10 جنيهات رسوما على المستقبلين والمودعين للركاب بمطار رقم (3)

[Mohamed_Rashad]

قررت إدارة شركة مطار القاهرة الدولي بدفع رسم قدره عشرة جنيهات على كل من المودعين والمستقبلين للركاب بمطار رقم (3).
ومن جانبه صرح الطيار حسن راشد رئيس شركة مطار القاهرة الدولي الاثنين بأنه بدءا من العاشر من أغسطس الحالي سيتم تحصيل رسوم من المودعين والمستقبلين لركاب مطار رقم (3) وذلك لتخفيف حدة الزحام بالمطار.


المصدر: وكالة انباء الشرق الاوسط و مصراوي

[Ahmed Selim]

بصراحة معاهم حق

لما كل واحد مسافر يبقى جاى معاه مش أقل من 5 الى 10 أفراد بس عشان يوصلوه المطار.......ده يبقى كلام ؟؟؟؟

أيه الفرق لما يسلموا على المسافر قبل ما يروح المطار أو فى المطار ؟
ولو هو جاى من السفر....واحد أو أتنين يستنوه و كفاية على كده.

[midnightman_74]

بصراحة العملية زادت عن حدها لان دة مبيحصلش فى اى مطار فى الدنيا وكفاية رسم الانتظار اللى العربيات بتدفعة ودة كمان مبيحصلش فى اى مطار فى الدنيا

دة مطار دولى مش محطة او بوابة لتحصيل الرسوم

[midnightman_74]

بصراحة العملية زادت عن حدها لان دة مبيحصلش فى اى مطار فى الدنيا وكفاية رسم الانتظار اللى العربيات بتدفعة ودة كمان مبيحصلش فى اى مطار فى الدنيا

دة مطار دولى مش محطة او بوابة لتحصيل الرسوم

[محمد عز]

والله ياجماعه أحسن

انا بشوف ناس وانا راجع مصر

القريه كلها قاعدة مستنية واحد بس

[kh_talaat]

شيئ مش جديد على الحكومة الذكية

[أبومعاذ]

هو الموضوع دا لسة جديد؟؟؟ انا كنت لسة هناك من حوالي 3 اسابيع و مكنش في الكلام ده

[ahmedhilmy]

القصة دي هتبدأ من 10 اغسطس الواح مش عارف فضلهم ايه ملموش منه

[M.FOUAD]

مفيش مطار في الدنيا كلها بياخد رسوم على دخول السيارات
دة كان زمان بياخدوا فلوس على عربيات الترولي عشان الشنط كانت حاجة تكسف بصراحة

[Mohammmed]

خليهم يلموا فلوس

[M.ABDEEN]

بصراحة حاجة مؤسفة فلوس فلوس فلوس !!!!!!
عايزين يلموا ثمن الصالة من الغلابة ؟؟؟؟؟ استعدوا يا جماعة ممكن تلاقي في ضريبة تنفس هواء وضريبة تسمح لك بالحياة ويا الدفع يا نموتك !!!!!!!!!!!!!!!!!حسبنا الله ونعم الوكيل

[ahmed4000]

يجماعة حرام والله كل قرار ينتقد كده
مهو ده علشان نقلل الزحمة الرهيبة الى ملهاش لازمة فى المطار
لازم كل واحد ياخد قبيلة معاه تستقبله وتودعه واهى فسحة

والدليل على انهم مش عايزين يلموا فلوس وخلاص (وإن كان مش عيب ) انهم قالوا التذكرة تقدر تستبدلها باى اكل او مشروبات تشتريها من جوا

يبقى هى وسيلة لتقليل العدد مش للمكسب

[Abo_Lina]

ما هي مش هاتيجي إلا كده ..
ماينفعش تقنع المصريين بإن كل واحد مسافر جاي معاه سبعة يودعوه ما هو إلا زحام بدون لازمة و شغل حيز في المطار..فالفلوس هي الحل و اللغة الي بتتفهم على طول..

[tutankhamoun]

فعلا الحكومة معاها حق و مليون حق و دشليون حق
الواحد يروح المطار ...... الناس اللي بتودع أو بتستقبل أكتر من الناس اللي مسافرة

و دي مش بتحصل في أي مطار في الدنيا .........

فعلا أحنا شعب درجة تالتة ..... شعب من العالم الثالث يعني .

و موضوع تذكرة الفلوس ده هايخلي العدد يقل كتير جدا .

بس مين قال أن المطارات في البلاد التانية ملهاش فلوس و بتحصلها ؟؟؟؟
في أنجلترا بيحصلوا فلوس للركن ............ زي مصر ..... و لكن هما عندهم نظام مختلف شوية .
كل مطار تقريبا له 3 مداخل للسيارات
المدخل الأول للناس اللي عايزة تسيب العربية لفترة طويلة هاتمتد ليوم أو أكثر .
المدخل الثاني للسيارات اللي هاتركن فترة قصيرة لمدة ساعات مثلا .

المدخل الثالث و هو مجاني و مسموح لك بالوقوف و تنزيل المتاع و الركاب و من ثم المغادرة في خلال خمسة دقائق .
و خمسة دقائق يعني خمسة دقائق ......

الناس هناك ملتزمين جدا جدا

كل علامة على الطريق ....... أغلبية الناس بتتبعها ....... هنا في مصر الشعب بيصعب كل حاجة على نفسه .

[elpasha009]

قرار صائب جدا جدا جدا.
من إسبوعين كنت بوصل خطيبتي المطار رقم 2 وأقسم بالله العظيم وقفنا في مسافة 100 متر 20 دقيقة بالظبط بسبب زحمة الناس المودعة ووقفنا 20 دقيقة تانية على باب التفتيش بسبب الناس المودعة مما إضطرني لأني أعلى صوتي جدا في نص الصالة وبقدرة قادر ظهر كام ظابط وعسكري مشوا الناس اللي كانت واقفة على سير التفتيش.

أول إمبارح كنت بوصل جدي نفس الصالة وشفت منظر غريب جدا أقسم بالله مايكروباص فيه 18 راكب (13 كبار و5 أطفال) جايين يوصلوا واحد!!!!!!!!لك أن تتخيل المنظر كان عامل إزاي.