مشكله فى الاكسنت

[hesham69]

ازيكم يا احلى اعضاء وعاملين ايه

يارب بخير


فى مشكله فى الاكسنت 1300 سى سى العربيه على سرعات عاليه بتسخن يعنى تعدى 120 وتفضل شويه تلاقى عداد الحراره بيعلى وبيزيد وياسلام لو جبت الخامس يزيد كمان اكتر ولو نزلت من السرعه ديه ورجعت مثلا 100 حتى لو ماشى على التالت تلاقى الحراره رجعت لطبيعتها

علما ان حاله العربيه بسم الله مشاء الله حلوه والميكانيكى قالى الماتور مظبوط وتمام وكشفت على الشكمان برضو قالى مظبوط ياترى العيب ده من ايه ياريت الرد لان زهقت واعرف ان العربيه ديه مع ناس كتير وبتجرى وزى الفل من غير سخنيه ولا كده

التجارب ديه على فكره سواء مشغل التكييف ولا لا

لكن فى السرعات العاديه وفى داخل وسط البلد مفيش مشاكل

مستنى الردود عشان اشوف حل للمشكله المقرفه ديه

[samirayad]

سلك الردياتير وأغسل دورة التبريد كويس وجرب

[HeMa_LanCeR]

انا عندي شك في طرمبه المياه
حاول تعمل زي ما الاستاذ سمير قالك
وقلنا النتيجه ايه؟

[hesham69]

شكرا يا استاذ سمير ويا هيما

بس هو لو فى مشكله فى الردياتير مش المفروض تقصر فى المشى العادى وعلى السرعات كمان يعنى العربيه وسط البلد وكده ولحد 100 تمام لكن بعد كده بتسخن وكمان الردياتير المايه بتاعته مظبوطه مش بتنقص


وياترى عشان اسلكه لازم بقى يتفك وكده والشغلانه بتاعه الصنايعيه ديه ولا ايه وبالنسبه لغسيل دوره التبريد ازاى يا استاذ سمير الى بتتعمل فى البنزينه ؟

[samirayad]

لا لما يكون فيه مشكلة سدد فى الردياتير بتكون كمية الميه اللى بتعدى فى المواسير قليله
ومع السرعه بتتراكم الحراره على المكنه

حأسألك سؤال علشان نجيب من الآخر

مش برضه أنت بتستعمل ميه من الحنفيه

لو الأجابه نعم.....يبقى جرب اللى قولتلك عليه
طيب لو الأجابه لا ....يبقى أنسى كلامى الأولانى

[hesham69]

تمام يا استاذ سمير انا هعمل غسيل للدوره النهارده وفعلا المياه مصديه هروح بنزينه واغسل الدوره كويس واحط مايه خضرا احسن برضو بس هل فى بنزينه معينه موبيل يعنى ولا شيل ولا ايه عشان شيل سمعت انهم مش كويسين

[hesham69]

يا استاذ سمير انا روحت النهارده غسلت الدوره بتاعه التبريد كلها فى البنزينه وكمان حطيت المياه الخضرا وطلعت جربت وعديت ال 100 برضو والعربيه سخنت برضو ولما اهدى تتعدل تانى ياترى ايه المشكله دلوقتى ؟

هل الشكمان مكتوم ولا ايه الميانيكى بيقولى الشكمان ممكن يكون مكتوم وهو ده الى بيسخنها فى السرعه العاليه

[zocor742]

افضلك تعمل صيانة وتنظيف الدورة والريداتير
واستخدم مياة خضرا افضل بكتير وبتحافظ وانسى الصدأ بس اتأكد من نوع المياة الخضراء عشان لو مضروبة هتبوظ الدنيا

انا كنت حسيت ان المياة بتنقص بسيط بصيت على الريداتير لقيت الخزنة بتاعتة هتصدى وبتطلع قطر مية
روحت لواحد بتاع ريداتيرات محترم
غسلت الدورة كويس جدا و قربة المياة بقت شمع وبالمرة السربتينة ومش هقولكم على البلاوى اللى كانت بتطلع وغيرت الخزنة طبعا
وبعد ما اتأكدنا ان الدنيا بقت زى الفل حطينا مياة خضرا امريكى مش عاوز اقولكم حاسس ان المتور بقى مرتاح اكتر والحرارة اهدى
انا عملت الموضوع دة كنظافة بس بجد جة مصلحة وبفايدة
يعنى ياجماعة المفروض نتابع كل حاجة نعملها الصيانة الازمة قبل ماتقلب وتفتح

