تعديل نظام الاشعال لسيارة Lancer 1980

[HossamTec]

السلام عليكم ورحمة الله
فى البداية احب اشيد بالمنتدى الرائع لانى استفدت منه كتير بصراحة خصوصاً ان ده اول موضوع لى وانى مشترك جديد
اما بالنسبة لموضوعى
انا معايا متسوبيشى لانسر ِa171 1980
ونفسى اعدل نظام نظام الاشعال بها خاصتاً ان الموبينة بتاعة العربية الاصلية ضعفت بعد 34 سنة شغل
وجبت بوبينة دايموند الكترونى بس الفكرة ان انا شفت مواضيع كتير ان البوبينة بتلدع فى الابلاتين
وعمر الابلتين الافتراضى بيقل
اما بقى انى اجيب اسبراتير الكترونى فده حكايته حكاية
فهو مش موجود للموديل بتاعى ولما سألت على واحد بتاع مازدا 323 لقيته بـ450 جنيه طبعاً الكلام ده فى اسكندرية
ولازم اعدل الترس و......الخ
ممكن حد يفيدنى فى الموضوع ده
ويقولى اعمل ايه او حتى لو فيه اى طقم بيركب بدل الابلاتين والكوندنسر يقولى فين وبكام
وشكراً لكم

[ehabouf]

انت جيتلي في ملعبي
علشان تريح نفسك وانت بتتكلم مع اي حد عن العربية بخصوص اي حاجة عن الموتور ماتقولش انها لانسر - اتكلم على انها اكسيل لأنه نفس الموتور بس السعة الأكبر (نفس قطع الغيار من اول 120cc حتى 1600cc)
حاتجيب اسبراتير الكتروني بتاع الإكسيل وتنساه زي مانا عملت في اللانسر 82 بتاعتي

[HossamTec]

اخيراً حد معاه عربية زى عربيتى
وانا معايا ماتور 1200 cc
سؤال تانى متعرفش حد بتاع قطع غيار استعمال للعربية ديه
فى وكالة البلح
مع العلم انى نزلت 3 مرات وكالة البلح بدون جدوى

[ehabouf]

ماتتعبش نفسك - قطع غيار الياباني القديم في واخد اسمه احمد مكي في الوكالة لاممهم كلهم وحايفضل يبيع ويشتري فيك على مايديلك الي انت عايزه
قولي انت محتاج ايه وانا اقولك تجيب ايه مكانه جديد

[HossamTec]

فعلاً روحت وكالة البلح وجبت من عند احمد مكى شوية حجات زى فانوس امامى يابانى اخذته بـ110 وماستر فرامل عمومى بـ150
وجبت طنبورة امامى بـ100 الكلام ده اول مرة روحت فيها
انا حالياً عايز تابلوه
وفرن للماتور
او ماتور كامل بس يكون 1800 cc
انا لسة جايب 4 ابواب و2 رفرف امامى من بورسعيد وعلى فكرة مفهاش اى اكسسورات لينا
وعايز عفشة كاملة طقم التياش بالمقصات واجهزة الفرامل وعلبة الدركسيون
امام بالنسبة للاكسسورات مؤسسة النور فى جسر السويس بتغلى علينا اوى والشرقاوى برضو بيغلى علينا
قالوا لى فى التوفيقية بس مش عارف فين

[HossamTec]

صحيح انا سألت على الاسبراتير الالكترونى بتاع الاكسل وطلع بـ450 جنيه
الكلام ده فى اسكندرية طبعاً

[ehabouf]

التابلوه الي عند مكي حالته زي الزفت
الموتور اعمله عمرة احسن - انت ممكن تحط بساتم الإكسيل الأستاندرد 1300 او 1500 - ماتتخضش الموتور واحد بنفس البلوك من اول 1100 لغاية 1600 - انا الخراط فضل يقاوح معايا انه ماينفعش وفي الآخر طلع كلامي انا هو الي صح و العمرة بفالها معايا 3 سنين
الإسبراتير غالي قوي - انا كنت جايبه من بورسعيد بدون المشط ب 100 جنيه والمشط جديد ب 200

[HossamTec]

بالنسبة للتابلو فعلاً عند مكى حالته سيئة جداً
وفعلاً انا خارط الماتور 060 يعنى اخر خرطة للاسف والعمرة بقالها معايا 5 سنين
وللاسف مفيش تابلو فى بورسعيد

[ehabouf]

مش آخر خرطة والا حاجة
الموتور الي عندك 4G11 مقاس السلندر 69.5*82 مم - البلوك بتاعته هي نفسها بتاعة كل جيل مواتير الأوريون
كل الي حاتعمله انك حاتتوكل على الله وتحل الموتور وخلي الخراط يقيسلك فتحة السليندر الحالية وبعدين حاتقارن المقاسات هنا
Mitsubishi Orion engine - Wikipedia, the free encyclopedia
وساعتخا اما تجيب البساتم الستاندرد بتاعة الأكسيل 1300 (4G13) او الأكسيل 1500 (4G15) وان كان الأرجح انك حاتحتاج ال 1300 وبعد العمرة دي يبقى لسه قدامك خرط تاني من اول 010 لغاية 060
زي ماقولتلك ماتخليش الخراط يرغي معاك كتير
على فكرة لازم تغير وش السلندر لأن في الحالة دي حاتحول الموتور من 1100 ل 1300 ووش السلندر الحالي مش حايستحمل