توكيل Ford Egypt ينتقل إلي مجموعة عبد اللطيف جميل

[K_Elkhawaga]

السلام عليكم ورحمة الله وبركاته

في مكالمة ليا مع التوكيل النهاردة، تم إبلاغي بإن التوكيل بيعمل عملية جرد حاليًا بسبب إنتقاله من مالك لآخر، والمالك الجديد هو عبد اللطيف جميل، صاحب توكيل Toyota في السعودية.

هل دي خطوة إيجابية ولا سلبية؟ حيبقى إيه نظام التوكيل الجديد؟
إيه رأيكم؟

[bassemali]

عبداللطيف جميل مانجحش مع دايهاتسو .. وما اعتقدش هينجح مع فورد .. إلا لو صلح أخطاء فكري جروب واللي قبله واللي قبله واللي قبله .. فورد زي دايهاتسو بيعانوا من سوء الوكلاء على مدى عقود دمرت سمعة العربيات دي ف السوق .. هيا اه عربيات جيده لكن إرتفاع أسعار قطع الغيار والصيانات ف التوكيل وعدم توفير الإنتشار وخدمة العملاء والصيانه بصوره كافيه خلاهم من العربيات المغضوب عليهم ف مصر .. مافيش شك غن سعر الفورد او الدايهاتسو في إعادة البيع بيقع بصوره كبيره عن منافسيهم من نفس الفئات .. للأسباب السابق ذكرها وهيا إرتفاع أسعار قطع الغيار وأسعار الصيانات وعدم إنتشار مراكز الخدمه وقطع الغيار وعدم عمل دعايه وتسويق كافيه و... إلخ .

[S O P H O S]

هو عموما تغير التوكيل فالبداية بيكون في تغيرات كويسة
لكن لو استمر كويس هيبقي خطوة ايجابية
ولا لا يبقي التوكيل هيكون اسوء
والله اعلم

[khawas]

شكرا على التنويه و احب اسئل التوكيل دلوقتي شغال ولا لأ عشان معاد الصيانه عندي قرب و باتصل بيهم مابيردوش

[shawke hamed]

عبد اللطيف راجل ومشهور فى الخليج

[raedegypt]

احب اوضح نقطه مش الصح انك تعطى وكالات فى بلدك لمستثمر وعندك رجال اعمال مصريين ممكن ياخدوها .. مع احترامى للسعوديه واى دوله محدش يسمح فى بلدهم بمستثمر مصرى وفى العاصمه ويلمع اسمه ياخد وكالات اى حاجه
لان الدوله غايب عنها نقطه مهمه وهى لابد من تحكم اولاد البلد فى مفاصل الاقتصاد والدوله العميقه وليس الاجنبى . الاجنبى مطلوب ولكن يندرج تحت او مشارك لواحد مصرى وهو العصب والاساس ال يتعامل مع الدوله باسمه . ياريت نتعلم بقى زى الاخرين فى بلادهم