فهمي هويدي يطرح 16 سؤالا على القيادة المصرية بشأن مجزرة غزة

[Abdo_Eldesokey]

هوا المفروض مصر تفتح الحدود وتسيب الفلسطينيين ينقلو فلسطين لمصر ؟؟؟

دة كان مخطط ومشروع اسرائيلى والموضوع معروف بانهم عايزين ينقلو الفلسطينيين لوطن جديد فى سيناء

ولا هيا مصر المفروض تدخل كل الفلسطينيين فى غزة الى الأراضى المصرية علشان متبقاش مصر وحشة وعلشان تحافظ عليهم من اسرائيل ؟؟

بالرغم من حزنى الشديد على اللى بيحصل لأخواننا فى غزة الا انى برضو حزين جدا من كل اللى عمال يقول مصر غلطانة انها مش بتفتح المعبر !!!!!

الصراحة وجهة نظر ساذجة لأن الواحد لو فكر فى العواقب اللى هتترتب على كدة عمرة ما هيقول الكلام دة

انا بتكلم على المصريين طبعا لأن غير المصريين مش فارق معاهم

"فرق تسد" السياسة الي بريطانيا اتخذتها في الوطن العربي ، وفعلا ً نجحت فيها بنسبة كبيرة ، هيا الي خلت يبقى فيه مصر وفلسطين وحدود

ما الغرض من فتح معبر رفح ؟، الغرض هو كسر الحصار عن إخواننا في غزة وتسهيل حركة البيع والشراء حتى يحصلوا على حاجاتهم اليومية ، كذلك تسهيل نقل المصابين للعلاج في مصر

أما عن احتمال نقل غزة إلى مصر فهو غير وارد تماما ً ، لا أظن إن ناس بتموت في سبيل وطنها هتسيبه في لحظة كدة ، أكيد فيه ناس هيهربوا إلى مصر ودول الي قلبهم مش متعلق ببلدهم ، وهم مجرد قلة موجودة في أي مكان

أنا رأيي إن مصر مش بتفتح معبر رفح بسبب توجهيات أمريكية اسرائيلية ، لأن لو المعبر اتفتح حماس هتحصل على الأسلحة والذخيرة والمتفجرات بسهولة من بدو سيناء وبالتالي خسائر أكثر لاسرائيل ، وهو ما لا ترضاه حكومتنا الرشيدة ، وإلا قولوا لي إيه فايدة أنفاق التهريب الي بنسمع عنها كل شوية والي بيهربوا منها أسلحة ؟؟

فمتهيألي المفروض نبقى مكسوفين من نفسنا ، إن إخواننا في حماس مش لاقيين مكان يجيبوا منه أسلحة غير عن طريق مصر وإحنا بكل بجاحة بنقلهم لأ مش هنسبكوا تضروا اليهود الحلوين أو تموتوهم ، إحنا هنستني لحد ما يخلصوا عليكوا وبعدين يجوا مصر ويكملوا علينا

أرجو يا جماعة إن محدش يزعل من كلامي ... ده مجرد حديث

[Abdo_Eldesokey]

هما بس بيطالبوا مصر انها تفتح المعبر
هوة المطلوب فتح المعبر ليه
ما مصر دخلت المصابين يتعالجوا عندها
هل المطلوب دخول كل الفلسطينيين مصر علشان مصر تبقى كويسة ؟
اذا كانت مصر بعتت شاحنات المساعدات وساعة ما دخلت المعبر حماس ضربته بالصواريخ
طبعا اسرائيل قفلت المعبر ومنعت المساعدات
يعنى حماس مش عايزة مساعدات من مصر
هما عايزين ييجوا مصر ويقعدوا فيها وبس

حضرتك جايب الكلام ده منين ؟؟؟ معقول حماس تضرب بردوا المساعدات بالصواريخ

بص هوا الكلام ممكن يكون حصل فعلا ً وفيه حد ضرب المساعدات دي ، بس دول أكيد مجرد عملاء خونة وما أكثرهم في فلسطين وخصوصا ً في حركة فتح ، لما حماس دخلت غزة وجدت بلاوي حركة فتح كانت عملاها

