سمكرة ودودكو كاملة ولا وش نظافة فقط؟

[mabdelaziz]

الموضوع باختصار أنا اشتريت عربية لادا 2107 موديل 90 من حوالى 6 شهور, وطبعاً لأنى كنت بتعلم السواقة عليها حصل كام خبطة كده فى منهم اللى سطحية واللى شالت الدهان خالص.
أنا دلوقتى عاوز أعرف هل أوديها لسمكرى يعمل لها سمكرة ودوكو بالكامل ولا يكفى وش نظافة, لأن فى مناطق من اللى اتخبطت عملت بارومة, وقلقت أكتر لأن فى منطقة من اللى اتخبطت وضح إنها كانت فيها بارومة ومرشوشة على البارومة فأنا كده مش ضامن إذا كان فى بارومة تانية مش ظاهرة ولا لأ, خصوصاً إنى مشتريها من واحد مش معرفة يعنى كلامه ممكن مش مضمون قوى.
أنا للأسف خبرتى ضعيفة جداً فى صيانة العربيات وعاوز لما أروح لسمكرى أعرف أتكلم معاه عن إيه, فياريت أسمع نصايح الإخوة الأفاضل فى المنتدى هل أعمل سمكرة ودوكو بالكامل ولا يكفى وش نظافة؟ وياريت لو حد عنده فكرة عن أسعار السمكرة والدوكو فى اسكندرية عشان أبقى عارف لما أتكلم مع الصنايعى السعر معقول ولا لأ.

وشكراً مقدماً

[M.Mostafa80]

طبعا تعملها سمكره ودوكو كامله عربيه موديل 90 وانت بتقول فيها بارومه ومرشوش عليها يعنى شغل عك يبقى لازم العربيه دى تتفور كلها ويتشاف ايه الى فيها ويتعمل وتترش على نضافه وهتبقى عارف الى فيها على الأقل

[khater87]

اصل وش نظافه ده لو العربيه مفيهاش غير تجاريح بوهيه بس او البوهيه بدات تقشر
انما بدام فيها خبطات وبروومه من الافضل ان العربيه ترووح للسمكري يتفرج عليها ويقولك علي الشغل الي فييها وتتفقوا اولا
وبعد كده ابقي اديها وش نظافه زي ماانت عاوز ..............

[powerofhelll]

احسن حاجه تعملها نزل البويا و اعمل الشغل علي نضافه علشان متصرفش كتير بعدين لو في بارومه هتسرح و هتقرفك خلص نفسك مره واحده و الفرق مش كتير

[mabdelaziz]

momomero, khater87, powerofhelll

أنا متشكر جداً لكم كلكم يا جماعة على نصايحكم ودعواتكم إنى ألاقى سمكرى أمين وكويس

كنت عاوز أسأل بس يعنى مبدأياً كده بنتكلم فى كام فى الحكاية دى؟
يعنى مثلاً 1000 ولا 1500 ولا 2000 مثلاً؟

[Samir Elshahawy]

momomero, khater87, powerofhelll

أنا متشكر جداً لكم كلكم يا جماعة على نصايحكم ودعواتكم إنى ألاقى سمكرى أمين وكويس

كنت عاوز أسأل بس يعنى مبدأياً كده بنتكلم فى كام فى الحكاية دى؟
يعنى مثلاً 1000 ولا 1500 ولا 2000 مثلاً؟

أعتقد هايكون في حدود 1000 جنيه بالكتير و ممكن تفاصل معاه

أنا كانت عربيتي مخبوطة جامد و كان فيه تغيير باب و رفرف و تصليح قايم ورش العربية بالكامل و أخد في المصنعية و الرش 1300 جنيه

[mabdelaziz]

يارب يكون زى مابتقول كده يا SE_coralsea

أنا فعلاً محتاج أظبط العربية ومش عاوزها تفتح معايا عشان ماتعبش نفسياً