اكشف على ايه فى Honda Shadow 400 ساعة الشراء؟

[yascro]

ربنا يعزك يا دياب أنا والله حبيت أأكد كلامك فى ناحية ان الميكانيكا لازم هوا اللى يتعامل لأنه طبعا لسه معندوش خلفية فى البايك كبيرة وحبيت افهمه بس الاساسيات

المشكله ان حتى اللى فاهم ممكن يتخم وما يخدش باله ( وحصلت هنا ف المنتدى من فتره)
انما الميكانيكى ده شغله
وشكرا لردك

[yascro]

بصراحة انا مع دياب ان اللي يبص علي الحاجات دي ميكانيكي
وانا بصراحة لفيت كتير علي موتوسيكلات
والضحك علي الناس اكتر بكتير من السيارات وفي حاجات فنية مش اي حد يفهمها والغرامة بتاعتها فلوس جامدة
وبالنسبة لموضوع البطارية المشكلة كانت عندي انا وانا اللي عملت الموضوع وسألت والاخ دياب هو اول واحد يرد و يشخص الحالة
حضرتك كده راجع الموضوع و شوف دياب قال ايه
والله يا جماعة انا لا أعرف دياب ولا عمري شفته
بس بصراحة حاسس ان في تحامل عليه من الاعضاء ليه
بس هو دايما كده الناجح في عمله مش كل الناس بتحبه او تشكر فيه

ربنا يخليك يا باشا

[yascro]

والله انا مش عايز اى القاب ودياب ليه فضل كبير عليا جدا ومحدش يقدر ينكر ده بصراحة انا بعتز بالمنتدى الرائع ده مع احترامى لجميع الاعضاء ومستحيل ان تكون خبرتى كخبرة دياب فأنا بعتبره معلمى بجد

شكر ليك كتير

[hassan14]

بصراحة انا مع دياب ان اللي يبص علي الحاجات دي ميكانيكي
وانا بصراحة لفيت كتير علي موتوسيكلات
والضحك علي الناس اكتر بكتير من السيارات وفي حاجات فنية مش اي حد يفهمها والغرامة بتاعتها فلوس جامدة
وبالنسبة لموضوع البطارية المشكلة كانت عندي انا وانا اللي عملت الموضوع وسألت والاخ دياب هو اول واحد يرد و يشخص الحالة
حضرتك كده راجع الموضوع و شوف دياب قال ايه
والله يا جماعة انا لا أعرف دياب ولا عمري شفته
بس بصراحة حاسس ان في تحامل عليه من الاعضاء ليه
بس هو دايما كده الناجح في عمله مش كل الناس بتحبه او تشكر فيه

انت فعلا بتتكلم صح وانا كمان بنضم ليك انت ودياب لان المفروض الى يشوف الحاجات دى يكون حد دى الشغلانة بتعاته مش أي حد حتى لو كان بيفهم أكيد في حاجات هيشوفها الميكانيكي مش هيقدر حد تانى يشوفها

[tafa17]

انت فعلا بتتكلم صح وانا كمان بنضم ليك انت ودياب لان المفروض الى يشوف الحاجات دى يكون حد دى الشغلانة بتعاته مش أي حد حتى لو كان بيفهم أكيد في حاجات هيشوفها الميكانيكي مش هيقدر حد تانى يشوفها