كان فيه مقال عن الموضوع ده بس للأسف مش لاقيه دلوقتي ، هدور عليه وأجيبه لحضرتك

فأظن إن دي سهلة أوي أي حد من فتح يعملها
ملحوظة : ليس كل فتح خونة ، لكنهم كالحزب الوطني ، الكل عايز مصلحته

انا بردة عايز اسأل
مين اللى ضرب النار على جنود الشرطة المصرية
مش الفلسطنيين
محدش فيكم اكلم عن الشهداء دول ليه
لو الشهيد دة لخوك او ابنك
كنت بردة هتدافع عن حماس

محدش اتهم حماس إنها الي قتلت الظابط المصري ، وأنا أي واحد فلسطيني بالنسبة لي زيه زي المصري لو قتل ظابط مصري أكرهه بنفس المقدار الي أكره بيه القاتل لو كان مصري ، كفى تفرقة ، كلنا مسلمون

اما نجادى قال مليون مرة انه هيرمى اسرائيل فى البحر
ما بعتش ليه فعلا اسلحة او خبراء لحماس

محدش عارف إيه الي بيحصل ، والأيام القادمة ستكشف الكثير في المواجهات البرية

[Mohamed_Hegazy]

المشكلة فى كاتب الموضوع و كل من أشبع بهذا الفكر فكر الجماعة المعروفة انهم مشتركين فى الآتى
1-معاملة مصر و باقى الدول على انها قوى عظمى وأن رؤساؤهم متخاذلين متقاعسين متواطئين كفروا بالله و تولوا أعداء الله من اليهود و من شايعهم
2- الحكومات العربية أغلبها أو كلها كافرة متولية للكفار
3-اسقاط عدالة الحكومات و تهيج الشعوب على حكامهم و حكوماتهم
4-الدعوة للخروج للجهاد على طريقتهم بالشباشب والنعال و عصيان المقشات فى مواجهة الدبابات والطيارات والصواريخ
5-الحرب على دولة اليهود شىء هين كأنك مثلا رايح تتخانق مع شباب فرافير من نادى هيليوبيليس
6-و هو المغالى فيه بشدة هو تعظيم حماس و الاخوان و حسن عدوالله الى مرتبة تقارب مرتبة الصحابة والصديقين والشهداء
أعوذ بالله من هذا الفكر السخيف الضيق والحمدلله الذى عافانا
أريد أن أقول لأصحاب هذا الفكر
1-حكوماتنا ليست كلها كافرة أو متخاذلة بل أغلبها مسلمة
2-دولنا بالكاد تحاول الدفاع عن حدودها لا هى بالقدرات التى تطالبونها بها ولا تستطيع تحقيق الأهداف التى ترجونها و تطالبونها بها
3-الحرب على اليهود ليست هينة ويجب اعداد العدة لهم ولأن المواجهة لن تكون معهم وحدهم بل تلات اربع الخريطة سيكون معهم
4-اخرجوا من حيز الجماعة بتاعتكم الى حيز أهل السنة والجماعة
5-عمالين تقولوا جهاد جهاد جهاد و أنا متأكد يقينا محدش فيكم يعرف ما معنى كلمة الاسلام ولا يعلم تعريف الايمان عند أهل السنة والجماعة يبقى عايززين تروحوا تجاهدوا ازاى و أنتم أبجديات الدين لم تحصلوها
و ربنا يهدينا ويهديكم

راءيك اتفه من ينظر او يرد عليه

[hh]

