هو مين اللي قتل العصب؟!

[ehabthefirst]

المهم بعد كل الحوارات دي مين اللي موت العصب ؟ ههههههههههههههه

مش انا هو اللى مات لوحده
ههههههههههههههههههههه

[MoToRiZeR]

لأ دنا كمان ساعات أخش محل لبس ولا حاجة .. و أما أقول للبياع هاتلي ده أشوفه أحس إني طلبت منه طلب فوق طاقته مثلاَ و إنه بيعمل حاجة غصب عنه ! لدرجة مرة واحد حسسني إنه بيتعذب و هو بيجيبلي جزمة عايز أقيسها من المخزن فا بقوله هو إنت بتشتغل هنا ولا واقف مجاملة لحد بيعمل مصلحة و راجع ؟!

مفيش إلا محلات قليلة هي اللي بتفهم اللي شغالين فيها إزاي يخدم الزبون .. و مش كل توكيلات العربيات برضه كدة فيه منها اللي بيكسبوا الزبون و فيه اللي بيكفروه في عيشته .. انا فاكر من سنتين أيام ما كانت السريون لسة نازلة و عجبتني بس مكنش في دماغي أشتريها بس رحت أتفرج عليها من باب التطفل يعني فا قابلني هناك مهندس كان قمة في الذوق لدرجة لسة فاكر إسمه لحد دلوقت "عمر خالد" قعد فصصلي العربية من أولها لأخرها بأسلوب محبب كدة و فتحهالي و أخد نمرتي عشان قاللي نكلمك نقولك ال updates اما موديل 2008 ينزل .

اما جيت أشتريها بقي .. في نفس التوكيل و نفس الفرع .. شخص تاني .. هو متأخرش في حاجة الصراحة إنما كنت اما تسأله سؤال تحس إنه بيتكرم عليك بالإجابة .. فا خدمة العملاء خصوصاَ بالإتصال المباشر وجهاَ لوجه دي مش أي حد ينفع يشتغلها لأن ممكن بياع يقفلك من السلعة و يخليك تصرف نظر لمجرد رخامته .

فيه حكمة صينية بتقول لا تفتح متجر إذا كنت لا تستطيع الإبتسام .

و عموماَ فيه طبع عفن في الشخصية المصرية حالياَ زي العصب تمام و هي إنه عايز يكسب فلوس من الهوا مش عايز يتعب .. عايز الناس تشتري عربيات من غير ما تسأل و توجع دماغه .. عايز الناس تشتري اللبس من غير ما تقيسه .. عايز كل واحد يديله الفلوس و ياخد الحاجة و يمشي و خلاص .. و تلاقي الشاب من دول متخرج من كلية هو مش حاببها لأنه كان مكسل يفكر و يكتشف هو بيحب إيه .. و طبعا بيتخرج فلة ولا يفهم حاجة عشان كان صحابه بيكتبولوا الغياب و بيزبطوه في الإمتحانات و المشاريع كان بيشتريها .. و مش عايز ياخد كورسات و يوجع دماغه .. و في الأخر يقولك مش لاقي شغل ! طب ما إنسان محصلته النهائية زيرو .. يشتغل إيه !!؟؟ للأسف فيه منهم بيشتغل زي اللي كاتب الموضوع قابلهم في التوكيل و اللي أكيد معظمنا بيقابلهم كتير في يومه .. واحد شايل صفر فوق كتافه بس بيشتغل .

[Dr Ahmed]

يا جماعة كلامكم كله صح
لكن الجزء الإيجابى إن الواقع دا بيفتح الباب للتميز... إزاى؟
إنك تراعى ربنا وضميرك فى شغلك فتصبح مختلف عن باقى الكائنات حولك ، ودا هيجذب الناس ليك فى أغلب الأحوال سواء تاجر - موظف - دكتور أو أى مهنة
حسن مقابلة الناس من صميم الدين فضلا عن إتقان العمل
مشكلتنا نقص حاد فى الإيمان الحقيقى مش الصورى اللى بنتمسح فيه

[Lion_Heart]

