عربيتى أخرها 210 وصحبى 240 أية السبب

[0105365]

السلام عليكم عندى مشكلة محيرانى
أولا أنا معايا جولف 2 فيها موتور 2e
2000cc 8v
وفتيس 2Y
ومغير التنك وركبت تانك جولف3 وطرمبة كبيرة بتطلع 6 بار
لما بسافر بيها أخر الموتور 210


وفى واحد صحبى معاة جولف 2 وفيها نفس الموتور ونفس الفتيس
سقتها أولا بحس ان سرعة أستجابتها أسرع
ثانياً سقتها جبت 220 وكان لسة فى الموتور يجيب كمان
وهو عندوا طرمبتين وبيطلعوا 4 بار

بجد ياشباب أنا زهقت من العربية دى حد يقلى أية المشكلة مع العلم أحنا الأتنين نفس الدسك والأسطوانة
العربيتين نسختين من بعض معادا أختلاف الجنوط أنا جنطى 205/50/15
وصحبى 195/65/14
ياريت حد مختص يحلى المشكلة دى انا بحس أنى برمى فلوس فى الأرض

[samirayad]

واضح أن الجنط عندك أعرض.......و أكبرفى القطر علشان أنت 15 وزميلك 14 .....وهو ده السبب ليس الا ذلك..............وأنصحك بالتروى فى القياده

[0105365]

أولا يا باشمهندس شكراً على سرعة رد حضرتك بس
هى ممكن تفرق فى أستجابة العربية
لكن ما أظنش تفرق فى نهاية الموتور

[fahd_628]

حالة الموتور تفرق برضة و نوع البنزين و ال Exhaust ممكن يكون مركب كيت مثلا و ال Intake ممكن يكون مركب فلتر سبور و ممكن يكون مركب اسلاك سبليت فير و بوجيهات و حاجات كتيير ممكن يكون فية فرق فيهم

[0105365]

لأ مش مركب حاجة علب الشماكن الأتنين واحد وعو مركب عمة وانا مركب فلتر أسبور
ومفيش سلوك ولا بوجيها كلوا زى بعض

طاب أنا عايز أقول حاجة
أنا سعات لما باجى أكبس على دواسة البنزين بحس ان الموتور غول
وسعات تانية أحسن أنها موتور عادى
عند صحبى علطول صوت الموتور غول
مع أنى أنا مركب فلتر أسبور؟؟؟

[MoMohsen]

يا باشا اكيد اختلاف الجنط بيأثر على قراءة العداد بمعنى انك ممكن تكون ماشى على 220 او اكتر لكن العداد عندك قرائتة مش مظبوطة ودة لسبب ان القراءة بتاعت العداد معمولة على الحاله الاستندارد للعربية بمعنى انها ممكن تكون نازلة بمقاسr14 180/85 مثلا لكن انت لما غيرت المقاس اختلفت عوامل كتير من اهمها المساحة اللى بيشغلها الكاوتش على الارض و بالتالى التماسك.

[0105365]

ماشى بس أنا بقول أن القراية فى العداد عندى 210
وعند صحبى 220 ولسة فية فى الموتور يجيب كمان
فاهم قصدى

[MoMohsen]

يعنى هو الاختلاف فى السرعة نتيجة ان العداد اخر مؤشرة 210 ولا ان الموتور مش قادر يجيب اكتر.

[samirayad]

التقييم الكيلومترى أساسا بيعتمد على أشارة الفتيس لعداد الرحلات والكيلومترات .......وطبعا بناءا على بعد محور نقل القدره الى الأرض.......ونظرا لأن الجنط عندك أكبر فهنا بيزداد السنتر لاين بتاع محور النقل للأرض عندك عن زميلك ......دا غير عرض الجنط عندك اللى بيمثل قوه مقاومه أضافيه من الطريق بتقلل من قيمة العزم المنقول والتى تنعكس بالسلب على السرعه النهائيه....................

_ بس عندك فيه ميزه أكبر ....وهى الثبات على السرعات بسبب زيادة قوة التماسك عندك بين الجنط والطريق ......وممكن تكون قريبه من النسبه اللى عند زميلك بسبب كبرقطر الجنط قليلا ....ولكنى أميل الى أنا الثبات عندك أكبر ( أصلها عملية نسبه وتناسب .....بس عرض الجنط بيكون له الغلبه فى عملية الثبات ....وأعتقد الثبات عندك حيكون برضه أكبر )

[0105365]

أوك شكراً يا بشمهندس
طاب صوت الموتور

أنا سعات لما باجى أكبس على دواسة البنزين بحس ان الموتور غول
وسعات تانية أحسن أنها موتور عادى
عند صحبى علطول صوت الموتور غول

[samirayad]

أنا سعات لما باجى أكبس على دواسة البنزين بحس ان الموتور غول

حلوه حتة غول دى......هو الموضوع ليه أبعاد كتير لأن مش ممكن تكون حالة المكن ولا الفتايس واحده .....وهنا حنستبعد حتة عادات القياده على أساس القائد واحد وهو سعاتك
...........بس أعتقد أن الحاله اللى بيكون الموتور عندك غول ساعتها .....بتكون طالع بالعربيه زى نظام الكيك داون مثلا ....وبيدخلوا ال6 بار بتوع طلمبة الزيت مره واحده....ويمكن تكون الطلعه كمان عندك أقوى ساعة التسارع......بس فيه جانب سلبى أن الفتيس عندك ممكن يكون بدأ يتعب شويه (لأن الطلمبه كبيره عليه )...........................واعتقد أن عربية صاحبك على أبوها بالنسبة لضغط زيت الفتيس ومتغيرش فيها حاجه ( مش عارف كلامى صح ولا لا .....علشان نفكر تانى )............مع الأشاره أن الموتور عندك لما بيكون عادى و بتكون مش عامل نظام الكيك داون مثلا على أساس هريت التورك كونفرتر شويه من كتر الكيك داون وضغط الطلمبه الزياده...........هذا والله أعلم

[3mr Farrag]

يمكن موتورك 8 فالف
وصاحبك 16 و محدش اخد باله

[samirayad]

هو الزيت اللى خارج من طلمبة الفتيس .....أكيد فيه جزء منه بيروح لشغل الtorque converter ....وجزء لكلاتشات تعشيق مراحل نقل السرعات المختلفه (الكميه اللى باقيه من ضغط الطلمبه )......وعلشان كده ممكن تكون كلاتشات التعشيق بدأت تتعب عندك شويه وتتبرى بعض الشىء (بسبب ضغط الطلمبه الزائد )....لأنك أخليت برضه بالناحيه التصميميه للفتيس ...................

[0105365]

بصراحة أبقى كداب لو قلت فاهم
بس الفتيس عندى سليم ومفهوش اى مشكلة
وأنا مانيول مش أوتو ماتك ولما بقول صوت غول دى بكون العربية واقفة مش ماشية
والعادى برضوا بتكون واقفة
يعنى بزود بنزين
وأنا مش من النوع الى بيفرك فى الطلعة

[samirayad]

دا الواحد عك بقه على الآخر.................يعنى الطلمبه دى طلمبة البنزين ..........وزميلك عنده طلمبتين بنزين.....معلش أهو أحنا بندردش على مانصل للصح.........................وأعتقد كده حتكون الأسباب أختلاف الكاوتش .....وبرضه مش ممكن تكون حالة المكن واحده .....وكمان حالة الدبرياش صعب يكونوا أسطمبه واحده برضه