مشكله فتيس هيونداى ix 35 موديل 2015

[kingalaa]

بعد التحيه
سياره لصديقى هيونداى ix 35 موديل 2015 الفئه الثالثه عامله 1800 كيلو بعد التلين حتى 1000 كيلو كان ملتزم ان السرعه لا تزيد عن 100 ك/س وعمل صيانه الالف وغير زيت وعند السفر العربيه مبتنقلش للغيار السادس اخرها الخامس (130 ك/س) وبعدين صوت الماتور يعلى تلقط السادس وتنزل تانى والامبير يعلى ومش عايزه تاخد السادس خالص ؟؟ ارجو النصيحه من الخبراء

[yasser100]

ما فيش نصايح . توكيل على طول و تغيير سوفت وير للفتيس .

[kingalaa]

راح الوكيل فى ابو رواش وقالولوا العربيه سليمه......وراح توكيل اسيوط جربوها والكمبيوتر طلع خطا فى الفتيس ولكن معرفوش يحلوا الموضوع ورفضوا يدلوا اي اوراق تقول ان فيه مشكله فى الفتيس بالرغم من انهم جربوها وشافوا العيب بنفسهم وهو بيحاول معاهم.....انا عايز اعرف المشكله ممكن تكون ايه ولو فيه حد يقدر يصلحها العربيه زيرو والوكيل نصاب

[hany121]

هوه ده غبور .. عاديتهم ولا هيشتروها؟؟؟

للاسف ما فيش قدامه غير قلة الأدب.. لما يتأكدوا انه فيه مشكله ومايرضوش يدوله ورقه بكده كان لازم اتصل بالنجده وهو هناك وعملهم محضر اثبات حاله.. دلوقت الحل انه يروح التوكيل ويخليهم يجربوا العربيه ويقولهم ان توكيل اسيوط اتاكد من وجود المشكلة وما يخرجش الا وهم حالين الموضوع او يروح حماية المستهلك ويطول باله لانهم هيمشوروه كتير بينهم وبين غبور علشان كده لازم يكون باله طويل ولو وصل في النهايه ان حماية المستهلك عرضت العربيه علي لجنه كلية الهندسه واتاكد ان فيه عيب في العربيه وغبور ما عرفش يصلحوا هيبقي فاضله خطوتين .. اما غبور يغير الفتيس او هو يرفع قضيه علي غبور ...

للمره الالف بقولها.. الناس وهي بتشتري لازم لازم تفكر في التوكيل وسمعته وامانته قبل ما تفكر في العربيه .. لو الموضوع صيانات واسعارها واسعار قطع غيار كان بقي هين لكن المشكله لو فيه عيب خطير في العربيه يستوجب تغيير فتيس او موتور او حتي العربيه كلها هتعمل ايه لو كان التوكيل غير امين وغير محترم في معاملاته...

من فتره مش كبيره كان ومازال فيه مقوله للاعضاء الكرام بتقول "تغور من وش غبور او منصور" والحقيقه هم الاتنين ما يتخيروش عن بعض...

مستني ايه من توكيل زي غبور اخترع صيانات كل خمسة الاف (بفلوس مع ان توكيل كيا بيعملها مجانا) بين الصيانات المتعارف عليها ( 5000 و 15000 و 25000 و 35000 الخ) ويقولك لو ما عملتش الصيانات ده تخرج من الضمان ولما تساله بتعمل ايه في الصيانات ده وهل بتغير فيها حاجه ( زيت او فلاتر او مياه تبريد مثلا ) يقولك لأ بنشيك علي العفشه والسوائل؟؟؟!!! تبقي رايحله بتشتكي من طنابير فيها عيب صناعه يقولك يتغيروا علي حسابك علشان انت ما عملتش صيانة الخمسات !!! قال يعني لو كنت عملت صيانة الخمسات الطنابير ما كانتش هتبوظ!!!! شفت قلة ادب اكتر من كده؟؟؟

بيتهرب من تغيير قطعة غيار تافهه بالنسباله في الوقت اللي توكيل رينو اللي هو نفس توكيل كيا خير احد الزملاء بالمنتدي كان اشتري فلوانس وطلع فيها مشكله انهم يغيرولوا العربيه او يرودوا له فلوسه ولما اختار ياخد فلوسه ادوهاله بالرغم انهم لو كانوا اكتفوا بتغيير العربيه كان هيبقي عملوا اللي عليهم وزياده وكانوا هيبقوا كسبانين ان العميل ما يخرجش براهم...