[hesham69]

يا جميل انا فعلا عملت غسيل للدور بتاعه المياه وبرضو حطيت مياه خضرررررا وبرضو نفس المشكله

[zocor742]

للاسف مش هقدر افتى انا قولت العملية هتنحصر على قد نظافة الدورة تكون مش سالكة كويس
بس حضرتك اتأكدت من كفائة طرمبة المياة
تابع مع الاعضاء وان شاء الله هتكون حاجة بسيطة وتابع الموضوع مع ميكانيكى بيفهم
بس بجد حاجة رخمة انك وانت ماشى تلاقى الحخرارة بتعلى وبتنزل خير ان شاء الله

[aYaBooY]

مشكلتك ديه محيرة بس تعالي نتامل ايه ممكن يكون السبب بما ان المشكلة بتحصل على سرعات عالية بس و واطيه لا يبقي نستبعد دورة التبريد نهائي ليه علشان دورة التبريد مع السرعات العالية بتعتمد على الهواء المصطدم بالريداياتير و الموتور من الخارج للتبريد اما في السرعات البطيئة بتعتمد على المروحة بس علشان تبرد المياه فاكيد مش طبيعي المروحة تبرد و الهواء السريع لا
طيب نيجي لموضوع طرمبة المياه و ديه ممكن تكون السبب اه ليه ممكن تكون كفاءة الترمبة بتقل مع السرعة ده احتمال بس محتاجين ايجابة من مهندس سمير عياد ممكن تفضل الطرمبة شغالة كويس في السرعات المتوسطة و تبداء تقصر في امداد الموتور بالمياه مع السرعة العالية و ان كان الموضوع مش مقنع اوي بس انا شايف انه ممكن
طيب نيجي لطرمبة الزيت هل الي ميشي على حسب الله يمشي على عبعالله يعني الي فرضتة على طرمبة المياه ممكن يكون بيحصل مع طرمبة الزيت بس اعتقد ان لمبة الزيت المفروض تنور
ممكن برده يكون فيه مشكلة مع جوان وش السلندر بس بسيطة و مع الضغط العالي من السرعة بتظهر المشكلة
ولا تكون كل المشكلة عيب في طقم الدبرياج و فيه احتكاك عالي بين الفلام و الاصطوانة ينتج عنه حرارة يصعب على منظومة التبريد استيعابها

[hesham69]

ان شاء الله انا هروح بكره لميكانيكى واحد بيشكر فيه جدا وقالى انه هيعرف العيب من ايه ويارب يحل المشكله ديه لانى بجد مخنوق منها وربنا يسهل ونشوف ايه الحل

[samirayad]

طيب حقولك على حاجه حتعملها يا أستاذ : هشام
وجربها قبا مانروح جهة الطلمبه أو التاكيهات مثلا

خللى الميكانيكى يشيلك الثرموثتات بتاع المكنه
وأطلع أعمل مشوار وجرب الحراره مع السرعه
لو الوضع أتعدل ....يبقى غير الثرموثتات

[hesham69]

استاذ سمير انا فعلا واحد قالى شيل الثرموثتات الى فى الكوعه

وشلتها فعلا وقولت خلاص بقى المشكله اتحلت لان الميكانيكى قال احنا اصلا بنشيلها فى كل العربيات ديه لانه معموله عشان تسخن العربيه فى الجو البارد

وجربتها ولسه الموضوع زى ما هو اول لما تجيبى 100 وتفضل ماشى عليها شويه فيما فوق او تجيب الخامس تلاقى الحراره ارتفعت ولما تنزل السرعه تنزل عادى

ياريت حل يا استاذ سمير ويا كل اعضاء المنتدى لانى بجد خلاص اتخنقت من الحوار ده

وعلى فكره اخر العربيه 150 وطبعا جت ونزلت بسبب السخونيه ومش معقوله الاكسنت ده اخرها ولا ايه

[hesham69]

انا شلتها فعلا الى فى الكوعه ولسه الموضوع زى ما هو اول لما تبتدى تجيب ال 100 وتفضل ماشى شويه او تعديها وتجيب الخامس تلاقى برضو العربيه بتسخن ياريت حل يا جماعه