ممكن تجيب ميكروباص و يكون هو سيارة العائلة؟

[M!NA]

يا جماعة انا عارف اني عملت استطلاع ممكن يبان انه مشابه لده ... لكن هو مختلف في حاجة جوهرية جدا...

ان الميكروباص ممكن يترخص ملاكي لو شلت منه عدد الكراسي الزيادة من 7

بكده هيكون معاك عربية صناعة ياباني... 2500cc تيربو ديزل... حمالة أسية... تكييف تحفة... مساحة تخزينية ممكن تحط فيها سرير من وسعها (بعد ما تشيل الكنبتين اللي ورا)

او حاجة زي هيونداي اتش وان....نيسان... و غيره كتير...

قطع غيار مرمية في كل حته.... و كمان رخصة ملاكي...

ها؟؟ كدا ممكن تقدم عالخطوة؟؟ و لو لأ... ايه اللي هيكون السبب؟؟

[Mzeid]

أقسم بالله العظيم كنت لسة هطرح الفكرة دي و الله لأن أنا فكرت في الفكرة دي و لقيتها فكرة هايلة جداَ جداَ ..
:):)

[dr_3eshoo]

رخصه ملاكي ادفع الجمارك بى و عيش حياتك شوف بقى هاتبقى بكام و شوف ضريبه 2500 سي سي هاتبقى بكام ساعتها هاتنقل على مرسيدس زيرو او بي ام او بسات علشان مش ببقى ببالغ
بس كا فكره تستاهل خصوصا لو سفرك كتير و مسافات بعيده

[Mzeid]

هو تقريباَ التويوتا الموديل السياحي أبو سقف عالي ( تقريباَ ) ب 180 بس مش عارف ينفع يترخص ملاكي بالتخليص الجمركي بتاعه الحالي و لا لأ لو حد يعرف يا ريت يفيدنا ..
:):)

[alaa_dash]

اللي اعرفه ان الهيونداي 1 H ب 110 تقريبا بدون جمارك ..سياحة يعني ..
مش عارف ايه نظامه لو ملاكي ..
مستر هاني 180 دول و يترخص ايه؟

[marsguy]

بصراحه أنا مش ممكن أعمل كده

عشان الميكروباص كراسيه ضيقه ومكربسه في بعض.

وكمان الميكروباص مش عالي أوي وما فهوش ميزه جامده عن العربيه السيدان.

يعني الأماكن اللي مش هاتعرف تروحها بالسيدان مش هاتعرف تروجها برضه بالميكروباص، يعني مش هاتعرف تطلع بيه الصحراء ولا هاتعرف تروح بيه أي منطقه وعره.

[sa3dawy]

سعرة مبالغ فية
طيب مانا لية ماجبش بيجو 307 sw اكيد احسن فى استهلاك البنزبن و1600 فى الترخيص وكمان محدش هيقول عليك راكب ميكروباص
او ممكن ميجان استاشن او فورد فوكاس sw
دى كلها حاجات جامدة لواحد عايز مساحة وكدا

[hero]

انا اخترت لا للاسباب الآتية:
1-المكروباص هايبقي كبير قوي علي عائلة 5 افراد حتي ...
2-ركوبة متعب ومش مريح بالمرة....وصوت الموتور ايلي تحت السواق هايكون مصدر قلق وازعاج للركاب
3-شكل المكروباص وحجمة لا يليق مع كل مناسبات الخروج ..يعني ما ينفعش امشي بية في زفة ولا حتي اروح ازور واحد صاحبي ....دة عايز رحلات زي السفاري او رحلات خلوية في حدائق مفتوحة....والثقافة دي مش موجودة في مصر....
4- انا مش لاقي مكان اركن فية عربية صغيرة ...زي الياريس ولا حتي امشي بيها براحتي...يبقي اروح اسوق عربية طولها 5 ولا 6 متر وعرضها 2 متر...وشغلانة...طيب هاتركنة فين دة....دة عايز جراج عربيات كبير...
5-بناءا علي ما تقدم في النقطة 3 ...هاتحتاج شراء عربية تانية تليق بالخروج المحترم ..وبرضة عربية صغيرة للمشاوير داخل البلد والزحمة...

