الأوفردرايف... يعني إيه؟؟؟

[borio1704]

بعض العربيات الأوتوماتيك فيها أوبشن الـ"أوفردرايف"، وده عبارة عن "زرار" غالبا موجود على عصاية الفتيس أو ممكن يكون موجود في التابلوه قريب من الفتيس برضو


هو الزرار ده بيعمل إيه؟؟؟





للأسف فيه مفهوم خاطئ (واضح إنه منتشر) عن سبب وجود الأوفردرايف... ناس كتير فاهمة إنه بيساعد إنك تسقط نقلة وتشد بالعربية


الحقيقة إنه العكس تماما


الأوفردرايف هدفه إنك توفر في البنزين وتمشي بالعربية بالهداوة.


أمال يعني إيه كلمة أوفردرايف؟؟


كلمة أوفردرايف Overdrive هي جاية أساسا من التسمية الهندسية للتروس... الترس اللي بيلِف أو بيسلم الحركة إسمه الترس "القائد" (Drive)... والترس اللي بيتلَف أو بيستلم الحركة إسمه "المنقاد" (Driven)




والمتعارف عليه من زمان إن القائد أسرع من المنقاد أو على الأقل بيساوو بعض في السرعة


الأوفر درايف كان مصطلح بيتقال على إن الترس المنقاد بقى هو اللي أسرع... يعني سرعته Over Drive




خلينا نرجع لطريقة قيادة الفتيس الأوتوماتيك


الأوضاع الموجودة في الفتيس اللي فيه أوفردرايف هي:

(P) باركنج (الركن)، وده الوضع اللي بنستخدمه لما بنركن العربية
(R) ريفيرس (العكسي)، وده وضع المارشدير
(N) نيوترال (الحيادي)، وده وضع الحياد أو (المور)
(D) درايف (القيادة)، وده وضع القيادة العادي، وفيه يتم تشغيل التروس الأول والتاني والتالت
(2) سكند (الثاني)، وده وضع القيادة اللي مش عايزين نشغل فيه الترس التالت (أول وتاني فقط)
(L) لــــو (المنخفض)، وده الوضع اللي بيشغل الترس الأول بس



الكلام ده معناه إن الترس التالت هو الترس اللي حيوصل العربية للسرعة القصوى بتاعتها... وطبعا كلنا عارفين إن الفتيس اللي فيه أوفر درايف بيبقى أربع سرعات.


أمال الترس الرابع بيعمل إيه؟؟؟؟؟


ترس الأوفردرايف مهمته إنه يوفر في استهلاك البنزين عن طريق تقليل دوران المحرك على السرعات العالية... وده معناه إنه مش حيقدر يخلي العربية تمشي بسرعة أكتر من السرعة القصوى للترس التالت... لإن عزم الموتور مش حيقدر يرفع سرعة العربية بعد سرعة معينة،

وغالبا حتبقى أقل من السرعة القصوى بحاجة بسيطة، بس حيمشي العربية كويس على سرعات متوسطة (100 - 150 كم/س) ويوطي لفات الموتور

وزي ما قلت لحضرتك الغرض منه التوفير في الوقود على أساس إنك مش عايز منه تسارع ... مجرد بس تبقى ماشي على سرعة ثابتة عالية نسبيا بدون زيادة في السرعة، وفي الحالة دي رجلك حتدوس بنزين على قد ما العربية ماشية



على فكرة.. الأوفردرايف مش ترس أساسي في علبة التروس


يعني مش ترس أساسي؟؟ مش هو موجود في الفتيس بردو؟؟

أصل زمان ما كانش فيه ترس رابع.. وكانت العربيات الأوتوماتيك بتنزل سرعتين أو تلات سرعات... ولما بدأ الترس الرابع ينزل في العربيات الأمريكاني بالذات بعد حرب 73... عملوا الأوبشن دي بهدف توفير الوقود.

ترس الأوفردرايف ماكانش موجود جوه الفتيس، وكان عبارة عن ترس إضافي أو وحدة إضافية بيتركب على جسم الفتيس أبو 3 تروس، طبعا من غير ما يعملوا تصميم جديد لعلبة تروس جديدة ويبقى شيء مكلف جدا.. خصوصا إن ظروف الحرب المفاجئة خليتهم يتصرفوا بسرعة.





طيب .. أعمل إيه لو لقيت العربية مش مساعداني وعايزها تشد شوية؟؟


لو حبيت تخلي العربية تشد وتسحب معاك.. يبقى لازم تفصل الأوفر درايف



لما بتظهر في التابلوه لحضرتك العبارة بتاعة O/D off وده اختصار لكلمة (Over Drive Off) فده معناه إن وظيفة الأوفر درايف مطفية والترس الرابع مفصول.. وبالتالي لازم الصوت يعلى لإن العربية شغالة على التالت




الخطأ الشائع عندنا كمصريين إن اللمبة لما بتنور بتنبه حضرتك إن الخاصية دي مش شغالة... مش العكس.. لإنها لمبة إنذار.. بدليل إن لونها دايما أصفر... زي لمبة البنزين.

والمعروف في كود الألوان بالنسبة للعلامات التحذيرية إن الأصفر يستخدم للتنبيه لحاجة ممكن تسبب مشاكل.. بس ما فيهاش خطر

بعكس اللون الأحمر... ده معناه تحذير لحاجة بتسبب خطر على العربية أو خطر علينا.

زي لمبة الفرامل أو لمبة الدينامو أو لمبة الحرارة.




