تعديل فى دورة التبريد للاسكودا فليشيا لحل مشكلة السخونة بالصور

[MOHAMED ABD EL SHAFY]

الاخوة الاعزاء

تعديل فى دورة التبريد للاسكودا فليشيا لحل مشكلة السخونة بالصور هنا فى الرابط الاتى

http://www.nilemotors.net/Nile/showthread.php?p=447879&posted=1#post447879

[al_ostaz74]

الحل النهائي لسخونة فليشيا

السلام عليكم و رحمة الله و بركاته.

مبدأياً أحب أوضح ان العربية الفليشيا على قد ما هي عربية متينة و موزونة على الأرض و حمالة أسية ، إلا إني فعلاً كنت خلاص قرفت منها على الأخر و ناوي أبيعها بأي ثمن عشان أريح أعصابي. و سبب البيع طبعا العيب القاتل اللي في العربية ... ألا و هو السخونة !!!!! نار بجد !!!! فعلا عيب قاتل و تغور العربية بسببه ، ما الواحد مش لاقي فلوسه كل شوية جوان وش سلندر ، نص عمرة ، الخ ...

هاتسألوني ازاي اتغلبت على المشكلة دي ، هأقولوكم اني بفضل الله من خلال البحث في هذا المنتدى و من خلال سؤال أهل الخير ، وصلت لحل المشكلة و هي كالتالي:
أولاً:عمرة كاملة للموتور ودي نص الحل ، و قصدي بعمرة كاملة بمعنى الكلمة مش تقوللي نص عمرة. و الله يا اخواننا أنا كلفت نص عمرة ب 2200 و العمرة في منطقة ريفية في بلد اسمها أشمون عملت 2200 بردوا يبقى وفر فلوسك و اعملها كاملة ، ميكانيكية القاهرة للأسف بلاعة فلوس و مش شاطرين قوي و ياريت شغلهم نفع في النص عمرة. و العمرة اللي عملتها كالتالي:
1. شراء وش سلندر استيراد أو خلع المهم يكون حالته كويسة "يعني لو الوش عندك محتاج قشط و مفقع يبقى أرميه أحسنلك و جيب واحد بحالة أحسن" ، و الوش تعرفه كويس ازاي ، تكون لحمية تخينة و باين عليه ما أتقشطش و مش مفقع "يعني ليس به ثقوب او نقرات"
2. طقم جوانات كامل صيني بجلب الصباب 120 ج
3. جوان وش سلندر أصلي محمل 50 ج
4. طقم صباب فرنساوي 175 ج
5. طقم شميز بالباساتم بالشنبر تركي 600 ج
6. أي حاجة تانية الميكانيكي محتاجها + شغل الخراطة الخ
ثانياً: الرادياتير :
هاتودي الرادياتير بتاعك الألمونيوم لأي بتاع رادياتير نحاس عشان يصنعلك واحد بنفس الحجم بس 3 ماسورة و ده للأسباب الأتية :
a) الرادياتير النحاس لو اتخرم سهل تصليحه ، مش زي الألمونيون هاترميه.
b) النحاس بيسخن ببطء و هاايبرد أحسن
c) هاتعمل الرادياتير 3 ماسورة مش 2 زي الألمونيوم و ده طبعاً هايكون أفضل للتبريد
d) هاتعمل قواعد للمروحة الأصلية بحيس تكون على جنب قوي و تفضي مساحة لمروحة تانية تتركب جنبها
e) هاتشتري مروحة أرجنتا هي صغيرة بس شديدة و هاتعمل قواعد على الرادياتير جنب المروحة الأصلية بحيث المروحتين هايجو بالظبط على قد الرادياتير
f) هاتخللي بتاع الرادياتير يعملك مكان ثرموستات اضافية في الجنب المعاكس للوضع الطبيعي للقرموستات الأصليه و دي أهم حاجة و بدونها يبقى مالوش لازمة لكل الشغل اللي عملناه و ماتسمعش للفتوي بتاعت الميكانيكا و لا بتاع الرادياتير يقولك ازاي ده الفابريكة هنا يبقى ازاي نعمل واحدة تانية. المهم بعد ما تعمل واحدة تانية زي ما قولتلك هاتركب في الجانبين ثرموستات منخفضة يعني 68 – 80 ، حد يسألني ليه بنعمل الثرموستات التانية أرد و أقوله لأنك لو فكرت في مكان الأولى هاتلاقيها محطوطة بعد دورة التبريد في الرادياتير يعني بتقرى المية بعد تبريده من الرادياتير و بالتالي مهما كان ترموستات منخفضة هاتقرى متأخر قوي بدليل لو حطيت الترموستات الواطية في الرادياتير العادي هاتلاقيها بتشغل المروحة و الأمبير في لوحة العدادات بيقرى 85 يعني مأخر تقريبا 25 درجة.أما الترموستات التانية هاتقرى المية و هي خارجة سخنة من الموتور للرادياتير و هاتشغل ساعتها المراوح و هي على 75 درجة تقريبا لحد ماتبرد الرادياتير و عند 68 هاتفصل المراوح.

ثالثاً: شغل الكهرباء :
a) هاتخللي الكهربائي يعملك كتاوت للمروحتين عشان يستحملوا و حماية ، و هاتخليه طبعا يوصل الكهربا بالاثنين فلو واحد عطل التاني يشتغل
b) هاتعمل مفتاح داخلي زيادة أمان لاماكانية تشغيل المراوح يدوياً و انت داخل العربية و يتم توصيل لمبة مع الدائرة بجوار المفتاح بحيث تضيء في حالة ان المراوح شغالة و تطفيء في حالة توقف المراوح وده هايطمنك أكثر أن المراوح شغالة أو لا. و المفتاح تخللي الكهربائي يخليه تحت بجوار مقبض رفع الكبوت بجوار كرسي السائق ، يعني مش هايبان خالص و مش هايشوه منظر التابلوه من الداخل.
و انت ماشي هاتلاقي العربية كبيرها توصل 75 أو 78 و تبدء المروحتين يشتغلوا و التبريد خلال 3 دقائق بس ، حتى لو ماشي بسرعة عالية أو واقف في الزحمة ، و ابقى ادعي لي.
و الله الموفق ،،،،

[ahmed_h_g]

شكرا" عالأفادة
بارك الله فيكم