أرجو الدخول للخبراء

[CBR-250]

السلام عليكم :)

يا جماعه انا معايا بولسر 220 جديده .. ومسافر بيها بورتو مارينا هل هتستحمل؟ ومفيش غير ريست واحد في master علي الصحراوي قبل العلمين هتستحمل ولا هتكح معايا :d

[Abdm]

المشكلة مش فى المكنة هى ممكن تمشى عادى ما فيش مشاكل . المشكلة هى كل ما الطريق بقى طويل فأنت معرض للخطر بتاع الطريق أكثر من رملة أو زيت أو جاز أو أى عوامل على الآرض وكمان سرعة العربيات اللى ممكن لا تلاحظك ويكون فى خطر عليك منهم

وربنا يسترها معاك ومعانا جميعا

[SpeeRace]

صلى عالنبى .. هات ورقه وقلم وأكتب معايا ..
------------------------------------------------
1 - خوذتك النضيفه الحلوه وطبعا تكون الأسكرينه نضيفه ولازم تكون الخوذه مش واسعه عليك وتكون مقفوله (full face)
*إعمل حسابك إن الخوذه لو مش مقاسك ونضيفه هتتعبك أوى
2 - تغير زيت ويستحسن (شـّيل) الأصفر .. ولو حد نصحك بأفضل منه هاته بس انا أنصحك بيه ..
3 - روح لميكانيكى نضيف ومحترم يربطلك عالمكنه بضمير (( كل مسمار فيها يربط عليه بضمييييير )) ضرورى
4 - حاجه من الأتنين : يا إما تغير طقم جرارات (( ترس أمامى وخلفى وجنزير )) يا أما تاخد جنزير أحطياتى
*غالبا بيكون طويل عن المطلوب (( خلى الميكانيكى يقصرهولك عالتركيب ويقولك بيتركب ازاى .. مش صعب ))
5 - غيّر البوجيه وهات بوجيه نضيف .. غالى مش مشكله وخلى القديم احطياتى ..
*الجنزير والبوجيه مش هيخسروك حاجه ..
6 - أظبط الهوا بجيث ميكونش عالى أوى ولا واطى أوى .. مابين 25 و 28
7 - إوعى تنسى تتأكد من الفرامل تكون 100 100 ودى أهم حاجه .. ولو مش متأكد من التيل غيره وخلى القديم فـ البيت
8 - إوعى تسافر بـ تى شيرت 1/2 كم .. هتكره نفسك بجد وممكن متستحملش لسعات التراب وضغط الهوا
*يعنى ألبس جاكيت جلد حتى لو الجو حررررررر .. مش هتحس بالحر ولا حاجه وأمان
9 - زوّد العواكس الضوئيه فى البايك من ورا على قدر الإمكان .. فى ناس مش بتبص قدامها عالطريق ..
10 -قبل ما تنزل صلّى ركعتين لله وإعرف انه (( لا قدّر الله ممكن تكون دى أخر دقايق من عمرك )) يعنى حياتك متوقفه على قدر الله أولا وأخيرا وانك على عجلتين هوا .. سلّم نيّتك لله وأنطق الشهادتين أكنك رايح حرب بالظبط وربنا يستر طريقنا جميعاً
11 - فوّل التانك بنزين 90 أو 92 ومتخافش مش حامى زى ما الناس بتقول .. وكل ما تعدى على بنزينه فوّل إحطياتى .
12 - دعاء ركوب الدابه ودعاء السفر ويستحسن تاخد مصحف معاك
(( دعاء الدابه: سبحان الذى سخّر لنا هذا وما كنا له مقرنين وإنا إلى ربنا لمنقلبون ))
13 - لازم كل 75 كيلو تريح الموتور والمكنه وتريح نفسك .. وإوعى تسرح عالطريق
14 - دعواتك يا زميلى .. وان كنت رايح فـ شغل هناك .. انا فـ امتحانات وهخلص وأدور على شغل بره القاهره .. لو تقدر تساعدنى تبقى عملت معايا الصح .. ولو رايح مصيف .. يبقى تروح وترجع بالسلامه وربنا يستر طريقك ولو أحتجت تكلمنى رقمى أهو 01113256357 أى مساعده انا تحت أمرك

[SaSa.FireBlade]

ههههههه زى ما البرنس ما قلق كانك رايح تحارب البجاج مكنة محترمة وعلى فكرة خدها قاعدة كدة طول ما المكنة بجرى مش هتسخن بس م معنى كدة انك تجيب اخر المكنة يعنى خلى سرعتك متزدش عن 130 مثلن عشان مديقهاش عليك لو لقيت المكنة ابتدت ترعش يبقا تهدى طول ما المكنة ثبتا على الارض انتا فى امان ولزم تبقا نايم قبليها بتاع 10 ساعات ولون زى منتا بتقول كدة مشجعكش انتا بتقول ان الطريق هو فى هو طيب افرض لقدر الله عجلة عملتها معاك هتعمل اية ؟

[CBR-250]

لا اله الا الله
يا جدعان الموتسيكل جايبوا بقالي اسبوع
ومترخص
وعندي 15 سنه بس لو وقفت ف لجنه هدفع 50 جنيه وهاخد وصل لمده اسبوع :d

اغير جنزير و تيل و بوجيه ايه ؟؟
ديه جدييييييييييييييييييده :d

الكاوتش تيوبليس :)