اسرع عربية مسروقه ترجع في اسكندرية...!!!

[abogogo]

عربية خالي الاوبترا موديل أخر 2012 اتسرقت من أمام شقته اللى في الاسكندرية في البيطاش منطقة شهر العسل بياخد العيال وبيروح هناك يقضي نهاية الاسبوع ويرجع المهم في يوم الجمعة صلى الفجر في المسجد وطلع للشقة وطبعاً العربية كانت موجودة تحت العمارة الساعة 8 صباحاً نزل مالقاش العربية تحت العمارة ووجد مكان كسر زجاج مكانها ...!!! بيقولي فضل مصدوم بتاع 5 دقائق مش مجمع من الخضة والموقف ( ربنا مايوريها لحد أبدأً اللهم آمين ) فين على فاق من الخضة وابتدى يسأل البوابين على العربية وقام اتصل بينا وقال لنا أن العربية اتسرقت ومش عارف يعمل ايه ...؟؟ على ما عملنا اتصالتنا وجمعنا بعض كان هو قالنا انه راح القسم وعمل محضر وقالوله هات ما يفيد ان العربية بتاعتك ( للأسف كان حاطت رخصة القيادة ورخصة العربية في الشماسة ..!!) قالنا انه جاي عشان يطلع ورقة استعلام عن سيارة من مرور الشروق اللى العربية تتبع له ...طبعاً على بال ما نزل من الاسكندرية كان اليوم خلص فقام الصبح وروحنا معاه المرور خلصنا الورقة وطلعنا على الاسكندرية ... روحنا قسم ( الدي خيبة ..اقصد الدخيله اللى امام معسكر الامن المركزي ) وكان معانا واسطة من رتبه كبيرة اتصلنا به ودخلنا لمعاون المباحث وقالنا اعملوا محضر واستنوا الناس هيتصلوا بيكم ... وقولناله طيب لما يتصلوا بينا نعمل ايه ... ؟؟؟ قالنا اتفوضوا معاهم
اومال انتم بتهببوا ايه ..!!
خرجنا من القسم في الوقت ده اتصل بخالي واحد وقاله : انت فلان صاحب العربية الاوبترا ...
خالي :ايوه انا
قاله : انا اشتريت عربيتك اللى اتسرقت لو عاوزها ترجع لك هات 25000 الف جنيه ...!!
نسيت اقول ان خالى شغال في المقاولات وكان سايب كروت لشركته في العربية فيها رقم تليفونه ومنها عرفوا يوصلوله بسرعه .. خالي قاله هشوف وارد عليك ... قاله بسرعه عشان عربيتك لو مردتش عليا هوديها ليبيا ...!!
نزلنا البيطاش قسمنا نفسينا مجموعات وفتشنا المنطقة كلها والعربيات المتغطية طبعاً احنا بندور على ابره في كوم قش ...!!
المهم المثل بيقول ( العيله اللى مافيهاش صايع ... حقها ضايع ) اضطرينا نتصل بأقارب لنا في الاسكندرية فيهم واحد من البلطجية الكبار من الصعايدة اللى هما بيهدوا الفلل ويبنوا مكانها ابراج المهم روحناله واخد التليفون بتاع الواد اللى اتصل بينا واتصل بالواد وكلمه وعرفه وقالنا الناس دي من عرب سيدي كرير والعربية عندهم هناك وراح مكلم ناس عرب يعرفهم وقالهم على مواصفات العربية وطلعت عندهم وروحنا نجيب العربية طلبوا مننا مانكونش كتير روحنا بعربيتي انا وخالي وواحد قريبي ووسيط وقريبنا البلطجي قالنا ماتخفوش محدش هيعملكم حاجه انتم جايين تبع واحد من اكبر العائلات عندهم ..!!
دخلنا وكر الثعالب مكانهم امام قرية سيدي كرير اللى أمامها الطيارة الميج ... ودخلنا جوا في دهاليز وطرق غريبة جوه بيوتهم وفي جوه مكان محاجر قديمة ودخلنا لآخر ارضهم كان فيه زي بحيرة وقعدنا مع الناس( في المضيفه اللى بيسموها المربوعه ) وعملوا واجب الضيافه معانا وجابوا العربية كانت متنفضة من الاستبن والكاسيت وكل حاجة فيها ورق ورخصه وحاجات كان خالي حاطتها في الشنطه كلها اتهلبت من العربية والزجاج الخلفي للسائق مكسور ..غيرناه في نفس اليوم
الناس دي بتبيع بودره وحشيش وسلاح فالعيال الشمامين بيسرقوا العربيات وينفضوها ويبعوها بألف جنيه وتذكرتين بودره ...!!! يقوموا الناس دي ياخدوا العربية ويوصلوا لصاحبها يفوضوه وياخدوا فلوس مقابل العربية وممكن ياخدوا الفلوس وميرجعوش العربية ..!! وبيضربوا ورق ويبيعوا العربية لأي حد ...!!!
عملوا معانا الواجب مشاريب وكدة وأخدنا العربية ودفعنا 5000 جنيه تمن البودرة والفلوس اللى اخدها الحرامي الشمام اللى جاب لهم العربية ....!!!
المكان ده الشرطة ماتقدرش تدخله والشرطة عارفه نشاط الناس دي ومابتقدرش عليهم ولا تقدر تعمل معاهم حاجه .... الحمد لله العربية رجعت تاني يوم اتسرقت فيه مامرش عليها 24 ساعة بفضل الله ...
الاستفادة من القصة دي ..
- نأمن العربية بكلابش طاره او كلبش عجل او زرار فصل
- مانحطش اي ورق مهم في العربية ولا الرخصة العربية ولا مفاتيح خاصة ولا حاجات زات قيمة
- للأسف الواحد مايعتمدش على الشرطة (كل شيخ يحمي ضريحه )
وربنا يسترها علينا جميعاً ... تحياتي
والفيديو ده مصوره للعربية بعد مارجعت وهي متنفضه
13 4 2013 - YouTube

