مية بسكر

[SAMER_ENGINES]

قلتلكم قبل كدة اني عندي ورشة فرامل و دبرياج انا و واحد صاحبي..
المهم اني كذا عربية جت بشكوي عدم وجود فرامل تماما تقريبا و ده طبعا ليه أكتر من سبب بس في الفترة الاخيرة حصل اني العربيات دي لما فتحنا خزنة الفرامل فيها لقينا طبعا زيت باكم بس فريد من نوعه و هو عبارة عن ايه؟؟؟؟؟!!!!!!!!!

ايووووووووة

فعلا

مياه + سكر

مية من الحنفية اللي احنا بنشربها دي و سكر من اللي بنحطه علي الشاي بعد الغدا ساعة العصاري كدة.

ايوة انا مش بهرج يا جماعة و لا عامل موضوع دمه خفيف و لا اعلان و الدليل اني مش كاتب عنواننا او اي شئ يخصنا او يخص ورشتنا بس ده بجد حصل و في اكتر من عربية و ده للتحذير بس و بجد من خوفي عليكم مش اكتر.
انا نفسي طلعت جربت 128 و هي بتاعة واحد صاحبنا كمان و انا لما صاحبي ده بيقولي العربية مفيهاش فرامل خالص قلت اكيد بيهرج او بيبالغ عشان نشتغل له في العربية و هو دايما بيهرج معانا كدة فقال لي خد المفتاح يا عم و اطلع جرب و طلعت و شبعت اولاني و بدوس فرامل وملقتش فرامل تحت رجليا و كنت قبل مطب المهم دوست الفرامل دوبل و شديت الهاند سنتين و دي حاجة عادية بالنسبة لي و متعود عليها من كتر ما عملتها بس اول مرة اعملها مع المية بسكر المهم لميتها و رجعت الورشة و كشفنا لقينا نفس الحكاية العربية فيها المية ام سكر بس تقريبا المية بسكر مقدرتش تفوق الفرامل و للعلم زميلي تذوق المية دي فعلا و ده موضوع تحذيري مش اكتر و كل واحد يخلي باله قبل ما يزود الفرامل و بصراحة من ساعة الحكاية دي و تقريبا حد بلغ التموين و التموين شغال عندنا علي ودنه.
و ده يبين اد ايه الإنسان المصري بقي رخيص و الغش وصل لحد ارواح الناس و اللعب في الفرامل للاسف يعني لو عايز تبيع حاجة مغشوشة بيع كاسيت بايظ بيع لمبات بايظة اي حاجة لكن كله الا الفرامل دي ارواح يا ناس حرام عليكم.
و ربنا يسترها معانا يارب و محدش فينا يدوس ميلاقيش فرامل تحت رجليه لانه احساس رهيب.

[zalpany2000]

طيب انا عندي سؤال صغنن قد كدددددده
ايه لزمة السكر
ده السكر غالي يعني
و ليه مش ملح مثلا ؟؟؟
تحياتي

[KoDaK_Gti]

انا اول لما جبت النوبيرا كان زيت الباكم ناقص فيها
وواحد ميكانيكى ابن حلال قالى هزودهولك وبعت جاب علبه ام 5 جنيه الصفرة دى وحطها
وبعد 3 ساعات مفيش ولا دبرياج ولا فرامل الله يخرب بيته وخليته يندم انه اشتغل فى عربيتى
وكلقنى 500 جنيه ماستر فرامل جديد وطقم اصلاح دبرياج وعلبتين زيت باكم موبيل

[youssefmustang]

لا وحول ولا قوة الا بالله العلى العظيم
مصر باظت انهارت تدمرت خربت حسبى الله ونعم الوكيل فى كل ظالم
اخوكم يوسف

[أبومعاذ]

الكلام دا مش واقعي لأن السكر فعلا غالي وبعدين ازاي عرفت انها مية بسكر؟
عادة الصنايعي بيحط كل التكاليف من زيت او غيره على صاحب العربية دا غير مصنعيته يبقى ايه اللي يخلي الصنايعي يحط مية بسكر ولا مية طرشي ما هو كدا كدا مش دافع من جيبه

[ahmedsrs]

اشترى زيت الباكم الى فى علبة صفيح العلب البلاستك مغشوشة

[A.Saad]

يعنى ايه دوست فرامل دوب يا استاذ car lover

[samirayad]

عامة الموضوع غريب فالفعل.......ولسة ياماحنشوف......وشكرا للأخ صاحب التحذير....

