عاوز اتجوز.............. اة عاوز اتجوز فيها حاجة ؟؟؟

[eng.octooo]

اسف لانى كنت غايب اليومين الى فاتوا بس بجد ماشاء الله ماكنتش متوقع الاقبال على الموضوع بالطريقة دى بس الناس كلامها تحفة ومتابع الحوارات (الشخصية الجانبية)

[الغزالى]

اية الكلام دة كلة انتوا بتجيواااا الكلام دة منين ربنا يسمحك يا اكتووووووووووو انا عنيا راحت فى دلهية من كتر قراءة الكلام

[eng.octooo]

الناس دى والله تعبت فى الموضوع ياغزالى بس الموضوع بقا جامد جدااا بردودة

[الغزالى]

الناس دى والله تعبت فى الموضوع ياغزالى بس الموضوع بقا جامد جدااا بردودة

وهو انا قلت حاجة يا عم انت انت هاتغلطنى لية روح كل احسن يا اكتووووووو شكلك بئالك كتير مكلتش والناس الى فى الموضوع على عينى وراسى من كبيرهم لصغيرهم

[unit_delta]

I am with you man & i wish that everyone get the good wife (or husband) cause it is the best thing in life

[MohamedFadel5]

السلام عليكم يا جدعان

والله الحوار ده بيثبتلي إننا ممكن نناقش كل قضايانا بهدووووووووء ورقي ومن غير ما حد يتعدى على الآخر
ويا ريت كل مشاكلنا سواء من ديمقراطية لشفافية لحريات وأزمات طائفية وحقوق المرأة وغيره وغيره كنا نناقشها بهذه الروح الرياضية
النقاش ده بيفتح عيون كل واحد فينا على زوايا أخرى للموضوع يمكن هو مش واخد باله منها

لكن كنت بأتمنى إن النقاش الجميل ده يكون تحت قيادة واحد أو واحدة بحيث يديره بمزيد من الحرفية

معلش انا هأغلس عليكم وأكتبلكم بعض آرائي ويا رب يكون كلامي خفيف عليكم

فيه مميزات كتيرة فينا كمصريين واكيد فينا عيوب
سواء العيوب دي كنا مسئولين عنها او مشاركين فيها بطبيعة التواجد في هذا البلد
أنا هأحاول أذكر بعض العيوب او المشاكل ويا ريت نشارك في حلها

1- المجتمع المصري مجتمع أبوي
بمعنى إنه غالبيتنا وخصوصا النساء بيدربوا من نعومة أظافرهم على السمع والطاعة
اسمع كلام أبوك
أسمع كلام امك
لغاية ما نوصل لسماع كلام الأكبر منك وكلام البواب والراجل بتاع اللبن
وده له ميزه إنه بيخلي فيه إرتباط لكن عيبه إنه بيلغي الشخصية لوقت طويل وللأسف الاسرة حاليا ما عندهاش القدرة على توريث الخبرات من الأب والأم وفي النهاية يصل الشاب لمرحلة يكون مطلوب منه أن يستقل بقراره وان يأخذ قراره بسرعة وحسم وأن يكون قرارا صائبا رغم إنه ليس لديه خبره كافية وثانيا متعود طول عمره إنه ينتظر رأي الأكبر منه ويستشيره بطريقة تابعة غير مستقلة
زي واحد منع واحد من تعلم العوم طول عمره
وبعدين وهو في وسط البحر رماه من المركب وقاله طيب يا عم ورينا شطارتك بقى مش بتقول انا حر سيبني أعوم براحتي
ويقعد بقى يتفرج عليه وهو بيغرق ولو أنقذه يقوله شفت علشان قلنالك اسمع الكلام لأن إحنا خبره عنك وعارفين
يلا بعد كده لما نقولك على حاجة ما تجادلش كتير

استمعوا إلى قصة الفتاة التي جائت تشتكي أبوها لرسول الله صلى الله عليه وسلم رسول الله أنه زوجها بغير رغبتها وعرض عليها الرسول أن تجيز زيجة أبيها فرفضت فما كان فأخبرها الرسول صلوات الله وسلامه عليه أن لا شئ عليها فقالت الآن أجيزها وقد جئت لكم برواية من الحديث تتعرض لهذه الحادثة