انا عايزة اعرف الي عمالين يدافعوا عن موقفنا المتخاذل ده و بيتكلموا عن السلام فكروا في الموضوع بجد و لا سمعوا كلمتين في التليفزيون بيرددوهم؟
سلام ايه و حرب ايه اللي عمالين يتكلموا عليهم؟ محدش طلب من مصر تبعت جيشها يحارب في غزة, و انا معرفش حماس مخلصين في دفاعهم عن قضيتهم و لا بيدافعوا عن اجندة ايرانية و بصراحة مش هي دي القضية خالص. الفضيحة الحقيقية الي احنا قدامها ان في حالة حصار للشعب الفلسطيني في غزة - الشعب و ليس حركة حماس - تقوم بها كلا من مصر و اسرائيل!!!!!!!!!!! نعم مصر تحاصر غزة مع اسرائيل و تمنع وصول الامدادات اليها, و انا هنا لا اتكلم عن الامدادات العسكرية و لكن اتكلم عن المساعدات الطبية و الغذاء. و اريد من الذين يتشدقن بنغمة الأمن القومي المصري ان يقولوا لي ما الذي يضير الامن القومي المصري من فتح معبر رفح؟ هو حد قال انه حيتفتح عالبحري من غير رقابة؟ ده مجرد نقطة حدودية تقدر مصر تضع لها كل الضوابط اللي هي عايزاها, بس هما مش عايزين يعرفوا بده لأن زي ما قلت قبل كدة مصر مشتركة شراكة اساسية في جريمة الحصار والتجويع التي تجري ضد شعب غزة!!!
و بعدين ظريفة اوي حدوتة احتلال لفلسطينيين لسيناء اللي عمال بيغنوها دي.....
طيب ما الفلسطينيين لما قفلنا المعبر في وشهم المرة اللي فاتت و حصلت عملية اقتحام المعبر اللي كلنا عارفينها, التقارير لرسمية قالت ان حوالي 450 ألف فلسطيني عبروا الى مصر.الناس اللي عدت دي بقى عملت ايه؟ اشتروا احتياجاتهم وز رجعا بلدهم تاني.......يعني ما الفلسطينيين مش هدفهم انهم يسيبوا بلدهم و يجوا يقعدوا عندنا ولا حاجة...
يايت بس يا اخوانا منقعدش نردد كلام و بس و نشغل عقلنا شوية. و خدوا بالكم انا كل اللي بقوله مالوش دعوة لا بحرب ولا سلام و لا حماس حلوة ولا وحشة و انما يتعلق فقط بحقوق الشعب الفلسطيني المعلقة في رقابنا و رقاب حاكمينا.

[الطنطاوي]

فهمي هويدي يطرح 16 سؤالا على القيادة المصرية بشأن مجزرة غزة

فهمي هويدي يطرح 16 سؤالا على القيادة المصرية بشأن مجزرة غزة




خاص - أحمد الدسوقي - طرح الكاتب الصحفي فهمي هويدي 16 سؤالا علي القيادة السياسية المصرية والفلسطينية والمجتمع الدولي داعيا اياها الى الاجابة عليه كي تحدد الي حد كبير موقفها من تطورات الاحداث في غزة بعد العدوان الاسرائيلي الجبان والمجزرة الصهيونية التي بدأت منذ اطلالة يوم السبت الاسود ولا تزال مستمرة حتى الان.

وأكد هويدي ان الاجابة على اسئلته التي اطلق عليها اسم "اسئلة الساعة" وعنون بها مقالها في جريدة الرؤية الكويتية تكشف الي حد كبير اسرار العدوان وتفضح مخططاته وتضع النقاط علي الحروف تجاه مواقف الدولة خاصة وانها تشمل كافةة الاستسفسارات التي يطرحها الشارع السياسي العربي ويجب ان نجد اجابة لها.

وفما يلي نص مقال فهمي هويدي:

المذبحة التي وقعت في غزة تستدعي شلالات من الأسئلة منها ما يلي:

1 ـ هل أُخطرت مصر بالعملية، خصوصا أن وزيرة الخارجية تسيبي ليفني قدمت اليها يوم الخميس 25/12 بعد 24 ساعة من صدور قرار الحكومة الإسرائيلية بشن الغارة حسبما أعلن رسميا في تل ابيب، الامر الذي يعني انها جاءت والقرار في جيبها؟

2 - أعلن رئيس الوزراء التركي رجب طيب أردوجان تعليق الوساطة التركية في المفاوضات بين سورية وإسرائيل بسبب الغارة، واعتبر أن بلاده أهينت حين جاء إليها ايهود باراك وزير الدفاع الإسرائيلي قبل خمسة أيام من تنفيذ العملية، ولم يشر إلى اعتزام إسرائيل ضرب غزة.

