هرش وهكبر رغم ان العربية 2007

[r0xer]

السلام عليكو

بصفتي من هواة إن العربية ميبقاش فيها خرابيش ولا نقرات من المعتادة في بلدنا قررت إني هرش الباب الشمال عندي و جزء من الرفرف الشمال بسبب عتيه كان سايق نص نقل. طبعا والدي و كل الأهل والمعارف نصحوني بأنها خطوة سيئة جداً لإن سعر إعادة البيع هيقل! و لكن في الواقع يقل ولا ينقص أحسن ما الواحد كل ما يشوف عربيته يتغمّ!


المهم اللي عايز أعرفه هل المسألة بتاخد وقت ؟ السمكري و البوهيجي موجود ولكن أخشى إن اللون يطلع مختلف ولو بنسبة بسيطة، فهل حد يعرف مكان كود لون السيارة ؟ وهل البوهيجية بيفهمو في الحاجات دي يعني لو لاقيت الكود و أدتهوله هيعرف يجيب نفس الدرجة بالضبط؟


شكراً مقدماً.

[Rsarabia]

السلام عليكو

بصفتي من هواة إن العربية ميبقاش فيها خرابيش ولا نقرات من المعتادة في بلدنا قررت إني هرش الباب الشمال عندي و جزء من الرفرف الشمال بسبب عتيه كان سايق نص نقل. طبعا والدي و كل الأهل والمعارف نصحوني بأنها خطوة سيئة جداً لإن سعر إعادة البيع هيقل! و لكن في الواقع يقل ولا ينقص أحسن ما الواحد كل ما يشوف عربيته يتغمّ!


المهم اللي عايز أعرفه هل المسألة بتاخد وقت ؟ السمكري و البوهيجي موجود ولكن أخشى إن اللون يطلع مختلف ولو بنسبة بسيطة، فهل حد يعرف مكان كود لون السيارة ؟ وهل البوهيجية بيفهمو في الحاجات دي يعني لو لاقيت الكود و أدتهوله هيعرف يجيب نفس الدرجة بالضبط؟


شكراً مقدماً.

حسب انت رايح لمين بس انصحك بلاش ترش :skeptical: دى نعمة انك تقول عربيتى فابريقة احسن من انك تشوف مفيش خرابيش بس راشة

[sammor_28]

مش اي بوهيجي بيقدر يطلع اللون بالظبط ...وانصحك زي ماقالك الأستاذ rsarabia حرام انك ترش العربيه وهي 2007 لأنه زي ماقال نعمه انك تقول عربيتي فبريكه بالكامل الا لاقدر الله في حاله ان الخبطه كانت جامده ومن النوع اللي لازم يتصلح...نصيحه لو خرابيش بسيطه بلاش

[mrghost]

انصحك بلاش لان مش اى حد بيعرف يطلع نفس درجة اللون (عن تجربه ) مفيش غير التوكيل

[noble911]

حتحس بفرق الجديد عن القديم اللي اتعرض للشمس و اتغير لونه مع الوقت
الفرق مش كبير بس تلاحظه العين الخبيرة

[hazem_khidr]

بلاش احسن
ما انت حترش و حيجيلك نقر و خرابيش برضه
حتفضل بقي تصرف فلوس و تقلل من قيمه عربيتك كل شويه؟؟!!

[r0xer]

طيب الواحد يعني المفروض كل يقوم ميبصش على جمب عربيته اليمين اللي واخد خربوش بطول نص متر ؟ بجد محتار.

عموما الكل قال نفس نصائح الوالد :d و محدش قالي إلاقي لون العربية فين

[sab3aawy]

بص، انا واحد من الناس لا اتحمل منظر الحرابيش فى عربيتى، وبعدين ساعة البيع يحلها ربنا، لأن انا اصلا بتفقع مرارتى لما الاقى واحد رايح يدفع شئ وشويات فى عربة منقرة ومخرمة من كل حتة بمناسبة ان الهانم لسة فابريكة، فاضل ان لما واحد يشترى عربية فابريكة يغينلها(يا حلوة يا بلحة يا مقمعة شرفتى اخواتك الأربعة)

انا فى رأييى ان اللى يعيب العربية هو اى رش داخلى(حوض، قوائم ، شنطة الخ) لكن الرش الخارجى فقط بيدلنى على ان صاحب العربية راجل نزيه مبيستحملش منظرها وهى مدهولة(فقط حاول تبتعد عن رش السقف قدر الامكان)