في سنن النسائي عن عائشة أن فتاة دخلت عليها فقالت : إن أبي زوجني ابن أخيه ليرفع بي خسيسته وأنا كارهة قالت اجلسي حتى يأتي النبي صلى الله عليه وسلم فجاء رسول الله صلى الله عليه وسلم فأخبرته فأرسل إلى أبيها فدعاه فجعل الأمر إليها ، فقالت : يا رسول الله قد أجزت ما صنع أبي ولكن أردت أن أعلم أللنساء من الأمر شيء ؟ . ، وفي رواية مسند أحمد قالت : ولكن أردت أن تعلم النساء أن ليس للآباء من الأمر شيء

أنا عانيت من هذا الأمر للأسف وأنا رجل حتى وصلت لمرحلة إني واحد مهندس شحط طويل ومالي هدومه لكن مش قادر يحدد قراره وخايف ومتردد

والحمد لله دلوقتي بأحاول أعمل لأولادي شخصية مستقله وأدربهم على إتخاذ القرار الصحيح بكل استقلال وإنهم يشاركوني في معظم القرارات بحيث يتعودوا هم كمان ياخدوا قراراتهم وكمان ما يبقوش متسلطين على الآخرين ويفرضوا نفسهم عليهم

2- المجتمع المصري للأسف قريب من بعضه قوي
زي ما بيقولوا في علم النفس : مجتمع نهري
وهذا المجتمع النهري يتميز بتلاصقه للنهر وزيادة في الإختلاط والإحتكاك مع بعضه
ده بيولد عندنا عاطفة جياشة بالإنتماء والحب لهذا الوطن
لكن فيه عيوب كتيره
أهمها إن كل واحد بيتأثر بوضع وظروف اللي قدامه
وطبعا اللي قدامه ده قريب منه قوي يعني بينهم في السكن ستة متر هي عرض الشارع وبينه وبين اخته وأخوه تلاتين متر هي طول الشارع وبينه وبين ابن خالته سبعين متر وهي المسافة حتى آخر الشارع اللي وراه
وده بيخلي كل واحد باصص للتاني ولو ما بصش للتاني التاني بيجي قدامه ويقوله لو سمحت بصلي ههههههه
لكن في المجتمعات الصحراوية بيكون الوضع اخف وكل واحد في بيته مستقل كتيييييييييييير عن كده وممكن ينفصل عن المؤثرات الخارجية بشكل أكتر

إمتى بقى إحنا نفض حالة الإشتباك اللي عايشينها دي مش عارف

3- كل راجل بيتمنى في زوجته صفات كتييييييييييييره زي ما الأخت رنا قالت والست أكيد بتتمنى كذلك مواصفات كبيره فيه
وطبعا زمان كان الواحد ممكن يتجوز واحدة وما يشفش وشها غير بعد ما يخلف العيل التالت مثلا ههههههههههههه
لكن دلوقتي مع إنتشار القنوات والأنترنت والإثارة الرهييييييبة التي نتعرض لها فأصبح من الصعب واحد ياخد واحدة ما تكونش عاجباه أو ما تكونش بتثير أمامه إحساس بأنوثتها الجميله حتى لو مختمرة أو منقبة
أنا على فكره والحمد لله كويس باعرف ربنا ولا أزكي نفسي على الله وعمري ما كلمت أو مشيت مع واحدة غير زوجتي
لكن أنا طبيعتي إن حدودي هي حدود الله
وما دون ذلك فهو حلال أحله الله وأحب أن أتكلم بكل الحرية اللي ربنا ادهاني
لكن بأقولكم إن ما كان في الماضي فراغة عين بالنسبة للرجل أصبح اليوم أقل القليل بالنسبة لإحتياجاته
وكذلك بالنسبة للمرأة
موضوع عش العصفورة والكلام ده ما بقاش مقنع ليها كتير وإن كانت ممكن تقبل بيه علشان تتجوز وتخلص لكن بكره ومع وجود هذا المجتمع المثير حولها أكيد هتحس بالنقص

أكيد هنا البنت بتتحمل كتير من المسئولية
أولا إهتمام المرأة المصرية بنفسها أقل بكثير من أي إمرأة في العالم
يعني أنا بأشوف لبنانيات هنا الواحدة فيهم محافظه على قوامها سواء عدم نحافة أو عدم زيادة في الوزن رغم إن الواحدة ممكن تكون مخلفة عشرين عيل
لكن المصرية بسم الله ما شاء الله بعد سنة من الجواز - ده إن كانت مش ثمينه في الأصل - تلاقيها ضربت من كل ناحية وتقولك هو عايز إيه مني مش كفاية إني حملت وخلفت وعمالة أتنيل أرضع
هو فاكرني إيه انا هألاقيها منين ولا منين
خلاص مش عاجباه يروح يتنيل يتجوز !!!!!!!!!!!!!!

