الرخصة المنتهية وحق الشرطة في تفتيش السيارة -مناقشة

[Abo.Moazz]

فعلاً الثورة غيرتنا كلنا
وكمان فى أفراد شرطة كتير أوى إتغيروا للأحسن
النهاردة قبل نفق الشهيد أحمد حمدى وأنا متجه إلى شرم الشيخ وقفنى ظابط بمنتهى الإحترام
سألنى على الرخص بمنتهى الإحترام
إديتله الرخص بمنتهى الإحترام
قاللى إركن على جنب بمنتهى الإحترام
ركنت على جنب بمنتهى الإحترام
قاللى رخصة العربية منتهية ياأستاذ أحمد بقالها أسبوع والإبتسامة تعلوا وجهه
قلتله مانا عارف .. ولسه فى شهر سماح والإبتسامه تعلوا وجهى
قاللى إتلغى خلاص
قلتله مين اللى قال إنه إتلغى
قاللى إتلغى بعد الثروة
قلتله معرفش
قاللى معلش بقى هنعمل أيه
المهم من بداية الكلام لأخرة كان موطى على العربية بيكتب إيصال سحب الرخصة بمنتهى الإحترام والإبتسامة تعلوا وجهه
وبعدين إستلمنى أمناء الشرطة وفتشوا العربية حته حته بمنتهى الإحترام ( أول مرة تحصللى إنى أتفتش بالطريقة دى بعد أكتر من 7 سنين رايح جاى على الطريق ده قبل وبعد الثورة )
أمين الشرطة قعد يدور حتى جوه غطاء الدريكسيون .. قلتله ياعم متخافش مبشربش حشيش
المهم ...
السؤال اللى عايز أسأله بمنتهى الإحترام ..
أيه موضوع الشهر السماح بعد إنتهاء الرخصة ؟؟ هل هو موجود أصلاً ؟؟ إتلغى فى قانون المرور الجديد ولا لسه زى ماهوه ؟؟؟
العقوبة إيه نظامها بالظبط .. يعنى الغرامة بتبقى أد أيه ؟؟
عايز رد بسرعة الله يباركلكوا علشان لو مكانش الشهر إتلغى زى مالظابط قال يبقى كده إشتغلنى وأقسم بالله لو طلع إنه كان بيشتغلنى ...... ولا بلاش .. ليكون عنده عيال ... ربنا يسامحه
ونصيحة للى هيسافر شرم الشيخ بالعربية .. إبقى إرمى الحشيش أو إشربة قبل ماتخش على النفق
التفتيش بقى زى الزفت

[matrix_it]

ان شاء الله ترجع الرخصة !! بس سؤال انت كدة تاخد الرخصة من السويس ولا القاهرة عادى ؟

[hossam_elwani]

الى اعرفه ان الشهر السماح معمول بس عشان ماتدفعش تلت ضريبه الا بدع الشهر ده لكن لايمكن السير بلعربيه بعد انتهاء فترة الترخيص تحياتى

[abo-berry]

ان شاء الله ترجع الرخصة !! بس سؤال انت كدة تاخد الرخصة من السويس ولا القاهرة عادى ؟

من المرور اللى تابع للعربيه

[AHMED1718]

الشهر السماح ده لو عربيتك فيها شغل سمكرة يتعمل قبل التجديد او الفحص وبس

لكن هوا مش معمول علشان تمشى بيها
ومكنش موجود واتلغى هوا كان بالحب كده

[m_adeleid]

هوا ليه محدش علق علي موضوع تفتيش العربيه
لا صاحب الموضوع ولا اي حد من المشاركين
عادي ده ولاانا اللي فاهم حاجه غلط؟
ازاي يفتش عربيه بدون اذن نيابه في ظل عدم وجود قانون الطواريء

[د. علاء ابراهيم]

هوا ليه محدش علق علي موضوع تفتيش العربيه
لا صاحب الموضوع ولا اي حد من المشاركين
عادي ده ولاانا اللي فاهم حاجه غلط؟
ازاي يفتش عربيه بدون اذن نيابه في ظل عدم وجود قانون الطواريء