هل بوسع مصر أن تعلن أنها أهينت بدورها، لأن ليفني زارتها والتقت برئيسها ووزير الخارجية من دون أن تخبرهما بشيء عن الغارة؟ أم أن سكوت مصر يعني أنها أُحيطت علما بالأمر قبل وقوعه؟

3- إذا صحت التصريحات الإسرائيلية بأن بعض الدول العربية أُبلغت بالغارة، أليس من حقنا أن نعرف ماهية تلك الدول؟

4- ما مدى صحة الأنباء التي نشرتها الصحف الإسرائيلية (يديعوت احرونوت ومعاريف يوم 15/12) من أن عاموس جلعاد مدير الدائرة السياسية والأمنية في وزارة الحرب سمع من السيد عمر سليمان انتقادا حادا لحماس حين التقاه في القاهرة، وتأييدا لما يمكن أن تتخذه إسرائيل من إجراءات بحقها؟ وإذا لم يكن الخبر صحيحا، فلماذا لم تنفه القاهرة؟

5- إذا كانت تركيا قد علقت وساطتها بين سورية وإسرائيل، فهل ستتخذ مصر أي إجراء تعبر به عن غضبها إزاء ما جرى في غزة، بخلاف بيان الشجب وتصريح وزير الخارجية السيد أبوالغيط الذي حمل فيه حماس المسؤولية عما انتهى إليه الوضع في القطاع؟

6- لماذا لم يذكر اسم القاهرة ضمن حملة الاتصالات المكثفة التي تبادلتها القيادات العربية يوم الاحد لاتخاذ موقف، بعد ذيوع أخبار الغارة وسقوط العدد الكبير من الضحايا الفلسطينيين؟

7- بماذا نفسر وقوع الغارة الوحشية يوم السبت، ثم اتجاه الجامعة العربية لعقد اجتماع لوزراء الخارجية العرب يوم الأربعاء، أي بعد أربعة أيام من وقوع المجزرة، رغم الإعلان الإسرائيلي عن استمرارها؟

8- هل لابد أن يتحول الفلسطينيون إلى جثث أو جرحى شوههم القصف أو مرضى مشرفين على الموت حتى يُفتح لهم معبر رفح؟

9- بعدما قال مفتي مصر إن العدوان جريمة إنسانية، ما رأي فضيلته في اشتراك مصر في حصار غزة؟

10- إذا اعتبرنا أن اجتماع المشير طنطاوي وزير الدفاع المصري مع قائد القيادة المركزية الأميركية في اليوم نفسه الذي وقعت فيه الغارة الإسرائيلية على غزة هو مجرد مصادفة، أما كان الأجدى والأليق أن يؤجل ذلك الاجتماع 24 ساعة على الأقل، لكي لا يساء فهم دلالة الاجتماع؟

11- بعد المذبحة ما هي نسبة الأصوات التي يمكن ان يحصل عليها السيد أبومازن في الأرض المحتلة، إذا أجرى الانتخابات الرئاسية بعد انتهاء ولايته في التاسع من شهر يناير المقبل؟

12- هل العملية العسكرية تستهدف تأديب حماس أم اسقاطها؟ وهل التزامن النسبي في التوقيت بين بدئها وبين إعلان أبومازن انه سيعود الى غزة في وقت قريب، هو مجرد مصادفة؟

13- هل يصبح طريق التفاوض مفتوحا بين قيادة السلطة الفلسطينية والحكومة الإسرائيلية بعد الانتهاء من العملية العسكرية في غزة؟

14- اذا كان عنف الغارة الاسرائيلية قصد به رفع أسهم ليفني وباراك في مواجهة نتنياهو في الانتخابات البرلمانية التي تجرى في فبراير المقبل، فما الذي سيفعله أبومازن لكي يعزز موقعه ويدافع عن شعبيته في الانتخابات الرئاسية المفترضة؟

15- إذا صح أن إيران أصبحت موجودة في غزة، كما ذكرت بعض التصريحات السياسية والأبواق الاعلامية، فلماذا لم يظهر أثر لأسلحتها التي توافرت لدى حزب الله وسببت ذعرا للإسرائيليين في حرب لبنان عام 2006؟ وأين عناصر الحرس الثوري الذين قيل انهم تسللوا للقطاع؟

