العربية بتصوت مع الدواره والتكييف ؟؟

[superzok]

السلام عليكم وكل سنه وانتم طيبين

عربيتي كورولا 2005 اوتوماتك ماشيه في حدود 90000 كم

اول مشكله بسمع صوت عالي اول ما ادورها واتحرك بيها او اول ما اشغل التكييف ( صوت يشبه الصريخ )
وتقريبا الصوت ده بيختفي لما العربيه تسخن

هل ده بيكون عيب سيور او ممكن يكون حاجه تانيه ( لاني ممكن اشتري سيورها واروح لواحد يركبهملي علطول )
علما باني مغيرتش السيور من اول ما جبت العربية
ولما اغير السيور لازم اغير الاتنين مع بعض ( سير الدنموا والتكييف "اعتقد غالبا العيب فيهم" و سير البور ) ولا اغير اللي فيه العيب

وبما اني جبت سيرة البور
هو زيت البور بيتغير ولا بيتزود وكل اد ايه ( علما بانه موصلش لغاية علامه ال ميني(
نفس السؤال بالنسبة لزيت الفرامل ؟؟

وبما اني جبت سيرة الفرامل
انا بسمع صوت واير الفرامل تقريبا وانا بدوس فرامل
كده يكون العيب منين وهل الواير محتاج يتشد او يتشحم ولا المشكله مش مشكله واير اساسا


عندي سؤال كمان برضه : هو يعني ايه تربيط عفشه وهل هي حاجه روتينيه بتتعمل كل فتره

ونفس الكلام بالنسبه للوزن والترصيص وهل اوزن وارصص علما بان الكوتش عندي ماشي 90000 كم (( ايوه الفبريقه بتاعها )) والعربية فيها حوده مع السرعات ولا محتاج اغير الفرد اللي عندي الاول وبعد كده اوزن وارصص



اخر حاجه الكلام ده كله مين نضيف في اسكندريه ممكن اعمله عنده لاني عمري ما اتعاملت مع ميكانيكيه
ومتخوف من الخطوه دي
ومحدش يقولي التوكيل لاني مش بحب اتعامل معاه


معلش على كمية الاسئلة الكتير
بس اخوكم طمعان في الاستفاده من خبراتكم

[aYaBooY]

السلام عليكم وكل سنه وانتم طيبين

عربيتي كورولا 2005 اوتوماتك ماشيه في حدود 90000 كم

اول مشكله بسمع صوت عالي اول ما ادورها واتحرك بيها او اول ما اشغل التكييف ( صوت يشبه الصريخ )
وتقريبا الصوت ده بيختفي لما العربيه تسخن

كدة السيور عاوزة تغير و يفضل لو انت مغيرتش اي سير من ساعة ما جبت العربية انك تغير طقم سيور و خصوصا سير الكاتينة و ده تشتريه و تغيره عند التوكيل علشان يتعمل مظبوط و يا ريت تعجل بتغيرة علشان ده بيتغير على عدد كيلومترات معين و لو لا قدر الله اتقطع و انت ماشي الموتور هايفرم نفسة و هايكلفك كتير اوي و برده لو اتركب غلط هايبقي اضرارة كتير علشان كدة بنفضل التوكيل اما باقي السيور من اي حتة و تتركب في اي حتة مجرد سير بدون ظبط

وبما اني جبت سيرة البور
هو زيت البور بيتغير ولا بيتزود وكل اد ايه ( علما بانه موصلش لغاية علامه ال ميني(
نفس السؤال بالنسبة لزيت الفرامل ؟؟

زيت الباور و الفرامل المفروض يتغيرم كل فترة حسب ما محدد في كتالوج السيارة بس العادة المصرية انهم بيتزودوا بس لو نقصوا

وبما اني جبت سيرة الفرامل
انا بسمع صوت واير الفرامل تقريبا وانا بدوس فرامل
كده يكون العيب منين وهل الواير محتاج يتشد او يتشحم ولا المشكله مش مشكله واير اساسا

