كان في موضوع عن الميكروويف أنا مش لاقيه :(

[marsguy]

السلام عليكم ورحمة الله وبركاته،،،

كل سنه وإنتم طيبين با جماعه :)

كان في في المنتدى من فتره أخ كان بيسأل عن أفضل أنواع الميكروويف وبصراحه الإخوه هنا مشكورين إدوله معلومات مهمه جداً ومفيده عن أنواع الميكروويف والفروقات ما بينهم!

أنا دلوقت عاوز أشتري ميكروويف وللأسف حاولت إني الاقي الموضوع ده بس ما لقيتوش :(

يا ريت لو حد يدلني عن الموضوع ده أو ممكن يفيدني من واقع الخبره الشخصيه:

أنا عاوز ميكروويف ما يكونش صغير أوي، يعني 30 لتر مثلاً بس مش عاوزه يكون حاجه جامده جداً عشان أنا مش ناوي أطبخ فيه، أنا هاستغله عشان التسخين والإذابه في المقام اﻷول، فا مش عاوز أدفع ثمن خصائص أنا مش هاستخدمها.

وطبعاً مش عاوزه يكون غالي أوي بس يكون صناعته كويسه.

من اﻵخر عاوز حاجه تكون

good value for money

شكراً مقدماً

[أحمد كمال]

كينوود كويس جداً عن تجربتين و وكيله محترم و ممكن تلاقي طلبك في حدود 900 جند

[الغزالى]

عندنا الدايو وشغال زى الفل بئالو بتاع سنتين وكان فى وكان فى واحد قابلية بس امريكانى كان تحفة حمار شغال بس غالبا غالى
عشان انا بصراحة مرفش الاسعار بتاعتهم

[أحمد كمال]

بص يا باشا

انا بس ردي الاول كان مقتضب عشان كان من الموبايل

انا عندي كينوود بقاله سنتين ماشي اخر حلاوة

باستثناء عطل بسيط في رمضان الماضي (الباب قفل و ما رضيش يفتح بسبب ان اللوك فوت و التوكيل صلحوه في يومين كما وعدوا و دفعت 55 جنيه بس تمن اللوك و المصنعية و الضريبة)

كنت جايبه ب 815

هو 34 لتر و 100 واط و شكله عصري و ظريف


شغال معايا كويس جدا ..... و وكيله محترم

المزايا اللي فيه

واجهته سهلة الاستعمال

ممكن بزر واحد تشغله (دقيقة) و كل ضغطة زيادة بدقيقة زيادة

و ممكن تختار قوة الميكروويف (من 10 لحد 100%) و تختار الوقت

فيه برامج جاهزة للتسييح بالوزن او التسييح بالوقت او طبخ طبخات معينة

سهل ممتنع

الصراحة من غيره كنا تايهين اما كان بيتصلح (غير الربع فرخة اللي اتقفل عليها هههههههههههههههههههههه)

و والدي عنده الموديل اخوه بس اللي بشواية بس نصيحة فكك من الشواية لانه في سنة و نص استعملها مرة واحدة بس !

و برضه ما حصلش عنده غير عطل في الموتور الدوار بتاع الصينية الداخلية و كان ممكن يستعمله من غيره بس برضه صلحه في يوم واحد بس في التوكيل تمن الموتور الدوار + المصنعية 110 جنيه

[Mohd_Adel_Amin]

والله للأسف انا معرفش الموضوع فين بس لو عايز نصيحة انا جربت نوعين شارب وسامسونج وبصراحة الشارب ما شاء الله تبارك الله بقاله 7 سنين ربنا يبارك فيه زي الفل .. انا كنت شاريه من السعودية بس شفت زيه في كارفور مره مش عارف لسه موجود ولا لأ ؟؟
بالمناسبة هو المشكلة اللي حصلت فيه ان مع الوقت بدأت الشاشة تتعطل فيها الأرقام وبلغت التوكيل في السعودية قالو ان الموديل ده ظهرت فيه المشكلة دي وبتتغير ببلاش , بس طبعا كان صعب اني ارجعه من مصر للسعودية علشان الموضوع ده ولاقيت اني مش محتاجها قوي لأني كنت حفظت الأوامر بتاعته ..

[marsguy]

ألف شكر يا جماعه على ردودكم، ربنا يكرمكم يا رب

طمني يا أحمد على الربع فرخه؟ يا ترى طلع من الحادث سليم؟ ولا مهندس الصيانه طمع فيه؟

أنا عندي سؤال محوري من الطراز الأول: ومحتاج إجابه سريعه:

هو الميكروويف اللي فيه خاصية الـ convection ممكم أشغله كا فرن كهرباء عادي ولا لأ؟

عشان والدتي أصلاً مش متقبله فكرة الميكروويف، فأنا متخيل إن لو في فرن ممكن يشتغل فرن عادي لما أحب وفرن ميكروويف لما أحب يبقى ده فل أوي؟ ده غير طبعاً إنه ممكن يشتغل برضه بخاصية الـ convection.

