أزالة الصدأ من داخل التانك

[tito29]

صباح الخير يا حضرات
أولا بأعتذر عن عدم تواجدي في الأيام الماضية بس لأنشغالي الشديد و بسبب رحلة البحث عن بايك و ده موضوع مستقل سأحكيه بالتفصيل
من المواضيع الهامة للحميع هو موضوع الصدأ داخل تانك البنزين حيث أن معظم البايكات الواردة من اليابان أو من غيرها تتعرض للركن فترات طويلة سواء في الميناء أو لدي التاجر و طبعا مستوي الوقود بيكون منخفض مما يعرض سطح التانك للرطوبة و بالتالي للصدأ
طب يجي واحد و يقول و أيه يعني ما تسيبه يصدي بدل وجع القلب
الصدأ في النهاية سيؤدي الي خرم التانك و يمكن التانك كله يبوظ و يترمي ده طبعا غير أن الصدأ يؤدي لمشاكل في طرمبة البنزين و الكربيراتير و الفلتر و يؤدي لضعف الأداء بشكل كبير
طيب هل في حل لهذه المشكلة؟
الحقيقة في عدة حلول بس لازم نفرق ما بين الوقاية و العلاج
خلينا الأول في العلاج حيث أن العديد من الناس عندهم هذه المشكلة و بعد كده نتكلم علي الوقاية بس بعد ما نشيل الصدأ تماما
الحقيقة الحلول متعددة بس أهمها كالأتي:
1. الصنفرة و دي بتكون عن طريق وضع عدة مسامير و صواميل و شوية جاز (طبعا بعد ما نفك التانك و نفضيه من البنزين تماما) و ترج يا معلم في التانك (علي فكرة في ناس بتستعمل الرمل كمان) و لحد ما كل الصدأ يروح و بعدها تشطف التانك بمياه ضغط عالي عدة مرات ثم تشطف التانك بالبنزين عدة مرات (طبعا تشيل المسامير و خلافه) و أستمتع
2. المذيبات و دي بتكون عادة بأستعمال الأحماض (ماء النار مثلا) أو بأستعمال المذيبات التجارية (مثل مزيل الصدأ) و فيه طريقة مشهورة (و أنا مجربها شخصيا) و هي بأستعمال الخل (أيوه الخل العادي بتاع الطعام) و دي بتكون عن طريق وضع الخل مع ملح طعام (كوب و نصف علي 5 لتر خل) في التانك (بعد ما تفضيه من البنزين و تشطفه بخرطوم مياه ضغط عالي) و تسيبه من 3 الي 5 أيام حسب كمية الصدأ و طبعا كل يوم تغير الخل لحد ما الصدأ كله يروح
3. الطلي الكهربائي و دي أنا شايف أنها أفضل طريقة و ناوي أجربها في أول فرصة و دي بتكون عن طريق وضع مياه و كربونات الصوديوم (أسمها كربوناتو و عند أي عطار) معلقة صغيرة علي 5 لتر مياه (طبعا بعد ما تفضي التانك و تديله غسلة بالخرطوم الضغط) و بعد ذلك تضع عامود صغير من الحديد (بلاش أستنلس علشان سام جدا) داخل التانك (تأكد ان العامود لا يلامس جدار التانك) ثم يتم توصيل جسم التانك بالطرف السالب من جهاز التونجر (شاحن البطاريات) و يتم توصيل العامود بالطرف الموجب
المفروض لو عملت الخطوات السابقة تمام حتلاقي أن المياه فيها فقاقيع و شوية شوية كل الصدأ ينتقل من التانك ألي العاود الحديد
العملية دي بتأخذ حوالي 24 ساعة (حسب درجة الصدأ) و كل ساعتين شيل العامود و نظفه لأنه حايكون مليان صدأ


أما بالنسبة للوقاية فده موضوع تاني...........................
يتبع.....................

[yascro]

الله ينور عليك يا تيتو

[karembob]

موضوع تمام يا تيتو ربناك يباركلك طيب انا عندي صدي بس علي حفيف اوي اوي اسببو واله انضف

[tito29]

موضوع تمام يا تيتو ربناك يباركلك طيب انا عندي صدي بس علي حفيف اوي اوي اسببو واله انضف

خد بالك أن الصدأ بيزيد مع الوقت طالما أبتدأ
الوقاية تفيد فقط في حالة أن التنك خالي تماما من الصدأ

عموما لأطالة عمر التانك حاول أنه يكون مش خالي من البنزين

أنا حأعمل موضوع كامل عن الوقاية بس ده بعد أزالة الصدأ 100%

[tito29]