السيارة هى ملكية خاصة " حيازة" زيها زى المنزل
المفروض يكون فى اذن بالتفتيش

[lanos2004]

فيه عربيات بتكون متبلغ عنها لانسر مثلا
تلاقيهم سايبن كل العربيات وماسكين الانسر يفتشوا فيها
وعلى الى بشوفه اكتر عربيه شفتها بتتفتش بعد التاكسى السيراتو وخاصه الكوبيه

[Yasser.Essam]

بالنسبه للشهر السماح فـ ده بيبقى علي التجديد عشان متدفعش ضريبه وتلت غرامه

إنما الرخصه إنتهت مثلاً بتاريخ 5/10/2012

يوم 6/10/2012 منتهيه ويقدر يسحبها منّك .


بالنسبه للتفتيش فـ الله اعلم بموضوع إذن النيابه ده :)

وربنا يكفينا شر التفتيش :d

[samoreception]

تفتيش العربية عادى جداااااااااااااااااااا وكله بيبتفتش حتى لو اجانب علشان النفق محدش يدخله من غير ما يكون متاكدين انه معهوش اى حاجة سواء اسلحة او مخدرات ا

[semi]

اولا الكمين ده طول عمره كده والتفتيش بيتم فعلا بضمير
وبيدور في كل حاجه بالعربية
لكن ده غالبا للشباب اعتقد انك شاب برضه
لكن لما يكون في عائلات بيعدوا بسلام
تاني حاجه موضوع شهر سماح دي اكبر كذبة عرفها المصريين من ايام رمسيس الاول
مفيش حاجه اسمها شهر سماح الظابط هو اللي بيسيبلك الرخصة استذواقا لاعطاءك فرصة
فيمكن من هنا طلع مصطلح شهر سماح لكن قانونا مفيش حاجه اسمها كده

الشئ الجديد بقى هي الابتسامة اللي حضرتك بتتكلم عنها والاسلوب الحلو
وده شئ جميل فعلا وياريت الناس تتكلم باحترام برضه لما تلاقي المعاملة كده
وان ده مش يشجعها انها تقل ادبها

الشئ الاخير موضوع التفتيش اتلغى خلاص لان حالة الطوارئ اتعطلت
فالظابط اللي يقولك تفتيش قوله مينفعش حضرتك الا باذن نيابة
ومحدش يسبق سوء النية لان في ظباط فعلا مش يعرفه الموضوع ده

[Dr.Mostafa Anwar]

ونصيحة للى هيسافر شرم الشيخ بالعربية .. إبقى إرمى الحشيش أو إشربة قبل ماتخش على النفق
التفتيش بقى زى الزفت

معلش أنا منذهل من الجملة دي ومش قادر أصدق عيني إني قريتها فعلا ...

هوا للدرجة دي الحديث عن "الحشيش" بقى بسهولة كده وكمان ممكن حد ينصح واحد "حشاش" بحاجة عشان ما يتمش القبض عليه مثلا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ظ

أنا فعلا منذهل

[waleedrahmy]

الكمائن الثابتة
عند المداخل الرئيسية
معها اذن تفتيش دائما

[ayman_omer2007]

ههههه سرد الموضوع جميل والله ياباشا انت راجل محترم بمنتهى الاحترام

[AhmedBahgat]

للتوضيح فقط
لا يملك كائن من كان بتفتيش سعادتك أو سيارتك أو منزلك إلا وكيل نيابة الدائرة أو بإذن منه أو من المحكمة موجة لتفتيش شخص بعينه وبمعرفة شخص بعينه
ولا يملك أي شخص خلاف ذلك تفتيشك سوء في كمين ثابت أو متحرك أو غيره

ولكن .............
إذا طلب أحد الضباط في إحدي الكمائن تفتيشك فدعه يفتشك وتلك نصيحتي وإنسي كل إللي أنا كتبته فوق ده
:)