الداخلية تستعين بـ"شركة خاصة" لتوعية المواطنين بآداب المرور

[mragh]

أعلن اللواء شريف جمعة مساعد وزير الداخلية للشرطة المتخصصة عن بداية حملة توعية مرورية ضخمة منتصف الشهر الحالي تحت عنوان "الطريق".

وقال اللواء منصور في تصريحات صحفية إنه سيتم خلال منتصف الشهر الحالي عقد مؤتمر ومعرض ضخم بعنوان "الطريق" بمركز القاهرة الدولي للمؤتمرات تتكاتف خلاله الهيئات ومؤسسات المجتمع المدني في تحقيق هدف التوعية وترسيخ الثقافة المرورية لدى المواطنين.

وكشف مساعد وزير الداخلية للشرطة المتخصصة عن أنه تم اختيار شركة "أنفوكاست ميدل" للترويج للحملة والإعداد للأحداث والفاعليات المطلوبة منها.

ومن جانبه قال الدكتور أنس فوزي رئيس مجلس إدارة الشركة إن حملة "الطريق" جاءت بدعم كبير من وزير الداخلية ، وسوف تستمر لمدة 18 شهرا.

وأوضح الدكتور فوزي أن الحملة تتضمن طباعة أنواع مختلفة من المطبوعات الإرشادية (كتيبات وبوسترات وملصقات) وإعداد أكشاك تستخدم كمراكز للمعلومات داخل وحدات المرور ومكاتب البريد والاتصالات والأماكن الجماهيرية.

وأضاف أن فاعليات الحملة كثيرة ومتعددة ، منها لوحات إرشادية بالطرق السريعة والصحراوية وبعض المصايف ، وكذلك عدد من الأعلام أعلى الكباري.

وأردف قائلا "إن فاعليات المعرض والمؤتمر سيشارك فيها عدد كبير من الخبراء والمتخصصين في شئون الطرق لمناقشة حلول المشكلات المرورية".

[amir]

العالم دي هتوجع دماغنا ليه ليه بس
مياخدو الفلوس اللي عايزنها و يسيبونا في حالنا
مطبوعات ايه و اعلام ايه و اكشاك سجاير ايه بس
كفايه بفي حراااااااااااااااام

[MoToRiZeR]

انا شايف إن البلد محتاجة حاجة زي كدة .. أصل السبب الرئيسي في أزمتنا هي العامل البشري كله سايق بدراعه
فا لازم نحاول نعمل حاجة حتي لو هتحسن الوضع تحسن طفيف !

لذلك انا أفضل أن نحسن الظن هذه المرة و نشوف اللي هيحصل .
خاصة إن المسئولين زينا زيهم يا جماعة اللواءات و الناس دي ماهي بتفضل واقفة في الزحمة و الطريق يقفل عليهم و ولادهم بيموتوا في حوادث!

فيه مسئول كبير كان ماسك مدير أمن سابقاَ فقد عيلته كلها في حادث سيارة .

انا اؤيد الحملة دي إن شاء الله .

[Abo_Lina]

يعني هو الي بيكسر على الناس أو الي بياخد غرز مش عارف إن كده غلط ,,لا عارف بس بيعمل كده عشان عارف إن مافيش حد هايحاسبه ..
الأفضل الشركة دي توجه الحملة دي لتوعية ظباط و عساكر المرور أحسن بدل ما هما مش عارفين غير الموبايل و الحزام و الاستيكر

[aratux]

إنفو كاست؟؟؟
مش دول اللى عاملين دعم لحملة توزيع المثلث و الشنطة على الناس اللى هاترخص مجانا؟؟

شامم ريحة حاجة مش مظبوطة

[bemocarlo]

يحطوا بس العلامات المروريه الارشاديه في كل مصر والقوانين تطبق علي الكل من غير وسايط وكله هيلتزم ونبقي تمام.
bemo,ire

[Khalid_Mostafa]

احنا محتاجين لحاجه كده برضه ...ومش كل ما يعملوا حاجه حضاريه نهاجمهم بالشكل ده .....انا شايف برضه اننا لازم نعدل من سلوكيتنا احنا نفسنا ...مش كل حاجه علي المرور و الشرطه ...الي بيعمل الغلط مش بيعمله عشان رجال المرور وحشين او الطرق مفيهاش علامات ارشاد ..وبره بيعملوا حملات ارشاد زي دي ومتهيألي انها خطوه كويسه علي الطريق الصحيح ولازم نشجعها ونبتدي من نفسنا

زي ما تلاقي واحد راكب عربيه محترمه جداً و اخر شياكه و تلاقيه فتح شباكه و رمي علبة السجاير الفاضيه او المنديل في الشاره و هو ماشي !!! انسان معفن فعلاً

[Karim_Monir]

المرور مش هايتعدل حاله الا بتطبيق القواعد بمنتهى الحزم
يعني مثلا على المحور لما يتحط كاميرا ثابتة وتشوف الميكروباصات بتهدي قدامها وترجع تجري بعدها ده اسمه كلام
هما مثلا لو ركبو الكاميرات دي في عربيات ملاكي وتمشى جنب العربيات في الشارع تلقط المخالفين وتتسحب رخصتة فورا ويتطبق نظام النقاط مش ده ردع اكتر
لو اتعمل ان لو حد اتحبت رخصتة مرة ينزل نقط وبعد 3 نقاط يتوقف 6 شهور عن القيادة مش ده مفيد اكتر
ولو 3 نقاط كمان يتوقف سنة
وبعد 10 نقاط مثلا يمنع من القيادة نهائي
اهو ده الردع
لكن توعية ارشاد طبعا مقبولين لكن النفس البشرية وخاصة مرضى الغرز والسرعات العالية بجنون وترويع الاخرين لازم يكون في رادع حازم
انا متخيل لو واحد ماشي بسرعة وقابل لجنة قالتلة غرامة الف جنية هل تتخيلو انه ممكن يجري تاني
ولو نقل غرامة 10 الالاف جنية
واللي مايدفعش تتفك نمر العربية وتتوقف 3 شهور ولا 6
والله ماهيكسور السرعة تاني

[Ghamrawy]

بصراحة انا شايف ان حملات التوعية دى مش حاتنفع مع العقول المظلمة اللى فى البلد هنا (ميكروباصات-تاكسيات-اتوبيسات-موتسيكلات-تكاتك- ملاكى عربجى )
و الحل هو السيف .. والسيف هو القرش فى البلد العجيبة دى
غرامة محترمة تعور و تضلع و تودى السجن فى حالة عدم الدفع و بيع العربية فى مزاد لسداد الغرامة لو امكن
و النظام ده محتاج رجال مرور "نضاف" مش عينة ابو 50 جنيه و ساعتها ممكن الاحوال تتصلح