شهادة حق

[Shady_mas2000]

قبل أى حاجه يا جماعه أنا ولا قابض ولاعندى أجندات خاصه
بس أنا قولت أحكيلكوا عن تجربه سريعه مريت بيها وبجد كانت
من أجمل اللحظات اللى قضيتها..
الحكايه ببساطه أنى كنت راجع من القاهره مرهق وتعبان
ومش محتاج أقلكوا على الجو هناك ربنا يكون فى عون الناس اللى فيها
المهم جيت إمبارح بعد الفطار قررت أنى أنزل بالمكنه
وأتمشى على البحر شويه..
واحد طبعاً هيقولى عادى وأيه الجديد فى كده واجع دماغنا ليه؟
أقول له لأ فيه جديد...
الجديد انى قررت اركب مكنه كاستم...أيوه مكنه كاستم
قولت نفسى ياترى مين من صحابى معاه كاستم؟؟
مجاش فى بالى ساعتها إلا واحد صاحبى معاه مكنه سوزوكى كاستم
المهم جيت بعد صلاة التراويح وهيا بتخلص عندنا متأخر على 10 ونص كده
روحت مكلم الواد ده وقولتله انا عايز مكنتك ولو عايز مكنتى خدها
طبعا الواد ماصدق وفرح اوى وفى ساعتها جه قابلنى فى سموحه
وحصل اللى بتمناه هههههههه....طبعا أول ماركبتها حسيت بشعور غريب
لأنها تقيله شويه والقعده طبعا مختلفه لدرجة انى كنت عمال بدور احط
رجلى فين اتارى السناده قدامى هههههههه المهم أخدتها وطلعت بيها على البحر
وكانت الدنيا راايقه شويه ومش عايز أقولكم بقه على الشعور الفظيعععع
بجد شعور بالارتياح والهدوء الشديد بعيدا عن السرعه والضغط اللى بيولده
الريس نتيجة الصوت والسرعه الزائده وخلافه..
وطبعا المشى على البحر وشم النسيم العليل والهواء البارد الجميل شعور
أول مره احس بيه وأخدت بالى من حاجات أول مره أخد بالى منها وانا ماشى
وده طبعا نتيجة السرعه الهادئه والتجميع البطىء والأستمتاع بالقعده المريحه
ولقيت نفسى اخدت عليها بسرعه كأنى أعرفها من زمان طبعا الكلام ده عن المكنه
هههههههههه وبعد نهاية الرحله الجميله دى رجعت قبل الفجر مباشرة عشان الحق اتسحر
وطبعا اديتها لصاحبها تانى بس على عينى والله وركبت مكنتى تانى
وبرضه كانت وحشتنى بصراحه...
خلاصة الموضوع ان كل حاجه ليها مميزاتها الريسينج عنوان السرعه والجنون
أما الكاستم فهو عنوان الهدوء والعقلانيه زى اللى كنت فيها امبارح ههههههه
وكل رمضان وانتم طيبين
نسيت أقولكم المكنه اللى كانت معايا اسمها سوزوكى إنترودر ودى صورتها

[sor2]http://www.nileup.com//uploads/images/domain-a0d4422fc1.jpg[/sor2]

بجد ماشاء الله عليها...

[karembob]

انتا عندك حق هو من رييس لي كاستم تفرق طبعاً انا حسيت بلفرق دا زيك لما كان معايا ال250 وبعته وجبت الاستيد ال 400 حسيت فعلن الفرق و وفعلن الكستم دا مكن الانتخي

[mahgary]

انا معى كاستم وجربت اسوق cbr 400 مش عايز اوصفلك الاحساس حسيت بطيق فى القعده ومع محور الدوران مع تنى الرجل للخلف فى وضع ان مش متعود عليه والله ما حبت غير الاول ثم الثانى وقمت نازل منه فى الخقيقة الكاستم خاجه تانى خالص

[yascro]

هو ده الفرق بين الكاستم والريس

[alfath8]

بجد متعة ركوب البايك تجدها فى الكاستم

[hassan_gost]

اوعى تكون نويت تغيرررررررررر

[Khaled Online]

