للمرة ال 14 رسميا كسر وسرقة سيارة وصاحبها بداخلها عالمحور

[me_medoo]

بسم الله الرحمن الرحيم

ترددت كثير ... أقول ولا مقولش ... مرة بقول خلينا احكي لزمايلي على الي حصل ومره بقول يواد بلاش هيا الناس ناقصة قلق وخوف ورعب ... الناس فيها الي مكفيها ... بس بقول يمكن لمن أحكي وأقول الناس تاخود الحيطة والحذر ... للحرمية دول ... بس كمان انا ذات نفسي لمن بلاقي واحد كاتب تحذير او قصة حصلتلو للأنفلات الامني بقول في نفسي أكيد ده من رجالة النظام السابق (الحزب الوطني ) وعمال يخوف الناس علشان الناس تترحم على أيام حسني مبارك .ويعفو عنو .

ودي بلد الاشعات متصدقش كل حاجة تسمعها ومتصدقش كل حاجة تقراها ... ناس بتحب تهول الامور لغايت ماحصل مع زوجتي الي حصلها .

كانت ياسيدي زوجتي العزيزة وقت ماكنت في معرض الاهرام بتمشى انا ... أبوها تعب وأتصلو عليها وقالولها تعالي ... فكلمتني قلتلها خلاص خودي العربية وروحيلو ... وانا لمن أخلص شغل هبقى أعدي عليكم ... طبعاً مقدرتش أقلها أني في معرض العربيات بتمشى مع صحابي والشلة بتاعتي الي هيا اساسا مبتطقهمش (وقلتلها أني في شغل ) يمكن لأنها مش ممكن تقدر قد أيه العربيات بتمثل ليا في حياتي ... الي هيا أهم من حياة أبوها عندي . لأني بستنى المعرض من السنة للسنة .

المهم كانت الساعه 8 بالليل بعد صلاة العشا مباشرةً وعلى محور 6 أكتوبر المتجه لميدان لبنان في الوقت ده وفي يوم الجمعة كانت الدنيا زحمة ... الزحمة الطبيعية للمحور فقالت تمشي هيا ناحية اليمين لأن اليمين بيتحرك اسرع ... والطريق واقف وقفه منيلة بنيلة .

بصت لقت واد شكلو مريب قاعد على سور المحور وعمال بيبص على العربيات ... طبعاً انا كنت منبه عليها قبل كده تسوقر السنتر لوك ... وتقفل الشبابيك ومش مشكلة تشغل التكيف حتى لو على المروحة علشان محدش يثبت منها العربية ويسرقها ... المهم عدت الواد ومفيش كام متر ... وشوية بصت لقيت الشباك الي جمب السواق أتكسر والقزاز طار في وشها وعنيها لمحة الواد على اخر لحظة ماسك طوبة وطراااااااااااااااااااااااااااااااخ في شباك العربية ، وطبعاً في لمح البصر ... وفي ثواني لا تذكر كان الواد مد أيدو وخد الشنطة بتاعتها بعد مكسر الشباك مباشرة ً ... وكردة فعل لأي أنسان شاف قزاز بيطير في عنيه أكيد هيحط أيدو على وشو علشان يحمي عنية ... المهم الناس أصحاب العربيات الي شافو الموقف نزلو كلمهم جري عليها في عربيتها ونزلو جري ورى الواد قام الواد نط من سور المحور في الغيطان الي هناك .
وأدي صور العربية والشباك المتكســــــــــــر ......

الي يشوف الصور ... يفتكر أنها صورة عربية واحد ناسي فيها شنطة او لاب توووب لكن الجديد ، أن يكون صاحبها فيها وسايق وماشي بعربيتو وواحد يحدف عليه طوبة ويكسر قزازو ويسرقو وهو سايق ... طول عمرنا بنسمع عن وحده ست كانت ماشية على رجليها وجه عيل خطف منها الشنطة بتاعتها وجري ... لكن عمركم سمعتو عن واحد راكب عربيتو وعامل السنتر لوك وقافل الشبابيك واقف وسط الزحمة يعني وسط الناس ويتسرق بالمنظر ده ... فعلاً عليه العوض ومنو العوض ..