[Moh.Fahmy]

ممكن بس بشرط ما تدخلش بيه ميادين عامة الساعة 2 ظهرا عشان الناس ما تهجمش عليك
و برضه ما يكونش فارق معاك المعاملة اللي مش و لا بد اللي ممكن تلاقيها في محطات البنزين و في المرور و يكون عندك استعداد انك تتنازل شوية عن برستيجك يعني مثلا و انت ماشي و لقيت حد عايز يعدي الطريق ووقفتله عشان يعدي و يقولك شكرا يا اسطي




محمد فهمي

[Sameh]

:) إيه الهجوم ده كله على فكرة الميكروباص

طيب ما إنت مش لازم تجيبه لونه أبيض وبخط أزرق يعنى :) تخيل لونه أزرق بالكامل أو دهبى أو سماوى مثلاً ، يعنى ألوان مش مألوفة فى الميكروباص الأجرة ، وبعدين مش هتكتب عليه 14 راكب ولا ميدان الجيزة ولا البرنس لما يدلع يخلى الأسفلت يولع ولا حاجة من دى (بس ممكن الحلوة تفاحة للسفر والسياحة) ، وبعدين ممكن تركبله زينون وبدل الشبكة المعتادة اللى فوق تركب صندوق اللى زى القارب ده شكله محترم وإنسيابى وشيك أو ماتركبش خالص :)

طبعاً محتاج إنك تتجاهل شوية نظرات الناس ، يعنى تصور إنك لابس بدلة ونازل منه !

عادى يعنى مش هجوم ، أصلا فيه مزايا غير اللى ذكرتموها ومش فى السيدان ، زى الخصوصية ليك ولأسرتك ولأطفالك ، وزى الأمان أكتر فى حالة الحوادث لا قدر الله ، زائد الديزل رخيص شوية

بالمناسبة هو هيتعامل جمركياً زى العربية بنزين 2500 و 3000 ؟ ولا الديزل ليه شرائح مختلفة ؟؟

لو زيه زى البنزين ، يبقى إنسى كل اللى أنا كتبته والأخوة وإقفل الموضوع من دماغك ومن المنتدى ومن الدنيا لأن مش معقول تدفعله 10% تجديد ترخيص كل شوية !!

[MoToRiZeR]

لا معتقدش .. مبحبش الميكروباص
يعني عربية بيك اب اوكي .. انما موقع السواق في الميكروباص بيخلي مجرد التفكير في حادثة مرعب (انت اول حاجة في العربية ! يعني ميت ميت مفيش امان خالص) .. انما في البيك اب و العربيات العادية اهو فيه حاجات بتدشدش علي بال ما الحاجة اللي خبطت فيها توصلك .. و بتبقي امتصت جزء كبير من الصدمة

موضوع امان و راحة

[medozaed]

انا عايز اعرف امان ايه الى فى المكروباص دانتا بتبقى راكب امام العجله الاماميه وحاطط رجلك على سدر العربيه يعنى لاقدر الله لو حصل اى حادثه او حاجه معا السلامه هو فى حل انك تتدرب زى سواقين المكروباص انك اول ماتشم ريحه خطر تفتح الباب ويافكيك

[tutankhamoun]

صوتي هو لا
لا وجود للأمان للركاب الأماميين
لا وجود للبرستيج ( متنساش أنت في مصر )
محدش عنده عائلة كبيرة قوي كدا علشان يستاهل يشتري ميكروباص
استهلاكه هايكون عالي علشان الموتور كبير بالإضافة إلى إن أسعار الوقود في ازدياد مستمر
مصاريف تسجيله عالية
سيارة كبيرة الحجم و صعبة في الركن
و البديل هو السيارات الكارفان أو الفان

زي كيا كارفان و ستروين بس مش فاكر اسم الموديل
و ده طبعا للعائلات الكبيرة اللي فوق 4 أفراد
و برضه أستخدامه غيره عملي لأن العربية مش بتتحمل بالعائلة كل يوم

يبقى العربية اللي 1600 أفضل خيار للعائلات الكبيرة و التي تكون بحجم السيدان أو الاستاشين
و العربية التي أقل من ذلك للعائلات العادية و التنقلات داخل المدن

[Xpert]

انا فكرت ... بس فكرت اجيب سوزوكي سوبر كاري (لو تعتبره ميكروباص) ... 1000 سيسي و بيجري .. هوه محتاج بس شويه ثبات و يبقي تمام (قليل في الاستهلاك و 1000 سيسي في الضريبه مفيش و حجمه لذيذ كده ...و عامل زي درج الكبريت اللي واقف علي جنبه هههههههعهعهع (و بيجري علي كده!)

[mohamed ibiza]

المنظر هيبقي صعب اوي يعني المفروض في شوية اهتمام بالظاهر مش شرط الاهتمام كله يبقي علي المظاهر بس شوية برضه ميمنعش ميكروباص فكرة لا يمكن اعملها