شكرا لحضرتك
والله العظيم واحد صاحبي يوم الاربعاء نزل لف علي ريس عند كذا واحد انا قولتلو عليهم وزي الشاطر عجبه واحد وراح دافع مقدم حجز ليه والراجل قالو تعالي بكرة خد العقد المسجل والموتوسيكل وتجيب باقي الفلوس
قولتلو جبت ميكانيكي قالي لأ الراجل كان لسه مصلي وقايم من علي السجادة قولتلو ولو ممكن يغلي عليك التمن
وطبعا روحنا تاني يوم الخميس نشوف الريس اللي حجزه طلع حاجز cb4 400 موديل 1997 ,وخلصه ب 18500
واتفرج بقه مبدأيا محتاج 2 فردة كاوتش علي طول
والتاني هو مش نفس شكل الريس من غير فيبر
ومحتاج تظبيط جامد
من هنا الي هنا ظبطنا الراجل وكنا هانمسك في خناقة علشان السعر عالي وان باع حاجة علي الاقل فردة الكاوتش اللي قدام فيها حوالي 10 لحام فتلة والفتلة باينة من الكاوتش واتفقنا مع الراجل ان يجيب فردة كاوتش امامي جديدة ويغير البوجيهات والزيت ويعمله سرفيس والعقد المسجل علي حسابه بال 18500 مع اني حاسس ان التمن الفعلي حوالي 16000 انا بصراحة معرفش تمنه كام بس بصراحة الراجل كان حاسس ان الموتوسيكل تمنه غالي علشان كده غير الحاجت دي علي حسابه
وما خفي كان اعظم لسه هانشوف الموتوسيكل هايبقي فيه ايه تاني
لازم ميكانيكي لازم ميكانيكي حتي لو الموتوسيكل قدامك فابريكة في حاجات ممكن تخليك تلف حوالين نفسك وتكره الموتوسيكل وتكره حياتك
انا علشان غيرت ببطارية صيني زقيت في الشوارع زق واتبهدلت وكن هارمي الموتوسيكل في الشارع وده في الاخر بطارية يعني حوالي 360 جنيه
مابالك بقي لو حاجة في الماتور ولا ...... ولا........... ولا................ ولا ..................هاتدفع كام ده غير تمن الموتوسيكل الاصلي
الموتوسيكل زي العربية ينفع تقول ابص علي ايه في العربية لما اروح اشتريها
طبعا ده اقل حاجة بتروح محطة ترفعها وتقيس كبس الماتور او بتجيب ميكانيكي
عامل الموتوسيكل نفس معاملة السيارة في كل حاجة
بدأ من الشراء حتي الصيانة

[her210]

بص يا باشا
دى تجميعية لطرق فحص البايك عن طريق بعض اعضاء المنتدى ومن خارج المنتدى والكلام طبعا منقول
شوف ميكانيكي ثقه وخده معاك يتفرج عليها واتعلم منه هو هيبص عليها ازاي وهيكشف عليها ازاي
واهم حاجه تتعلم منه الحاجات دي
1- تشيك علي جوانات وش السلندر
2- تبص علي وش الموتور وتبص علي فرق التقفيل من ناحيه اليمين عشان ده مكان ورق الدبرياج لو المسافه باين انها واسعه شوية بيبقي الوش ده اتحل قبل كده . وتبص علي وشوش الموتور اللي مكتوبه عليها هوندا تشوفها متجرحه ولا لا عامله حادثه ولا لا لان الوشوش دي لما المكنه بتقع جامد بتنشع زيت
3- تشيك علي الكهرباء كلها ابتداء من الفوانيس حتي الديل يعني تبص علي العدادات كلها شغاله ولا لا المروحه شغاله علي الترموستات ولا ليها زرار تشيك علي الار بي ام والكيلو وتشيك علي االانوار العالي والواطي والاشارات وتجرب تدورها وتسيبها عشان تشوفها بتقف سرانسيه ولا لا تمام وتشوف مكنه الاستوب كل ده خلي الميكانيكي يقولك عليه سريعا ولو مبصش خليه يتاكد من الكلام ده
4- اركب البايك واقرص علي الغيار شوفه هيرزع معاك ولا لا
5- اول ما تدور البايك تحط ايدك علي مواسير السلندرات عشان تتاكد البوجيهات شغاله ولا لا ولازم المواسير كلها تكون سخنه وعشان تتاكد ان السخونه طالعه منها بل ايدك نقط ميه وانطرها علي الماسوره وشوف النقطه هتختفي بسرعه ولا لا لو اختفت يبقي شغال
6- الفيير طبعا لازم تشيك عليه مرشوش ولا لا في لحامات ولا لا
7-تحط ايدك علي الشكمان من ورا وتمسك دبرياج منغير ما تنقل غيارات وتشوف كده لو سمعت صوت دربكه خفيفه تبقي المكنه عايزه ديسك وورق دبرياج ودي بلاش منها علطول لو بطلت تبقي عايز تعلي السرانسيه ودي حاجه بسيطه جدا .
8- اخر حاجه دي مهمه جدا بس متعملهاش الا لما تتفق عشان مترخمش علي البايع
ترفع التانك وتبص علي حوض الشاسيه عامل ازاي لو سليم مفيهوش اي حوادث يبقي اتوكل علي الله والف مبروك
وحاجات كمان
بس ل cbr وفى حاجات عامة مهمة
طبعا كل اللى بيشترى بايك بيبقى محوش فلوسه بالعافية, ونفسه يجيب حاجة يفرح بيها وتعيش معاه من غير ماتغلبه, وكتير فلوسهم بتضيع فى بايك مستعمل فيه مشاكل, مبيكتشفوهاش الا بعد فترة, فمنعا للأحباط, دى شوية نصائح عن أزاى تفحص بايك مستعمل, هيا بنا نلعب

