رعشة فى الغيار الأول - بروتون ويرا 2005

[ahmed_h_g]

مشكلتى فى ويرا موديل 2005 فيها رعشه بسيطه بحسها عند طلعة العربيه على الغيار الأول لازم أدوس بنزين زياده (أعلى صوت الموتور) فى الطلعه علشان محسهاش مع العلم انى لسه مغير اسطوانه ودسك جداد ولكن الفرق بسيط ولسه ذى ما هيه
محتاج الحل ضرورى علشان متضايق من العيب ده جدا" .

[samirayad]

محتاج الحل ضرورى علشان متضايق من العيب ده جدا"

ياعنى يا أستاذ / أحمد من ساعتها وأنت ماشى معانا عشره على عشره والآخر تبقى متضايق كده................وواضح طبعا أن السلانسيه واطى شويه عندك ومحتاج يعلى شويه وده بيكون بضبط خليط الحريق..........وحاليا أنصح بنظافة فلترى الهواء والبنزين والكشف على البوجيهات أولا .........والتجربه .......فأن لم يحدث تحسن فيجب نظافة بلف الأيدل والبوابه لتحسين أداء دورة السلانسيه

[ahmed_h_g]

شكرا" مهندس سمير.... على فكره اللى مدايقنى انى غيرت الدسك والأسطوانه علشان أعالج نفس العيب وللأسف مفيش أى نتيجه مع العلم انى مغير طاقم الفلاتر والسيور وبلى العجل من الأخر مغير طاقم السيرفيس كامل علشان لسه مشتريها مستعمله .

[amarakl]

يا سيدى الفاضل
ممكن يكون العيب فى الفلام او يكون الطقم الجديد فيه نفس العيب ويكون ده عيب تصميم
شوف حد معاه نفس السياره والموديل وجربها وقوللى

[tmedhat]

ممكن يكون العيب فى طقم الدبرياج اللى ركب
السوق مليان قطع غيار مضروبة

[ahmed_h_g]

ممكن يكون العيب فى طقم الدبرياج اللى ركب
السوق مليان قطع غيار مضروبة

نفس الكلام اللى قالهولى الميكانيكى اللى ركبهم لما رجعتله
بس أنا مشتريهم من أولاد منصور اللى فى الجيزه صناعتهم كورى أصلى
خليك مكانى وأدينى الحل ؟؟؟؟؟؟

[Karim Salem]

بص يا استاذ احمد انا عندى نفس العيب من ساعة ما اشتريت العربية و كل لما اقول للمكيانيكى الماتور محتاج يعلى يقولوا لا سيبه هو كده الطبيعى بتاعه متلعبش فيه.
هيا العربية و هيا على السلانسية بترعش
تدوس سنه خفيفه بنزين تختفى الرعشة

اعتبرها اوبشن فى العربية زى ما انا عملت بقالى سنتين.
اصل لما الواحد بيركز فى حاجة فى العربية هتلاقى نفسك قاعد بتصرف و لما الموضوع ميتحلش هتتضايق اكتر.
أصل عندى مشكلة تانية انى كنت على طول بعمل الصيانة كل 5الاف فى التوكيل
و عند ال35 ألف قلتلهم الفرامل موش مظبوطة المهم غيروا التيل و قالوا ان الطنابير محتاجة تتغير - فالمهندس اللى هنالك قال انها موجوده عندهم بس ب1000 جنيه - فاقترح انهم يخرطوها و خلاص
المهم خرطوها و من ساعتها كل لما ادوس على الفرامل العربية تترج
من ساعة ما حصل الموضوع ده و انا اخدت عهد انى معتبش التوكيل تانى بما انى بدفع كل مرة بتاع 500 جنيه و موش عارفين يصلحوا عيب فى الفرامل
المهم بقيت بروح اصلح العربية فى ورشة فى الحرفيين - حكتلهم على المشكلة - افتوا انهم يعيدوا خرط الطنابير و يغيروا التيل
عملنا كده و محصلش حاجة
المهم طنشط الموضوع خالص و على ال50 الف قلتلهم غيرولى الطنابير - روحت جبت طنابير نوعها بريمبوا (قالوا ان ديه احسن ماركة) بحوالى 350 جنيه و كان عليها ضمان لمده سنه
المهم ركبتهم و فضل برضه العيب موجود
روحت بعد شهرين كده قلتلهم الطنابير ديه موش تمام و العيب لسه موجود فى العربية
غيروا الطنابير تانى و جابوا نوع تانى اسمه ماستر و المشكلة هى هى
هيا الفرامل كويسة يعنى العربية بتقف كويس
و لما بدوس على الفرامل جامد مبحسش بالرجة
هيا بتبان لو انا ماشى فى طريق طوالى و عاوز اهدى فبريح رجلى على الفرامل الاقى العربية فيها زى رفه (رجه - غربلة ) حاجة موش طبيعية
لما ادوس اجمد تختفى خالص
انا بجد زهقت من المشكلة ديه و كرهتنى فى العربية
لانى بحاول احافظ على العربية و اقل صوت بسمعه فيها بيفضل مضايقنى لحد ما اعرف ايه العيب و اصلحة

