تسكن بالقرب من أهلك )العبور) ولا تسكن قرب شغلك (حدايق الأهرام)

[TIMODAX]

السلام عليكم
أنا بقالي فتره بأفكر في تغيير شقتي و عاوز أنقل فا لقيت أكتر منطقتين مناسبين من حيث السعر
العبور و حدايق الاهرام
أنا أصلا شغلي في وسط البلد التحرير
أهلي في جسر السويس
أسكن فيييييييييييييييييييين
عاوز أعرف رأيكم و تقولولي عيوب و مميزات الاتنين

[cheetos_892005]

لو عايز في حدائق الاهرام عندي شقه ممتازه للبيع 175 متر
دور اول مرتفع يعني اللي تحتي فيلا دوبلكس
ناصيه
مدخل خوفو
العماره تشطيبها رائع
داخلها كهرباء و عداد
محاره
اتصل بيا لو حبيت تشتري
0106089033 مهندس شريف

[maka]

اهلك طبعا لان الشغل مش دايم وممكن تنقل الى شغلانة احسن - باذن الله - او حاول تشوف مكان تانى فى النص

[MoToRiZeR]

أهلي مبروحلهومش كل يوم .. شغلي بروحه كل يوم رايح جي!
يبقي قريب من الشغل طبعاَ ..

[maka]

بس لو اهلى جرلهم حاجة واحتجونى بسرعة , ساعتها مش هينفعنى اى شغل

[bmya]

بيب بيب اهلييي

[bmya]

ده رأيي لو قدامي اختار

[homme49]

المسافة من حدائق الأهرام للتحرير و ظروف المرور فى الطريق إلى العمل يتم مقارنتها بالمسافة من العبور إلى التحرير مع الأخذ فى الإعتبار كل وسائل الإنتقال .
بمعنى أنه يمكن إستعمال مواصلات أخرى فى جزء من الطريق للذهاب للعمل
مترو الأنفاق مثلا إلى التحرير و ركن السيارة لأفرب محطة مترو لمدينة العبور
(المرج - عزبة النخل- عين شمس - الخ ...)
أسكن فى مصر الجديدة بالقرب من الكلية الحربية و أستعمل مترو الأنفاق فى كل تنقلاتى لوسط البلد حيث أننى وجدت أن ذلك هو أفضل حل للحفاظ على مستوى ضغط الدم .

[lonedoctor]

السكن بشكل عام فى مكان بعيد نسبيا عن الشغل والاهل يستلزم وجود سيارة موديل حديث وبحالة جيدة او سيارتين للاسرة احداهما حديثة والثانية ممكن نصف عمر لاستخدام الاهل فى حال غيابك فى الشغل وبصفة عامة الاهرام او العبور اعتقد المسافة بعيدة للعمل والاهل لكن انا افضل العبور جدا لانها فى اعتقادى انظف مكان فى مصر والحى مهتم جدا بالمدينة والمساحات الخضراء فيها هايلة والجو نقى جدا اما حدائق الاهرام اعوذ بالله منها صحيح هى المدينة نفسها كويسة بس انا لا اتحمل اسمع سيرة شارع الهرم او فيصل فضلا انى امشى فيهم بسيارة اماكن زحمة ومكتظة بالناس بطريقة عجيبة وانا لما شفت العبور من كام سنة كنت عايز انقل فيها فورا بس للاسف فوجئت ان الناس اكتشفوها والاسعار ارتفعت هناك بطريقة جنونية وخلى بالك فى العبور فى حى من احيائها فيه مشكلة مياه جوفية طفحت وضيعت على الناس مبانى وفلل بالملايين فلابد تسال فى الموضوع ده كويس وتختار الحى المناسب واظن ان افضلهم الحى المتميز والحى التاسع على شمالك وانت داخل المدينة واظن هيفتحوا فيه فرع لجامعة عين شمس

[crazylambada]

المسافة من حدائق الأهرام للتحرير و ظروف المرور فى الطريق إلى العمل يتم مقارنتها بالمسافة من العبور إلى التحرير مع الأخذ فى الإعتبار كل وسائل الإنتقال .
بمعنى أنه يمكن إستعمال مواصلات أخرى فى جزء من الطريق للذهاب للعمل
مترو الأنفاق مثلا إلى التحرير و ركن السيارة لأفرب محطة مترو لمدينة العبور
(المرج - عزبة النخل- عين شمس - الخ ...)
أسكن فى مصر الجديدة بالقرب من الكلية الحربية و أستعمل مترو الأنفاق فى كل تنقلاتى لوسط البلد حيث أننى وجدت أن ذلك هو أفضل حل للحفاظ على مستوى ضغط الدم .

1+++++++++++++

[tutankhamoun]

المسافة من العبور إلى وسط البلد
و المسافة من حدائق الأهرام إلى وسط البلد تقريبا متقاربة جدا

يبقى أسكن قريب من أهلك

ﻹنما في العموم .................................. السكن أقرب للشغل هو الأفضل خصوصا لو كان الشغل دائم .....
زي ما قال محمود موتوريزر ......... أنا مش بشوف أهلي كل يوم
أنما بروح الشغل كل يوم ................. يبقى لازم أريح نفسي

أنما اختياراتك هناك مش وسط خالص
يعني حدائق الأهرام مش قريبة من وسط البلد قوي و بعدين دي منطقة زحمة جدا و لو عايز تخرج خارجها برضه زحمة
شاره الهرم و فيصل و ما ادراك الشارعين دول ............ بالاضافة أن الطريق الدائري أصبح زحمة هو كمان ..... ( هي حاجة تقرف الصراحة )

أعتقد خليك في العبور أفضل ليك و لأهلك و لشغلك . ( و الله أعلم )

[enas75]

العبور افضل كسكن من حدائق الاهرام من حيث الهدوء الوسع المناطق الخضراء
بس خد بالك فيها منطقه نص السنه بتبقي غرقانه في المجاري ....اتاكد قبل ماتشتري

[Karim_Monir]

العبور افضل بالطبع على حسب معطياتك
بالنسبة لمشكلة الصرف
لما تظهر سوى في حي واحد فقط
وذلك لتعطل طلبمات المياة وكسل المقاول
وتم تغييرة بشركة المقاولين العرب
واهل العبور يفيدوك اكثر مني في هذة النقطة لان المشكلة دي اختفت تماما
والعبور فعلا اسعارها ارتفعت بشدة
وهاترتفع اكثر
لانها امتداد طبيعي ل مصر الجديدة ومن افضل المدن الجديدة خاصة مع قربها شديد للقاهرة وتمتعها بجهاز مدينة صارم لا يسمح باي مخالفات

[Imhotep]

انا هقولك على الخلاصة من واحد سكنه فى اكتوبر و شغله على الكورنيش و بيروح و ييجى بقاله 3 سنين..... اسكن جنب شغلك..... افضل من كل النواحى

[TIMODAX]

شكرا يا جماعه علي الردود فعلا منتدي مكسب لأي حد عضويته
جزاكم الله كل الخير