[rompo10]

ربنا يسترها والحمد الله ان العربيه رجعت حضرتك بتقول العربيه رجعت في 24 ساعه عندنا في البحيره واحد اتثبت وخدوا عربيته ورجعت بعد ساعتين ههههههههههههههههه بعيد عن الشرطه طبعا بس العيله دي بسم الله ماشاء الله 26 اخ وكلهم مخلفين ومعاهم سلاحهم قفلوا البلد وساعتين كانت العربيه جت كنت بتكلم مع واحد منهم قلتله هانفتح قسم شرطه وامسكوه احسن الشرطه في بتدور علي عربيات لما تتمسك في كمين ولا حاجه يبقي يرجعوها

[al_manara]

الاول . الحمد لله علي رجوعها . وربنا يحفظها ويحفظ اموال المسلمين .

ثانيا . هو حضرتك بتحكي فيلم ! هو احنا بقينا في الغابة خلاص !

[abogogo]

ربنا يسترها والحمد الله ان العربيه رجعت حضرتك بتقول العربيه رجعت في 24 ساعه عندنا في البحيره واحد اتثبت وخدوا عربيته ورجعت بعد ساعتين ههههههههههههههههه بعيد عن الشرطه طبعا بس العيله دي بسم الله ماشاء الله 26 اخ وكلهم مخلفين ومعاهم سلاحهم قفلوا البلد وساعتين كانت العربيه جت كنت بتكلم مع واحد منهم قلتله هانفتح قسم شرطه وامسكوه احسن الشرطه في بتدور علي عربيات لما تتمسك في كمين ولا حاجه يبقي يرجعوها