يا ريت يا جماعه حد يردي علي بسرعه.

شكراً

[mr_sameh]

انا بقالي سنه بشتري في الميكرويف

[أحمد كمال]

ألف شكر يا جماعه على ردودكم، ربنا يكرمكم يا رب

طمني يا أحمد على الربع فرخه؟ يا ترى طلع من الحادث سليم؟ ولا مهندس الصيانه طمع فيه؟ :ob_mak1[1]:

أنا عندي سؤال محوري من الطراز الأول: ومحتاج إجابه سريعه:

هو الميكروويف اللي فيه خاصية الـ convection ممكم أشغله كا فرن كهرباء عادي ولا لأ؟

عشان والدتي أصلاً مش متقبله فكرة الميكروويف، فأنا متخيل إن لو في فرن ممكن يشتغل فرن عادي لما أحب وفرن ميكروويف لما أحب يبقى ده فل أوي؟ ده غير طبعاً إنه ممكن يشتغل برضه بخاصية الـ convection.

يا ريت يا جماعه حد يردي علي بسرعه.

شكراً

ده الموديل بتاع والدي ..... ميكروويف + شواية ..... و هو اغلى تقريبا 200 او 300 جنيه من اللي عندي

[marsguy]

ده الموديل بتاع والدي ..... ميكروويف + شواية ..... و هو اغلى تقريبا 200 او 300 جنيه من اللي عندي

يعني إنت متأكد يا أحمد إني ممكن أشغل الشوايه لوحدها وكده يبقى زي الفرن الكهرباء العادي بالظبط؟

شكراً

[أحمد كمال]

يعني إنت متأكد يا أحمد إني ممكن أشغل الشوايه لوحدها وكده يبقى زي الفرن الكهرباء العادي بالظبط؟

شكراً

أيوة و شوينا بيه العيد الكبير قبل اللي فات

فيه 3 modes للتشغيل

شواية فقط او ميكروويف فقط او الاثنين معاً

[marsguy]

جزاك الله خيراً يا أحمد

شكراً

أنا جبت بلاك أند ديكر 30 لتر بالشوايه من كارفور بـ 1200 جنيه

ضمان سنتين

[egyegy]

انا بقالي سنه بشتري في الميكرويف

سنه !! ؛ ليه يعني ؟؟

[mr_sameh]

سنه !! ؛ ليه يعني ؟؟

اقولك ليه كل لما اروح اشتري اشوف ماركات كتير فاحتار بينهم مره وماشتريش ومره تانيه اتخانق انا والمدام ونرجع ومنشتريش وكتير من كده وبقالي سنه

[egyegy]

اقولك ليه كل لما اروح اشتري اشوف ماركات كتير فاحتار بينهم مره وماشتريش ومره تانيه اتخانق انا والمدام ونرجع ومنشتريش وكتير من كده وبقالي سنه

طيب في موقع انا بستخدمة دايما في المقارنات بين الحاجات دي، موقع wize، هتلاقي في الموقع المقارنات بتم على الحجم الداخلي وسهولة الاستخدام والسعر والخ ...، وممكن انت تعيد ترتيبهم على حسب السعر والجديد والقديم ، رابط الموقع اهو ، هتلاقي اعلى التقييمات لباناسونيك وشارب وفي نوع تالت مش حطينة هو الهاير.

رابط باناسونيك مصر

رابط شارب مصر

رابط هاير الشرق الاوسط

وهتلاقي في كل موقع التليفونات، تقدر تتصل بيهم وتسأل على الاسعار، وعشان تريح نفسك من موضوع الخناقات ده تعمل زي ما الاجانب بيعملوا، تحدد انت السعر اللي مش هتقدر تدفع اكتر منه وتسيب المدام هي اللي تحدد النوع والحجم والماركة، عشان لو في خطأ في الاختيار لا قدر الله او حصل لخبطة في موضوع الصيانة او اي مشكلة من اي نوع، يبقى انت لا تتحمل شيء. والطرف الآخر هو المسئول.

ارجو ان لا اكون قد اثقلت عليك وشكرا لك.

[marsguy]

جزاك الله خيراً يا أحمد

شكراً

أنا جبت بلاك أند ديكر 30 لتر بالشوايه من كارفور بـ 1200 جنيه

ضمان سنتين

آسف، أنا إتلخبط

الميكروويف سعره 1100 مش 1200