ملاحظاتي المتواضعة بعد زيارة معرض أوتوماك امبارح

[Mohamed-Saoud]

السيارات الصيني:

- اسبرانزا:

• انفي معاجبتنيش الصراحه بسبب رخص الخامات الواضح جدا في الصالون. من الاخر مش مبهره
• تيجو شكلها من الخارج و الداخل حلو و هي فعلا سياره عملية و معقولة جدا.

- ايجراند:

• من الاخر: منظر من بره و من جوه أي كلام !!

- فاو "FAW":

• أكتر عربية شدت انتباهي للقسم الصيني و بعدها مقدرتش أقارن أي عربية صيني بيها هي عربية جديده لانج هاتنزل مصر ب 130000 اسمها FAW BESTURN B50
• العربية واسعة جدا من جوه و من بره تحفه و شنطة بحر.
• العربية دي أقدر أقول عليها "الألماني بتاع الصين"

السيارات الياباني:


- تويوتا:

• من الاخر يا تجيب كورولا الجديده اخر فئة يا بلاش أحسن. غير كده و لا أي تويوتا حسيت بيها فعلا.

سوبارو:

• كالعاده الامبريزا متفوقة و متألقة و زي ما تكون مستنيه اللي يشتريها في البلد دي !!!
• XV من واسعو من جوه بس حلوه جدا لل off roading

السيارات الأوروبي:


- رينو:

• كله كله new نيو لوجان - نيو سانديو - و هكذا
• العربية الجديده اللي شايف انها ممكن تعمل طفره في سوق العربيات "بجانب فلوانس و لوجان" هي ال captur ... انتظروا العربية الكروس أوفر دي في شوارع المحروسة ده لو سعرها كان معقول طبعا.
• لوجان الجديده هي و عائلتها "سانديرو و ستب واي" فعلا فعلا حلال على اللي هايشتريها بس السعر لما يعدي ال 90 ألف في اخر فئة و هي لسه مانيوال كده يبقى مش حلال :-)
• شاشة اللوجان و عائلتها الجديده "شاشة الكاسيت و غيره" من LG . بس أعتقد الموتور و الفتس مفيش تغيير عن اللي قبلها !
• بالنسبة للفلوانس يا تجيب اخر موديل أوتوماتيك أو على الأقل اللي قبله يا بلاش أحسن.

مرسيدس و بي ام:

• لا تعليق :-)

أودي:

• أعتقد المفاجأه الحقيقية هي ال A3 السيدان .. تكنولوجيا عالية و سيارة فوق الرائعة.

سيات:

• الابيزا هي السيارة المناسبة و يمكن الأحسن في فئتها بس "للشباب"
• الليون جميلة و عمليه و صالونها شيك جدا . بس لو كانت تكبر عن كده شوية في الحجم كانت تبقى أحسن بكتيير.

سكودا:

• رابيد سباسباك : جميلة و عملية من الاخر. بس السعر مبالغ فيه على ما أعتقد.
• الA7 فخمة و شيك جدا بس تساع فردين في الخلفية فقط لأن اللي هايقعد في النص هايبقى متضايق من القبة اللي طالعه بزياده في النص !!

أوبل:

• الاسترا: هي و مفيش غيرها :-) فعلا حلال فيها الفلوس في كل حاجه

• اتصدمت في الانسيجنيا لأنها مش واسعة في الخلف زي ما كنت متخيل!!

بيجو:

• في المجمل: بيجو بتتفوق على نفسها ابتداء من الكام سنة اللي فاتوا
• 2008 جميلة جدا جدا و أتوقع ليها انتشار في شوارع مصر.
• ال 308 الجديده فعلا تنافس الجولف بسهووووله

السيارات الأمريكي:


شيفورليه:

• نيو أوبترا: زبالة و محدش يزعل مني.

فورد:

• فوكس: فعلا عربية ألمانيه بمعنى الكلمة و تحفة في تفاصيلها. يعيبها "فقط" انها ضيقة في الخلف.

و بس كده علشان أنا تعبت :-))))))
أتمنى اني وفقت أنقل صورة مجملة مع شوية تفاصيل للمعرض السنة دي. سلام

[ahmzd]

جزاك الله خيرا على هذا الموجز الذي عوضني - نوعا ما - عن عدم زيارتي للمعرض!

[shiko85]

تقرير ممتاز
بسيط - موجز - مفيد
كأنى رحت المعرض
شكر على التقرير و على التلخيص و مجهودك

[Ayman Elmandoh]

شكرا على مجهودك وكأني رحت المعرض

[engwms]

تقرير ممتاز الف شكر ليك
لكن هل للانطباعات السلبية عن بعضالعربيات ليها سبب مقنع
وبالذات عن الاوبترا؟؟؟؟؟؟

[J A G U A R]

تسلم يا باشا على الموضوع المفيد

[MOTOR HEAD]

اعتقد المفاجأه الحقيقية هي ال a3 السيدان .. تكنولوجيا عالية و سيارة فوق الرائعة.

مشكور عاى التقرير
بس العربيه ديه دفع خلفى و لا جر امامى ؟

[tareksakr]

شكرا علي الايجاز والانجاز

[epnmasr]

مشكوووووووووور على مجهودك وشرحك المتميز

[Ahmed TRAVCO]

ربنا يكرمك على التقريلر المختصر المنسق ده، بس بلاش والنبي نحط أوبترا تحت عنوان "السيارات الأمريكية" علشان حرام!!! دي عربية كوري وسمعت كمان ان الجديدة دي صيني!!

[akmm]

خير الكلام ما قل ودل .................................................. .....

[S O P H O S]

وجهة نظر تحترم

[Ahmed.Essam]

شكرا على الشرح الرائع ده :)

[Mohamed-Saoud]

اعتقد المفاجأه الحقيقية هي ال a3 السيدان .. تكنولوجيا عالية و سيارة فوق الرائعة.

مشكور عاى التقرير
بس العربيه ديه دفع خلفى و لا جر امامى ؟

أنا مخدتش بالي من النقطة دي بس هي بتنزل بره ب "front-wheel drive" و فيها منها نظام دفع أحدث اسمه "quattro® all-wheel drive"

بس أكيد اللي هاتنزل مصر الدفع الأمامي كالعاده و الله أعلم !

[Mohamed-Saoud]

متشكر يا شباب على التشجيع ربنا يبارك فيكم...