ساعتين ...!! لا يبقى كدة البحيرة تكسب
معاون المباحث بيقولنا سيبوا رقم تليفون في المحضر عشان الحرامي يقدر يوصلكم ويتصل بيكم ويتفاوض معاكم واحنا نقدر نتتبعه....!!! تخيل الكلام ده ...!!! انا انفعلت وقليت ادبي عليهم

[abogogo]

الاول . الحمد لله علي رجوعها . وربنا يحفظها ويحفظ اموال المسلمين .
... اللهم آمين
ثانيا . هو حضرتك بتحكي فيلم ! هو احنا بقينا في الغابة خلاص !
للأسف مش فيلم ده الواقع المرير ... احنا في غابة من زمان بس شغل الادغال زاد حبتين اليومين دول

[elpasha1]

حمد الله على سلامة الامورة

[ahmed1981]

عمي وإتنين من ولاد عمي
يعني ثلاث عربيات

إتسرقوا بنفس الطريقة
وإتقالهم نفس الكلام في القسم
وتم دفع المعلوم ورجوع العربية متقلبة خلال يوم بالكثير

رجال الداخلية الآن أصبحوا مكاتب سكرتارية أو سمسرة للتوصيل بين السارق والمسروق
هذه وظيفتهم التي يحصلون مقابلها على الرواتب

بيعاقبونا على خلع مبارك

حسبنا الله ونعم الوكيل
فوضنا أمرنا لله

مرسي معملش حاجة في الداخلية بقاله سبع شهور
لسه الداخلية بيتحكم فيها الخونة

ربنا موجود
-
-

[kokowasfy]

مش مصدق فين مصر بتاعت زمان خلاص بقا كلو كدا لازم بل عافيية

[Kareem.ElAraby]

مبروك عليك رجوع العربيه
والله لو فيلم من أمريكا ما هيبقي كده
شاطرين بس يتشطروا علي الناس المحترمه اللي يوقفوهم في اللجان و الكماين لكن يجوا عند الناس اللي حضرتك كاتب عليهم يجيبوا مارشدير بريفيرسايه كمان !
حسبي الله و نعم الوكيل

[adel_2346]

دارت ازاى وعملو ايه فى اللوك بتاع الدركسيون

[shaddadfalcon1]

واحد صاحبي برده من كام شهر عربيته اتاخدت من جراج العماره في زيزينا وبرده كان سايب كارت بتاع الحضانه تقريبا بتاعة بنته وحاطط نمرته عليه وكلموه وراح دفع واخد العربيه وبرده كانو عرب من نواحي العجمي

[abogogo]

دارت ازاى وعملو ايه فى اللوك بتاع الدركسيون

الحرمية دول محترفيين الجماعة العربويه دول قالولنا انهم جابو حرامي من العيال الشمامه دي وحبوا يعرفوا بيسرق العربية في اد ايه وعملوله اختبار بيقولوا الواد الحرامي فتح العربية ودورها وطلع بيها في 30 ثانية ...!!! بيكسر الزجاج ويدخل العربية من الشبك ويكسر فبرة زور الدريكسيون ويدورها بكماشة لو تلاحظ في الفيديو في قرص على القرص بتاع كالون الكونتاكت بيقولوا كل الاوبترا والافيو واللانوس والفيرنا بيفتحوها ويدوروها كدة ...!!

[Sehsss]

وسمعني أحلى سلام للنهضة

[د.أبونضال]

يا ساتر يا رب ... حمد الله على سلامة العربية

[شاهين - بنز]

أولا ألف سلامة على رجوع العربية
ثانيا أنا بجد جبت جاز من العربيات الكوري دي لحد إمتى حتفضل بتتسرق وتحرق دم أصحابها مايضبطوا أم السيفتي فيها شوية
ده فيديو لسه شايفة إنهارده واحد سرق النيو إلنترا في أقل من دقيقتين !!!!!!!
عمري في حياتي مسمعت مثلا عن أوكتافيا ولا جيتا ولابي إم إتسرقوا دايما كوري كوري كوري