البايك فى مصر بيعامل معاملة سيئة جدا, لأن غالبا اللى بيركب بايك بيكون لسه جديد فى السواقة, وبيقع بيه كتير, ده غير أن معظم اللى بيجيبوا الريس بيبقوا جايبينه علشان يسمع صوته وهو بيفصل ويلعب بيه, وده طبعا بيهلك حالة البايك جدا, فلما تشترى لازم تشترى من شخص مخضرم وقديم فى مجال البايكس, أو يفضل حاجة أستيراد علشان أختلاف الطرق ونظام المرور وحتى نوعية الحوادث بينا وبينهم.

الفايبر هو أول حاجة بتلاحظها على البايك, وهو أكبر دليل على حالة البايك وأعتناء صاحبها بيها, بس بما اننا فى بلد الفهلوة, أغلب اللى بيشتروا بايك بيمشوا من غير فيبر أو بفايبر صناعة محلية رخيص, لأن سعر الفايبر أصلى أو أستيراد غالى جدا, بالتالى ممكن يتضحك عليك بشكل الموتوسيكل لما تلاقيه لسه بيلمع وجديد لانج.



الفايبر ممكن يتصب ويتدهن ويبقى شكله زى الأصلى بالظبط, بس بيبقى أضعف وأرخص وبيقلل من ثمن البايك جامد, لازم تفك الفايبر من على البايك وتشوفه من جوه, هل فيه نسيج فايبر ولا لأ (الريش اللى بيتعمل منه الفايبر) لو صاحب البايك مقالكش أن البايك مغير فايبر يبقى أكيد فيه حاجات تانية مقالهاش, ولو الفايبر أصلى برضه حاول تفحصه من جوه ومن بره, ممكن يكون مكسور وأتعمل عند صنايعى, وده بيبان كمناطق مرتفعة ومنخفضة غير ملاحظة على سطح الفايبر, أو لو الصنايعى غبى ممكن من ظهر الفايبر كمان تشوف لون الفيلر والبرايمر والمواد اللى أستخدمها

بعد فك الفايبر, هيبقى قدامك جسم الموتوسيكل, جسم الموتوسيكل هو أهم حاجة فيه, لأنه عامل زى شاسيه العربية وأكثر, أى عوجة فيه أو خبطة بتبوظ تحكم البايكر فيه, كمان هو الحاجة الوحيدة فى الموتوسيكل اللى صعب تغييرها أو تصليحها, لازم تشوف لو فيه ماسورة متنية فى الفريم, أو واخدة خبطة, أو لونها مختلف, ده بيدل أن البايك وقع وقعة جامدة, والحاجات دى هتقرفك بعدين, ولازم كمان تبص للفريم بتاع البايك على أنه نصين, وتحاول تطابقهم مع بعض, يعنى مثلا تبص للبايك من ورا, لقيت حتة من الفريم داخلة لجوه شوية والنص التانى مظبوط يبقى البايك متبهدل, وتبص على الصدأ برضه فى الفريم, وتشوف الشكمان متجرح ولا لأ (دليل على وقعة).



العجل ثم العجل ثم العجل, العجل أكثر حاجة بتدل على حالة البايك ومعاملة صاحبه ليه, لازم تبص على العجلتين وبالذات العجلة الخلفية وتشوفها ممسوحة أو النقشة بتاعتها ضايعة ولا لأ, وهل الجنط نفسه متجرح أو معووج او مرشوش قبل كده؟, ,وتشوف الكاوتش مشقق ولا لأ, أحسن يتخلع منك وأنت ماشى وتبقى فرجة فى الشارع.



لو كل ده سليم يبقى أساسات البايك سليمة, بعد كده هترفع البايك من قدام, وتمسك العجلة الأمامية تدورها بأيدك, وتشوف هل بتتهز وهى بتدور أو مبتدورش بصورة مثالية ولا لأ, وتشوف هل بتدور بسهولة ولا لأ, علشان ممكن الفرامل تكون قافشة عليها, وهتعمل نفس الحكاية فى العجلة الخلفية, بس دى طبيعى أنك تلاقى فيها مقاومة علشان السلسلة وكده.

