البلي و بلاوي البلي

[tito29]

صباح الخير

سأحكي لكم اليوم عن قصتي المؤلمة مع رولمان البلي و طبعا ده للموعظة و علشان ماحدش يقع في نفس الأخطاء أللي أنا عملتها

بدأت القصة من حوالي 4 شهور كان أحيانا بأحس بخشونة من العجلة الخلفية بس أنا كبرت دماغي و قلت أكيد شوية تراب علي الجنزير و حايروح مع صيانة الجنزير كل 500 كم
المهم أكتشفت بعد فترة أن الخشونة بتزيد و بتحدث بعد ما أخد مطب مثلا و تختفي بمجرد أني أنزل من علي البايك و أركبه تاني
الموتوسيكل بتاعي حالته جيدة جدا و عامل أقل من 15 ألف كيلو و كل الصيانات معمولة فوق الوصف و بخامات كلها مشتريها بنفسي من أنجلترا يعني مجال أن حاجة مضروبة أحتمال ضعيف جدا
المهم بعد البحث الدقيق و طبعا لازم أعترف أني كسلان موت و طنشت العيب ده فترة طويلة أكتشفت أن المشكلة في بلي العجلة الخلفية
بسيطة جدا
نجيب مقاسات البلي من الورك شوب مانيوال و نشتري البلي من التوفيقية
لما روحت التوفيقية وجدت أنواع عديدة من البلي من أول 8 جنيه للبلية و ماركات يابانية (طبعا مضروبة و يمكن مجددة كمان) طبعا علشان أنا حريص شويتين أشتريت نوع سويدي ماركة أس كيه أف أصلي 100% من الوكيل مباشرة بس البلية الواحدة عاملة 58جنيه
و بعد كده الميكانيكي ركب البلي بس أكتشف أن طنبورة الفرامل الخلفية تأكلت بشدة و لازم تتغير طبعا ده علشان أنا طنشت موضوع البلي و العجلة كانت بتروح يمين و شمال و أنا مكبر دماغي
و النتيجة أن الطنبورة عايزة تتغير و دورت عليها مش لاقيها في مصر غير مستعملة و حالتها مش 100%
بعثت أجيبها من أنجلترا و سعرها علي فكرة نار و لسه ماوصلتش علشان وزنها تقيل شوية لازم تنزل مع حد نازل مصر و ده لسه شوية عليه

الدرس المستفاد : لو شاكك في البلي يبقي تغييره فورا و بلاش كسل علشان ده حايكلفك فلوس كتير

[oyosof]

الحل بسيط جدا هاتروح ورشة خراطة و هايزود مكان البلية فى الطنبورة باللحام ثم يخرط مكان البلية على المخرطة بنفس مقاس البلية الجديدة والتكلفة حوالى 15 جنيه و عيش حياتك

[tito29]

الحل بسيط جدا هاتروح ورشة خراطة و هايزود مكان البلية فى الطنبورة باللحام ثم يخرط مكان البلية على المخرطة بنفس مقاس البلية الجديدة والتكلفة حوالى 15 جنيه و عيش حياتك

يا باشا أنا مش فاهم ليه خراط؟

البلية القديمة أنا خلعتها بالشاكوش (علي خفيف كده) و البلية الجديدة نفس المقاس و ركبت زي الفل من غير أي تعديل

المشكلة أن طنبورة الفرامل (فرامل باكم زي الريسات الكبيرة) هي أللي فيها ريجة (عالي وواطي)
و أعتقد أن ماينفعش فيها لحامات و بعدين خرط علشان السخونية دي بتفقد المعدن صلابته
لذا يبقي لازم تتغير الطنبورة بواحدة أخري جديدة

[yascro]

هههههههههههههههه
عشان تبطل كسل

[bido600]

قول الحمدلله انها جت علي قد كدا ومجتش في حاجة تانية
ودا عشان نتابع صيانة البيك باستمرار

[tito29]

هههههههههههههههه
عشان تبطل كسل

معاك حق يا صديقي
بس المشكلة أني قليل الركوب للبايك جدا جدا يعني المعدل بتاعي أقل من 100 كم في الشهر و أقصي مشوار بأروحه حاجة كده بتاعة 2 كم رايح و زيهم راجع يعني لغاية القهوة لزوم شرب المعسل
تصور أني بقالي شهور طويلة لم أضع بنزين في التانك؟ لأن التانك عندي 25 لتر وأستهلاك البنزين بسيط
عموما ده مش عذر و فعلا كان لازم أصلح البلي علي طول و من غير كسل

قول الحمدلله انها جت علي قد كدا ومجتش في حاجة تانية
ودا عشان نتابع صيانة البيك باستمرار

الحمدلله علي كل شيئ و معاك حق لازم المتابعة بأستمرار

[karembob]

كان لازم اول ما تحس بالمكنة بتضرب سبعات في تمنيات وبتروح وتيجي كان لزم تغير الرمان عشان دا هام جدا علي السرعات العالية

[alfath8]

الحمد لله انها جت على قد كده بس وده درس نتعلمه كلنا بلاش كسل

[Hesham94]

هو البايك بتاعك 600 f3؟

[tito29]

هو البايك بتاعك 600 f3؟

لأ
البايك بتاعي هوندا فراديرو 1000 موديل 2001

[Shady_mas2000]

انا غيرت الرولمان بلى بتاع العجله اللى ورا بمجرد ماسمعت الخشونه اللى بتحكى عليها والحمد لله الامور رجعت تمام

[m3_dolphen]

شكلى كده الدور عليا لأنى سامع الصوت وبكدب ودنى علشان مكسل ههههههههه

بس كويس يا استاذ تيتو انك جبت اس كى اف من التوكيل وممكن بردو تجيب البلى من توكيل فاج فى شارع معروف