بس هى المشكلة ان هيبقى فيه فرق فى الللون، الكحلى والأسود فقط هما اللى مبيبانش فيهم فروق اللون، لكن كل الألوان الفاتحة بيبان فيها، انا لو مكانك والموضوع مضايقنى اوى، هرش الجنب بالكامل علشان فروق اللون متبانش

[MOHAMED ABD EL SHAFY]

طب سؤال على الماشى
البطارية بتنقط سعات مياه وشالت اللون الاصلى من الصدر فى الجزء الموجودة به وبقت على الحديد بدون لون فهل ارشها ولا اكبر عشان محدش يقول انها عاملة حادثة

[sab3aawy]

طب سؤال على الماشى
البطارية بتنقط سعات مياه وشالت اللون الاصلى من الصدر فى الجزء الموجودة به وبقت على الحديد بدون لون فهل ارشها ولا اكبر عشان محدش يقول انها عاملة حادثة

حط على الحتة دى شحم ومترشهاش

[hamdy]

بص، انا واحد من الناس لا اتحمل منظر الحرابيش فى عربيتى، وبعدين ساعة البيع يحلها ربنا، لأن انا اصلا بتفقع مرارتى لما الاقى واحد رايح يدفع شئ وشويات فى عربة منقرة ومخرمة من كل حتة بمناسبة ان الهانم لسة فابريكة، فاضل ان لما واحد يشترى عربية فابريكة يغينلها(يا حلوة يا بلحة يا مقمعة شرفتى اخواتك الأربعة)

انا فى رأييى ان اللى يعيب العربية هو اى رش داخلى(حوض، قوائم ، شنطة الخ) لكن الرش الخارجى فقط بيدلنى على ان صاحب العربية راجل نزيه مبيستحملش منظرها وهى مدهولة(فقط حاول تبتعد عن رش السقف قدر الامكان)

بس هى المشكلة ان هيبقى فيه فرق فى الللون، الكحلى والأسود فقط هما اللى مبيبانش فيهم فروق اللون، لكن كل الألوان الفاتحة بيبان فيها، انا لو مكانك والموضوع مضايقنى اوى، هرش الجنب بالكامل علشان فروق اللون متبانش

واللهيبجد يا سبعاوي باشا ونعم التفكير هو ده التفكير الصح بجد
هو انا جايب العربية عشان اتقرف من منظرها عشان سيادتو لما ييجي يشتريها ققلو المحروسة صاج سليم

[shoudy2005]

انا بالنسبالى منظر العربيه بيهمنى اكتر من اعادة بيعها لآنى انا من النوع اللى مبيحبش يبيع السيارات الكلاسيك مش مهم الرش الخارجى المهم الداخلى و على فكره انا كنت عملت حادثه بسيفيك 92 و غيرت ربع و الحام مكنش باين علشان اتعمل عند واحد مشهور فى الحرفيين و دخلت العربيه كلها فرن بره و جوه و مكنش باين اى حاجة و اتباعت ب 52000 الف

[MoToRiZeR]

الناس يا جماعة بتجيب العربية و تركب فرش و هي لسة زيرو يقولك عشان احافظ عالفرش الأصلي عشان اما أجي أبيعها

و تتخبط و يسيبها و يقولك عشان تبقي فابريكة اما ابيعها

هو الواحد بيجيب العربية لنفسه ولا للي هيبيعهاله كمان كام سنة !
و مدام دي عربيتك و قاعدة معاك شوية لسة مش هتبيعها إلا كمان 5 سنين عالأقل .. معتقدش حتي إن فرق السعر اللي هينزل فيها يستاهل حرقة دمك الخمس سنين دول كل ما تشوف العربية .. ليه تسيب في عربيتك حاجة يا راجل رش و دلع عربيتك .. تتخبط ولا تتخربش تاني دي حاجة بتاعة ربنا المهم صلح دلوقت

[EGMIDO]

دة راى بردة وعلى فكرة انت لما تسيب العربية كدة هتقلل من تمنها بردة وطالما هة خربوش يبقى مفيش مشاكل بس هل فى اعوجاج فى الصاج لو مفيش يبقى الموضوع حل نفسة واى واحد ممكن يعملها وتجيب اللون من اى شكة بوية محترمة بالرقم الى على السيارة

[pondk20000]

el salamo 3alikom gami3n

code el looon beta3 el 3rbia mawgood law fat7t el kabooot hatl2ee odamk 3ala toool 3and matoor el masa7aat