[SAMER_ENGINES]

الكلام دا مش واقعي لأن السكر فعلا غالي وبعدين ازاي عرفت انها مية بسكر؟
عادة الصنايعي بيحط كل التكاليف من زيت او غيره على صاحب العربية دا غير مصنعيته يبقى ايه اللي يخلي الصنايعي يحط مية بسكر ولا مية طرشي ما هو كدا كدا مش دافع من جيبه

مبدئياً حضرتك قبل ما تقول كلام مش واقعي شرفنا و انا اعملك منه كباية شاي
و عن موضوع السكر غالي!!
اكيد السكر مش حيكون غالي زي سائل الفرامل لما تحط منه شوية صغيرة علي كل ازازة و هي الازازة البلاستيك الفوكس و لا غيرها حجمها اد ايه كلها؟؟

اما ازاي عرفت انها مية بسكر؟؟
لو كنت حضرتك قريت الموضوع كويس قبل ما تهاجم كنت عرفت اننا تذوقنا السائل ده و معتقدش اني ده شئ غريب لاني الصنايعية بالذات بيسحبوا بنزين من التنك فمفيش مشكلة لو داق من السائل ده نقطة علي طرف لسانه و تفها تاني.

و بعدين السكر أيه لزمته للناس اللي بتسأل؟؟
لزمته حاجتين أولاً بيدي قوام للمية, و ثانياً لون.

و طبعا زيت الباكم لانه و لمعلومات حضرتك مش زيت اصلا هو سائل الفرامل فقوامه مش زي زيت الموتور او زيت الباور مثلا لا قوامه اخف بكتير لانه مش زيت بالمعني المفهوم هي مجرد حاجة او اسم طلعوه الصنايعية عليه و دي نقطة هامة حبني عليها بقية كلامي.

وعشان كدة السائل ده بيبقي تقيل بدرجة بسيطة اوي بس مش نفس التقل بتاع بقية الزيوت إطلاقاً فالسكر بيديه القوام المظبوط ده بالنسبة للقوام.
و لاني السكر اللي في بلدك تلت ارباعه لونه بيج مش زي السكر الابيض اللي البني ادمين برة بيستخدموه فبيعطي للمية اللون المطلوب و عمر الملح طبعا ما حيعطي نفس اللون و القوام لاني الملح اصلا ابيض اللون مش غامق و عمرنا ما سمعنا عن ملح غامق او لونه مش ابيض لانه بللورات جاية من البحار و المحيطات و مش بيستخرج زي السكر من البنجر او القصب او ليه مليون مصدر زي السكر دي نقطة اللون.

نقطة كمان انا مجبتش سيرة اي صنايعي انه غشاش او حرامي او اي شئ و اكيد الصنايعي مش بيقفل باب الورشة نص قفلة بالليل و يعد يعبي ازايز سائل فرامل بمية و سكر لا طبعا انا بتكلم علي غش جاي من اللي بيقوموا بعملية تعبئة الزيت من الأصل.

حاجة كمان و هي التكاليف اللي بيحطها الصنايعي علي صاحب العربية, جايز انا او انت او غيرنا ميسورين الحال انا شخصيا بحط بندكس فرنساوي بالنسبة لسائل الفرامل و ثمن الازازة بيوصل لـ 12 جنيه و يمكن اكتر عند بعض الناس و انا راكب لادا مش هقولك حاجة جامدة بس بحافظ علي نفسي و عربيتي اما بقي لما يبقي سواق تاكسي و لا سواق يقولك يا عم حط انشالله تحط زيت اكل حتي مش بيفرق و لا في ماركة و لا اسم كل همه حاجة رخيصة و خلاص و بعد ده كله احيانا يقولك و الله الحالة زي الزفت ممكن تصبر عليا يومين بس في الفلوس و تكون تكلفة الشغل كله 20 جنيه و لا حاجة فمش دايما الناس بتدفع زي ما حضرتك متخيل كدة.

