"الوطنى" يدعو أعضاءه للتصويت بـ"نعم" على التعديلات الدستورية

[Qmax]

أعلن الدكتور محمد رجب الأمين العام للحزب الوطنى وأمين التنظيم، تأييد الحزب للتعديلات الدستورية الأخيرة، مشيرا إلى أنه أصدر تعليمات وتوجيهات لكافة قيادات الحزب فى جميع المحافظات بضرورة المشاركة فى الاستفتاء على التعديلات الدستورية فى التاسع عشر من مارس الجارى.

وقال"رجب" لـ"اليوم السابع"، إن الحزب دعا الناخبين للمشاركة وتأييد هذه التعديلات لما لها من أهمية فى تحقيق الشرعية الدستورية والانتقال لمرحلة جديدة من العمل الوطنى.


وأضاف الأمين العام للحزب الوطنى، أنه لم ينته حتى الآن من التشكيل الجديد لهيئة مكتب الحزب واختيار الأمناء المساعدين، بعدما تقدمت هيئة مكتب الحزب باستقالتها له قبل 3 أيام.

وكان "رجب" أصدر قرار أمس السبت، بفصل 22 قياديا من الحزب على رأسهم جمال مبارك وحبيب العادلى وأحمد المغربى وأمين أباظة وعدد من رجال الأعمال، بخلاف إعلانه خلو منصب "مبارك" وإقامة مؤتمر استثنائى لاختيار رئيس بديل للحزب.
انا ناقل الخبر ده لأني حاسس انه كوميدي

[د.أبونضال]

الإخوان والجماعة السلفية والحزب الوطني هم الجماعات السياسية الوحيدة التي توافق على التعديلات. في رأيكم ماذا يعني هذا؟

[hobiko]

المعنى واضح جدا يا د. نضال

اللعبة لعبة مصالح ..... قبل كل شىء

[wawoo]

الإخوان والجماعة السلفية والحزب الوطني هم الجماعات السياسية الوحيدة التي توافق على التعديلات. في رأيكم ماذا يعني هذا؟

اقرار هذة التعديلات يعنى ببساطة ان الخطوة القادمة ستكون هناك انتخابات برلمانية قبل الانتخبات الرئسية ...و هذا يعنى ببساطة ان التعديلات فى مصلحتهم ...

[mikho83]

الإخوان والجماعة السلفية والحزب الوطني هم الجماعات السياسية الوحيدة التي توافق على التعديلات. في رأيكم ماذا يعني هذا؟

طلع السلفيين برة اللعبة لأنه مش ليهم في السياسة زي ما قال الشيخ محمد حسان، بالنسبة للإخوان امبارح عرضوا على باقي الأحزاب الدخول في الانتخابات بالقائمة الموحدة، وأعتقد إن ده مش في مصلحة الإخوان، بالعكس دا في مصلحة الوفد والتجمع والباقين، أما بالنسبة للحزب الوطني فأعتقد إنهم بيحاولوا يظهروا إنهم أصبحوا كويسين وعايزين مصلحة البلد. هذا رأيي

[تامر.محمد]

الاخوان كده كده اعلنوا انهم مستهدفين 30 او 40 % على الأكتر من البرلمان , و بالمناسبة , فيه وجوه يسارية بدأت تدعو للتصويت بنعم برده , بغرض التخلص من وجود الجيش في الشارع و تفادي انفلات اعصابه اللي طبعا هايبقى على دماغ الشعب و مش في مصلحة البلد

[mailo]

الإخوان والجماعة السلفية والحزب الوطني هم الجماعات السياسية الوحيدة التي توافق على التعديلات. في رأيكم ماذا يعني هذا؟

كلامك فيه ريحة اتهام مش حلوة خالص واسمحلي أقولك إن أنا غيرت فكرتي عنك تماما بعد الكومنت ده
مش معنى إن أنا اوافق أبقى وطني أو ارفض أبقى برادعي

[Dojuar]

من الناحية الاخرى: البرادعي و الحزب الناصري و الوفد و الجبهة يدعون للرفض و المقاطعة

في مصلحة مين بقى؟؟؟؟

[mikho83]

طيب أنا مش فاهم هو ده عيب في الإخوان ولا عيب في الأحزاب اللي ما كانش ليها لازمة في الشارع المصري؟
يعني ده ذنب الإخوان إنهم كانوا منظمين وواقعيين؟!!!!!!!

[hobiko]

من الناحية الاخرى: البرادعي و الحزب الناصري و الوفد و الجبهة يدعون للرفض و المقاطعة

في مصلحة مين بقى؟؟؟؟

معلش بس عشان اضافتك تبقى كاملة

كل مرشحى الرئاسة المحتملين ...... ضد التعديلات

مش البرادعى بس ...... و كمان ائتلاف شباب الثورة

يعنى احنا كده كده .... عايزين ننتخب رئيس من الموجودين على الساحة ..... بعد ما نوافق على التعديلات

اللى ولا مرشح .... موافق عليها

حاجة غريبة فعلا

[زينة الله]

طبعا لازم الوطنى يوافق عليها ... عارفين ليه ؟

لأن الرئيس السابق هو من دعى للتعديلات الدستورية و شكل لجنة لها

و لما تنحى و الجيش مسك البلد حل اللجنة الأولى و شكل لجنة جديدة لعمل التعديلات !!!!

و من الخبر اللى حضرتك نقلته فوق ... أنا زادت شكوكى أكتر و أكتر من سبب إجراء التعديلات و أتمنى دستور جديد

[النوبي]

كلامك فيه ريحة اتهام مش حلوة خالص واسمحلي أقولك إن أنا غيرت فكرتي عنك تماما بعد الكومنت ده
مش معنى إن أنا اوافق أبقى وطني أو ارفض أبقى برادعي

تمام كده

[otefa]

وطني يأيد مايأيدش ..............أنا عندي فكري وثابت عليه نعم للتعديلات

[aif]

الحزب الوطني
انا سمعت الاسم ده قبل كدة
..
..
يااااااه
والله زمان يا وطنطن

[Moh.Abdelbaset]

الإخوان والجماعة السلفية والحزب الوطني هم الجماعات السياسية الوحيدة التي توافق على التعديلات. في رأيكم ماذا يعني هذا؟

يا أستاذ فيه تعديلات يوم 19 تقول لا تقول نعم..حضرتك حر
لكن سؤالك مستفز لأبعد الحدود..و ملهوش لازمة التهكم على اللي موافقين على التعديلات