عليه العوض ومنو العوض

تصور أنو يحصلك نفس الموقف ... ومحدش يقلي لا انا لوكنت موجود هعمل وأساوي وأجري وراه ... أقوله مش هتلحق تعمل حاجة ، أنتا أصلاً مش هتستوعب الموقف وهتبقى مزهول ... وعقبال ماتفكر أيه الي كسر قزاز عربيتك وانتا سايقها هيكون الواد سرقك وجري ...

المصيبة أن 90% من ستات مصر لو كانو سايقين بيحطو الشنطة على الكرسي الي جمبهم ...
و90% كمان من ستات مصر اذا كانو جمب ازوجهم ... بيحطو الشنطة على حجرهم .
حتى الرجالة بيبقو سايقين وحطط الموبايل او الشنطة بتاعتو مع علبة السجاير على الكرسي الي جمبهم او على التابلوة .

ومن ساعة الي حصل ده لغايت دلوقتي وانا شايف في عنين مراتي الي بحمد ربنا انهم متفقعوش او وشها اتشلفط بسبب القزاز ... وانا شايف في عنيها نظرة حزن وأسى ... وخوف أنها تنزل الشارع لعدم شعورها بالامان ... دي وحده قاعدة في عربيتها وقافلة عليها الباب والشباك والسنتر وفي وسط الناس وتتسرق بالمنظر دهوو ... ومراتي دكتورة (يعني أمرأة عاملة ) يعني من البيت للمستشفى للعيادة لشراء حاجيات البيت ... وبنتشارك ونتساعد في الحياة علشان نعرف نربي عيلنا الي بنجري وراهم وورى أكل عيشنا علشان نعرف نربيهم ونصرف عليهم . ومش هقول غير كلمة وحدة حسبي الله ونعم الوكيل ... انا بجد بجد مش زعلان على شنطتها الي اتسرقت وفيها الموبايل والرخص والبطاقة والاتي أم بتاعتها ومصروف البيت ... ولا زعلان على الشباك ألي أتكسـر ... ولا زعلان على وش مراتي الي أتشلفط بس الحمدالله خدوش طفيفة خارجية ... لكن بجد انا زعلان على البلد ... والناس الجعانة الفقرانة ... الي هتبتدي تهاجم كل الناس ، وعازرهم لأن معاهم حق الجوع كافر ... بس كمان ميصحش يتشطرو على وحده ست .وينهبو ماليس من حقهم .

[mahmoud_afifi]

قدر الله وما شاء فعل.
مفيش احتياطات الواحد ممكن يعملها اكتر من كده. حتى لو كانت شايله مسدس برضه كان هيحصل الي حصل.
المهم الف سلامه على المدام وربنا يبعد عنكم شر ولاد الحرام

[zangry]

الحمدلله انها جات على قد كده فداها وفداك .. والحمدلله انها متخدتش بالعربية :d

قدر الله وماشاء فعل وحمدلله على سلامتها

[spiderman22]

لية كررت الموضوع تانى ؟
وربنا معاك والف سلامة على المدام

[Land_Cruiser]

هو الموضوع مكرر يا فندم و لا الحرامى عملها تانى لاقدر الله

[Kareem Fawzy]

قدر الله وما شاء فعل
والحمدلله انها جت على قد كدة
واحمد ربنا انهم ما خدوش العربية بمرات حضرتك
بجد البلد مبقت مقرفة من اللى بنشوفه

[wael6]

ربنا يكون فى عونك
وحمد الله على سلامة المدام
وربنا يسترها علينا جميعا يارب

[Amro_ON]

حسبي الله ونعم الوكيل .... والحمدلله ان مافيش حد اتصاب
البلد زفت زفت واللي هيمسك البلد وهي على الحال ده هيطلع عينه

[Hamdy Masria]

