هل يجب تشحيم بلية الدبرياج؟

[أبو_يوسف]

السلام عليكم .. الأعضاء الكرام..
عندي سؤال .. هل يجب تشحيم بلية الدبرياج عند تركيب طقم دبرياج جديد؟
هذا رأي الميكانيكي ولكن التوكيل يرى غير ذلك على اساس ان الطقم جديد..
مع العلم اني اعاني من مشكلة قد تكون بسيطة الا وهي وجود رعشة في دواستي البنزين والدبرياج..
ولكم جزيل الشكر..

[samirayad]

نعم يجب ويفضل تشحيم الظرف الداخلى لبلية الدبرياج بشحم متعدد الأغراض عند تركيب طقم دبرياج جديد وذلك لتسهيل الحركه التردديه
للبليه على دليل أو جلبة البليه المركبه على مدخل الفتيس
وعملية تسهيل حركة البليه تكون أثناء فصل ووصل الدبرياج

[أبو_يوسف]

طب يا بشمهندس سمير هل عدم التشحيم دا ممكن يكون السبب في الذبذبة اللي في الدواسات دي؟

[samirayad]

لا هو عدم التشحيم بيأثر فقط على سهولة حركة البليه
أما موضوع الدواسات ده أكيد ليه سبب آخر
ومع توضيحك للظاهره بدقه شديده
حنقدر كلنا بأذن الله من تصور العيب سببه أيه

[أبو_يوسف]

طب معلش سؤال تاني .. ايه الفوائد اللي هاتعود علي من سهولة حركة البلية .. لان حضرتك عارف اني هاحل الفتيس كله وكدا ..

انا عندي الفتيس احيانا نقلاته بتبقى صعبة كدا وبيعاكس شوية... هل التشحيم ممكن يعالج حاجة زي كدا؟
شكرا لاهتمامك :)

[samirayad]

التشحيم لتسهيل حركة البليه
وملوش دخل بصعوبة النقل
وغالبا السبب عندك يرجع لعيب فى الديسك
ومع عمرة الدبرياج حتتحل مشاكلك

[aymansaad]

طبعا لازم تشحيم البلية كل فترة

[أبو_يوسف]

التشحيم لتسهيل حركة البليه
وملوش دخل بصعوبة النقل
وغالبا السبب عندك يرجع لعيب فى الديسك
ومع عمرة الدبرياج حتتحل مشاكلك

الديسك أصلي من التوكيل
والطقم كله مكملش 3000كم بس صعوبة النقل اصبحت اقل من قبل تغيير الطقم ولكن برضه في بعض الصعوبة وبحلها بأني قبل مانقل امور وارجرج الفتيس كدا وبعدين انقل..
عمرة الدبرياج يعني تغيير الطقم؟

[samirayad]

طيب شوف
أحتمال يكون العيب عندك فى جلبة دليل البليه
بتبقى راكبه فوق بلية عمود الدريك بتاع الفتيس
علشان بلية الدبرياج ترجع مظبوط عليها
وأنت بتشد البليه بالشوكه وأنت دايس على الدبرياج
وبكده حركة البليه فعلا مع وجود صعوبه فى أرجاع البليه بالشوكه
تعملك صعوبه فى النقل
دا لوكان قميص (دليل البليه) مش مظبوط فعلا

على فكره القميص بتاع توجيه حركة البليه ده بيتشحم من بره
زى البليه مابتتشحم من جوه الظرف بتاعها لتسهيل الحركه بينهما وقت سحب البليه بالذات

وأدى المنظر المقصود

البليه فوق مشرشرعمود الدريك
والجلبه (القميص ) المقصود راكب حواليه شوكة سحب البليه

[أبو_يوسف]

الله ينور يا هندسة :)
ان شاء الله اعمل المشوار دا.. لان الميكانيكي نصحني برضه بتشحيم البلية واقوله على موضوع الجلبة ولو ان الكلام شكله كبير اوي يا بشمهندس

[أبو_يوسف]

نسيت اقول حاجة يا بشمهندس
والعربية دايرة بس واقفة النقل بيبقى سهل الى حد كبير مفيش مشكلة..
مشكلة صعوبة النقل بتظهر بس والعربية ماشية..

[samirayad]

متهيألى عربيتك موديلها قديم شويه
وعندك بلى الفتيس خفيف شويه
وقد يكون عندك ونه بسيطه فى الفتيس
وعامله شوية بوش على بلى عمود الدريك بالذات
وعلشان كده لو عملت المشوار اللى قلنا عليها
حتتحسن معاك عمليات النقل وأنت ماشى بالعربيه
وأذا كان عندك صوت ضوضاء عاليه صادر من الفتيس
قول عليه برضه
لأن موضوعك حساس فعلا

وياريت برضه تبقى تبين نوع العربيه وعداد الكم عامل كام

[samirayad]

سورى على التسرع شويه فى السؤال عن موديل السياره
وأنا جبته فعلا

السيارة سيراتو 2006 عاملة 70 الف

يبقى خلينا برضه فى المشوار أياه ونجرب
وأن شاء الله خيرا

[أبو_يوسف]

لا يابشمهندس مفيش ضوضاء أو يمكن انا مش فاهم المقصود بس مفيش صوت عالى بيصدر اثناء النقل..
النقل احيانا بيكون بالزق واحيانا النقلة تمشي بس في نص المشوار بيكون في عائق او مطب..كأن الفتيس بينط من عليه :)
وفي حاجة لاحظتها اني لو اخدت النقلة براحة وبحنية كأني بامسك الفتيس من الأول احطه في التاني كأني شايله .. مبحسش بالمشكلة.. بس الكلام دا عايز روقان في السواقة:) وبرضه بعد مارجرج الفتيس او اموره..
اللي فهمته يا بشمهندس اني اشحم البلية والجلبة.. تنصحني بحاجة تانية اعملها او اكشف عليها..
طلب كمان لو تعرف ميكانيكي كويس قريب من مدينة نصر..

[samirayad]

اللي فهمته يا بشمهندس اني اشحم البلية والجلبة.. تنصحني بحاجة تانية اعملها او اكشف عليها

نعم وأبقى خللى الميكانيكى يكشف برضه كويس على وش الفلام اللى بيعشق مع اسطوانة الدبرياج المقابل له

طلب كمان لو تعرف ميكانيكي كويس قريب من مدينة نصر..

للأسف مش حقدر أفيدك فى النقطه دى
والبركه فى الزملاء
لأننى مقيم بالأسماعيليه