رجاء تعريف واير الفرامل لو قصدق فرامل اليد ليها واير و لو تقصد دواسة الفرامل احب اضيف ان ملهاش واير ديه مش عجلة فرجاء الاستفاضة في وصف الصوت

عندي سؤال كمان برضه : هو يعني ايه تربيط عفشه وهل هي حاجه روتينيه بتتعمل كل فتره

ونفس الكلام بالنسبه للوزن والترصيص وهل اوزن وارصص علما بان الكوتش عندي ماشي 90000 كم (( ايوه الفبريقه بتاعها )) والعربية فيها حوده مع السرعات ولا محتاج اغير الفرد اللي عندي الاول وبعد كده اوزن وارصص

موضوع الكاوتش الاول المفروض يتغير على عدد كيلوات معينة و غالبا الي عندك محتاج تغير 90 الف كويس قوي بس لو مش عاوز تصرف كتير ممكن تغير الجوز الاماميين علشان لو لاقدر الله لو واحد جرالة حاجة و انت ماشي بسرعة ممكن تحصل مشكلة و ربك يستر
و طبعا ظبط زوايا و ترصيص بعد التغير اما موضوع تربيط العفشة ده اجراء روتيني المفروض كل 10000 كم او كل ما تحس ان العربية متخلعة من بعضها

اخر حاجه الكلام ده كله مين نضيف في اسكندريه ممكن اعمله عنده لاني عمري ما اتعاملت مع ميكانيكيه
ومتخوف من الخطوه دي
ومحدش يقولي التوكيل لاني مش بحب اتعامل معاه :h_angry[1]:

طبعا انت مضطر تروح التوكيل علشان سير الكاتينة اما موضوع ميكانيكي في اسكندرية ولا اعرفك

معلش على كمية الاسئلة الكتير
بس اخوكم طمعان في الاستفاده من خبراتكم

تسال زي ما انت عاوز احنا اخوات كلنا

[superzok]

عزيزي aYaBooy

اول حاجه اسمحلي اتقدم بشكري وامتناني لحضرتك لسرعة تفاعلك معاي واجاباتك الوافيه

بالنسبه للسيور انا ناوي اغيرهم قريب ان شاء الله
اما سير الكاتينه فهو في عربيتي جنزير وده بيقعد لغاية اكتر من 100 الف كيلو وناس بتقول اكتر ( ايه رايك في المعلومه دي ؟ )

اعزني لان كاتالوج العربية مش معاي فمعظم معلوماتي واخدها من كلام للناس وحضرتك عارف اد ايه المصريين بيحبوا يفتوا

بالنسبه لوير الفرامل مش عارف والله احدد بس بحس بصوت حاجه بتتشد وانا بدوس على بدال الفرامل ( مع اول الدوسه ) علشان كده تخيلت انه واير يعني حاسس ان الصوت في الحاجه اللي بتنقل حركة البدال للفرامل

شكرا مره تانيه على ردك

[aYaBooY]

سير الكاتينة جنزير اتمني ان حد يجزم في الموضوع ده بس هو لو جنزير عادي بيفضل شغال لحد ما الموتور يعمر و بعد كدة يتغير
لو بتسمع صوت زي كبس هواء عادي ده صوت السيرفو بس برده اعتقد ان العزل المفروض يكون كويس في التيوتا

[superzok]

انا لسه جي من مشوار في العربية واخدت بالي ان الصوت بيطلع مع شيلة رجلي من على بدال الفرامل
الصوت مش بسمعه وانا جوه العربية غير نادرا

اخدت بالي والسايس كان بيركن العربية

[SAMEH_FOUAD]

دة صوت عادى جدا ,بيجى بس من بدال الفرامل نفسة ,ساعات بينشف وبيبقى حديد فى حديد بيخبط فى بعض ,مع انى بردة مش عارف يعنى اية حاسس ان سلك بيتشد بس دة رائى على الصوت اللى انت ممكن تكون متخيلة كدة

[Ali_Abdelhamid]

