برجاء الاجابة على سؤالى وعدم الاكتفاء بالمشاهدة فقط

[sherif_84]

عربيتى الشاهين كل ما يركب معايا حد ورا او الشنطة تكون مليانة أسمع صوت رزع وهبط وطقطقة من العفشة اللى ورا او صوت حاجة بتتكسر والاصوات دى بتظهر لما بامشى فى شوارع مش متسفلتة كويسة ( وما اكثرها فى مصر ) او لما بانزل من على مطب بسرعة عادية لازم انزل براحة جدا جدا عشان ما اسمعش الصوت وكل اللى بيركب معايا بيقولى على الصوت وانا معرفش اجاوب لانى مش عارف ده صوت ايه ؟؟
انما العربية لما تكون فاضية الصوت مابيظهرش
ياترى ده صوت ايه ( مساعد ولا سوستة ولا من المحور الخلفى عموما ) وياريت ياجماعة لو اى واحد دخل الموضوع ويعرف بتاع عفشة كويس وأمين يقولى عليه وأكون شاكر لكم جميعا
وكل سنة وانتم طيبين

[mrghost]

السلام عليكم ورحمة الله وبركاته
بص حضرتك الحكايه دى ماينفعش نجاوبك عليها لانه ممكن تكون بسبب اى حاجه من اللى انت ذكرتها وبالتالى لازم تروح لبتاع عفشه وهو اللى يحدد
وفى بتوع عفشه كتير عند حديقة بدر ممكن تروح لاى واحد وهو اللى يحدد

[ibrahimsaad]

لازم العفشجى يكشف على المساعدين والمقصات ويتأكد انهم سلام

[amreldieb]

بص كده على الشكمان ... ممكن تكون الكاوتشة بتاعتة عاوزة تتغير .... تجربة بسيطة اوي ... جرب هز الشكمان بايدك لو سمعت نفس الصوت يبقى الشكمان بيخبط في تنك البنزين او الشاسيه ... روح لواحد بتاع شكمنات يظبطهولك ... وبرده بص على العفشة زي الاخوة ماقالوا

[احمد عز]

ممكن يكون فى حاجه فى المساعدين

[samirayad]

عربيتى الشاهين كل ما يركب معايا حد ورا او الشنطة تكون مليانة أسمع صوت رزع وهبط وطقطقة من العفشة اللى ورا او صوت حاجة بتتكسر والاصوات دى بتظهر لما بامشى فى شوارع مش متسفلتة كويسة ( وما اكثرها فى مصر ) او لما بانزل من على مطب بسرعة عادية لازم انزل براحة جدا جدا عشان ما اسمعش الصوت وكل اللى بيركب معايا بيقولى على الصوت وانا معرفش اجاوب لانى مش عارف ده صوت ايه ؟؟
انما العربية لما تكون فاضية الصوت مابيظهرش
ياترى ده صوت ايه ( مساعد ولا سوستة ولا من المحور الخلفى عموما ) وياريت ياجماعة لو اى واحد دخل الموضوع ويعرف بتاع عفشة كويس وأمين يقولى عليه وأكون شاكر لكم جميعا
وكل سنة وانتم طيبين

تقريبا كدة من كلام حضرتك....مرونة اليايات الخلفية زادت عن الحد(بقت مهلبية)......وبالتالى حينما يكون هناك أشخاص وأحمال بالشنطة بتسمع الخبطة والصوت الوارد بالموضوع وفى هذة الحالة لابد من تغيير اليايات الخلفية.......وعموما ياأخى يمكنك عمل الاختبار البسيط الاّتى.........حمل السيارة من الخلف بأقصى حمولة ممكنة....بعد ذلك قم بملاحظة وضع حلقات اليايات الخلفية....لو كان الخلوص بين الحلقات قليل بدرجة ملحوظة...أى أن الحلقات على وشك التلامس.....فى هذة الحالة لابد من تغيير اليايات لمنع الصوت الوارد بالموضوع

[ahmed1981]

لازم عفشجي
حدد المنطقة التي مناسب تروحها لعفشجي عشان الشباب يدلوك

[أبومعاذ]

شريف باشا كل عام وانت بخير
عندي واحد بتاع عفشة ناحية قسم الحدايق وواحد في عين شمس الاتنين ممتازين بس اعتقد اللي ناحية قسم الحدايق اقربلك
اسمه عمرو وموبايله 0103132156
قوله من طرف محمد عيسى

[sherif_84]

ياشباب بجد مش عارف أشكركم ازاى ربنا يخليكم وجزاكم الله خيرا على المعلومات اللى قدمتوها وعموما كده يبقى لازم أروح لعفشجى احسن وهو يكشف على المحور الخلفى كله عشان بس انا عايز اعرف الصوت منين عشان أرتاح لان لما بيكون فى صوت فى العربية الواحد بيتضايق
بالنسبة للاستاذ أحمد 1981 انا افضل لو فى المناطق القريبة من الزيتون
الاستاذ محمد عيسى شكرا على الافادة بس فين هو قسم الحدايق ؟

[ahmed1981]

بالنسبة للاستاذ أحمد 1981 انا افضل لو فى المناطق القريبة من الزيتون ؟

كويس جداً
سأصف لك واحد في المطرية
من ميدان المطرية تدخل يمين في طريق السوق والجامع على شمالك بإتجاه محطة التعاون
بعد محطة بنزين التعاون هتدخل يمين في أول شارع رئيسي يقابلك
هتفضل ماشي لغاية لما تلاقي على يمينك جامع كبير دورين وقدامه تنده
مقابل للجامع من الناحية الثانية شارع على ناصيته واحد بتاع سيراميك تدخل فيه
أول تقاطع هيقابلك في هذا الشارع هتلاقي على ناصيته عبودة بتاع العفشة
ولو معرفتوش إسأل أي حد على عبودة بتاع العفشة
المهم هتلاقي ورشة كبيرة فوقها تنده
تسألهم على الأسطى عبودة وهو اللي يجرب العربية
وإبقى قل لنا الأخبار