قمة الغباء (مصر تعتذر عن تنظيم بطولة افريقيا لكرة اليد )

[w-m-a]

فى قمة الغباء وتسرع ونظام عيال صغيرة من مسئول كبير المهندس حسن صقر يعلن ان مصر تعتذر عن تنظيم بطولة افريقيا لكرة اليد لمشاركة الجزائر واعلن ايضا ان مصر ستشارك فى البطولة فى اى دولة
وطبعا دة مش هيحصل علشان اكيد الجزائر هى الى هتنظم البطولة
حسبنا الله ونعم الوكيل

[dodino2006]

اتفق معاك انه موقف في منتهي الغباء فعلاً... يعني مش معقول نكون احنا اللي هنظمها و نعتذر علشان الجزائر فيها.....

[Terrible_DaRsH]

غبي فعلا ,دى فرصتنـــــــــــــــــــــــــــــــــا ..

[النوبي]

احنا عندنا اطفال معندناش مسؤلين

[TaoTao]

يا عييييييييييييييييييني ، الراجل الحليوة ابو عيون ملونة اتقمص؟ حد يطبطب عليه ويداديه شوية عشان يسكت !!
ياخي ....
وللا بلاش :(

[Everlasting]

اللهم لا تؤاخذنا بما فعل السفهاء منا

[Sameh]

قرار خطأ فعلاً إحنا الدولة المنظمة ، وتبقا كبيرة لينا لما هم يبقوا عايزين يلعبوا ويلاقوا الدولة المنظمة مصر ، إنما إحنا دلوقتى نروح زينا زيهم فى أى بلد تانية ويحصل قلق برضه فى بلد غريبة

[ehabradwan]

انا دمي اتحرق لما قريت الخبر على مصراوي . ايه لعب العيال ده . نظام مش لاعب معاكوا يا وحشين

[TaoTao]

لو مصر اعتذرت عن التنظيم الجزائر هي اللي هاتنظم البطولة أو تونس .. لأن كرة اليد في أفريقيا مابتتلعبش غير في مصر وتونس والجزائر والمغرب، غير كدة مشاركات رمزية من باقي دول أفريقيا، وعشان كدة بطولة أفريقيا لكرة اليد 8 فرق بس !!
غير كدة الجزائر محتكرة البطولة دي ومصر لم تحصل على هذه البطولة غير مرتين فقط على ما أذكر !!
أظن إن سبب الاعتذار هو التمهيد للانسحاب لمداراة المستوى الهزيل الذي وصل إليه منتخب اليد لأن منتخب الجزائر هايعلم علينا على أرضنا عن جدارة لأنها متطورة وشرسة جداً في كرة اليد

[abouelmaggd]

انا شايف ان موضوع الجزائر ده بقى شماعة للمدربين و القائمين على الالعاب الرياضية ، انا مش فاهم مين اولى بالاعتذار البلد المستضيفة للبطولة و اللى اتضربت بره ارضها و لآ البلد اللى المفروض جمهورها خايف ييجى مصر ، حاجة غريبة فعلا :(((((((

[M.Mosaad]

هي موضه و هوجه و كله راكبها اي حاجة تمت للجزائر بصله نقطعها
ناس كلها راكبه الموجة لان السيد الرئيس قال كدة
و بكرة لو اتقال عكس كدة هتلاقي كله بيدادي في الجزائر
اللي عمله الجزائريين في السودان جالهم علي الطبطاب علشان يداروا خيبتهم و فضايحهم بتاعه التذاكر في ماتش القاهرة و بتاعه السفر للسودان
و اي حد عامل فضيحه الموضوع دة جاله نجدة
ازمه انفلوانزا الخنازير اتنست
قطارات بتخبط في بعض اتنست و كله اتنسي
حسبي الله و نعم الوكيل

[medmac]

مش ممكن دي قمة الغباء ولازم حد يدخل ويمنع المهزلة دي

والاخ صقر ده يروح بيتهم بقى لان تصرفاته ان دلت فتدل على اعل مستوى من الجهل

بقى انت عندك فرصة تنظيم بطولة علشان توضح للعالم انك بلد الامن والامان تعتذر طب ليه مش هتقدر تنظم بطولة زي دي ولا مش هتقدر تامن الناس اللي هتيجي

وبعدين يا اخي بدل متطلع زي كل مرة انت اللي بتعيط خليها يمكن الجزائر هي اللي تنسحب

واحنا كدة بنفقد مصداقيتنا ادام العالم لما انسحب من تنظيم بطولة قبلها بايام وبسبب تافه زي ده

انا فعلا دمي اتحرق

[human]

الناس ديه لو جت هنا الناس هتاكلهم
و مصر اللى هتنضر اكتر

هما عارفين اللى فيها و عارفين الناس هتوجب مع الجزاير ازاى
المره اللى فاتت كانوا كام طوبه المره ديه احتمال كبير الاتوبيس مش هيوصل الفندق من المطار و غالبا هيختفى فى السكه

واحنا مش ناقصين فضايح

[MoToRiZeR]

انا شايفه قرار كويس .. إنت متقدرش تطرد الجزائر من البطولة بس تقدر تطرد البطولة كلها برة .. أحسن ما الفريق الجزائري ييجي يلاقي بتاع 150 ألف واحد مستنيينه ينزلوا فيه ضرب و يقتلولهم كام واحد و الجزائر تنشر الموضوع و نطلع إحنا تاني اللي قتالين قتلة و بلطجية و يدخلوا الموضوع ده في الموضوع الأولاني و يطلع قدام العالم المصريين ولاد 60 في 70 .

أصل مستحيل فريق جزائري هييجي مصر في الظروف دي و الموضوع يعدي علي خير !

[human]

انا شايفه قرار كويس .. إنت متقدرش تطرد الجزائر من البطولة بس تقدر تطرد البطولة كلها برة .. أحسن ما الفريق الجزائري ييجي يلاقي بتاع 150 ألف واحد مستنيينه ينزلوا فيه ضرب و يقتلولهم كام واحد و الجزائر تنشر الموضوع و نطلع إحنا تاني اللي قتالين قتلة و بلطجية و يدخلوا الموضوع ده في الموضوع الأولاني و يطلع قدام العالم المصريين ولاد 60 في 70 .

أصل مستحيل فريق جزائري هييجي مصر في الظروف دي و الموضوع يعدي علي خير !

زى ما قلت
احتمال كبير مش هيوصلوا صلاح سالم
و المره ديه يبقى مشكله اختفاء بعثه الجزائر كامله