عملت حاجة غبية

[dr_abooody]

النهاردة بشوف الزيت في عربيتي ال 128 لقيتة ناقص شوية
روحت مطلع جركن الشل من الشنطة و مزود العربية زيت
روحت حطيت الجركن في الشنطة و بعد كدا روحت قافل الكبوت و نسيت اقفل غطا الزيت :(

المهم روحت راجع على البيت مشوار حوالي 10 كيلو كدا و اول ما نزلت من العربية لقيتها ضاربة زيت و مبهدلة الجراج و لحوست نفسها

المهم اعدت ادور على الغطا لحد ما لقيتة و اقع في حتة صعبة و روحت مادد ايدي و جايبة بالعافية و حطيتة

شوفت مقياس الزيت لقيتة ناقص شوية مش مشكلة هروح ازودة

دلوقتي المشكلة ان الزيت مبهدل الكبوت و سايح في كل مكان و على طقم الكهربا
هل دة كدا مش كويس على العربية و لا اروح اديها غسلة و لا مش مهم

[BLACKVERNA]

الحمد لله انها جت على قد كده
و مسخنتش منك

انا رأى انك تروح تغسلها غسلة حلوة علشان الزيت ميأثرش على الكاوتشات و البلاستيكات

و انتظر رأى باقى الاعضاء

[shoudy2005]

طبعآ مفروض تغسلها علشان زيت المحرك بينشف الكاوتش و البلاستيك عكس زيت الباكم

[MoToRiZeR]

كان فيه عضو هنا حصلوا نفس الموقف في سيراتو زيرو و التوكيل نضفلوا مكان الزيت و غسلوا الموتور بالفوم .. فا ممكن تعمل كدة

[waled369]

لازم تغسلها غسلة محترمة بس خليلي اللي يغسلها ياخد باله ميجبش ميه على توصيلات الكهرباء و بعد الغسيل تتنفخ هوا كويس

[Akram]

يفضل انك تغسل الموتور في البنزينة غسله محترمة ,
و لو عايز غسلة متكلفش كتير يبقى بالجاز , و لو غسلة تمام يبقى بالفوم و طبعاً الناس في البنزينة بتبقى عارفة موضوع تغطية الاسبراتير علشان متجيش عليه مياه ,
و لو حصل و جت مياة عليه العربية مش هتدور الا لما المياة تجف و لو ده حصل بينفخوا في الاسبراتير بالهواء علشان ينشف بسرعة ..

[amir]

يفضل انك تغسل الموتور في البنزينة غسله محترمة ,
و لو عايز غسلة متكلفش كتير يبقى بالجاز , و لو غسلة تمام يبقى بالفوم و طبعاً الناس في البنزينة بتبقى عارفة موضوع تغطية الاسبراتير علشان متجيش عليه مياه ,
و لو حصل و جت مياة عليه العربية مش هتدور الا لما المياة تجف و لو ده حصل بينفخوا في الاسبراتير بالهواء علشان ينشف بسرعة ..

بالظبط كده و متقلقش الموضوع بسيط ان شاء الله بس تبقي خد بالك من حاجه زي كده علشان الزيت اللي ممكن يكون وقع منك في الشارع ممكن يتسبب في كوارث
و ربنا يحفظنا جميعا

[dr_abooody]

شكراا يا جماعة على الردود الجميلة
و كل عام و انتم بخير