أيوة الست صحيح بتتعب لكن دي فطرة الله التي فطر الناس عليها
أنا حاولت أبات سهران مع الولد وهو مريض علشان أريح زوجتي لكن عنيه غفلت بعد شوية صحيت لقيت أمه صاحية وقاعدة بتعمله كمادات
دي قدرات ربنا مديها للست اكتر من الراجل
لكن الراجل بيتعب وبيتبهدل في الشغل وفي تحمل المسئولية حتى النفسية منها
وصدقوني أصعب شئ هو تحمل المسئولية النفسية
لو الست بتدي لجوزها كل مرتبها أو هو أصلا مليونير لكن مجرد تحمله لمسئولية زوجته وأولاده ويمكن أمه وأبوه وأخته
ده هو التعب الحقيقي إنه يكون حاسس بالمسئولية تجاههم
لكن آخر اليوم عايز يرجع يلاقي زوجته والبيت والأولاد على سنجة عشرة زي ما بيقولوا ويرتاح في البيت علشان ينسى كل تعب الدنيا
أكيد مش كل لحظه وكل يوم
لكن لازم ده يكون الشئ الطبيعي
طبعا فيه مشكلة عندنا
واحدة هتقولي طيب اللبنانيات اللي حضرتك بتتكلم عنهم دول عملوا مائة عملية تجميل علشان يوصلوا للشكل ده وانتوا حتى مش سامحين بالرياضة للست
أقولها أولا مش كل اللبنانيات بيعملوا عمليات تجميل ومش كلهم لونهم أبيض ومش كل الرجالة بتحب اللون الأبيض وفيه عارضات أزياء أسمر من السمار لكن الإهتمام ممكن يكون بإمكانيات أقل وصدقوني الراجل المتزوج ممكن يتنازل عن الأكل والشرب وحتى غسيل الهدوم وكويها لو الزوجة عوضت ده كله بالإهتمام بنفسها وبعيالها ودايما يقولوا يا وحشه خليكي نغشه
يعني الست لازم تتدلل على جوزها ويحس إنها بنته مش صاحبه الند بالند
أنوثتها إنها تديله رجولته ولو بالكلام ولو بالدلال وهي تاخد كل اللي في جيبه لو حبت

لكن الصراحة موضوع ممارسة المرأة للرياضة بدون الإخلال بتدينها ده موضوع مهم ويا ريت اللي يقدر يفيدنا فيه يتفضل
أنا عن نفسي نفسي أجيب لزوجتى عجلة وتتمرن بيها في الشارع بس بدون إسفاف وهي لابسه حجابها لكن مش عارف حكم الدين إيه وكمان ردة فعل أم المجتمع ده إيه
وفكرت إجيبلها عجلة صغيره في البيت تركبها مع الولد لكن مساحة الشقة ما سمحتش

وييجي الدور على الراجل إزاي يلبي طلبات زوجته
طيب لو ما قدرش طبعا مش هنقدر نقوله اعمل ريجيم
دي مقدور عليها لكن هيجيب فلوس منين
شخصية الراجل بقى هتظهر هنا هل هيقدر يحتوي زوجته ويعوضها عن الظروف المادية أو ياخد قرار إنه يروح حتة صحراء ويعيش فيها ويجيب عربية بسيطة ولا يبيع البيت والشقة ويشتري شقة ولا بيت في مكان أرخص ونضيف ويحاول يعمل مشروع
المهم لازم يحاول يتصرف يضحي من أي ناحية
إما يضحي بالمنطقة اللي عايش فيها طول عمره جنب امه واخواته
او يضحي بمصارييفه الشخصية
أو حتى يتعب نفسه شوية ويعملها قرداتي ويبقى واد كلمانجي ويعود نفسه على الكلام المعسول