16- هل اصبحت التهدئة المطلوبة الآن هي بين مصر وحماس؟ وهل يكون من بين شروطها مطالبة وزير الخارجية السيد أبوالغيط بالتزام الصمت؟

[الطنطاوي]

مقال أخر فهمي هويدي :

"خطاب لن يلقيه مبارك "

أيها المواطنون- في حين يقبل العالم على عام ميلادي جديد، ويودع عاما شهد احداثا جساما فإن الأمل يحدونا ان تشهد بلادنا في مقبل الأيام والشهور ما تصبو إليه من سلام ورخاء ورفعة إلا أن الرياح التي هبت علينا خلال الأيام الأخيرة أضعفت كثيراً من ذلك الأمل، على نحو أعاد إلى الأذهان صفحة الصراع الدامي والخصومة المريرة، التي ظننا انها في سبيلها الى الزوال، بعد الجهد الكبير الذي بذلناه لإحلال السلام وإعادة الثقة ومد جسور الفهم والتفاهم في المنطقة، اذ تعلمون اننا ظللنا طوال الوقت نلوح باليد الممدودة، ونعبر عن حسن النوايا..

الأمر الذي دفعنا إلى توقيع الاتفاقيات وتصديق الوعود تلو الوعود، التي كان من احدثها ذلك الوعد بإقامة الدولة الفلسطينية قبل نهاية العام الحالي، وهو ما دفعنا الى الصبر وتمرير الكثير من الهنّات والأخطاء في سبيل المراهنة على إنجاز ذلك الوعد، غير ان ما حدث بعد ذلك لم يكن في الحسبان، فقد تم التأجيل والتسويف، حتى بلغنا أواخر العام ولم تقم للدولة المرجوة قائمة، ليس ذلك فحسب، وإنما فوجئنا بما هو أسوأ بكثير، ذلك أن وعد الدولة تبخر وبدلا منه نزلت بأهلنا في غزة نازلة أغرقت القطاع في بحر من الترويع والدماء والأشلاء، حتى أصبحت هدية نهاية العام للفلسطينيين مذبحة لا دولة.

وإزاء هذه الصدمة، فإن مصر التي تعرفونها ما كان لها ان تقف متفرجة أو تلتزم الصمت. ايها الإخوة المواطنون، لقد اخترت هذه المناسبة لكي أصارحكم بحقيقة مشاعري، وانتهزها فرصة كي أصحح في الأذهان بعض الأمور الملتبسة، التي فتحت الأبواب للغط وسوء الفهم، بل وسوء الظن بمصر وسياستها وقيادتها، لقد ظن البعض ان السلام الذي اختارته مصر كان استسلاما، وذلك خطأ محض، وتصور آخرون ان صبرنا ناشئ عن الضعف وقلة الحيلة، وليس عن الثقة وطول البال، وسمعنا كلاماً كثيراً عن خروج مصر عن الصف العربي وتخليها عن دورها التاريخي في قيادة هذه الأمة، ولم نشأ في حينه أن نرد على هذا الكلام، حتى لا يظن أحد أننا في موقف الدفاع، أو أن دور مصر موضوع للمساومة أو محل للاجتهاد. وأنا هنا أقول بوضوح إن مصر التي هي ذاتها التي حاربت، ستظل ضمير هذه الأمة.

ولأن مصر تعرف قدرها وتدرك مسؤولياتها، فإن ما جرى في الأرض المحتلة كان ينبغي أن يكون له عندها وقع آخر. فليست مصر التي ترى الدم الفلسطيني ينزف ثم تقف صامتة أو متفرجة، وليست هي التي ترى اسراب الطائرات النفاثة تقصف القطاع، ولا تنتفض تضامناً مع الشعب الفلسطيني البطل، وغيرة على كرامة الأمة وشعوبها، وليست مصر هي التي ترى المقاومة الباسلة تضرب ولا تهب للذود عنها، وليست هي التي تسمع أصوات التهديد والوعيد تصدر من تل أبيب فتتراجع وتستسلم للخوف، لكن مصر التي تعرفونها تستقبل كل ذلك بثقة وثبات، وتعرف أن عليها ان ترد، في التوقيت الذي تحدده وبالأسلوب الذي تقتنع بجدواه.

