سخونية وغليان قربة المياة

[alimohammed]

سلام عليكم

انا جديد في امتلاك سيارة

جبت من شهرين جيلي متغير ليها ماتور شاريد

بالظبط مشيت بيها من القاهرة حوالي 100كم ساعتها وبعدين مشاوير خفيفة 20كم بس او اقل والحمد لله كانت زي الفل

النهاردة كنت جاي القاهرة ,, حطيت مياه في القربة (هي عندي من غير غطا ) زودتها تقريبا للآخر ,, مشيت تمام حوالي 80كموطول الطريق مؤشر الحرارة تحت النص بشرطة لغاية شبرا الخيمة لقيت المؤشر طلع للنص وشوية بدأ يعدي رحت راكن وفاتح الكبوت لقيت المياة بتغلي في القربة وتنزل تحت ,, سبتها شوية تهدي وفتحت الريداتير لقيت المياة مفيش خالص طفيت الماتور وفضلت ازود مياة وبقيت متابع تحت العربة فمفيش مية نزلت من تحت الريداتير وسبتها تهدي شوية وزودت مياة في القربة تاني ودورت لقيت االمؤشر بقي ربع الحرارة دورت ومشيت حوالي 20كم المهم في 20 دول وقفت حوالي كمان مرتين تسخن فوق التص اقف تهدي شوية وازود مياة في ريداتير والقربة وامشي لغاية اما وصلت دلوقتي مش عارف اوديها لمين ميكانيكي ولا ريداتير

[tasaka]

حطيت مياه في القربة (هي عندي من غير غطا )

هو فى قربه فى الدنيا كلها من غير غطا ؟؟

روح لميكانيكى علشان يتأكد ان محصلش سخونه زياده للموتور

و لازم يراجع على دوره التبريد كلها و لازم تركب غطا للقربه طبعا



و بعد التأكد ان الموتور سليم و الدوره مفيش فيها عيوب ظاهره .. يبقى تعبى ميه و لازم لازم تأخذ الهوا من دوره التبريد ..

اخذ الهوا هو انك بتعبى الميه .. و تدور العربيه لغايه المروحه ما تشتغل .. و تزود الميه الناقصه .. و طبعا تقفل غطا القربه .. و بعد يومين او ثلاثه مشى تبقى تراجع على منسوب الميه تانى و تزود الناقص



بعد المشى بالعربيه لفتره و كل شيئ اصبح طبيعى بدون مشاكل .. يبقى لو انت كنت بتستعمل ميه حنفيه تبقى تغيرها لميه موبيل ( الخضرا \ الزرقاء .. هو لون اخضر مزرق ) و تعيد نفس الخطوات

لو الموتور سليم و لم يتأثر .. و لسه فيه سخونه يبقى روح لبتاع راديتير يراجع لك على الدوره

[ahmed.biso13]

غطاء القربة ناقص لكى تكتمل الدورة هو ما ادى الى سخونة السيارة وتفريغ المياه

[tasaka]

حطيت مياه في القربة (هي عندي من غير غطا ) زودتها تقريبا للآخر

القربه فيها علامتين .. واحده لاقل منسوب .. و الثانيه لاعلى منسوب

ما تزودش القربه اعلى من علامه اعلى منسوب .. ده حمل على طلمبه الميه و ايضا لا يسمح بمكان لرجوع الفايظ

مراجعه منسوب الميه يتم و السياره بارده .. يعنى الصبح قبل تدوير السياره .. او فى حاله الضروره بعد ما تبطل بنصف ساعه او ساعه مثلا

التزويد لا يتم و الموتور سخن .. لازم الموتور يبرد الاول نسبيا و بعدين تدور العربيه و تزود

[tameem2010]

انت قلتها قربة من غير غطا
عاوز ايه تاني
كويس ان العربية لسه بتدور بعد كل ده

[133 lover]

روح لحد بتاع ردياتير يعملك تسليك لأن كده شكل دورة مياة تبريد السيارة مسدودة و راجع او خللى حد يراجعلك على الوصلات و كل ما يخص دورة تبريد مياة السيارة و ابقى حط مياه مقطرة و معاها مياه خضراء علبة كانز أمريكى حتلاقيها عند محلات اللى بتبيع قطع غيار السيارات و مش غالية بكتيرها حتعمل 20 أو 25 جنيه .