3- بيقولوا دايما الشاب والفتاه بيحلموا بالفنانين
أنا عمري ما اتمنيت أتجوز واحدة شبه الممثلة الفلانية
الصراحة لا تهويني إلا البنت المحجبة الرقيقة العفيفة اللي فيها رونق العفاف وطبعا تكون مظهرها منظم وألوانها متناسقة يعني تحس فيها بالرقي وكمان يكون وجهها عاجبني وجسمها رياضي !!!!!!!!!!!
دي اللي كان طول عمري أتمنى اتجوزها
والحمد لله ربنا أكرمني بيها بس مش عايز مراتي تعرف كده لحسن تتفرعن علي !!!!!!!!!!!!
أما اللي طول عمري حلمت أتجوز واحدة زيها وأنا شاب
هي الممثلة نورة
مش علشان الشكل رغم إن شكلها لذيذ
لكن كنت دايما أشوف موقفها وهي بتمثل دور الست الوفية البسيطة اللي بتقف مع جوزها وتخفف عنه ومهما حصل تقوله ولا يهمك ربنا بكره هيفرجها انت زعلان ليه طب دا انا والله بأفكر أنزل أشتغل معاك وإيدي على إيدك ونعمل كل اللي تحلم بيه
وبعدين إحنا نبيع حتتين الدهب دول ونفتح بيهم مشروع وتقف على رجليك من تاني
انت أهم عندي من مال الدنيا كلها
سيبك من كل ده دا انا عاملالك شوية مصقعة بإيديا دول هتاكل صوابعك وراهم

كل العبارات دي كنت أسمعها وأحلم إني إيه متجوز واحدة بتقولي كده

يا جماعة إحنا فيه سلاح قوي عندنا جدا يكافح مشاكل كتيره ومش مستغلينه
سلاح الكلام الحلو اللي يريح البال
يا سلام كلمة حاضر تريح الخاطر
يا سلام لما الواحد بيبقى مستني مراته تحت البيت وهي تخليه واقف في الشارع نصف ساعة بيكون دماغه هتغلي ولو شافها قدامه هيتخيله إنه يعلقها فوق باب زويله وخلص من برودها
لكن لما تنزل وتقوله : قبل ما تعمل نفسك زعلان ، أنا حبيبك هتزعل من حبيبك بردو
يلا يا ولد روح بوس بابا لحسن شكله كده ناويلنا على نية سودة ومش هنطلع النهاردة روح يلا قوله ما تزعلش يا حبيبي أنا آسف يا بابا

شوية كلام وخلاص بس ممكن يطلعوا الواحد من كل مشاكله

لكن اتخيلوا المنظر لو نزلت الزوجة بعد كل التأخير ده والراجل حاسس إن كرامته التهبت
وتنزل تقوله : ما تعليش صوتك العيال قرفوني
انت سايبني عماله أخلع في ده وألبس في ده لما هلكوني مش عايز تروح انت حر يلا يلا يا ابني خلينا نطلع ما هي عيشه غم ، هو بيتلكك وعلى إيه

أكيد هيكون المنظر متلف

5- إحنا بنفتقد الشجاعة الأدبية الكافية اللي تخلينا نواجه بعض التقاليد والمفايهم الخاطئة في المجتمع والتي لا تتفق مع الدين
على سبيل المثال
كم رجل متزوج يتمنى أن يتزوج على زوجته
تقريبا 99.9 % حسب علمي
هل لآن الزوجة وحشه ولا مقصرة في حقه
أكيد لا
لكن دي طبيعة الرجل
فطرة الله التي فطر الناس عليها
واحدة هتقولي الرسول صلوات الله وسلامه عليه اتجوز السيده خديجه وهي أكبر منه بخمستاشر سنة ورغم كده ما اتجوزش عليها لغاية ما توفاها الله وكان عمره ساعتها واحد وخمسين سنة حسب علمي يعني أمنا السيدة خديجه كان عندها ستة وستين سنة
أقولها صحيح
الرسول صلوات الله وسلامه عليه اتجوز السيده خديجه وهي أرمله ولم يتزوج عليها وأيضا لا تنسي أنه تزوج السيدة عائشة رضي الله عنها وهي بكر ورغم ذلك تزوج عليها
كل الحالات أباحها الرسول صلوات الله وسلامه عليه

