سقت عربية تانية من نفس نوع عربيتك بنفس المكونتا الميكانيكية وفى عمر مقارب لسيارتك، او على الأقل سألت واحد من ملاكها، للأسف انا مجربتش قيادة الأوبترا اوتوماتيك علشان اقدر افتيك فى الموضوع ده، لكن من تجربتى مع منتجات نفس المصنع، فمحركات اللانوس كتير منها كان مصاب بداء الرعشة على السرعات المنخضة دون ان يمثل هذا عيب فى حق المحرك

[tayson54]

الف شكر يا استاذ سبعاوي علي مشاركتك وانا فعلا عندي فرصه اجرب عربيه تانيه زي عربيتي بالظبط وان شاء الله هجربها يوم الجمعه وهشوف لو فيها برده نفس رد الفعل اللي عندي يبقي الموتور فعلا نظامه كده ولو كانت افضل في رد الفعل يبقي فعلا فيه عندي مشكله وهاخد اقتراحك ده للتوكيل واصر انهم يكشفوا علي وضعية وقراءات ال TPS و ال air mass ..
طيب ايه رأيك احط السائل بتاع تنظيف الرشاشات علي ما اعمل الموضوع ده يمكن يكون المشكله من عدم نظافه الرشاشات فعلا؟

[chihab18]

اللي شايفه من وصفك ان الفتيس سليم جدا وبلاش تلعب فيه هو الاوتماتيك كده ماشي علي راحته
والسرعات عندك مضبوطه فعلا مع النقلات ؛ المشكله في الاوتماتيك هي عندما تدوس بنزين ولاينقل اوتماتك للنقله الثانيه مع زياده السرعه وتلاقي عداد السرعه وصل الي 70 كليو وصوت الماتور عالي ( يزعق ) ولا يقوم الفتيس الاوتماتيك بالنقل الا اذا شلت رجلك من علي دواسه البنزين لفوق شويه ثم حطيتها تاني وتحس انه لسه علي التكه التانيه ومانقلش
ففي هذه الحاله يبقي الفتيس ضعيف ولازم يتغير .
واحيانا يكون العيب ان العربيه بنزين وراكب عليها فتيس اوتماتيك بتاع عربيه سولار ( ديزل )
وعموما الاوتماتيك بتصلح عادي دلوقتي في ناس حتلاقيها متخصصه

[tayson54]

الف شكر علي مشاركتك يا استاذ شهاب

[Adham]

.
واحيانا يكون العيب ان العربيه بنزين وراكب عليها فتيس اوتماتيك بتاع عربيه سولار ( ديزل )

ممكن برضة

أسأل في التوكيل (منصور) يمكن هما مغيرين الفتيس بواحد تاني بتاع عربية ديزل

كون الفتيس مش بينزل للنقلة الأقل لما تهدي و تدوس بنزين تاني معناة ان الفتيس ما سقطش نقلة
ودة نتيجه ان سلك الكيك داون مرخي مش مضبوط (دة لو عندك سلك كيك داون أصلا)
واذا كانت العربية من غير سلك كيك داون يبقى فية رجلاش ممكن في الفتيس او ذراع بيتحرك حاتلاقية فوق البودي فالف بتاع الفتيس, بيحتضبط منة

المهم يا تشوف السلك و لو مافيش يبقى روح التوكيل و قولهم ان العربية مش بتزل نقلة لما تهدي

الفتيس الاتوماتيك ما بيمشيش على راحتة

[tayson54]

معتقدش ان منصور مغير حاجه في العربيه لانها مستورده من برده لكن الف شكر ليك انك لخصت المشكله في الجمله دي

كون الفتيس مش بينزل للنقلة الأقل لما تهدي و تدوس بنزين تاني معناة ان الفتيس ما سقطش نقلةودة نتيجه ان سلك الكيك داون مرخي مش مضبوط (دة لو عندك سلك كيك داون أصلا)واذا كانت العربية من غير سلك كيك داون يبقى فية رجلاش ممكن في الفتيس او ذراع بيتحرك حاتلاقية فوق البودي فالف بتاع الفتيس, بيحتضبط منة
المهم يا تشوف السلك و لو مافيش يبقى روح التوكيل و قولهم ان العربية مش بتزل نقلة لما تهدي