سلسلة البايك مهمة جدا جدا, لازم تبص على السلسلة والتروس, وتشوف هل كل أسنان الترس موجودة ولا فيه منها مكسور, وتبص على السلسلة كويس جدا وتشوف هل عليها صدأ أو متوسخة زيادة عن اللزوم, وبرضه وأنت رافع البايك من ورا, دور العجلة وبص على السلسلة والتروس, لازم السلسلة تمشى على أسنان الترس بسلاسة من غير مقاومة عند جزء معين, أو أنها تعدى على سن من غير ماتلتحم بيه.



هتطلع على البايك, وتبص على الجادون, وتمسك فرامل اليد, مش من المفروض أنها توصل للأخر, ده معناه أن الفرامل مش كويسة أو التيل عاوز يتغير, وهتدور بكرة البنزين وتشوف بتدور معاك بسلاسة ولا فيه مقاومة كبيرة, وهل شكلها مستقيم ولا ممسوحة وفيه ثنية, وهتدوس دبرياج وتشوف حالة المقبض بتاعه برضه وهل شكله مثنى ولا لأ, مقبض الدبرياج والفرامل لازم يكون شكلهم مثالى ومتطابقين, بمعنى متعدلوش أو أتثنوا قبل كده.



هتدور الجادون يمين وشمال, وتشوف فيه صوت غريب ولا أيه, وهتضغط بجسمك على البايك من قدام وورا علشان تشوف حالة "العفشة" أو مايطلق عليها الشوكة, وتشوف فيه أصوات غريبة أو تخبيط, وهل البايك بيرتد بسهولة, وهتبص على الشوكة وتشوف هل عليها زيت أو فيها ثنية غريبة, وكمان هترفع العجلة الأمامية تانى وتشوف هل الجادون بيتهز بسهولة وبيتحرك قدام وورا ولا ثابت فى مكانه.



وطبعا هتجرب منظومة الكهرباء, وتدور النور العالى والواطى ونور الفرامل والأشارات, وتجرب كل أوبشن فى البايك عدة مرات, وخاصة بعد متاخد بيه لفة علشان لو فيه حاجة متلصمة تبان, وتبص على العدادات تشوف هل عداد السرعة أو الأربى أم بيهيس أو عداد الكيلومتر مش شغال وحالة الباغة اللى على العدادات عاملة أيه, ومتنساش تبص على حالة وجسم المرايات.



طبعا هتبص على حالة الكرسى, هل ناشف زيادة عن اللزوم أو مقطوع أو أو, وبعدين هترفعه علشان غالبا هتلاقى البطارية تحتيه, هتبص على حالتها, هل الأقطاب بتاعتها متوسخة أو حالة البطارية وحشة, ده بيدل على عدم أهتمام صاحب البايك بيها.

(مكان البطارية, لاحظ الصدأ)


هتفتح تانك البنزين وتدخل صباعك جواه, وتدوره حوالين حافة التانك علشان تشوفه مصدى ولا لأ, وهتعمل نفس الحكاية مع قربة المياه وتشوف لون المياه فيها أيه, وهتبص على الزيت وتشوف لونه أيه, لو أسود وملمسه حديدى يبقى بقاله كتير متغيرش وصاحب البايك مطنشها, لازم يبقى لونه خفيف وملمسه نضيف شوية لأنه روح الموتور.

هتسأل الموتور حالل ولا لأ, وتبص على البلوك تشوف شكله وحالته أيه, متجرح أو فيه خبطات, وهل عليه زيت أو فيه تنشيع من أى جزء من أجزاء الموتور, والبوجيهات لونها أيه وهل عليها زيت أو بنزين (مصيبة), وطبعا هتفحص عند أو هيكون معاك ميكانيكى موتوسيكلات علشان يظبطك فى موضوع الموتور, وبرضه متنساش تبص على الفتيس من بره, لو متجرح = وقعة شديدة.



ومتنساش تبص على ديسكات الفرامل والتيل, وتشوف فيه تنيه أو حتة مكسورة فى الديسك أو أى شئ غريب, وتجرب الفرامل الورانية عدة مرات, وتطلع على البايك تانى وتمسك فرامل وتزق فى الموتوسيكل لورا وقدام, مش من المفروض أنه يتحرك (طبيعى), هتزعل أوى لو ماشى على 130 وبتدوس فرامل وتلاقى البايك خيش منك وبقيت بتلف خمسات.