والله أنا شايف إن التعدد ده في مصلحة الزوجة والمرأة بصفة عامة لكن المشكلة مش فيه المشكلة فين طيب
أ- المشكلة في ثقافة المجتمع
يعني ممكن ثقافة المجتمع توصل بالرجل إنه يكون في ديسكو وواحد يقوله لو سمحت ممكن مراتك الرقصة دي فيبتسمله وما يحسش بأي غيره ويسلمهاله ويقولة بكل سرور
بتوصل لمرحلة إن البنت ممكن تبقى عارفه إن الولد اللي ماشيه معاه ماشي مع كام واحدة تاني ومش زعلانه بالعكس شايفه إنه واد دونجوان وكل البنات بتحبه كل البنات حلوين
لكن لو واحد اتجوز على مراته يبقى رجل شهواني وغريزي وعينه فارغة وما عندهوش وفاء ولا أمال ووووو
فثقافة المجتمع السائدة بتسيطر على تصرفاتنا

ب- اللي بيروح يتجوز على مراته فغالبا بتبقى حياته الأسرية مدمرة وهو إما عايز يخلع نفسه شوية ويريح دماغه من المشاكل اللي مش لاقيلها حل أو عايز يربي مراته إنه يجيبلها درة
وعشان كده أول سؤال ممكن يتسأله الشخص اللي متجوز على مراته هو يا عم وهو انت ناقصك إيه وهو بالطبع هيحاول يجيب مبرر
أنا لو عايز اطلع مراتي دي شيطانة هأجيب مواقف تخلي الناس تبكي على وضعي
ولو عايز أطلعها ملاك هأجيب مواقف الناس تحسدني عليها
لكن رأيي بقى إن الشخص اللي نجح في فتح بيت وعمل أسرة مستقرة وراقية ومتطورة هو اللي عنده القدرة على فتح بيت آخر وإنجاح أسرة تانية لكن لو هو مش ناجح في حياته لازم يدور على حل لمشاكله الأول ولو وصل لا قدر الله للإنفصال

ج- الإعلام بيجيب صورة للتعدد تتلخص في واحد جزار وكل يوم حاطط إيده في فتحدة الجلبية اللي في الصدر وإيده التانية بيخبط بيها على بيت واحدة من زوجاته ويتنحنح ويقولها أنا المحروس جوزك افتحي

لكن لما الإعلام قدم صورة تانية زي الحاج متولي أعتقد كتير من الناس فوجئت بيها
فالإعلام ممكن يغير كتير من وجهة نظرنا

طيب مميزات التعدد في نظري
1- لو عندنا مليون إمرأة ونصف مليون رجل قادرين على الزواج أو راغبين فيه
وكل رجل اتجوز واحدة فقط هيبتقى نصف مليون
قدامهم ثلاث حلول إما يوافقوا على الزواج من شخص متزوج أو يمتنعوا عن الزواج نهائيا ويقضوا حياتهم كده وخلاص وطبعا نفسيتهم وظروفهم انتوا أدرى بيها أو الحل التالت إنهم والعياذ بالله ينحرفوا فأي الحلول أفضل لهن

2- كتير من الزوجات يقعون تحت أقل ما يوصف سوء معاملة وتعذيب ورغم كده لا يستطيعون طلب الطلاق لأنهم بإختصار مش هيلاقوا فرصة أكيدة للزواج مرة أخرى والواحد تفكيرها هيدور في نظرية إن البكر مش لاقيه جواز فالمطلقة هتلاقي

3- الرجل الأرمل بعد فترة حزن عميقة هيروح يتجوز ودايما بيتجوز واحدة بكر لأنه بيبقى عنده الخبره الكافية إنه يدور كويس ويلاقي الأنسب ليه لكن المرأة المطلقة المجتمع بيحكم عليها إنها تلبس السواد وتنتظر هكذا حتى نهاية الحياة تتحمل المسئولية بمفردها
بالعقل كده وفي الغالب مين هياخد واحدة مطلقة أو أرملة وعندها أولاد إلا لو كان مطلق او أرمل وعنده أولاد
كام في المية إحتمال إن واحد فرداني يتقدم لواحدة مطلقة أو أرملة

