العربيه بتغيب علي ما تدور

[cuppo]

العربيه بحالات مره تدور في ثانيه و مره تغيب
هي لانسر كريستاله
ممكن تكوتبطاريه ؟
ولا ايه ده طيب؟
يا ريت مساعده

[eldeplomasy]

ممكن يكون عيب بوجيهات هو حضرتك غيرتها قريب

وراجع ضبط المحرك على الكمبيوتر يمكن يكون في ايرور وبص على فلتر الهواء

وانتظر راي باقي الاعضاء

[samirayad]

على الرغم من أن الأخ السائل لم يذكر شىء عن بيانات آخر صيانة فانة مطلوب الكشف على البوجيهات .....لو مش مهببة ونظيفة ......يلزم ضبط الثغرة بتاعة البوجيهات الأربعة حسب المقنن بالكتالوج....عامة بتكون فى حدود.8 -1 مم

[eldeplomasy]

في الشاهين الفتحة بتبقى 0.85 جزء من المل

[cuppo]

انا لسه جايب البوجيهات من حوالي شهرين
جديده يعني
Nkg

[ابراهيم]

ياه انا عندى كريستالة برضه وفيها نفس المشكلة وهيه كاربارتير والبوجيها مغيرها من سنة وهيه بوش ولاحظت حاجة غريبة انى لما باسيبها من غير مامشى بيها لمدة يومين وادورها بتدور اسرع من لما اكون مشيت بيتا وبادورها بعدها بيومين

[hishamkenawy]

لانسر كريستالة

انا بردة عندى نفس المشكلة مع انى مغير البوجيهات من التوكيل وفلتر الهواء والبنزين وظابط الموتور على الكومبيوتر بس بردة بتعمل نفس الحركة
الصبح بدرى تدورفى ثوانى ولو مركونة اسبوع بدور برضة لكن مجرد اكون فى مشوار واجى ادور السيارة مرة اخرى تغيب فى الدوار ياريت لو حد يعرف يرد علينا

[ابراهيم]

اين انتم ياخبراء الكريستالة الموضوع ده يستحق الدراسة

[samirayad]

شوف يا أستاذ/ابراهيم.....أنا مش خبير ولا حاجة.....بس تقريبا العيب دة يرجع الى دائرة الاشعال بالسيارة....حيث أنة عند توقف السيارة لفترة أو عند الادارة صباحا ...بيكون ملف الاشعال بارد لسة....وبتكون مقاومتة الداخلية لسة فى الحدود الآمنة....علشان كدة بيكون الحريق أكفأ....ولكن مع التشغيل لفترة بيكون ملف الاشعال سخن ومقاومتة بدأت تقل ....وبالتالى بيكون فى نقصان فى قيمة الشرارة الذاهبة منة الى البوجيهات لبدء الادرة.......وممكن تطمن على الكلام دة.....بعد تشغيل السيارة لفترة....وقم بلمس ملف الاشعال....لو حرارتة عالية بطريقة ملحوظة.......اذا تحليلى سليم

[abdelsameaa]

المشكلة دى من المارش بتاع الدوارة خلي كهربائي يفكو ويبصلك علية وينضفوا هتلاقي كل حاجة تمام واسأل مجرب

[mrghost]

كان عندى كده فى الريتمو واكتشفت فى الاخر حاجتين
(سلك الموبينه كان متآكل )
وكمان كابل الارضى اللى واصل لجسم العربيه متآكل وبالتالى المارش كان بيفضى البطاريه ومش قادر يدورها
(اتأكد من ان كابلات البطاريه مش عليها املاح )

[osa_hassan2020]

انا كانت عندي نفس المشكلة وكنت قاعد مع واحد صاحبي شغال في التوكيل وقالى دي عيب رشاشات وبالفعل غيرت الرشاشات بي ام ...انا عندي نوبيرا وركبت رشاشات بي ام دبليو وماشية زى الفل وشغاله وبتطولش خالص

[kemks]

عن تجربه شوف قواطيش البطاريه لو مملحه حتي لو مملحه علي خفيف

و حط Wd40 علي القواطيش إن شاء الله التمليح هيقل خالص علي القواطيش

بس نظف القواطيش قبل ما تحط Wd40