و في الآخر ربنا وحده يعلم اني عامل الموضوع ده بهدف التحذير مش اكتر و مش في نيتي اي شئ لا الإعلان عن نفسي و لا اني اسوأ سمعة غيري بس بحذر الناس و بوريكم صورة للوضع اللي وصلنا له و وصل لحد الاستهانة بأرواح الناس و الجري و راء المكسب بأي طريقة.

[SAMER_ENGINES]

يعنى ايه دوست فرامل دوب يا استاذ car lover

اهلا بيك
و دوست فرامل دوبل يعني مرتين ورا بعض و دي بنعملها لما نطلع نجرب عربية فراملها خفيفة او مغيرة تيل و لسة مطبعتش فبدوس بالطريقة دي عشان انزل الزيت من الخزنة للماستر الرئيسي و منه للمساتر الفرعية و ده بيدي قوة فرملية اكبر.

[magyver]

فعلا والله العظيم الحكاااية دة صح فعلا وحصلت معايا وجربتها ودوقت الزيت بنفسي لقيتة مية بسكرفعلا

[maka]

طاب يا باشمهندس car_lover تنصح با ستخدام زيوت باكم معينة ونبعد عن حاجات معينة

[SAMER_ENGINES]

البندكس هو رقم واحد طبعا هو غالي بس معلش استرخص في اي حاجة الا الفرامل.

احنا شخصيا في الورشة كنا بنجيب فوكس و و بندكس فرنساوي اللي يحب من ده او ده كل واحد حسب راحته و بصراحة الاتنين كانوا كويسين البندكس الافضل بس برضه فوكس كان حلو و مشهور بسمعته الجيدة بس للاسف انضرب حاليا كمان و بقي بيتغش فتحولنا لنوع أخر هو S & Q بس التاجر اللي بناخد منه برضه خوفنا منه فحاليا مفيش عندنا اي زيوت و الزباين بتشتري من برة (للاسف) و ضاع علينا مكسب كبير بالسبب ده لأني الزيوت دي بنعتمد عليها بنسبة كبيرة و منه لله اللي كان السبب, بس فضلنا نكون في السيف سايد زي ما بيقولوا و بدل ما يجي بتاع تموين يبهدلنا و حتي لو مفيش تموين حرام عليا احط لواحد زيت عشان 5 ولا 10 جنيه و اضيعه هو و اللي معاه.
و بطلنا نجيب زيت طول الفتر اللي فاتت حوالي شهر و يمكن اكتر بس بعد كام يوم هجيب بندكس فرنساوي و مش هنشتغل غير فيه الزبون اللي يحب ياخد بندكس اهلا وسهلا و اللي يحب يجيب من برة برضه اهلا وسهلا بس بدون ادني مسؤولية علينا هو يجيب زي ما يحب بس احنا مش مسؤولين عن عدم وجود فرامل او عن اني ماستر يضرب او جلد ماستر او اي شئ.
و الكلام ده علي الاقل لحد ما الحكاية دي تهدي و لو في جديد هقولكم طبعاً.
فأنا شخصيا بنصح ببندكس و بستعمل بندكس في عربيتي و هو علبة صفيح زي ما قال احد الزملاء مش بلاستيك و تكون العلبة مقفولة بالغطاء البلاستيك الأبيض الخارجي و غطاء داخلي بلاستيك ايضا بيتشد زي غطاء كان البيبسي بس بلاستيك.
و انا تحت امركم في اي استفسار ولو في حاجة مش عارفها حسأل زميلي و اقولكم.

[maka]

هو البندكس ده موجود فى اى محطة بنزين اصلى اول مرة اسمع عنه

[ahmed1981]

الغش تطور جامد في مصر
واضح إن المصريين أصبحوا من دول العالم الأول ولكن في الغش

فعلاً لو أحضرنا مياه وأذبنا بها سكر ستصبح ذات قوام ولون مشابه لزيت الفرامل

حسبنا الله ونعم الوكيل
ربنا يجعل كيد الغشاشين في نحورهم

وشكراً على التحذير