الكاوتش والجنوط ومقاستهم

[yahiahelaly]

بسم الله الرحمن الرحيم
من غير تريقة على قد ما عندي الي حد ما خبرة بلعربيات مهما كانت صغيرة الا اني ميح في موضوع مقاسات الكاوتش
يعني انا خبرتي كلها تندرج ان مقاس كاوتشي بتاع الاكسنت 13 طيب ممكن اكبر الجنوط والكاوتش طبعا لغاية 15 ولو 15 او 14 هيبقى مقاس الكاوتش كام على كام على حسب ما بشوف ويا ريت الارقام دية تدل على اية
وبعدين انا على حسب مفهمت من المنتدى هنا العامل الاساسي في التاثير على العفشة هوة وزن الجنط مش حجمة طيب وانا بشتري الجنط اعرف وزنة ازاي اوزنة مثلا ولا بيبقى مكتوب

[Hosam_Optrawy]

ياباشا محدش بيتريق على حد

كلنا بنحاول نساعد بعض بالمعلومه اللى نعرفها

ونتعلم ونستفيد معلومات من خبراء المنتدى

انا برضه زيك كنت ميح فى حاجات كتير قبل ما اشترك فى المنتدى

عموما عشان مطولش عليك

بالنسبه للكاوتش والجنوط

انت قلت عندك كاوتش وجنوط مقاس 13

اول حاجه لازم تبقى عارف مقاس الكاوتش عندك كام بالظبط

ودا بيبقى مكتوب على الكاوتش

هنفترض مثلا انه 175 / 70 - 13

ال 175 هو عرض الكاوتش



ال 70 هو سمك الكاوتش



ال 13 هو قطر الجنط بالبوصه يعنى حوالى 33 سم



المقاسات دى بتدى ارتفاع معين للعربيه المفروض انه ميتغيرش

عشان العربيه ولا تعلى ولا توطى وتديك نفس قراية العداد ومتضرش العفشه

عشان كدا لما تيجى تغير الجنوط بجنوط أكبر

لازم تراعى ان مقاس الكاوتش الجديد يدى نفس الارتفاع

يعنى مثلا لو عايز تغير بجنوط 14

دا معناه ان قطر الجنط هيزيد ( اللى هو 33 سم ) هيبقى حوالى 35 سم ونص

قبالتالى لازم تقلل من سمك الكاوتش ( اللى احنا افترضنا انه 70 ) يبقى 60

وبالتالى العرض لازم يزيد ( اللى احنا افترضنا انه 175 ) يبقى 185

عشان يبقى القطر الاجمالى ( الجنط + الكاوتش ) يبقى هو هو بالظبط

وبالتالى هيدى نفس ارتفاع العربيه

أرجو انى أكون أفدتك

وكل سنه وانت طيب رمضان كريم

[yahiahelaly]

بارك الله فيك

[mahmoudbadr]

الموضوع ده فيه ملف لكل ما تريد معرفته عن الاطارات

http://www.nilemotors.net/Nile/92413-a.html

[yahiahelaly]

متشكر ليكوا بس انا ليا كام سؤالين
1-ينفع اركب جنوط 15 على الاكسنت الشكل القديم ولا هيضر العفشه
2-لو كدة اجيب كاوتش مقاس كام وهل كاوتش السرعات ده مفيد فعلا

[mtageldeen]

متشكر ليكوا بس انا ليا كام سؤالين
1-ينفع اركب جنوط 15 على الاكسنت الشكل القديم ولا هيضر العفشه
2-لو كدة اجيب كاوتش مقاس كام وهل كاوتش السرعات ده مفيد فعلا

إتبع تعليمات صانع السيارة وستجدها في كتيب الصيانة أو في الإستيكر ملصق علي القائم أو داخل درج التابلوه.

وإبتعد تماماً عن أي مقاس مخالف للمقاسات المتعددة التي ينصح بها صانع السيارة لأنه سيضر بالسيارة.

[l0new0lf]

دا بيبقى مكتوب على الكاوتش

هنفترض مثلا انه 175 / 70 - 13

ال 175 هو عرض الكاوتش



ال 70 هو سمك الكاوتش



ال 13 هو قطر الجنط بالبوصه يعنى حوالى 33 سم

مش بالضبط

70 ده معناها ان الارتفاع = 70% من عرض الكاوتش

يعنى فى المثال بتاعنا ده ارتفاع الكاوتش هيكون 0.7 * 175 = 122.5 مم

[Hosam_Optrawy]

مش بالضبط

70 ده معناها ان الارتفاع = 70% من عرض الكاوتش

يعنى فى المثال بتاعنا ده ارتفاع الكاوتش هيكون 0.7 * 175 = 122.5 مم

كلامك مظبوظ

ال 70 فى المقاس ده 122.5 مم فعلا يعنى حوالى 12 سم

هو انا قلت حاجه تانيه غير كدا ؟

انا قلت ال 13 بوصه حوالى 33 سم مقولتش حاجه تانيه

وبالمره كمان

ال 175 يعنى 17.5 سم

واجمالى طول الكاوتش بالجنوط 57.5 سم

[SAMEH_FOUAD]

الاكسنت اخرها 14 اكتر من كدة هايحك فى الرفرف والكارتيرة واى حمولة هتلاقى الكاوتش بيتاكل ,ثانيا هيخليلك العربية بدبدب فى اى مطبات

[yahiahelaly]

الاكسنت اخرها 14 اكتر من كدة هايحك فى الرفرف والكارتيرة واى حمولة هتلاقى الكاوتش بيتاكل ,ثانيا هيخليلك العربية بدبدب فى اى مطبات

شكرا لرد حضرتك بس ده عن تجربة ولا معرفة بابعاد العربية ولا اجتهاد اسف لوكنت بتقل عليك

[elmashboh]

كان نفسى ارد بس انتو جبتو من الاخر فعلا شباب المنتدى بتاعنا من الاخر ناخد بيه كأس العالم ههههههه

[SAMEH_FOUAD]

والله يباشا مش اجتهاد ولا حاجة
انا اديتك المقاس اللى يخليك راضى عن اداء السيارة فى المطبات ,ويخليها فى نفس الوقت كويسة فى المطبات ومش بدبدب
لكن لو هاتركب 15 هاتضطر تقلل فى ارتفاع الكاوتش عن سطح الارض ,ودة هيخلى العربية ناشفة اوى فى المطبات,دة غير ان مع الحمولة الكاملة للسيارة هتلاقى الكاوتش بيحك فى الكارتيرة ,
ودة عن تجربة مع سيارة صديق واضطر يجيب علايات ,واصلا المقاس الطبيعى للسيارة 13 ,ودة هتلاقية فى كتالوج عربيتك
وانت وراحتك لو مش هامك موضوع الراحة فى المطبات يبقى ركب براحتك ال15

[nyzo]

What about VERNA?? What is the maximum rims size for VERNA and what's the maximum width size??

[Evil]

yea plssssssssss i wanna know too the max size of verna ??
thanxx

[SAMEH_FOUAD]

الفيرنا بيركب جنط لحد مقاس 16 بس بتجيب كاوتش لو بروفايل ,ودة بيخليها ناشفة جدا فى المطبات ,بس قصاد كدة بيبقى الكاوتش دة عمرة قصير جدا بالنسبة للكاوتشات العادية بس بيديك ثبات اكتر ,عشان قرب المسافة بينة وبين سطح الارض ,