أنا شخصيا... بافصل الأوفر درايف جوه البلد.. وما بشغلوش إلا لو طلعت على طريق سريع ومش ناوي أجري أكتر من 100-120.

على فكرة... لو فصلت الأوفردرايف... غالبا هتحس بفرق واضح جدا في سحب العربية.. حتى على السرعات البطيئة.





خلي بالك.. كلمة أوفردرايف ممكن تتقال في الفتيس المانيوال بردو لو كان الترس الخامس مش بيخلي العربية توصل للسرعة القصوى بتاعتها والغرض من وجوده مجرد التوفير في الوقود


طيب لو عندي عربية مانيوال 5 سرعات... أعرف إزاي إن الخامس بتاعها أوفردرايف ولا لأ؟؟؟


كل اللي حضرتك محتاجه إنك تشوف جدول نسب التخفيض بتاعت الفتيس

النسبة اللي تلاقيها أقل من 1 تبقى أوفر درايف.. وما تعتمدش عليها في إي شد بالعربية.

زي كده






آخر حاجة عايز أقولها


علب التروس اللي فيها أوفردرايف تعتبر حاليا تكنولوجيا قديمة.

لإن علب التروس الجديدة فيها 5 سرعات و6 سرعات وكمان وصلت لـ8 سرعات، بالإضافة لتكنولوجيا الستيبترونيك والـCVT وحاجات تانية كتير عمالة بتطلع.

بس لازم نتكلم عليها مادام فيه عربيات موجودة وفيها الأوبشن ده زي العربيات الياباني (ومنها النيسان صني مثلا)



...

[Batman372]

مشكور يا باشا على المعلومات القيمه :)
تحياتى ...

[ahmedelrayan]

شكرا يا باشا على المعلومات القيمة دى

[horas3000]

الف شكر
موضوع مفيد
و جاري التجربه في موضوع الشد ده :)

[J A G U A R]

شكرا على الموضوع المفيد

[abohend]

بجد معلم

الله ينور يا هندسة
منكم نستفيد

[mido200039]

جزاك الله كل خير

[maio_do]

موضوع جميل وشرح مبسط بس اية فايدة زرار ال s اللى موجود

[kimo haider]

الف شكر
موضوع مفيد

[MisterMaN]

انا معايا النترا 2004 اوتوماتيك فيها زرار الاوفر درايف..الزرار ده عندى بيعلق وبيهرًب المهم انى لما فجأة بلاقى العربية ال ار بى ام بتاعها بيعلى بعد التانى بمعنى انه دايما بينقل على 3 او اقل لكن فجأه لقيته بيعلى مع السرعه يعنى ممكن على 110 يكون الار بى ام على 4 ولو السرعه زادت الار بى ام بيزيد كتييير عكس اللى بيحصل معايا فى العادى(لانه فى العادى بحيب 130 والار بى ام اقل من 4)..رحت كشفت على العربية فالكمبيوتر قال الفتيس سليم اللى حصل بس ان الاوفر درايف واضح انه معلق(باين فى التالوه انه off بس على الجهاز باين انه on) بسبب الزرار وانى محتاج اغير الزرار وفعلا داس على الزرار كذا مرة ورجعت العربية عادى تنقل على اتنين ونص او تلاته وتطلع 140 والار بى ام 3 او اعلى حاجه بسيطه ده غير انه قالى كويس انك مزودتش عن 100 والا كان ممكن فالف الفتيس يتغير (بس انا عموما مبزودش لما اسمع صوت الموتور عالى او الاقى الر بى ام بيعلى عن 4)
الشاهد فى الموضوع ان الاوفر درايف بيعلى الار بى ام عند السرعات العاليه لان وظيفته انه مينقلش العربية بعد التالت ولو ماشى على الرابع العربية بتسقط لل الثالث والا فا ايه اللى كان بيخلى صوت الموتور والار بى ام عندى يعلى لما الاوفر درايف بيكون شغال
ارجو الافاده وشكرا

[Mohamed_Hamza]

والدى معاه عربية نوبيرا 2 موديل 2000 اوتوماتك الفتيس فيه زرار باور بيعلم فى التابلوه لو دوست عليه بس مبيحصلش حاجة وفيه فى التابلوه زرار هولد ساعات مبيعلمش مش عارف فايدته ايه؟

[yrezk]

Ds هو اوفر دريف

[aif]

موضوع جميل وشرح مبسط بس اية فايدة زرار ال s اللى موجود

ده زرار القيادة الرياضية وهو اختصار
sport
لما بتشغله السيارة بتحرق ع الغيار
بمعني ان النقل من السرعة الي النقلة الاعلي بيكون متأخر علي عدد لفات موتور اعلي
وده بيدي للعربية سحب اقوي لكن طبعا بيستهلك بنزين اكتر بكتير
وبيستعمل لما بيبقي حد بيشد بالعربية لأي سبب .... من اول ان واحد بيشد مع صحابة او بيعمل دريفتات .... لغاية لو حد بيجري ورا حد عشان يثبته والعياذ بالله
وطبعا الزرار ده مش موجود غير في السيارات الحديثة والفئات العالية
هذا والله اعلى وأعلم

[Silent~Dream]

شرح ممتاز و موضوع رائع تسلم ايدك

[faroojj]

طيب بالنسبة إلى زر السبورت اللى فى الفيتيس الستيبترونيك يعتبر زيه برده ؟؟؟؟