على فكرة دى بتكون قلة ذوق , و بحس انه تعالى على الرزق و مفيش حمد لربنا , نفس الموقف حصلى فى صيدلية كان معايا روشته وعاوز اصرفها فلقيت الدكتور عمال يتابع المتش و لازق فى الكرسى ومش عاوز يتحرك وتقريبا مشغل واحد معاه دبلوم وبينده عليه عشان يصرفلنا الروشته و الأخ اللى بينده عليه مش موجود وبرضه لسه لازق فى الكرسى و قفت دقيقتين رحت سايبه وماشى من غير حتى ماقول سلام عليكم لأنه ميستحقهاش , منتهى قلة الذوق ...
على فكرة العصب مقصود بية الذوق و النخوة و الرجولة و الاحترام و الأدب .....

[OlaOsman]

الله ينور عليك
المهم ان دكتور السنان براءة من دم العصب

كل يغني على ليلاه يا دكتور

[rockana9112007]

بعد اذنكو ياجماعة اقول رأيى .اولا انا كنت شغال فى شركة كبيرة خدمة عملاء كان كتير من الناس اللى بيتصلو مستواهم العلمي والاجتماعى كبير يعنى مهندسين او اطباء او ظباط ولواءات الخ بس هما كانو مفكرين انهم لما اشترو السلعة اشترونا معاها فكانو بيتكلمو بتحفز وغرور وكانت قلة الادب واردة وهما عارفين اننا منقدرش نرد عليهم ولازم نمسك اعصابنا فكانو بيسوقو فيهااا وانا عمرى ماهنسى دكتورة قعدت تدينى كلام فى جنابى واكنى جوزها اللى طلقهاا وتزعق فى التليفون لحد ماقررت انى ارد عليهااا واللى يحصل يحصل فلقيتهااا فجأة سكتت وصوتهااا انخفض وقفلت الخط ودايمااا يقولو انتا مش عارف انتا بتكلم مين انا هسوى واعمل ويشتكو شكاوى كيدية للادارة ومن كتر الشكاوى الكيدية المشرف مبيصدقش اى شكوى توصلة من عميل بيعمل حساب انها ممكن تكون كيدية ومبيصعدش الموضوع نسيت كمان اقول انهم كانو بيبقو عاوزين اننا نعمل استثناءات ليهم ولأهاليهم عشان دة اللواء فلان او المستشار علان بجد كانت حاجة تنقط حسيت بجد انهم مرضى نفسيين مش ناس المفروض تكون قدوة واللى كان يخلى ابنة الصغير معداش الاربع سنين يكلمنى ولما اقولو ممكن ياحبيبى تخلينى اكلم بابا او ماما يقوم يرد ابوة ويقول وهو ابنى يعنى مش عاجبك دة احسن من اللى مشغلك فكان الحل الوحيد ليهم البروووووووود التام والتجاهل ولا اكنهم كائنات وعلى جثتى لو قضيتلهم مصلحة او حليت مشكلة او قلت حتى معلومة تفيد وسيبهم يزعقو للصبح والله انا كنت بقفل الصوت وقعد اغنى لحد مايزهقو ويقفلو
بس كان فية اخرين والحق يقال احترامهم كان فوق الوصف وكانو يحرجو الواحد من كتر الذوق واحترامهم لنفسهم والاخريين لدرجة انى كنت بعمل حاجات مش فى نطاق عملى وأكلم زمايلى والمشرفين وممكن اقول انهم قرايبى عشان صحابى يعملو معاهم الواجب وزيادة عشان مشاكلهم تتحل بسرعة والنتيجة انهم كانو بيتصلو يسألو عليا بالاسم ويطلبو انهم يتكلمو معايا بس وانا كنت بعرفهم على طول اول مابسمع صوتهم ولسة فاكرهم وفاكر اساميهم حتى بعد سنتين من تركى للعمل
والدليل على كلامى دة ان وظيفة خدمة العملاء دية من اكتر الوظائف اللى فيهااا turn over يعنى معدل ترك الناس للعمل عالى جدااااا بسبب الضغوط النفسية الرهيبة
كمان عندى سؤال لية دايمااا المصرى مفكر ان بالصوت العالى وقلة الادب بس هما اللى هياخد بيهم حقة
اسف للاطالة وخالص تحياتى