65 مترا ليه

[zaza_lanos]

كل شوية
اسأل نفسى ليه الحكومة متعمدة
فى اسكان الشباب ان تكون مساحة الشقة 65 متر
باسعار فلكية لتحطيم الشباب وزيادة الكراهية فى معيشتهم
انا شقتى فى الشيخ زايد
الحمد لله خدمتها منظمة وشوارعها جميلة
بس ليه 65 ليه غرفتين وصالة
ما المفروض ان الصحراء ده بتاعتنا وانت سارق فى التكاليف بالعبيط
وكمان بتعذب الناس اللى بترشحلهم العاصمة الجديدة بموصلتها المحدودة

[A_H_M_A_D]

فعلا موضوع يضايق و يغيظ

المفروض كان عملوها 100 متر على الأقل زي المشروعات الأولى اللي إتعملت في التجمعات , دي كده بقت علب كبريت مش شقق

ده كمان أنا كنت قريت إن فيه شقق 55 متر !!

[نور القمر]

وفي 45 متر ده نظام استوديو اكيد

[zaza_lanos]

علشان تكره اليوم اللى تخلف فيه طفلين وياسلام لو ولد وبنت يا جمالوا
تبقى غرفة رجالى والاخرى حريمى

[zaza_lanos]

وفي 45 متر ده نظام استوديو اكيد

على رايك قال وعايزين الناس تتجوز

[sab3aawy]

السبب بسيط جدا

السبب بسيط جدا، شقة ال 65 متر دى هدفها تحديد النسل
وجهة نظر الحكومة ان اللى رايح يسكن فى شقة فى المدن الجديدة يبقى اكيد فقير وكحيت ،يبقى ليه يخلف زوربة عيال فقراء زية يقرف بيهم الحكومة، كفايه عليه عيل واحد يلعب بيه على قد فلوسه، انما تبنيله شقة 120 متر يملاها ب 6 عيال فقراء ومساكين زيه ويقد بعد كدة يمسك فى رقبة الحكومة علشان تطعمهم؟ كما ان باقى وجهة نظر الحكومة ان محدش ضرب الشاب على ايه علشان ياخد الشقة دى
الى جانب ان ممكن تسمع برضه من ممثل الحكومة-اللى قال الكلمتين اللى فاتوا- جملة من نوعية: انتم عايزين مننا ايه؟ شقق ووفرنالكم.قرض تعاونى يسدد على مليون سنة وجبنالكم .جواز واتجوزتم. مساحة تكفى عيل واحد وادينالكم. هو انت كمان عايز تخلف وتزرب وتملاها عيال على قفانا؟ نفسك فى العيال يا اخى اشتغل بأه شوية وهاتلك شقة واسعة وخلف فيها، اقله نبقا ضمنا انك بقيت تملك وضع مادى واجتماعى يسمح انك تأكل وتعلم العيال اللى انت هترزبها،

دى طبعا وجهة نظر الحكومة وليست وجهة نظرى، لكن بصراحة شديدة انا -بالرغم انى مش قادر اقول ان الحكومة صح100%-برضه مش قادر اقول انها غلط 100% - لأن الحكومة من اكتر من 30 سنة وهى بتتحايل على الناس تفكر قبل ما تخلف-محدش طلب منهم ما يخلفوش لكن كان الطلب انهم يفكروا قبل ما يخلفوا- لكن مافيش فايدة، الناس بتتعامل مع الخلفة بمبدأ عك وربك يفك، بل وسارع الكثيرون الى زج الدين فى الموضوع حتى يقطعوا الطريق على الكثيرين فى مسألة ضبط النسل، وبالتالى وجدت الحكومة نفسها فى مأزق، اما ان تفعل كما فعلت بعض الدول وتضع عقوبات ماليه وربما احيانا عقوبات مقيدة للحرية على من ينجب اكثر من طفلين، وهو امر كانت ستقوم بسببه مليون قيامة لأنه مسألة غير دستورية، او ان تجرالحكومة لعبة تتظيم النسل الى ملعبها بعد ان قامت يعض القوى بسحب اللعبة الى ملعب لا تجيد الحكومة اللعب او التأثير فيه ، فاذا كان البعض قد اوعز للشعب بترك حبل الخلفة على غاربه واقنعوهم ان هذة هى وجهة نظر الدين فأن الحكومة قامت بتضييق الخناق ماليا على كل من يفكر فى انجاب اكثر من طفلين، اصبحت المدارس الحكومية زى قلتها واصبح وضع الطفل فى اية مدرسة آدمية يتكلف على اضعف الايمان 5 آلاف جنيه سنويا، توغلت الدروس الخصوصية واستفحلت، الجامعات الحكومية المجانية لا تقبل سوى مجاميع مرتفعة جدا ناهيك عن مستوىالتعليم الآخذ فى التدنى فيها حتى لا يصبح هناك تعليم جامعى سوى فى الجامعات الخاصة، رفعت كل انواع الدعم على الغذاء، رفع الدعم عن الداوء والعلاج، توفير شقق بأسعار مناسبة لا تصلح سوى لانجاب طفل واحد فقط اما اذا تهور ساكنها وفكر فى انجاب الطفل الثانى فسيشعر انه يقيم فى خيمة إيواء، رفع الدعم عن المواصلات، رفعت الدولة يدها عن توظيف الخريجين