إنني أعلم أن مصر مسكونة بالسخط والغضب إزاء الممارسات الإسرائيلية في غزة، لذلك فإنه استشعارا لمسؤولية مصر ومسؤوليتي الشخصية، فإنني بعد التشاور مع إخواني في مجلس الأمن القومي وقيادات قواتنا المسلحة، أعلن أن صبرنا قد نفد، وأن مصر بعدما اعطت لاحتمالات السلام كل فرصة ممكنة، قررت ما يلي: إبعاد السفير الإسرائيلي في مصر واستدعاء السفير المصري في تل أبيب إلى القاهرة للتشاور في فتح معبر رفح على مصراعيه أمام الإخوة الفلسطينيين في غزة لتوفير احتياجاتهم طوال الوقت، تعليق مشروعات التعاون مع إسرائيل، -تشكيل لجنة لإعادة النظر في اتفاقيات تصدير النفط والغاز اليها- إيفاد مبعوث خاص الى سورية لطي صفحة الخلافات بين البلدين وإعادة تنسيق المواقف بين القاهرة ودمشق والرياض، واتخاذ خطوات حاسمة لإنهاء الخلاف الفلسطيني ودعوة السيد محمود عباس رئيس السلطة الوطنية والسيد خالد مشعل رئيس المكتب السياسي لحركة «حماس» للاجتماع في القاهرة خلال اسبوع، وسأباشر بنفسي إدارة الحوار والتفاهم بينهما. أيها الأخوة المواطنون، لقد حققت مصر عبورها في عام الحسم، وأرجو ان تكون القرارات التي اتخذتها سبيلا إلى إعلان العام الجديد عاما للعزة واسترداد الكرامة.. والله ولي التوفيق.

[Ibtal]

nonsense and stupid talk

[foaadhammad]

راءيك اتفه من ينظر او يرد عليه

وانت معندكش رأى. انسان متبرمج وواخد الأكلاشيه ماركة أخوان

[foaadhammad]

انا عايزة اعرف الي عمالين يدافعوا عن موقفنا المتخاذل ده و بيتكلموا عن السلام فكروا في الموضوع بجد و لا سمعوا كلمتين في التليفزيون بيرددوهم؟

لا ده احنا سمعناها فى الراديون

و اريد من الذين يتشدقن بنغمة الأمن القومي المصري ان يقولوا لي ما الذي يضير الامن القومي المصري من فتح معبر رفح؟ هو حد قال انه حيتفتح عالبحري من غير رقابة؟
يايت بس يا اخوانا منقعدش نردد كلام و بس و نشغل عقلنا شوية. و خدوا بالكم انا كل اللي بقوله مالوش دعوة لا بحرب ولا سلام و لا حماس حلوة ولا وحشة و انما يتعلق فقط بحقوق الشعب الفلسطيني المعلقة في رقابنا و رقاب حاكمينا.

حلوة يتشدقن دى,المشكلة ان مصر مش عايزة عناصر من حماس تدخل مصر علشان مصر تفضل طاهرة,قصدى عشان بيعملم عمليات ارهابية فى مصر و برضه زى ما الأخ ما قال عشان ميكربسوش فلسطينية عندنا فى مصر علشان العملية مش ناقصة كفاية الغلب اللى الناس فيه البلد مش ناقصة مساكين, و بعدين أما بوابة تتفتح هيكون عليه رقابة ايه؟هى بوابة حديقة الأورمان!