ربنا يخلف عليك

[OMAR61995]

لا حول و لا قوة إلا بالله
ده الحرامية بقوا أذكياء قوى
يعنى هو كان ممكن يفتح الباب بس تفكيره هداه إلى أنه ممكن يكوم مقفول و قد كان أو ممكن تشوفو و تطلع سلاح
و الأكتر أنه كفاية الخضة و الازار المكسور

[BLOODY_STONE]

لا اله الا الله
معلش
قدر الله و ما شاء فعل
الحمد لله انها جت في ازاز بس ... الحمد لله ان مراتك سليمة و كله تمام ...

تصور انا الدم بيغلي في عروقي دلوقتي
الموضوع وصل لكده ؟ و انت سايق؟
و انت برضه معاك حق محدش يلحق يتصرف بسرعة فموضوع زي ده

اهم حاجة بس متتخنقش من العربية لأن ساعات لما بيحصل مواقف زي دي او حادثة لا قدر الله الواحد بيكره العربية و يعاملها معاملة زبالة ... عادي ده ازاز متشغلش بالك .. و نعملك بأذن الله موضوع في قسم تويوتا تجيب الازاز منين و بأذن الله كل الناس حتساعد و الموضوع سهل الحمد لله ..

[autocross]

اللهم لا اعتراض بجد وفعلا مفيش كلام يتقال غير حسبى الله ونعم الوكيل انا بردو عربيتى اتكسر الزجاج اليمين الامامى وانا راكنها قدام بواب يادوب اقضى مصلحه رجعت لقيته مقلبها كلها وتخيل انه ملقاش حاجه قام واخد سلسلة مفاتيح بتاعت البيت :d وربنا يسترها من ثورة الجياع

[keeko]

هي المنطقة دي طلعت مشهورة بالسرقة بقي..
انا شوفت ادام عيني عمليه سرقة تشبه اللي حكاها صاحب الموضوع و نفس الماكان بالظبط
من حوالي 4 شهور كنت ماشي ع المحور و قبل الطلعه بتاعت الدائري علي طول
كانوا في اتنين شباب ماشيين علي الرصيف عادي خالص
لقيت مره واحده واحد نط علي السور و نزلت ناحية الغيطان و العشوائيات اللي هناك
و التاني جري علي العربية اللي ادامي و كان راكب فيها اتنين رجاله ادام و ست ورا و كانت فاتحه ازاز العربية و حاطة الشنطة علي رجليها
الولد جري و خطف الشنطة بمنتهي السهوله و رماها للولد التاني اللي مستنيه ورا السور و راح ناطط هو كمانض و اختفوا....طبعا كل الكلام ده بيحصل في اقل من 5 ثواني و ماحدش بيعرف يتصرف
لأنهم فعلا بيسرقوا و بينطوا السور ده و بيختفوا في المناطق الغريبة اللي بين المحور و الدائري دي

و علي فكرة الكلام ده كان الساعة 6 تقريبا و كانت الدنيا زحمة
فياريت الناس تاخد بالها عموما و ماتخليش ازاز العربية مفتوح
و بالذات في المنطقة دي عشان واضح ان العيال دي استسهلت الموضوع و مش شايفه اي شرطة في المكان

[elnakshabandy]

سترك وعفوك يارب

[mmaaggddyy]

ألف حمد لله علي السلامة - قدر الله ما شاء فعل - قل اللهم أجرني في مصيبتي واخلفني خيرا منها - حسبنا الله ونعم الوكيل فيك يا - حسني مبارك- أنت وأولادك ومراتك واعوانك - الشباب دي كان ممكن تشتغل وتنتج وتبتكر كمان وتفيد البلد - بدل ما بتسرق وتعرض نفسها وغيرها للخطر من اجل اما الجوع( المتسبب فيه هؤلاء الخونة ) او من اجل الكيف ايضا المتسبب فيه هؤلاء الخونة - كم الاموال التي سرقوها كانت تشغل كام عاطل ؟؟!!