سخونية الفيرنا بالتكييف و العربية واقفة بس

[dipole_moment]

السلام عليكم و رحمة الله و بركاته
انا عندى فيرنا 2008 ماشية 211000 كيلو
بتسخن مع التكييف و العربية واقفة بس انما لو اتحركت بيها بتبقى زى الفل
السخونية بتظهر بعد 30 دقيقة تقريبا من المشى بالعربية بمجرد انى اوقف العربية انزل حد مثلا الاقى الحرارة رفعت انما لو طفيت التكييف شوية لحد ما اجرى بالعربية و شغلته تانى الاقيها بقت زى الفل

علشان تبقوا معايا فى الصورة
انا هقول لحضراتكم على الاجزاء اللى غيرتها فى العربية و لسه العيب موجود لحد دلوقتى

الرادياتير - غطاء الرادياتير جبته من التوكيل - طلمبة المياه - لغيت الترموستات - ركبت وصلة أرضى خارجية للعربية - المراوح شغالة تمام على حسب كلام الكهربائى - مفيش تسريب فى دورة المياه من خراطيم و خلافه حسب كلام الميكانيكى و الله اعلم .

طبعا العربية من غير تكييف زى الفل

فيه كذا حاجة كده بتحصل يمكن تفيدنا فى الوصل للحل:

فيه رائحة عادم جوا العربية مع التكييف بالرغم انى قافل الهواء اللى جاى من بره و كمان مركب فلتر هواء.
الرادياتير بيحتاج يتزود بعد كل مشوار طويل و خصوصا لو حصل موضوع السخونية ده على الرغم من انه جديد و الغطاء كمان زى ما قولت لحضراتكم قبل كده.

الصراحة أنا كرهت العربية و عاوز ابيعها و طبعا حرام انى ابيعها لحد و فيها العيب ده .
فيا ريت لو حد عنده حل يقوللى لانى بجد صرفت كتير و مخنوق جدااا

[dipole_moment]

انا روحت للميكانيكى النهارده
لان العربية كانت متلته اوى و انا مسافر بيها حتى من غير تكييف
قاللى انها جابت جوان وش السلندر
و هى بتتحل عنده دلوقتى
و كمان لقينا ان كوع المياه فيه دوبان جامد اوى و فتحة كبيرة من الدوبان اللى فيه
ان شاء الله هستلم العربية بكره و هقوللكم على اللى هيحصل بإذن الله تعالى

[dipole_moment]

الحمد لله تعالى العربية بقت تمام بعد ما غيرت جوان وش السلندر و غيرت كوعة المياه
الصراحة انا مش عارف التحسن فى الحالة ده نتج من تغيير مين فيهم بس أهم حاجة انها بقت كويسة بفضل الله تعالى.
الغريب ان كوعة المياه دى بصينا عليها من فترة كانت كويسة بس للاسف كانت عاملة زى المصفاه و احنا مش واخدين بالنا و بمجرد الخبط عليها ظهر فيها فتحات كبيره تقريبا هى دى اللى كانت عاملة التسريب
حتة بقا ان السخونية كانت مع التكييف و العربية واقفة ليها عندى تفسير واحد :
انا اما كنت ببقا لسه مزود المياه كانت العربية بتبقا تمام و حتى لو مشغل التكييف و العربية واقفة لمدة ساعة و انا جربتها بنفسى .... انما لو سافرت بيها مسافة 30 كيلو هو ده اقصى مسافة للسفر عندى بلاقيها سخنت مع التكييف اول ما أقف بيها و لو استنيت عليها لحد ما تبرد و كشفت على المياه بلاقيها ناقصة كتير و المياه كلها بتروح لقربة المياه و مبتردش تانى فى الريداتير
تفسيرى الوحيد ان المشكلة كانت من الغطاء ( غيرته من التوكيل ب 55 جنيه ) و ثانيا من الكوعة اللى كانت بتسرب بالراحة من الفتحات الضيقة اللى كانت عاملة زى فتحات الاسفنجة و احنا مش شايفينها.

[samykhafagy201]

مشكور على عرض الحل بعد المشكله
واحمد ربنا انها اتحلت بالجمال ده
وربنا يجازيك خير

[د.محمود صلاح]

بمجرد اكتشاف السخونة كان المفروض ما تتحركش بيها الا لما تكتشف العطل فين

والحمد لله جت على كده

[dipole_moment]

مشكور على عرض الحل بعد المشكله
واحمد ربنا انها اتحلت بالجمال ده
وربنا يجازيك خير

تحت أمرك
انا قولت انقل التجربة كامله و النتيجة بعد تجربة العربية مشاوير طويلة علشان لو حد وقع فى نفس الموقف ميصرفش كتير زى ما انا صرفت لانى غيرت كل حاجة ليها علاقة بالسخونية من ريداتير و خراطيم و كل حاجة فى اى حاجة و طلع فى الاخر العيب بسيط
عموما الحمد لله تعالى انها جت على قد كده

[dipole_moment]

بمجرد اكتشاف السخونة كان المفروض ما تتحركش بيها الا لما تكتشف العطل فين

والحمد لله جت على كده

المشكلة يا دكتور ان محدش فعلا كان عارف هى بتسخن ليه
و عرضت العربية على اكتر من 5 صنايعيه
كل واحد بيفتى فى اتجاه
فانا اما كانت تسخن منى بتسخن و هى واقفة و بمجرد ما اتحرك الحرارة تظبط و تبقى زى الفل
لو وقفت تانى تسخن فكنت اما احس انى هركن شوية كنت ببطل العربية و انا كنت باستخدمها بس علشان اعرف العيب فين
و الحمد لله انها جت على قد كده