تويوتا فورتشنر

[ashraf zaky]

برجاء من السادة اعضاء المنتدى مالكى الفورتشنر اضافة تقرير عن السيارة
حيث اننى مقبل على الشراء و فى مرحلة الدراسة
برجاء الافادة عن راحة الركوب .. الثبات على السرعات المرتفعة ..تكاليف الصيانات الدورية..
اسعار قطع الغيار العادية ( فلاتر .. تيل .. الخ ) .. قيمة الترخيص..
و ايضا مقارنة سريعة مع ال kk مو 2011-2013
مع الشكر الجزيل مقدما.
****ملحوظة
انا كنت كتبت نفس الطلب فى قسم التويوتا و لم يرد احد من الاعضاء
يا ترى نفس الكلام هنا برضه و لا.....

[ياسر شقو]

متابع

[ahmed_eng2001]

متابع

و انا كمان متابع معاك

الى يقدر يفيد حضرتك حد يكون جرب الاتنين .... معلوماتى عن التويوتا بوجه عام ... انا اشتغلت فترة فى قطع غيار الهاي لوكس .... قطع الغيار الاصلية غالية ... حشوة الجاز كانت ب 120 جنيه ... تيل الفرامل كان ب 600 جنيه ... دى اسعار السنة الى فاتت .. و دى حاجة الموتور الديزل

لو حد قالك ان حاجة التويوتا رخيصة .زز خده من ايده و روح اسأل على قطع الغيار فى التوكيل ....
احد ميزات / عيوب التويونا .... وجود قطع غيار كتيرة تقليد ... تايلندى و صينى كتير جدا
تيل فرامل الهايلكس الى كان ب 1000 جنيه ... فيه زيه صينى ب 70 جنيه .. و ده الى بيستخدموه بتوع المايكروباصات

للاسف انا سمعت عن قطع غيار رانجلر و كى كى من قترة بس نسيتهم تماما .... انما سعرهم كان غالى جدا برضو

ربنا يوفقك

[ashraf zaky]

الف شكر على رد حضرتك ... انا دلوقتى راكب كورولا 2015 و قطع غيارها فى نفس المستوى أو مقارب للى حضرتك ذكرته ...
يا ريت لو فيه حد جرب الاثنين علشان نقدر نعرف اكثر باقى المميزات و العيوب.

[ahmed_eng2001]

معلومة صغيرة عرفتها .... عرفت ان اسعار السيارة الفورشنر موديل 2017 المجمعة فى مصر .... حوالى مليون جنيه .. ارجو تاكيد المعلومة او نفيها

[man1974]

موديل الشكل الحالي 2017 (القديم) سعره في التوكيل 795 ألف جنيه كاش بالنسبة لـ 6 سلندر، الضريبة السنوية للترخيص حسب قانون المرور الجديد 2.5 في المائة، يعني 20 ألف تقريبا كل سنة، سعة خزان الوقود 80 لتر × 5 جنيه بنزين 92 = 400 جنيه في التفويلة.

[borio1704]

أنا ما جربتش الفورتشنر أو الشيروكي..

ولكن أحد الحاجات المعروفة عن سيارات الـ4×4 عموما إن ثباتها ضعيف وقابليتها للانقلاب أعلى بكثير من سيارات السيدان...خصوصا لما تكون السيارة عالية فعلا ومهاراتها الأساسية تظهر في الطرق الوعرة...

الفورتشنر واحدة من السيارات دي.. مهاراتها الأساسية في الطرق شديدة الوعورة..



فما تفكرش تمشي بيها أكتر من 100 أو 120 على أعلى تقدير... إلا إذا كنت ناوي تركب جنوط من اللي بيخرجوا بره العربية وجنوط 20 بوصة مثلا.. ويا سلام بقى لو نويت توطي العربية شوية.



وحسب البروشور على موقع تويوتا إيجيبت.. الفئات الـ4×4 فيها أنظمة إلكترونية مساعدة...

فيها ABS (عارفينه طبعا) و BA (أو نظام مساندة الفرامل Brake Assistance) .. وده نظام بيزود قوة الفرامل في الحالات الطارئة.. يعني لما تدوس فرامل فجأة وبقوة...
نظام TRC (نظام تويوتا للسيطرة على التماسك Traction Control) وده نظام ما بيخليش العجل يفرك خصوصا لما تيجي تزود بنزين أو أول ما تطلع بالعربية من السكون...
ونظام HAC (التحكم في مساندة بدء الحركة على التلال Hill-start Assist Control) وده نظام ما يخليش العربية تريح لورا لما تكون واقف بالعربية على طريق مايل.. خصوصا لو كان الميل قوي .. وما تنساش إن العربية فتيس أوتوماتيك.

إنما الفئة الـ2×4 مافيهاش أي حاجة إلا ABS بس.

نزل البروشور بتاعها من هنا:

http://www.toyota.com.eg/brochure/fortuner/download

بالنسبة للشيروكي.. ما أتوقعش الكلام يختلف كتير.. بس الموتور المتوفر ليها (6 سلندر 3700 cc) أكبر وبيوفر طاقة حصانية أكبر من الموتور الـ4 سلندر 2700 cc بتاع الفورتشنر (210 حصان للشيروكي مقابل 165 للفورتشنر الـ4 سلندر).. والعزم اللي بيطلعه موتورها أعلى بردو من عزم موتور التويوتا الـ4 سلندر (حوالي 319 نيوتن متر للشيروكي مقابل 245 للفورتشنر الـ4 سلندر )

تقدر تنزل البروشور بتاع الشيروكي من هنا.. بس أكيد مش كل حاجة فيه نطبق على الموجود في مصر..

https://www.jeep.com/en/pdf/2008_liberty.pdf

الميزة الأساسية في تويوتا من وجهة نظري:
1- العربية من إنتاج تويوتا.. يعني اعتمادية وطول عمر..
2- التويوتا أفخم من جوه وأحدث..
3- العربية متجمعة في مصر وبدإت تنتشر.. يعني مش حتغلب في قطع غيارها وصيانتها.. وده كمان غير موضوع قطع الغيار المقلدة اللي مؤكد هتكون متوفرة زي ما قاللك المهندس أحمد ahmed_eng2001 قبل كده، وإن كانت قطع الغيار الأصلية أغلى بس عمرها وأداءها أحسن بكتير.

...