انا عندى مشكله فى كهرباء الشاهين 1400

[ashrafloutfy]

عند تدويرى السياره صباحا اجد السياره بتقطع لمده طويله وغيرت البوجيهات وبرضه لسه المشكله وغيرت سلوك البوجيهات وبرضه لسه بتقطع وحاليا بتسخن بلاقى المؤشر على 90 وحاسس ان الكهرباء زياده وفى التوكيل ظبت الموتور وبرضه لسه المشكله
ارجو افادتى عن الحل
مع الشكر

[Abdallah]

فى تقطيع بنزين وفى تقطيع كهرباء فارجو انك تقولنا نوع عربيتك وموديلها ونوعية الموتور اذا ما كانت كارب ام انجيكشن

[ashrafloutfy]

انجكشن والتقطيع بيبقى شديد عند تدويرى السياره صباحا وهى شاهين موديل 99
وشكرا لاهتمامك

[ahmed1981]

انجكشن والتقطيع بيبقى شديد عند تدويرى السياره صباحا وهى شاهين موديل 99

المفروض أي سيارة إنجكشن تكون تدويرها في الصبح سهل بدون تقطيع
ولذلك يبدو إن عندك عيب في أحد من الآتي:
1- نظام الإنجكشن عموما (وده يكون صح أكتر لو العربية بعد التسخين فيها تقطيع ولو بسيط) قد يكون محتاج ظبط أو تسليك
2- نظام التسخيين (لو كان التقطيع بينتهي بمجرد التسخين)
3- إحتمال ضعيف يكون كهرباء مش مظبوطة

وياريت حضرتك توضح أكتر التقطيع شكله إيه وصوته عشان نقدر نفيدك لأن تقطيع عن تقطيع يفرق كتير

[ashrafloutfy]

شكرا لافادتك واهتمامك ـ التقطيع بيظهر بوضوح عند تزويدى البنزين وبيروح لما امشى بالسياره لفتره والمشكله ان انا كل ما بروح التوكيل يقولولى الكهرباء مظبوطه وحاليا غيرت سلوك البوحيهات لعل وعسى
شكرا لاهتمامك

[sab3aawy]

انا عاوز أسأل على حاجة ، ازاى شاهين 99 وازاى انجكشن، هى دى على فابريكتها وللا انت معدل فيها حاجة

الشاهين الإنجكشن اوله 2005 ، ام انك تقصد اشعال إلكترونى؟ الإشعال الإلكترونى electronic ignition مالوش دعوة بالحقن الإلكترونى electronic injection

أرجو الإفادة علشان اقدر اساعدك لأن قصتك دى ممكن يكون ليها 100 سبب

[ashrafloutfy]

اسف جدا فعلا عندك حق ،كان فكرى ان الانجكشن معناه عدم وجود الابلاتين والكونديسر
وحاليا السياره يظهر هذا التقطيع عند تشغيلها صباحا ويروح بعد فترة التسخين التى قد تطول لمدة 15 دقيقه تقريبا
اشكرك اهتمامك

[sab3aawy]

بص يا سيدى: ناخد احتمالات التقطيع دى من الأرخص الى الاغلى، وان شاء الله تكون حاجة فى الرخيص

