ربع ضارب !!!!!

[HRH_Sameh]

بعد التحية ،،
من يومين نزلت الصبح ادوّر العربية كالمعتاد
لا حياة لمن تنادي ميتة بمعنى الكلمة
توكلنا على الله وخدنا تاكسي بالليل دارت زق وقلت كانت نايمة عادي
بعد ما رجعت ادور مافيش بس التابلوه بينوّر والاشارات النور الكبير لأ وحاجات تطأطأ وكده
تاني يوم فكيت البطارية ورحت بيها على واحد كويس وقلتله شوف شحن البطارية دي كده - كل ده وفي دماغي انها سليمة بس واخدة تعسيلة
بعد الفحص والمحص قاللي البقية في حياتك

دي بقالها 7 شهور و12 يوم والدينامو تمام ومافيش كماليات زيادة والاستخدام يومي خفيف ماعدا يومين مش بخرج

المهم قال ان الربع اللي ضارب الأول من عند القطب السالب
طب والعمل قال ممكن نغير الربع ده بـ 65 جنيه وان شاء الله تقضي بيها الصيف وانت وحظك

انا متخيلتش اني اشتري بطاريتين في السنة
البطارية اللي قبل دي كانت كلورايد 50 مصري وقعدت 4 سنين و 6 شهور من غير لا صيانه ولا شحن

المهم سبته 5 ساعات ورحت جبتها الحمد لله ودوّرت تمام ورحتله قاس الشحن والدينامو تمام

نسيت اقولكم ان البطارية نسر فارتا 55

هل ده بقى الطبيعي يعني اشيل فلوس بطارية في جيبي على طول؟

والا بقت حظوظ؟

طيب ممكن تعيش قد ايه - ان شاء الله؟

طب لو جيت اغيرها تنصحو بإيه عشان وجع الدماغ ده؟

العربية شاهين 2004

وشكرا ليكم مقدما ع الافادة

[abo_hosni]

آخر مرة من 8 شهور اشتريت بطارية النسر فارتا 70 و ركبتها و تاني يوم العربية مارضيتش تدور، رحت بيها الكهربائي كان فيها ناحية بتغلي!!!! و شفنا الدينامو و الكت أوت كله مضبوط. و كنت عامل صيانة المارش كمان قبل ما أغير البطارية
رحت لبتاع البطاريات قال لي تلاقي شحن زيادة اللي بوظها(عشان مايرضاش يبدلها) لكن في الآخر أخدت منه واحدة تانية جديدة دي قصاد دي

قبلها استعملت بطاريتين جافتين Varta و الأولى اشتغلت 3 سنين تقريباً و التانية سنتين. مع العلم أن العربية في الفترة دي كانت بتترفع لشهور من غير شغل

مش عارف بعد كده أجيب إيه بيقولوا Ac-delco أو كلورايد

[shoudy2005]

انا كان معايا النسر فارتا 88 امبير و قعدت معايا اربع سنين تقريبآ بس حاليآ كلورايد ميراج

[tmedhat]

تقل جيبك ياباشا

للاسف حتحتاج و احدة جديدة

دى مش مضمونة ممكن تعطل فى اى وقت

[r0xer]

للأسف دا بقى أتجاه عالمي لإنتاج البطاريات بعمر قليل والكلام دا سمعته من أكثر من مصدر!!!!

[chihab18]

انا كان معايا النسر فارتا 88 امبير و قعدت معايا اربع سنين تقريبآ بس حاليآ كلورايد ميراج

سعر 88 امبير كام دلوقتي ؟

[chihab18]

البطارية اللي عندي كلوريد سائلة 70 امبير البلاستيك بغطاء احمر ؛ وضبطت المياة عند الكهربائي من حوالي شهرونصف وغيرت الكتاوت من كتاوت روسي خارجي الي كتاوت تركي خارجي علماالكتاوت الاصلي بتاعها كان الماني نظام فيشة علي الدينامو ؛ وجدت امبارح المياة في البطارية تقريبا ناشفة علي الاخر فزودتها مياة نار تركيز 30 فوجئت ان المياة بتتسرب من الجانب ؛ علما بان لمبة الكونتاك بطفي لما ازود سرعه الماتور بس وكنت قيست شحن الدينامو عند كذا واحد قالوا لي ان الشحن كويس حوالي 13.5 ؛فهل المياة اللي بتسرب من الجانب طبيعي وهل هذة البطارية ممكن تتصلح ؟

[shoudy2005]

خلى بالك من تسريب المياه ديه هيه عادية بس هتحتاج خرطوم فايظ و تنزله على الأرض انا مكنتش اعرف الحكاية ديه عير بعد ما البطارية بهدلت تحتيها و كنت عايز اسألك سوأل انا عندى الكتاوت الأصلى راكب افرض باظ اجيبه من التوكيل؟ ولا مفيش منه

[powerofhelll]

البطريات مبقتش مضمونه الواحد بعد كده يشتري اتنين احسن

[HRH_Sameh]

شكرا يا شباب ع الافادة
طب دلوقت ممكن الواحد يفكر في بطارية ايه بغضّ النظر عن السعر
علما بأن مشاويري قليلة جدا جدا

[original]

هوا بطاريات الملاكى البيضا ممكن يتغيرلها ربع؟؟؟؟؟

[waleedrahmy]

ياجماعة أشتروا البطاريات من عند واحد مضمون ومبيعاته كثيرة عشان البطارية لها عمر حتي ولو لسه عند التاجر بكيسها

[chihab18]

الكتاوت ثلاث انواع فقط كتاوت 20 جنية الروسي 20 جنية داخلي الماني 55 جنية
البطارية 88 امبير سائلة الفارتا 375 جنية ؛ الكلوريد 375 جنية

[Maged_Samy]

لازم تغيرها يا باشا متفعش تتصلح بس انت ممكن ترجعا للشركة لان الضمان يتاعها سنة وهيدولك واحدة غيرها لو كان العيب فى التصنيع مش فى عربيتك وطبعاً ده بيتحدد على حسب ماتدفع بقشيش للعامل الى فى الشركة والا هيقولك العيب فى عربيتك ومش هتتغير

[HRH_Sameh]

شكرا يا شباب ع الافادة
طب دلوقت ممكن الواحد يفكر في بطارية ايه بغضّ النظر عن السعر
علما بأن مشاويري قليلة جدا جدا