أستاذ Superzok
الصوت اللى بتسمعه من الفرامل عباره عن صوت تكه حديد فى حديد فى حاله ركن السياره او فى شارع فاضى وتدوس فرامل تسمع صوت التكه ؟؟؟ أنا عندى نفس الصوت ده والميكانيكى قال المشكله من المسمار اللى فى ماستر الفرامل ... الغريب انه أول ما يضع شحم على المسار ما أسمع صوت التكه دى لفتره اسبوع او اسبوعيين ... ويرجع تانى الصوت ده ... لو لقيت حل لهذه المشكله يا ريت تبلغنا ... مع العلم أن عربيتى كرولا 2003 اوتوماتيك 1300

[A.Saad]

الاخ سوبر زوق - انا معرفش الاسم -
حاول تشوف جدول الصيانة بتاع العربية
ده ممكن او عربية تانية
هتلاقى ان فيه مواعيد لتغيير
تيل الفرامل
الزيوت
الفلاتر
تربيط العفشة
كدة
دى هتساعدك فى الحفاظ على السيارة

جزئية انك مش بتحب تروح للتوكيل
فيه حاجات يفضل فيها التوكيل لكن ممكن تروح لمركز خدمة معتمد يكون ليه سكعة جيدة

[cyber007]

انا عندى نفس الصوت بتاع السيور دا وسمعت ان المكنه بس عاوزه تتغسل وهيا تتظبط ( انا لسه مغير سيور قريب )

صوت الفرامل كمان مش عارف هوا اللى عندى والا لا ، عندى صوت تزييق كل ما ادوس على الفرامل فى العجله اليمين ورا وصوت خبط وانا بدوس فرامل فى العجله اليمين قدام الصوت عامل زى ما يكون التنبوره مش مساويه وبتحرك الجزء اللى ماسك تيل الفرامل اللى فى الصوره دا بيقولو عليه القضيب المفروض ان فيه جوان ومع انى غيرته برضه الصوت مش راضى يروح (خرطت الطنابير وغيرت التيل وغيرت القضيب دا )

[ehab1eg]

بالنسبه للصوت ده غالبا صوت سير الدينامو و التكييف(سير واحد) و ده ناتج ان السير غير مشدود بقوه مما يجعل حركة الدينامو اسرع من حركة السير عند بدء التشغيل(ودي مش مشكله)لانها تختفي بمجرد ضغطه صغيره علي دواسة البنزين لتسريع الدوران .
اما زيت الباور فلا يقل الا نتيجه تسريب و ده ممكن تلاحظه بوجود بقع زيت علي طلمبة الباور فلا حاجه لتزويده الا اذا وصل لعلامة الحد الادني الموجوده علي القربه.
اما تربيط العفشه فهو حاجة روتينيه ممكن تعملها كل 30 الف كيلو ب 20 جنيه او لو مشيت في مكان غير منتظم لفتره (مدق مثلا).
اما الوزن و الترصيص فيجب القيام بهم كل 20 الف كيلو مع عمل تصليبه للعجل بمعني وضع الامامي يمين مكان الخلفي يسار و الامامي يسار مكان الخلفي يمين .
اما موضوع الفرامل فأنصحك بالكشف علي تيل الفرامل عند الميكانيكي ولكن 90 الف بدون تغيير التيل هي مسافه كبيره جدا
و شكرا

[aYaBooY]

.
اما تربيط العفشه فهو حاجة روتينيه ممكن تعملها كل 30 الف كيلو ب [gdwl]20[/gdwl] جنيه او لو مشيت في مكان غير منتظم لفتره (مدق مثلا).

خير تربيط العفشة على كوريك رفع للعربية بالكامل بـ 10 و لو هاينزل يربطها بكوريك عادي بـ 5 جنيه

[Ali_Abdelhamid]

الأخ superzok و cyber
انا غير المسمار ( القضيب اللى أنتى قولت عليه يا سايبر ) انا نزلت الحرافيين وجبت المسمار ده من ما ستر فرامل اصلى ... وروحت للميكانيكى وركبته فعلا ... ومجرد ما مشيت شويا ظهر الصوت تانى ... انا مش عارف أعمل ايه ؟؟؟

[Ali_Abdelhamid]

ما فيه حد عارف يحلنا هذه المشكله ؟؟؟