عربيتى بتستهلك بنزين جامد

[sayedafandy]

اخوانى الاعزاء بعد السلام عليكم ورحمة الله وبركاته
عربيتى رينو 12 1300 سى سى موديل 81 وهى بصراحة حلوة وعلى قد الحال وما شاء الله عليها جامدة وتحس انها عربية رجالة وخدمة شاقة ، المهم انها بستهلك بنزين جامد قوى ، كل الناس قاللولى انها المفروض تعمل 200 كيلو فى الصفيحة بس دى بتعمل من 130 كيلو الى 160 كيلو على احسن الاحتمالات
روحت لبتاع كربرتير فى عين شمس وضبطه وغيرت البوجيهات والابلاتين والكوندنسر وعلى فكرة انا بغيرهم اول باول باستمرار كل 6 او 7 اشهر وبغير زيت كل 1000 كيلو ومواظب على الصيانه قوى ولكن بدون فايدة برضه بتستهلك بنزين جامد مع ان مشوارى من البيت للشغل لايتعدى 10 كيلو رايح جاى وفى السفر بتعمل حوالى 170 ل 180 كيلو تفتكرو المشكلة تكون فى ايه بالضبط لانها مضايقانى بصراحة وعلى فكرة انا بحط بنزين 80

[samirayad]

طيب أدينا البيانات اللى فى الموضوع ده من 1 الى 13 يمكن نلاقى ثغره نعتمد عليها فى التشخيص http://www.nilemotors.net/Nile/showthread.php?t=75775

[SAMEH_FOUAD]

لو حالة الماتور عندك ضعيفة هتلاقى العربية بتاكل بنزين,وممكن يكون عندك البيج بتاع الكربراتير كبير فهياكل بنزين ,

[aYaBooY]

طيب انا في انتظار ردك على استاذ سمير برده
بس عموما انا شايف انه موضوع ال 170 180 في السفر و ان كان كتير لما نقارنة بعربيات تانية اعتقد انه كويس بالنسبة للرينو 12 نظرا لقدم السيارة و ممكن يكون الموتور عندك خفيف شوية و كدة مفيش احكام كامل لعملية الاحتراق
مما يسبب الاستهلاك الزيادة للوقود و ممكن يكون اصل المشكلة لو الموتور كويس في الكربراتير ممكن تغير بيكات 2 سرعة و 1 سلانسيه او يكون الاكس و الباب معمولين كذا مرة و في الحالة ديه هاتحتاج كربراتير استيراد او جديد ميكونش اتلعب فيه
و عموما لما ترد على البيانات المحددة في موضوع م سمير هايكون التفصيل اكتر

[sayedafandy]

اولاً وقبل كل شئ انا متشكر جداً على اهتمام حضراتكم وعلى الروح الجميله الموجودة فى منتدانا الغالى
ثانياً بخصوص البيانات فهى كالتالى :-
1- موديل السياره وسنة الصنع (رينو 12 موديل 1982 1300 سى سى )

2-عدد الكيلومترات المقطوعه ( عاملة حوالى 53000 كم )

3-موقف أستهلاك الزيت ( باقوم بتغييره كل 1000 كم باستمرار )

4-شكل العادم الخارج من الشكمان ( عادى وكانت بتعرق ميه وانا بسخن )

5-موقف البوجيهات وأسلاكها وهل تم عمل أختبار لقوة الشراره للبوجيهات الأربعه --- البوجيهات بغييرها كل 6 او 7 شهور وغيرت الاسلاك بتاعتها واشتريت موبينة جديدة الكترونى انما اختبار قوة الشرارة ده بصراحة معرفوش

6-موقف الفلاتر (هواء بغيره مع البوجيهات - بنزين بغيره لما الاقى شكله اسود شوية - زيت بغيرة عند تغيير الزيت مرة ومرة مرة اغير زيت وفلتر ومرة اغير زيت بس )

7-موقف أستهلاك البنزين ( زياده الصفيحة بتعمل من 130 الى 160 كم )

8- موقف الشكمان (سالك وتمام ولسه من حوالى شهرين مغيير علبة الشكمان بواحدة استيراد قالى انها فرنساوى بتاعتها)

9- موقف الفرامل (كويسه )