1- أول حاجة تعملها تشترى مفتاح بوجيهات(10 جنيه)
2- قبل ما تدور العربيه الصبح إفتح الكبوت وفك بوجيه رقم 2 من الامام(لأنه اسهل واحد فى الفك والتركيب فى الشاهين)، وبص على طرف البوجيه اللى راكب داخل غرقة الإحتراق
3- لو الشمعة البيضاء فى طرف البوجيه لونها اصفر (شكل النسكافيه باللبن كده) بيقى البوجيهات اللى انت جبتها تعبانة ويفضل تغيرها (افضل بوجيهات للشاهين هى الشامبيون ، وحاول تجيب الأصلى من وسط البلد فى شارع معروف او شارع شامبليون)، صناعة انجليزى وثمن الأربعة فى حدود 30 جنيه
4- اما لو لقيت طرف البوجيه لونه اسود مطفى يبقى كدة انت عندك اكلان بنزين (هنرجعلها حالا)
5- لما تيجى تغير البوجيهات( على فكرة تغيير البوجيهات فى الشاهين شغلانة سهلة جدا ولا تحتاج لميكانيكى، انا كنت بغيرهم 3 -4 مرات فى يوم واحد لأنى كنت بجرب افكهم واحرقهم واغسلهم بكلور واعمل فيهم كل البدع واركبهم تانى، الأمر لا يعدو انك تخلع السلك بإيدك، وتحط المفتاح فى البوجيه وتلفه عكس عقارب الساعة لحد ما البوجيه يطلع فى إيدك، وتجيب الجديد تحطه مكان القدي وتلفه بإيدك فى اتجاه عقارب الساعة لحد ما يمسك تروح مقرط عليه لفة بالمفتاح وتحط السلك مكانه)، المهم لما تيجى تغير البوجيهات حاول تلاحظ إذا كان أى منها عليها آثار زيت(اسود بيلمع) لأن ده هيكون معناه ان عندك تفويت فى السلندر اللى طلع منه البوجيه ده
6- لو غيرت البوجيهات ومجابتش نتيجة او لو ان الشممعة كانت سوداء مش صفراء يبقى عندك كذا حاجة تعملها
7- أول حاجة نجرب نعلى الأدفانس شوية، ودى برضه مش محتجة ميكانيكى، كل اللى انت محتاجة مفتاح بلدى 13 قصير، لو بصيت تحت البوجيه رقم 2 هتلاقى الإسبراتير (كوزبلاستيك اسود او بنى او احمر طالع منه السلك اللى رايح للبوجيهات) الإسبراتير هتلاقيه ممسوك فى جسم المحرك بحتة صاج تحت منه مزنوق عليها بصامولة واحدة مقاس 13 ، هوى الصامولة دى بالمفتاح عكس اتجاه عقارب الساعة لحد ما الإسبراتير على بعضة يبقى له القابلية انه يلف معاك(متهويش الصامولة اوى، يادوبك الإسبراتير يتحرك بالعافية) ، وبعدين لف الإسبراتير فى عكس اتجاه عقارب الساعة حاجة بسيطة جدا مش اكثر من 5 درجات على المنقلة (قدرها بعينك) واربط الصامولة تانى وجرب العربية على كدة لمدة 24 ساعة
8-لو تعلية الأدفانس محلتش المشكلة او العربية بقت بتسقف نرجع الإسبراتير الى مكانه الأول بنفس الخطوات السابقة
9- الخطوة التالية نختبر بيك السلانسية الكهربائى، لو بصيت على كاربراتير العربية (فيه فوق الموتور من أعلى قبة صاج سودا ، دى العملة والكتلة المعدنية المكعبة الموجودة تحتها اللى داخل له وخارج منها خراطيرم كتير صغيرة هى دى الكاربراتير)، لو وقفت على يمين العربية وبصيت على ناحيه الكاربراتير اللى فى اتجاه كابينة السائق هتلاقى فيه صامولة خارج منها سلك ، اتبع السلك ده لحد مكان توصيله بضقيرة العربة وفك فيشة التوصيل ثم فك الصامولة بالسلك، اسحبها للخارج برفق هتلاقيها خارجة ومعاها بوز معدنى طوله حوالى3 سم، دة بيك السلانسيه، خد البيك ولمس طرف السلك الحر اللى انت فكيته من الضفيرة مع الطرف الموجب لبطارية السيارة، ولمس الجسم المعدنى للبيك مع الطرف السالب، مفروض تسمع تكة، ولما تفصل جسم البيك تسمع تكة تانية، كرر التلميس والفصل عدة مرات (حتى 20 مرة مثلا) بسرعة، لازم كل مرة تسمع التكتين، لو مرة مسمعتش التك بيقى البيك ده بايظ ومحتاج يتغير (ثمنه فى حدود 60-70 جنيه فى وسط البلد)

10-لو لقيت بيك السلانسيه سليم بيقى المرحلة التالية هى ضبط تاكيهات السيارة(20 جنيه)، ولما تظبط التاكيهات تكون موجود مع فنى التاكيهات وتطلب منه يراجعلك عمود الكامة بتاع العربية ركبة ركبة، ويشوف لو فيه اى ركبة من ال8 ركب متاكلة او منحولة ، فى هذة الحالة تغير عمود الكامة(ثمنه حوالى 250 جنيه) بس بشرط تتأكد ان العمود الجديد مش بيلق فى بيت عمود الكامة، يعنى تمسك البيت بالعمود وترجه ماتسمعش صوت حاجة بتلق، لو العمود بيلق فى البيت يبقى انت محتاج عمود ببيته استيراد (بتاع الريجاتا والتيمبرا بيركب عليها)

11-كدة وصلنا للخطوة قبل الأخيرة ، لو ظبطنا التاكيهات ومجابتش نتيجة يبقى نغير طقم بيكات كامل جديد للكاربراتير ، ماعدا بيك السلانسيه(انا مش فاكر هم 4 او 6 بيكات) بس كلهم على بعضهم بحوالى 15 جنيه تقريبا، مع الكشف على أكس وباب الكاربراتير ولو محتاجين اصلاح نصلحهم

12- لو كل ده مجابش معاك نتيجة غير منظومة الإشعال الإلكترونى اللى راكبة فى الاسبراتير، تمنها حوالى 160 جنيه

[ashrafloutfy]

شكرا لك على الافاده وسوف اتبع ارشاداتك بخصوص عملية تركيب البوجيهات حيث انها الارجح من وجهة نظرى لان السياره بعد التسخين بيروح التقطيع.
شكرا جزيلا لك ،

[Abdallah]

تحليل رائع يا سبعاوى, الله يباركلك بس للاسف انا سمعت ان كل الشامبيون الموجود فى السوق مضروب, فاذا كنت تعرف محل كويس بيبعهم تتفضل مشكورا وتقولى اسمه ومكانه فين.

[nabilaly]

ياريت ياعم المشرف تثبت لنا هذا الموضوع مع الشكر للباشمهندس العبقرى سبعاوى
:D

[meemo20032000]

جزاك الله خير الجزاء أخى سبعاوى