الله ينور عليك يا تيتو

مشكور يا باشا

هو أيه نوع الموتوسيكل أللي في توقيع حضرتك؟
مش ده ياماها ميدنايت ستار 1300 و لا دراج ستار 1700 ؟؟

[yascro]

مشكور يا باشا

هو أيه نوع الموتوسيكل أللي في توقيع حضرتك؟
مش ده ياماها ميدنايت ستار 1300 و لا دراج ستار 1700 ؟؟

ده استراتو لاينر ستار (ياماها)
1900 سى سى

[tito29]

ده استراتو لاينر ستار (ياماها)
1900 سى سى

المهم أنه ياماها
علشان أنا كمان عندي ياماها تي دي أم 850
ده موتوسيكل دويل سبورت يعني نصف تريلا علي نصف ريس أو تورينج
الموتور هو نفس موتور السوبر تينيريه بس 100 سي سي زيادة

[Melego323]

الله ينور عليك يا باشا
إن شاء الله نجرب الخل دا

[alfath8]

الله ينور يا تيتو بس انا شايف ان موضوع الخل ده أأمن شوية

[tito29]

الله ينور يا تيتو بس انا شايف ان موضوع الخل ده أأمن شوية

الخل حامضي التأثير لذلك يمكن شطف التانك بماء مذاب فيه كربوناتو (قلوي التأثير) لمعادلة الخل
و بعد ذلك تشطف التانك بالبنزين عدة مرات و فيه ناس كمان بترش التانك wd40 و ذلك لأزالة أثار الماء

[hero_xp10]

شكرا يا تيتو موشوع جميل
تعرف ازاى ان التانك فيه صدا
لما ببص فى عين التنك مش لاقى صدا مع ان البايك كانت مركونه فترة لما جيت اشتريها

[tito29]

شكرا يا تيتو موشوع جميل
تعرف ازاى ان التانك فيه صدا
لما ببص فى عين التنك مش لاقى صدا مع ان البايك كانت مركونه فترة لما جيت اشتريها

ده سؤال جيد جدا

تقدر تعرف من لون البنزين النازل من التانك و كذلك من الترسيبات في قاع الكربيراتير و برضه من لون الفلتر بتاع البنزين
و عموما علشان أطمنك معظم موتوسيكلات ما قبل موديل 2000 فيها هذه المشكلة
تابع معي كيفية الوقاية للموديلات الحديثة و برضه القديمة (بعد أزالة الصدأ)

غدا أن شاء ألله سأكتب الموضوع علشان النهارده مشغول جدا

[Mahmode]

100 100

[tito29]

الوقاية من الصدأ

صباح الخير يا حضرات

الأن و بعد أن عرفنا كيفية أزالة الصدأ من داخل التنك و تمت العملية بنجاح عايزين نحافظ علي ذلك الوضع لأطول مدة ممكنة و ده كالأتي:

السبب الرئيسي للصدأ هو الرطوبة
طيب الرطوبة تدخل التانك أزاي ؟؟؟؟؟
أهم الأسباب هو غطاء التانك لازم يكون محكم تماما (بالرغم من أنه فيه خرم صغير للتنفيس في حالة التنك مليان)
عادة بيكون الغطاء منفس جامد مما يسمح بدخول الهواء و الرطوبة
السبب التاني بيكون أن السائق دائما ماشي بكمية بنزين قليلة و طبعا باقي التنك مليان هواء (و رطوبة) لذا حاول بقدر الأمكان تجنب ذللك
ركن البايك لفترة طويلة برضه من أسباب صدأ التنك لذا لو حتركن البايك لمدة أكثر من 3 شهور من الأفضل أن التانك يكون فاضي خالص و توضع مادة لأمتصاص الرطوبة مثل السيليكات (الأكياس الصغيرة أللي فيها بلورات) و دي بتيجي مع الأجهزة الكهربائية و الألكترونية ثم يتم أحكام غلق التانك و بس
أما لو الركنة أقل من 3 سهور من الأفضل أنك تملاه بنزين علي الأخر و تسيبه

طبعا الكلام ساري بعد أزالة الصدأ أو لو البايك خالي تماما من الصدأ

بس أعرف أن الصدأ سيعود مرة أخري مهما عملت الفكرة هي أنك تطول المدة بقدر الأمكان من غير صدأ

يارب أكون أفدتكم بمعلومة حتي لو صغيرة

[yascro]

بس المكن الجديد كله التانك من جوه معالج كيميائيا ضد الصدا على ما اتذكر