10-موقف السيور ( كاتينه بصراحة معرفش حالته- تكييف لايوجد - دينامو سيره كويس ولسه مغيير السير والدينامو كمان من حوالى 3 شهور )

11-موقف البطاريه والدينامو من ناحية الفولت والأمبير -- لسه جايب بطارية جديدة من حوالى 3 شهور ومغيير الدينامو الى اكتفير استيراد لان الدينامو القديم كان فصل معايا وانا مسافر وقطع نفس البطارية وكل كهربائى اروح له دلوقتى يقولى الشحن تمام والبطارية تمام

12-مصدر الصوت فى حالة ظهور أصوات من عند المحرك ومكانه بالضبط -- هو كل فترة بيحصل رعشة ورجرجه كده اروح للميكانيكى يظبط الهوا مع الكهربا تقعد عشرين يوم ولا شهر وترجع تانى

13- موقف آخر صيانه أتعملت ....وهل العيب المطروح ظهر بعدها ولا كان موجود من قبلها ....لأن دى نقطه مهمه جدا ---- انا تقريبا ايدى فيها علطول واستهلاك البنزين موجود فيها من ساعة ما اشتريتها من حوالى 3 سنين والميكانيكى اللى بتعامل معاه قال لى ان ده علشان صاحبها اللى قبلى مغيير لها الموتور الى موتور رينو 18 1500 سى سى 76 سم وانا بصراحة مش عارف الكلام ده صح ولا لاء لان الموتور فى الرخصة 1289 سم اللى هو 1300 سى سى

اتمنى ان الصورة تكون وضحت ومعلش وجعت دماغكم معايا وشاكر مقدماً على اهتمامكم

[sayedafandy]

معلش افتكرت حاجة تانى ان الميكانيكى قالى ان الكربتير بتاعها المفروض يكون 1 باب واللى فيها 2 باب وان ده من عوامل زيادة استهلاك البنزين ولو ركبت 1 باب هتحس انها مخنوقة معاك لانك اتعود عليها بالوضع الحالى وهى بصراحة بتدوس كويس معايا واى حد يضايقنى بجيبه فى الطرق السريعه

[samirayad]

-عدد الكيلومترات المقطوعه ( عاملة حوالى 53000 كم )

طيب أنت مقتنع أن العربيه تبقى موديل 82 وعامله الكيلومترات دى .............

واستهلاك البنزين موجود فيها من ساعة ما اشتريتها من حوالى 3 سنين والميكانيكى اللى بتعامل معاه قال لى ان ده علشان صاحبها اللى قبلى مغيير لها الموتور الى موتور رينو 18 1500 سى سى 76 سم وانا بصراحة مش عارف الكلام ده صح ولا لاء لان الموتور فى الرخصة 1289 سم اللى هو 1300 سى سى

أنا أشك فعلا ....أن الموتور بتاعها متغير لموتور أكبر ......وتم تغيير العداد كمان قبل ماتشتريها من 3 سنين

معلش افتكرت حاجة تانى ان الميكانيكى قالى ان الكربتير بتاعها المفروض يكون 1 باب واللى فيها 2 باب وان ده من عوامل زيادة استهلاك البنزين ولو ركبت 1 باب هتحس انها مخنوقة معاك لانك اتعود عليها بالوضع الحالى وهى بصراحة بتدوس كويس معايا واى حد يضايقنى بجيبه فى الطرق السريعه

طيب مايمكن كربوراتير ال1300 باب واحد ....وال1500 أتنين باب.........ولما صاحبها غير المكنه ل1500 ....حس بزياده فى أستهلاك البنزين ......فقال ....أما أبيعها ..........وياريت تشوف موضوع سير الكاتينه برضه ( غيره لو مكنتش غيرته من ساعة شراءك للعربيه ..........فده أضمن ليك .....وممكن يجيب نتيجه كويسه معاك فى الأستهلاك ) .......وبرضه أنصحك بالمره بالأطمئنان على كفاءة بلى الأربع عجلات ( لو تقيل .....حتاكل معاك بنزين برضه )

[ابو حسين]

هل انت متاكد من ان العدادات سليمه انا شاكك في العدادات وحصلت مع واحد صحبي وكان في مشوار بيعمل 20ك عمل معاه 11ك فقط وتلع العيب في العداد

[sayedafandy]