تجربة ممتعة أكيد
لكن زي ما انت قولت من بعيد وبشكل غير مباشر: جو القاهرة مايشجعش على الكاستم خااااااااالص
ليه بقى؟ عشان مش هتعرف تجمع البايك بسرعة وتنجز نفسك في الزحمة الرهيبة اللي جوا البلد هنا
هتبقى زيك زي العربيات بالضبط وهتفضل واقف ورا صف العربيات في الحر والشمس والتراب ومفيش بروتيكشن ولا سيفتي هيمنع عنك الحر

الكاستم مريح وهادي ودماااااااااااااغ
بس على طرق سريعة أو هادية أو مشوارها طويل بزيادة وكل يوم
يعني واحد ساكن في القاهرة وشغله في أكتوبر أو القرية الذكية، ده ينفعه الكاستم قوي ويريحه عن الريس إن كان الريس بيتعبه

وكلها أذواق في الآخر
تحياتي ومتشكرين على مشاركتك لتجربتك الممتعة

[nktis]

طبعا الكاستم يكفي بس قعدته المريحه ...انما الريس يبقي في مرحله عمريه معينه وبعد كده لو استمر في ركوب الموتسيكلات.. اكيد بقي هيبقي كاستم...انا ابن خالتي قاعد في الورديان ومعاه واحده 400 وعايز يديهالي باي شكل ويجيب هو كاستم...

[SaberMan]

قلت الكلام ده لناس كتير مصدقوش

الكاستم روقان تتفرج على الشارع برحتك و مريح اعصابك تحس ان عندك عربيه كابورليه

بس الدوسات لازم ترجع شويه لورىدى قدام قوى )):

[johnghaly]

انا بصراحه بحب شكل الكاستم احسن بس نفسى اجرب اسوق ريس اجرب بس

[tafa17]

الحمد لله
وشهد شاهد من اهلها
علشان تصدقوني
ان العهد القادم للموتوسيكلات الكاستم
الكاستم قادم قادم
يالا يا شادي اعقل وغير لكاستم
طبعا كل موتوسيكل له متعة خاصة
احلي حاجة انك تكون عارف الفرق بين الريس والكاستم
انا ركبت الموتوسيكل بتاع تامر من كام يوم هوندا 919 وبصراحة السحب ما شاء الله تمام بس القاعدة مش تمام حاسس اني مقلوب علي وشي وانا بسوقه ونزلت ايدي وجعاني حاسس اني محمل علي ايدي طول الوقت ده غير رجلي معكوسة لورا ، الواحد نزل من علي البايك وظهره واجعه

[Khaled Online]

القاعدة مش تمام حاسس اني مقلوب علي وشي وانا بسوقه ونزلت ايدي وجعاني حاسس اني محمل علي ايدي طول الوقت ده غير رجلي معكوسة لورا ، الواحد نزل من علي البايك وظهره واجعه

عشان مش متعود عليه
بعد فترة هتعرف تقعد عليه من غير كل المشاكل دي

دي إمكانيات اللي راكبين الريس عارفينها يا باشا!

[yascro]

بصراحه انا مبتفرقش معايا اللى بيجى قدامى سوقه وبستمتع بيه
ريس تورنج كاستم ستريت فايتر اوف رود

[tafa17]

بصراحه انا مبتفرقش معايا اللى بيجى قدامى سوقه وبستمتع بيه
ريس تورنج كاستم ستريت فايتر اوف رود

انت هاتقولي
مش بعيد لو ركبت عجلة سباق الاقيك رافع حصان وماشي بيها علي 120 كم
انت اي حاجة هاتركبها هاتطير بيهاحتي لو ايه

هو لقب عميد ده يعني واخده كده

[nktis]

والله يا اخونا يا ريت اللي معاه ريس او كاستم او اي بايك ياخد باله وبلاش جري اليومين دول.... لانك احيانا مجبر تتحمل اخطاء غيرك واحيانا بتكون مميته لو الواحد ماشي بسرعه ومعرفش يلم نفسه ... فاسلم حل انك تمشي براحه ..
وربنا يسترها علي الجميع...