[foaadhammad]

و طالما مصر عارفة مقدما انها لما تدخل معونات حتتضرب واليهود يقولوا المعونات دى حتخش على حماس و احنا مش عايزين كده فهنضربها, يبقى نحفظ شوية من كرامتنا و منبعتش طالما عارفين كده كده حتتضرب , و بعدين حماش معملتش حسابها ليه قبل ما ترمى شوية البمب بتاعها فى شاش و قطن والذى منه,ولا الغباء بتاعها منعها انها تفهم انها حتتضرب بعد ما ترمى صواريخ ,و بعد كل اللى كتبته ده أشك ان فى واحد اخونجى فهم حاجة؟ و بعدين عشان أنا عارف ان فى ناس حتقول ان احنا متخاذلين و مفروض ندخل معونات و نمفروض نساعد حماس و مفروض نصلى الجمعة الجاية فى تل أبيب,بقلهم الكلام مفيش أسهل منه,الحمساوية كانوا دايما يعملوا مظاهرات و يمسكو المصحف هللللللللللللللللللللللللللللللللللللللللللللل لما مسكم الحكم حكموا بالشريعة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟الحمساوية و بنى اخوان مبنخدش منهم غير كلام,و زيطة

[Scent7104]

انا عايزة اعرف الي عمالين يدافعوا عن موقفنا المتخاذل ده و بيتكلموا عن السلام فكروا في الموضوع بجد و لا سمعوا كلمتين في التليفزيون بيرددوهم؟
.

أنا بس هأرد على النقطة ده لأني كان لي الحظ إني أواجه كتير منهم وجها لوجه و في الآخر ما بيعرفوش يردوا علي و بعضهم بقى يبتدي يقول نفس كلامك بس بطريقة تانية عشان ما يحرجش نفسه أكتر من كده ...

على العموم دول يا صديقتي نتيجة سياسة القطيع اللي متبعة في البلد ده و بلاد شبيهة من خمسين سنة و كل شوية نتايجها بتبان و بتزيد و بتحفر نفسها أكتر و أكتر.

مع اشتراك مصالح البعض منهم مع التهليل للحكومة سواء مصالح سياسية أو مادية بس دول بتلاقيهم بيدافعوا في الأمور الداخلية و الخارجيو دول اللي بيقول لك اليلد زي الفل و المواصلات فايضة و الأسعار رخيصة و المفروض نشيل الدعم.

لكن الغريب اللي بتلاقيه من جوه مش عاجبه الغيشة و اللي عايشنها و مش مصدق الحكومة في أي حاجة و ييجي هنا يصدقها فده بقى بيقول لك أنا كفاية أعوي مع الناس اللي جوه كمان هأعوي مع اللي بره كمان!!!(ده من مبدأ الحكومة : ال*** تعوي و القافلة تسير)

[aymansaad]

حسبنا الله ونعم الوكيل

[araberphilosoph]

للمره المليار محدش قال نحارب مدش قال بعت سلاح
مش عايزين تفتحوا المعبر بلاش
بس وصلو المساعدات اسمحوا بقوافل الاغاثه من اي حد تعدي مش توقفهم في الاسماعيليه وعند كوبري السلام وفضايح
فبلاش كلام كبير و اعداء مصر والكلام ده
وصلوا المساعدات بس

[foaadhammad]

لكن الغريب اللي بتلاقيه من جوه مش عاجبه الغيشة و اللي عايشنها و مش مصدق الحكومة في أي حاجة و ييجي هنا يصدقها فده بقى بيقول لك أنا كفاية أعوي مع الناس اللي جوه كمان هأعوي مع اللي بره كمان!!!(ده من مبدأ الحكومة : ال*** تعوي و القافلة تسير)

ما الحكومة برده مبدأها مع اللى معترضين معاها على طول الخط انها سايباهم يزيطو و يعملوا مظاهرات يعملوا هتافات يلزقوا استيكرات اعتقادا منها بمبدأ
(لو كل KULB ألقمناه حجرا لصار الحجر بدينار)

[Scent7104]

ما الحكومة برده مبدأها مع اللى معترضين معاها على طول الخط انها سايباهم يزيطو و يعملوا مظاهرات يعملوا هتافات يلزقوا استيكرات اعتقادا منها بمبدأ
(لو كل KULB ألقمناه حجرا لصار الحجر بدينار)

و متضايق قوي كده ليه ماهو انت مش من الفئة التالتة ده خالص (لا بتعوي جوه و لا بره)... و متهيألي ده يوضح ردود كتير من بتاعة حضرتك