شاكر لكم جميعا على اهتمامكم وردودكم والله العظيم انتو فعلا ناس محترمة وانا يكفينى شعوركم حتى لو هتعمل كيلو واحد فى الصفيحة فأنا مبسوط معاكم وربنا يقدرنا على رد جمايلكم دى وبعد ،
طبعاً اكيد انها مش عامله 53000 كم بس واكيد العداد وصل لاقصى حد ثم صفر او تم تصفيره او تغييره قبل ما اشتريها لانها فعلا مش هتكون موديل 82 وتمشى دول بس ده انا لما اشتريها كانت عامله حوالى 30000 كم على ما اذكر تقريبا بس القراءة دى هيه الموجودة حالياً
اما بخصوص سير الكاتينة انا بصراحة معرفش وظيفته ايه بالضبط وهل فعلا يكون له علاقة بزيادة استهلاك البنزين انا عامة لما اشتريتها قولت للميكانيكى نغييره قالى ده مش سير بلاستيك ده حديد ذى الجنزير كده متقلقش منه خالص
بس اللى لفت نظرى فعلا من كلام الاخ ahah ان ممكن العداد بتاع الكيلومتر يكون فيه حاجة لان كان معايا عربية سيات قبلها كان مشوارى من البيت للشغل كان بيعمل حوالى 5 كم ودى بتعمل 4 كم بس وانا تذكرت هذه المعلومة بس ساعتها قلت اكيد الرينو هى الادق من السيات ونسيت الموضوع ده تماما
اعتقد من المناقشات المثمرة وارئكم القيمة دى انى اكشف على سير الكاتينة وعداد الكيلومتر ولا رأى حضراتكم ايه ؟
ولا طالما العربية بتسحب وتجرى كويس يبقى سير الكاتينة كويس ؟

[samirayad]

اعتقد من المناقشات المثمرة وارئكم القيمة دى انى اكشف على سير الكاتينة وعداد الكيلومتر ولا رأى حضراتكم ايه ؟
ولا طالما العربية بتسحب وتجرى كويس يبقى سير الكاتينة كويس ؟

سير الكاتينه الجنزير عباره عن عقل وبنوز ( زى سير العجله بالضبط ) وبيبوش مع الوقت .....والمفروض ليه عمر أفتراضى ووقت يتغير عنده ( زيه زى أى قطعة غيار ) دا غير أنه بيطول مع البوش ده وبكده بيبوظ شغل الصبابات ومنظومة التاكيهات ......وبالنسبه لموضوع العداد ......قيم أستهلاك البنزين على تفويلتين .....وأنت تعرف الوضع بالظبط .....بغض النظر عن أى عداد كيلومترى راكب ..........يعنى ممكن تسافر من مصر للأسماعيليه ....والمسافه محدده على الطريق وبلاش العداد وأنت حتعرف أنت أستهلكت قد أيه بنزين فى مشوار زى ده .........وكأن العداد مش موجود أساسا............

[aYaBooY]

الرينو 18 موتور عموما شغلة متعب و الناس القليلة اوي الي راكبة الرينو 18 بتغير الموتور لموتور 12 نظرا لانتشار قطع غيارة سواء جديد او استيراد علشان كمية التاكسي الي موجودة
عموما الرينو 18 مع قريب ليا و عادتا بتعمل معاه من 250 لـ 270 كم في الصفيحة ال 80 في الطوالي و برده الكهرباء بتاعتها مش بتظبط علشان اليكتروني
الكربراتير 2 باب و الباب التاني مش بيشتغل غير بعد سرعة 90 او 100 و هنا الاستهلاك بيزيد شوية انا عموما شايف انك شايل العربية في عينيك و اعتقد كدة انك محتاج تغير او تصليح و ان كان التصليح مش مجدي للكربراتير او تروح مشوار لعين شمس و تخلي حد من متخصصين الرينو يشوفلك مقاسات البيكات عندك مظبوطة ولا لا

[sayedafandy]

شاكر لكم جميعاً على اهتمامكم وردودكم وارئكم القيمة وربنا يقدرنا على رد جمايلكم وان شاء الله لو عملت فيها اى حاجة جابت نتيجة ملموسة بخصوص هذا الموضوع سوف اوافيكم بها للاستفادة العامة ولاثراء المنتدى الجميل ده