لو سمحت أرجو المساعدة

[ahmedsameih]

أعزائي أعضاء منتدى نايل موتورز
لوسمحت كان عندي استفسار
الموضوع انني أمتلك سيارة بيجو 504 ال وأثناء تجولي بها بإحدى الشوارع أخذت مطب (جامد شوية) وبعدين دخلت مني على الرصيف
المهم اتكسر عندي المقص والشداد
طبعا جه الونش بتاع المرور ورحت بيه على ورشة العفشة
طبعا علشان أنا كنت في بلد تانية وعلى الطريق فمضطر أعملها بأي ثمن المهم الميكانيكي شاف ان الحساب 350 جنيه وبكل سهوله وصلها الى 270 عادي المهم كان معايا 200 جنيه دفعتهم وله باقي 70 جنيه مش دي المشكله
المشكله اني أول حاجة أعمله سألت كل الميكانيكية وبتوع العفشة أهل الثقة بتوعي الكل إتفق ان الموضوع ده في البيجو ما يتكلفش أكتر من 150 جنيه
واني المفروض اني ما أدفعش أكتر من كده
فأنا مالقتش أفضل من أعضاء نايل موتورز لمساعدتي في هذه المشكلة
يعني تكلفة الشداد والمقص حوالي كام؟؟؟؟
ولكم جزيل الشكر

[samirayad]

المشكله اني أول حاجة أعمله سألت كل الميكانيكية وبتوع العفشة أهل الثقة بتوعي الكل إتفق ان الموضوع ده في البيجو ما يتكلفش أكتر من 150 جنيه
واني المفروض اني ما أدفعش أكتر من كده

أعتقد المفروض تديله المبلغ المتبقى (70ج )
ليه أنا قلت الكلام ده
1- العقد شريعة المتعاقدين
2- يشكر أنه أخد منك 200ج .....وقبل يتبقى له مبلغ ال70 ج
3- متضمنش صدق كلام اللى أنت سألتهم بعد كده ....لأن أى صنايعى بتروحله تسأله عن قيمة شغلانه أنت عملتها عند واحد تانى ....بيبخس قيمة الحاجه دى
لأنها أتعملت وخلاص ....وياسلام ...لو عرف أنك لسه محتاج تعملها .....حيقولك 500 ج ....مش 350 ج
4- كفايه أنه طلع راجل كريم ...ونزل المبلغ من 350 الى 270 ...وقبل يتبقى له فلوس
يبقى أأقل حاجه تردله باقى فلوسه .....حتى لو كان كسبان زياده
دا غير أنه من بلد تانيه وميعرفكش
ده رأيى بدون زعل
ولك حرية الخيار

[mrwho1982]

كلامك صح يا استاذ سمير

ادي للراجل حقه ومعلش انت اللي روحتلو مش هو اللي جاللك وانت اللي اتفقت معاه علي 270 مش 150 ادي للراجل فلوسه وقول

الحمد لله انها جات علي قد كده

[samirayad]

وقول

الحمد لله انها جات علي قد كده

[ahmedsameih]

الحمد لله رب العالمين
ومشكور جدا يا استاذ سمير ولكل من رد على استفساري
زطبعا لازم ياخد حقه لان ده كان اتفاقي معاه
انا بس كن عاوز أعرف هو استغل ظروفي ان انا على الطريق وجاي مش قدامي حل تاني غيره ولا هي كده التكلفة فعلا؟
ومشكورين جدا يا جماعة وجزاكم الله كل الخير

[SAMEH_FOUAD]

طبيعى الميكانيكية لما بيعرفوا انك غريب لازم يغلوا عليك عشان عارفين مدى احتياجك ,ودية فرصتهم ,يعنى كان واحد صاحبى فى اسكندرية غير كوندنسر وفلتر بنزين وكنا مسافرين ساعتاها الراجل قالة 30 جنية ولو احنا عملانها هنا هياخد بس 10 جنية فعادى جدا وادينهالة وخلاص هو وضميرة
فالحمد لله انها جت على قد كدة ,بس صدقنى هية هاتتكلف فى حدود 250 جنية بالمصنعية لو غيرلك مقص وشداد ب150 جنية هو هياخد كام لا طبعا انت كدة حسابك مظبوط او هو مزود بس عشرين جنية وسيبك من كلام الناس

[aYaBooY]

انا معرفش الموضوع يكلف كام بس اعتقد ان الرقم 150 صعب شوية علشان انا كنت بجيب مقص المرحومة 128 و هو عبارة عن حتة حديدة شبه السيخ ب 70 جنيه تقريبا فما بالك مقص محترم لعربية زي البيجو اعتقد تمنه لوحدة استيراد في حدود 100 - 140 و الشداد معرفش هو ايه بالظبط او ممكن اكون اعرفة باسم تاني اكيد ليه تمن و طبعا غير المصنعية و عموما ممكن تعتبر المبلغ لو زيادة انه حلاوة نجاتك من الخبطة ديه و الله الي يعوضك لو كان غالي