[ahmed_h_g]

شكرا" أستاذ كريم على مرورك . على فكره أنا كان عندى نفس العيب ده أول لما أشتريت العربيه ولففتى حولين نفسى لغاية ما لقيت الحل الحمد لله
بص يا باشا العربيه أول ما جبتها كانت مش عربيه من الأخر .. كانت لما تاخد مطب هواء عالى وواطى كانت العربيه كلها بتعوم جامد وبترجع تانى وكنت أول ما أدوس فرامل وأنا على 60 كانت بتغربل جامد جدا" لازم أخف على الفرامل علشان أقدر أقف وأنا مطمن .
الميكانيكى برضه قاللى طنابير وتيل وبلى وللأسف العيب مكانش منهم .. العيب كان من الجنوط روحت رصصت وقاللى هغيرلك الجنط الأمامى بالخلفى والعكس قلت تمام .
عملت كده لقيت الرعشه زادت بقت على سرعة 40 ..... كنت هعيط جنبها.
فى الأخر لقيت ال4 جنوط بايظين ومش باين أى خلل فيهم على جهاز الترصيص .
روحت مبدلهم بجنط تايلاندى من أشرفكوا بالحى السابع ورصصت ومشيت كله تمام والحمد لله بس فيه حاجه بسيطه (رعشه تانى لما أعدى ال120) وكان السبب لما المساعدين كانوا بايظين كانوا فى كل مطب هواء كانوا بياكلوا فى الكاوتش لحد ما عملوا عالى وواطى فيهم . المهم ركبت فاردتين جداد قدام ورجعت أنضف فردتين فى الخلف وأخيرا" أختفى العيب نهائى الحمد لله حتى لما السرعه تكون 160 وأفرمل .... ولا حاجه ... ويا رب تكون وصلك قصدى .
أظن موضوع الرعشه اللى عندك هو موضوع الحساس غيره وإن شاء الله كله هيبقى تمام
الموضوع ده عندى على الغيار الأول فى الطلعه وليس وهى واقفه .

[Karim Salem]

تسلم يا باشا على ردك السريع
انا هجرب موضوع الجنوط ده كان فعلا تاية عن بالى خالص
هو حضرتك عملت ايه فى الجنوط القديمة سيبتها لأشرفكو و لا بيخصمهالك من تمن الجديد
اما عن الحساس - هو اسمه كده بس اسأل عن الحساس و لو تعرف تمنه كام تقريبا يبقى عظيم جدا؟

[ahmed_h_g]

الجنوط القديمه كانت جنوط حديد عاديه أشتراها أشرفكو ب150 جنيه والجنوط التيلاندى اللى أشترتها ب1250 جنيه يعنى الأجمالى اللى دفعته 1100 جنيه
أما الحساس هو أسمه حساس الموتور مسؤل عن تعلية صوت الموتور بالنهار عند أول تشغيل للسياره (وهى بارده) وبعد كده يبدئ يهدى صوت الموتور أول ما عداد الحراره يبدئ يرفع تدريجيا" هتلاقيه هو اللى عاملك المشكله ديه وأى خدمه أنا تحت أمرك .