وهكذا اصبحت مسألة انجاب اكثر من طفلين هى مسألة ترف مبالغ فيه لا يقدر عليه سوى الطبقة فوق المتوسطة بشق الأنفس او الطبقة العليا،

فقط اطلب ممن يهتم بمشاركتى ويهتم بالرد عليها انه ميعتبرنيش واحد من بتوع الحكومة، انا لا بشتغل فى الحكومة ولا عاجبنى 75% من اللى هى بتعمله، لكن انا كنت بتكلم من وجهة نظرهم هم، وبالتالى لو وجهة نظر الحكومة مش مناسبه له يخلى رده موجه للحكومة مش ليا

[holiel]

علشان تسمعوا الكلام وتخلفوا عيل واحد وتعلقوه فى الباكونة

[holiel]

الاخ سبعاوى الاستثمار الافضل فى الحياة الابناء اذا تعلموا مكارم الاخلاق وليس تعليم المدارس والجامعات

[sab3aawy]

الاخ سبعاوى الاستثمار الافضل فى الحياة الابناء اذا تعلموا مكارم الاخلاق وليس تعليم المدارس والجامعات

منا قلت من الاول دى وجهة نظر الحكومة مش وجهة نظرى، انا ماليش دعوة اللى عايز يرد يرد على الحكومة مش عليا

[Karim_Mohy]

للاسف النظام ........
اللي مش عاجبه......
وكتر خيرهم انهم فكروا في حد اصلا

[Dr Zezo]

منا قلت من الاول دى وجهة نظر الحكومة مش وجهة نظرى، انا ماليش دعوة اللى عايز يرد يرد على الحكومة مش عليا

[Ghamrawy]

لاول مرة أقدر اقول ان الحكومة كان عندها حكمة فى الموضوع ده
الاهم من كترة العيال هو تربيتهم
معناها ايه اخلف 3 عيال و يطلعوا زبالة ؟؟ اخلف واحد و اربيه و اعلمه صح و توتة توتة خلصت الحدوته

[sab3aawy]

مهو يا عم انا صحتى على ادى، وياما شفت بهدلة فىالمنتدى الاجتماعى دى، انا بطلت اعرض وجهة نظرى فى اى حاجة، انا عرضت وجهة نظر الحكومة ووجهة النظر الشعبية، اللى عايز يرد على وجهة نظر معينة يرد على صاحبها ، لكن انا رأييى الخاص احتفظت بيه لنفسى علشان انا راجل غلبان لا انا حمل قفا من الحكومة ولا حمل اتهام بالكفر والعلمانية والماسونية والصهيونية من محتكرى الحقيقة على المستوى الشعبى،

[ahmed76]

كفايه عليه عيل واحد يلعب بيه على قد فلوسه

بجد انا هاموت من الضحك من الجمله دى


وكمان فيه هدفين من الشقه ال 45 متر

1- لما حد ييجى يزورك يبقى قاعد وشايف كل الشقه الحمام و اوضه النوم ومافيش اسرار بقه
2- ( الترب دلوقتى اصبحت 40 متر ) علشان بعد ما الواحد يموت ما يزعلش تبقى نفس المساحه تقريبا وما يحسش بفرق انه ترك نعيم الدنيا

[TIMODAX]

2- ( الترب دلوقتى اصبحت 40 متر ) علشان بعد ما الواحد يموت ما يزعلش تبقى نفس المساحه تقريبا وما يحسش بفرق انه ترك نعيم الدنيا