بعد كل ده هتشغل البايك, وتجرب تدوس دبرياج, لازم الدراع يتحرك معاك بسهولة وخاصة وأنت مدى غيار, ويسيب معاك بسهولة برضه (لو عمل العكس: ورق دبرياج) وتسيبها واقفة سلانسيه شوية, لأزم صوتها يبقى منتظم ومبتهبلش, بعد كده هتطلع تاخد بيها لفة, وتجرب الغيارات اكثر من مرة, لو بتعشق بصعوبة يبقى البايك غالبا محتاجة ورق دبرياج برضه, وهتجرى بالبايك (أو وأنت ورا صاحبك لو مبتعرفش تسوق) وتجرب التسارع (لازم يكون بسلاسة) والفرامل وكفائتها وسرعة أستجابتها, وتشوف فيه أهتزاز أو صوت غريب ولا لأ, أو سخونية شديدة غير متوقعة, وتشوف البايك بيحود بسهولة ولا أيه, وبعد ماتخلص لعب أقف ونزل الكيك ستاند وشوف بيقاوم الحركة أو البايك هيقع ولا أيه.



الموضوع صعب وطويل, بس ممكن واحد يجيب بايك ينيمه جنبه فى السرير من كتر فرحته بيه, وواحد يجيب بايك يكرهه فى أى حاجة بتمشى على عجل, لو لقيت بايك خالى من كل المشاكل السابق ذكرها, أتصل بهشام أو عمر باشا علشان ياخدوه

وطبعا لو حد عنده حاجة زيادة أو غير مذكورة ياريت يقولها, علشان ممكن تنقذ حد من جشع تاجر أو غش بائع.
كمان مرة الموضوع منقول بس ارجو من الله ان تعم الفائدة على الجميع

يا ترى حضرتك فاهم الكلام الى اتقال ده يعنى لزم يكون فى خبره عشان تعرف تكشف على بايك على الاقل انك تعرف المسمار ده اتفك من مكانو ولا لا وكل حاجه جوه المكنه تكون عارف اسمها عشان تعرف تشيك تمام وغير كده انتا مركبتش المكنه دى ولا تعرفها ازاى هاتعرف السرعه ورد الفعل للغيار دى حاجات عايزه مشوار انا بقولك كده عشان انا عملت ناصح واتلسعت ومش عايزك تقع عشان توفر كام جنيه ميكانيكى والشخص الى بيقول يمكن معكش فلوس محدش هاينفعك لو المكنه مسبكه ومش هاتعرفها ربنا يكرمك وتظبط فلوس الميك
ا نيكى قبل اى حاجه واتعلم على مكنتك وتبقا خبره ياعم وتكشف لاصحابك زى ناس كتير هنا بس خليك حرص بدل ما تلبسهم فى الحيط

[AhmadKarama]

السلام عليكم,مشكور كل من شارك فى هذا الموضوع و بالاخص alfath8 المعلومات اللى زودتنى بيها مفيدة جدا و خليتنى اقرا كتير و اعلم شوية حاجات حلوة.استاذ دياب حقيقى مشكور جدا انا فاهم وجهة نظرك من الاول و انك بتحب تجيب من الاخر بس انا بردو ما كونتش عايز اقف بطيخة مع الميكانيكى وان شاء الله هاجيب الميكانيكى معايا و بعد ما انفذ نجربها سوا فى اسكندرية :) المنتدى بصارحة اكتر من رائع الخبرات عالية و النقاش مهذب تانى شكرا جدا للجميع

[tafa17]

السلام عليكم,مشكور كل من شارك فى هذا الموضوع و بالاخص alfath8 المعلومات اللى زودتنى بيها مفيدة جدا و خليتنى اقرا كتير و اعلم شوية حاجات حلوة.استاذ دياب حقيقى مشكور جدا انا فاهم وجهة نظرك من الاول و انك بتحب تجيب من الاخر بس انا بردو ما كونتش عايز اقف بطيخة مع الميكانيكى وان شاء الله هاجيب الميكانيكى معايا و بعد ما انفذ نجربها سوا فى اسكندرية :) المنتدى بصارحة اكتر من رائع الخبرات عالية و النقاش مهذب تانى شكرا جدا للجميع

شد حيلك بقي عايزين نكتر الموتوسيكلات ونجتمع كلنا ان شاء الله
ونسافر مع بعض ونتعرف علي بعض اكتر
ومش بعد لما تجيب تنسانا ومانعرفش عنك حاجة
يعني ان شاء الله لما ربنا يوفقك في الشراء لازم نعرف كل حاجة وتورينا الصور علشان نبارك وندعي لك ونتواصل وننقل الخبرات لبعض كالأسرة الواحدة