اية اهدافك لسنة 2010

[Mohamed.Ramah]

مين فينا ياجماعة ملوش اهداف كل واحد فينا جواة حلم وعاوز يحققة وحاطط قدامة هدف او انة مقدرش انة يوصل لية فى 2009 او ماجلة ل2010 علشان يحققة سواء فى شغلة او فى حياتة او فى دراستة فكل واحد فينا يدخل يقول هدفة اية فى حياتة ولا هو عايش كدة وخلاص بدون هدف لية وغير طموح او احلامة او توقعاتة لمستقبلة فى 2010 ياريت نفكر فى نفسنا شوية بعيدا عن الحروب والفساد والسياسة والكورة والبلد نتكلم عن انفسنا مش عاوز حد من الاعضاء يدخل يقولى انا بحلم تبقى الشوارع نضيفة او حال البلد يتصلح مش هى دة فكرة الموضوع

مستنى مشاركتكم

كل واحد يدخل يقول انا هدفى كذا ......
انا حلمى كذا ......

[Mohamed.Ramah]

وااضح انة مفيش حد عندة اهداف فى حياتة

[seqoia]

انا نفسي اجيب امتياز

اولى هندسة سيارات المطرية

[Mohamed.Ramah]

جميل جدا ربنا يوفقك مستنى باقى المشاركات

[eng.octooo]

اولا احييك على موضوعك المميز


ثانيا
اهدافى (الترتيب مش مهم يعنى رقم 1 مش لازم يكون الاول )

1-نفسى انجح بتقدير جيد على الاقل فى التيرمات الجاية انا اولى عمارة
2- نفسى اتعلم كمان واشترى واحد حلو قريب ان شاء الله
3-نفسى اطلع الرخصة لانى مكسل (شفتة بقا لسة مكسل)
4-ان شاء الله بعد الامتحانات فى شهر 1 هاروح اقعد فى اليكس شوية لوحدى ودة سفر للمتعة وليس للبحر (مش باقولكم شهر 1)
5- اخس وماتخنش تانى لانى كل شوية باخس جدااا واتخن اكتر
6-انشر القصة بتاعتى (قصة رومانسية لطيفة اوى وفكرة كتابتها جديدة جدااا )
7-اجيب كمبيوتر جديد لان الى عندى هايبتدى يستهبل
8- فاطمة اختى الصغيرة (3 ابتدائى) تعرف الفرق بين الانجليزى والفرنساوى لانها بتكتب نص الجملة لغة والنص لغة تانى خالللص
9- انى اقنع والدى ان العربيات كلها فيها الحلو والوحش لانة مش مقتنع غير باليابانى والاوروبى وبس بجد نفسى اشيل الفكرة دى من دماغة
10- ان الناس تحترم الفن شوية وتبصلة على اساس انة تجسيد للجمال الروحى



فية ناس ممكن تشوف الحاجات دى تافهة او مضيعة للفلوس بس بجد انا محتاجهم

[human]

اهدافى انى ماموتش بحرقه الدم من ابلد ديه و اللى فيها

العيش و العيشه و اللى عايشنها

[peregrine]

أهداف اية يا سيد يا محترم فى اليوميين السود دول
هو بقى فى أمل ولا عمر حتى..للاسف فى خضم الانتروبيا دى كل واحد بقى هدفة الستر
كل واحد بيخرج من بيتة وبيقول يارب استرها لانة مش ضامن هايرجع تانى لولادة ولا لا
أحنا فى يوميين صعاااب اوى والوضع كل يوم بيسوء ولا حضرتك مش ساكن معانا فى العمارة!!؟

يارب أسترها من عندك

[Mohamed.Ramah]

لا حول الله يا جماعة لو الواحد متشائم للدرجة دة فيتوقع ان دة مش الموضوع المناسب يكتب فية دة ياريت نقدر شعور الناس انا كاتب موضوع متفائل وحضرتك والعضو human12 كاتب مشاركة مش تبع الموضوع خالص مع ان انا منبة فوق بكدة

[Terrible_DaRsH]

هدفى كان انى اقعد فى الكافى و اشد فى شعرى من المنتخب و هو بيلعب فى كاس العالم .

شكلى هروح انا ادخل المنتخب المونديال

بفكر بجد و الله :)

[eng.octooo]

انتوا كلكلوا على الراجل كدة لية هوة متفائل وقال ان محدش يدخل يقول كلام رجعى او سلبى حتى لو كان الحقيقة احنا عاوزين نبعد عن المشاكل وندخل فى جو هادى شوية
ياشباب ياريت الى يدخل يقول الحاجات الى نفسة (نفسة مش كل الى حوالية ) يحققها فى السنة الجديدة
وكل سنة وانتم طيبين

[HanyHanyHany]

اهدافي في 2010م على المستوى الكبير ان بلدي مصر تكون حلوة زي مصر في 1980م ...!!
وعلى المستوى الشخصي النجاح في عملي وزيادة قربي من الله .....

[AboELsoud]

نفسي ابطل كل الحاجات الوحشه اللي بعملها
نفسي ازود الحاجات الحلوه اللي بعملها
نفسي اذاكر اكتر من كده
نفسي اداوم على الصلاه و مسبش ولا فرض
نفسي المنتدى يكبر اكتر و اكتر
و .............شكرا لصاحب الموضوع

[eslam_wega]

عايز اخس شوية ونفسى ربنا يشفنى ان شاء الله
الصلوات الخمسة احفظ عليهم
اخطب فى اخر السنة

[M.Osman]

هدفي:
اشتغل و اسافر اكمل تعليمي في الخارج

[human]

كل واحد يدخل يقول انا هدفى كذا ......
انا حلمى كذا ......

لا حول الله يا جماعة لو الواحد متشائم للدرجة دة فيتوقع ان دة مش الموضوع المناسب يكتب فية دة ياريت نقدر شعور الناس انا كاتب موضوع متفائل وحضرتك والعضو human12 كاتب مشاركة مش تبع الموضوع خالص مع ان انا منبة فوق بكدة

انت هتلخبطنى ليه؟
امت قلت مش عايز حد يقول عايز حال البلد ينصلح

اعتقد انا قلت اللى انا عايزه من غير ماقول انى عايز حال البلد ينصلح

فيه ايه دلوقتى؟