انا ......وقعت ... وإتبهدلت

[omarken]

النهاردة كنت عند عادل الأخرص اللى فى شبرا
كنت بنضف الكربراتير علشان المكنه كانت مكتومه وبتبطل
بعد ما اتظبطت ..... وتمااااااااااااااام
خرجت من عندو ورايح عند جمال عنتر اللى فى دير الملاك اظبط العدادات
وفى طريقى لهناك عديت على بولاق ابو العلا ........... وياريتنى ما روحت هناك
ماشى ..... الطريق واقف علشان فى حاره طالع منها زفه ...... الطريق مشى وانا كنت اول واحد فى الشارع
ماشى طبعا داااااايس .......... طلع واحد من حاره جانبيه بسوزوكى ربع نقل ولا نوور ولا كلاااااااكس حتى ولاقيته فى وشيى ............. قفشت فى الباكم ..........المكنه زحفت لغايه مانزلت تحت العربيه
وانا كمان كنت تحتها بس هوا كمان كان قافش فرامل معاايا الحمد لله مداسش عليا ولا على المكنه
بس مشوفتش أدامى تانى غير بعد 5 دقايق
الإصابات
جلطه فى الكوع حوالى 10 سم
جلطه فى الكتف الشمال من الخلف حوالى 5 سم
والركبه الشمال حوالى 10 سم
غير انى مش عارف احركها اصلا
وزهقت من المكنه وهابيعها لو حد عايزها يقوللى
ومش هاركب وراك يادياب
ومش هاركب بايك تااااااااااااانى ان شاء الله
عيالى محتاجنى كده كفاااااااااااااااااااااايه
كفاااااااااااااااااااايه ........ كفااااااااااااااااايه والله العظيم

[A.Saad]

الف سلامة عليك

[yascro]

الف سلامه عليك يا حبيبى والحمد لله انها جت على قد كده
قدر الله وما شاء فعل
وتعالى اقعد يومين ف اسكندريه استجمام
والبايك فدى ظفرك يا باشا

[NoRmAl]

ألف سلامه عليك يا باشا
ولو ليك فى ركوب البايكس مش هتعرف تبطلها :))
ربنا يشفيك فى أسرع وقت

[hassan_gost]

الف سلامه عليك..وتقوم بالسلامه بأذن الله
ومعلش الحوادث بتحصل..والحمد لله الى هى جت على اد كده

[Mzeid]

الف سلامة عليك و الحمد لله انها جت على كدة
و فداك يا عم البايك
و بصراحة انت كدة خوفتني من الركوب او حتى اني اجرب

[SaberMan]

الحمد لله على سلامتك

[Diablo]

لا اله الا الله الحمد لله جت سليمة وبرضك ياعمر حد يجرى فى شارع زى ده ده شارع زبالة كله عربجية قلتلك اجى معاك الحمد لله ربنا ستر المهم انت قمت بالسلامة
معلومة صغيرة البايك ركوبته متعة بس لو مشيت بحرص يعنى انا افتح بس لو فى طريق سفر لكن لو جوه القاهرة على اقل من مهلى ويولع الى يزمر ورايا

[mtgalx]

الف سلامة عليك و يغور البيك في ستين دهيه المهم انتا سليم و الحمد لله انها جت علي قد كده و فعلاً المفروض متفتحش في شوار ممكن يطلع حد منها من الجنب يعني لو الشارع الي انتا ماشي فيه في شارع جانبي يمين امشي انتا علي الشمال و كلاكس قبليها و لو بليل رعش و يا عم اسمع كلام دياب وتعالي استجملك يومين هنا و متشلش في دماغك و الف سلامة عليك مرة تانية

[cbx]

الف مليون سلامة يابرنس بس صدفنى مش هتفدر تبعد عن الريس .
وبعدين ياسيدى يا ناس بتعمل حوادث بالعربيات هههههههههههه .
الف حمدلله على سلامتك

[zoom2zoom]

والله اول ما كلمني في التليفون اتخضيت عليه وروحتله جري لاقيته مدشمل خااااااااالص بس الحمد لله بقي تمام وياجماعه بلاااااااااااش الجري في الشوارع الضيقه في ناس متخلفه عقليا ممكن تلاقيه رمي عليك فجاه وكل واحد فينا بيقابله مواقف من دي كتيييير اوي وربنا يسترها من الناس والعين والسواقين والتكاتك والعربجيه والتاكسجيه والبوسطجيه اللي اشتكوا من كتر مراسيلي هههههههههههه

[pyramidology]

ألف سلامة عليك
أنا قرأت موضوعك و إستنتجت إنك ماكنتش لابس سيفتي gear غير الخوذة صح ؟

الحمدلله تاني
بس يا جماعة والله الإنسان حياته و جسمه أغلي شيء علي وش الأرض و أصلاً لا يقدر بثمن فمش هقول إلبس الجاكت الجلد عشان حر مصر بالذات في الصيف مع إن في جاكتات جلد للصيف االلى هي ال mesh
ولكن علي الأقل جوانتي جلد و سيفتي للكوع و الركبة و vest زي مثلاً Icon Field Armor Back عشان الظهر و طبعاً العامود الفقرى إللي هوا أساس الجسم كله
زي ده





وده حتي لو الواحد عارف إنه مش هيجري لأن الواحد ما يعرفش القدر ولا هيحصل إيه

و ألف سلامة عليك و تعيش و ما تاخدش غيرها إن شاء الله

[M!NA]

ألف سلامة عليك يا عمر... و خلي بالك و متاخدش ثقة مهما احترفت السواقة....
عشان ديه مالهاش كبير ...

و الحمد لله جدا أنها جت على أد شوية كدمات....

ألف ألف سلامة عليك....
و ابقا طمنا على أخبارك....

[د.محمود صلاح]

لا حول ولا قوة الا بالله ..
حمداً لله على السلامة وقضاء أخف من قضاء ..

يرجى الحرص بالطبع عند قيادة الدراجة النارية وأخذ الحيطة والحذر

[hossaam]

الحمد لله على سلامتك..انا شخصيا بعت اجيب حماية الكوع والركبة..
وان شاء الله موضوع حماية الضهر ده في بالي

واهي اسباب بناخد بيها..والحافظ الله