إستفسار مهم جدا عن البطارية

[eldeplomasy]

عندي في الشاهين دي رابع بطارية اركبها وتقعد 4 شهور او 6 وتبوظ ومش عارف السبب مع العلم انها بتنقص كل فترة وبروح للراجل يزودهالي ميه مقطرة وبعد التزويد باسبوع او 10 ايام تبوظ

تفتكروا ليه؟؟؟

وانا اعمل ايه؟؟؟ لاني بجد زهقت

وشكرا جزيلا

[lada2010]

روح لكهربائى يقيس الشحن لان كدا الدينامو عندك شحنة مش مضبوط خالص

[eldeplomasy]

بس بعد العربية ما تدور الكهربا بتبقى تمام

عموما شكرا لردك السريع ده

[محمد جلال]

ممكن البطاريات دى تكون متخزنة وبقالها فترة عند محل البطاريات وحصلت معايا جبت بطارية قعدت معايا 8 شهور وبعد كده جبت واحدة من عند واحد معروف فى المجال ده والسحب عليه جامد وبروح له مرة كل شهر يكشف عليها ويزودها مياه مقطرة وشغالة زى الفل وممكن تكون حضرتك بتسيب العربية لفترات طويلة مبتدورهاش البطارية تنام ومع الوقت متشحنش وبرده كان عندى كتاوت الدينامو بيخلى شحن البطارية يوصل لـ 16 وغيرته وده بيقصر عمر البطارية ودى تجربتى وشكراً .

[eldeplomasy]

شكرا لردك بس انا كل يوم بشغل العربية بتاع 1000 مرة ويمكن اكتر وكمان الراجل اللى بروحله عند سحب شوية

طيب في حاجه اكشف عليها ممكن تكون السبب ولا ايه؟؟؟

وايه رايكو في الجافه؟؟؟

[محمد جلال]

الجافة انا كنت جايبها قبل السايلة وبصراحة ركبتها ومبتحتجش اى صيانة قعدت معايا 4 سنين و 9 شهور وشغالة زى الفل وفى احتمال بس بعيد هوالبطارية مقاسها مضبوط مع العربية يعنى 70 امبير ولا اقل وحاجة غريبة موضوع اكثر من بطارية فهل بتاخد وقت فى الدوارة الصبح وهل لو سبتها شوية بعد ما بتبطل العربية متدرش علطول ولا بتدور عادى وشكراً

[kliken]

زى ما الأخ الكريم قالك انا اظن ان الدينامو فيه مشكله لان الموضوع مش طبيعى و صعب تكون كل البطاريات اللى جبتها مضروبه و حاول تشترى البطاريه تكون بضمان على الأقل هيكون سنه

[eldeplomasy]

هي فعلا بضمان سنة وكل شهر بروح يكشفلي عليها بس العربية نازلة ببطارية 50 امبير وضربت ولما رحت اغيرها الراجل قالي هات 70 دي احسن علشان المكيف و و و فجبتها بس الغريب انها كل بتدور كويس جدا جدا وفجأة تقطع واكون لسه راجع من المكتب الساعه مثلا 10 والصبح الساعة 7 الاقيها قطعت وبالنسبة للدينمو لما بتشتغل العربية كل الكهربا والنور بيبقى تمام حتى المكيف بس اللى لاحظته انها بتطلع ميه كتييييييير من الغطيان بتاعتها يعنى بتعرق كتير وكان في خرطوم صغير بيتوصل في البطارية علشان الزيادة ينزل في الشارع ميبهدلش العربية الراجل برده شاله قالي ملوش لزمة

وانا زهقت لان النهرده حصلتلي مشكلة في الشغل بسبب البطارية وخدت تاكسي وسبتها ومن ساعتها وهي واقفه تحت مش عارف اعمل ايه اغير ولا هتبوظ تاني

[محمد جلال]

هو حضرتك بتجيب البطارية من نفس المكان ولا بتغيروايه النوع اللى بتجيبه كلوريد سائلة ولا حاجة تانية
وفى علامة وانت بتزود المياه مبتعلاش عنها مش يزود لغاية العين فوق وازاى بتجيب ميه من الغطيان امال فين فتحة الفايز الاحسن هات جافة بس اتاكد الاول عند كهربائى امين يبص على الدينامو والاسبراتير والموبينة ولو سلام غير بالجافة ( فارتا ) وربنا يوفقك .

[kliken]

لازم تروح لكهربائى يكون جامد و هو هيعرف ان شاء الله الموضوع ايه و يصلحلك العيب

[HeMa_LanCeR]

ياباشا كده شحن الدينامو زياده وده بيخلي البطاريه شحنها يزيد والمياه اللي فيها تفور
واقولك علي حاجه تعملها طول ما انت ماشي شغل النور وسيبه سواء نهار او ليل وانت هتلاقيها اتظبطت معاك
بس ده عيب دينامو
ورجع الخرطوم تاني علشان كده المياه اللي نازله هتبهدل قاعده البطاريه اللي في العربيه

[eldeplomasy]

شكرا للاهتمامكو

وديت العربية دلوقتي قالي انها في حاجه بتسرب شحن ونامت وطبعا انا منستش اي انوار والعه فمش عارف ممكن يكون فين التسريب ده ده غير اني لما شغلتها بالزق الموتور مكنش مضبوط خالص وواطي جدا وبيترعش وفضل كده لحد ما شالو البطارية

وانا فعلا بجيب البطاريات من نفس المحل

[zaman288]

طالما الميه بتنقص يبقي الشحن زياده وفعلا بوظتلي البطاريه قبل كده

[mohamed_rhem]

بص يا باشا
اولا اتأكد ان الدينامو اللي عندك الكتاوت اللي فيه سليم
معظم العربيات الحديثه بكتاود داخلي ولما بيبوظ بيركبوا التركي وطبعا مبيبفاش مظبوط ده احتمال عموما في واحد في عزبة شلبي مسطرد عنده معظم الماركات
طبعا انا لا انصح بالتصليح الا اذا كان شربون يعني اي حاجه غير كده متصلحوش الاستيراد في حدود 100 جنيه

بس انا شاكك ان المارش عندك تقيل

هو انت لما بتيحي تدور بتدور بسلاسه ولا بتعتل وهل صوت المارش طبيعي و لا فيه خشونة

ابو أياد

[eldeplomasy]

لا بتدور بسلاسه اوي

والعربية جديده موديل 2006 مكيفه وباور و1600 بس دي رابع مرة تحصل مش عارف ايه السبب