4- فيه نساء وخصوصا في القاهرة الواحدة عندها إمكانيات كويسه جدا جدا جدا وكل أمنيتهم إن ربنا يرزقهم بواحد رجل يدخل البسمة في حياتهن ولو حتى يسأل عليها بالتليفون ولو لا قدر الله حصلها حاجة تلاقيبني آدم يخاف عليها بدل ما نسمع عن واحدة اتوفت في الشقة من أسبوع وما حدش عارف عنها حاجة

5- طبعا غير الحالات اللي النساء بتكون مش بتخلف والرجل نفسه في ذرية وحاسس من جواه إنه عنده فرصة وزوجته حارماه منها
طبعا ممكن نقول والرجل اللي مش بيخلف
أقول بردو المفروض ما يحرمش زوجته من غريزة الأم ويسرحها بإحسان ويتمنالها مستقبل أحسن

مع التعدد البنت بتلاقي فرص أكتر وحرية اكتر والرجل بيلاقي مجال للحرية وإنه ما يبقاش هو ومراته وش لوش طول العمر
دي حاجة تزهق والله للإتنين

والله يا جماعة التعدد ده في مصلحة المرأة قبل ما يكون في مصلحة الرجل وكما سمعت من الدكتور القرضاوي : فإن كان فيه مضرة بالأولى ففيه إصلاح للثانية وفيه إصلاح للزوج وفيه إصلاح للمجتمع

أنا شايف في كل دول العالم بيشوفوا حلول لمشاكلهم بكل واقعية وشجاعة سواء حلول محرمة أو حلال عندنا
لكن غحنا اللي بنضيق على نفسنا

أنا استهبلت وكتبت كتييييييييير لكن هأعمل إيه إجازة والأولاد مش معايا فأعذروني

+9999999999999999
يسم الله ما شاء الله و الله أستاذ
و تقريبا نفس الكلام اللى كان نفسى أقوله

[yousef1978]

دكتور
A7MED_PHARMA

والأخ الفاضل
MohamedFadel5


أشكركم على كلماتكم الرقيقة وأنا كل اللي حصل اني طلعت اللي جوايا وارجو إن يكون رأيي مفيد

كل سنة وكلكم طيبين

[eng.octooo]

هيا الناس شالت فكرة الجواز ؟؟؟؟؟؟؟؟؟؟؟؟

ههههههه النقاش وقف لية دة انا كنت مستمتع جدداااااا هههههههه عاوزين الناس تتفاعل
ولا تحبوا موضوع اسمة عاوز اطلق

[meemoo777]

بسم الله الرحمن الرحيم

الاخ الفاضل كاتب الموضوع الجميل
يشرفنى انى ارد عليك واقولك مبروك عليك انك عقلت الجواز دة جاجة حلوة جدا بصراحة انا لسة مجربتوش بس انا فى نص المشوار انا الحم لله خاطب وبجهز الشقة للجواز فى الصيف بعد امتحانات المدام باعتبار ما سيكون الجواز دة نعمة ربنا بينعمها على البنى ادام لعلمك الخاص والكلام دة مش للنشر لحسن المدام تزعل كل اللى الواحد مر بية من تجارب وكلام من عينة الجواز مسئولية هو هجس وانعدام شخصية الحمد لله انا كان ليا زميلات بنات وكنت بقولك نفس الكلام دة مسئولية ولسة بدرى والكلام الفارغ بس دلوقتى بقول ياريت الزمن يرجع وانا اتجوز من زمان قوى وعلى فكرة انا خاطب خطوبة عادية يعمى صالونات بس الحمد لله ربينا انعم عليا بواحدة بلسم والله مش كلام كفاية انها بقت جزء منى واحنا الاثنين فى الاول أول مرة كنا عادى لما قعدنا مع بعض كذا مرة الحمد لله متفاهمين جدا ويارب مكونش طولت عليكم وكلمة اخيرة اتجوز لان العمر بيجرى انا دلوقتى عندى 26 سنة بحسبة بسيطة على بال لما اتجوز بقيت27 واخلف لما يبقى عندى 50 سنة ابنى يبقى عندة 23 يبقى فى عز الوقت اللى نقدر نفهم بعض اوعى تسمع كلام حد والكلام دة من واحد مجرب وابعد عن جواز الحب اختار واحدة كويسة وعلى خلق وامها طيبة دى اهم حاجة تقبل تحياتى ومستنى تشريفكم فى الفرح

م /محمد حامد

كلامك عجبني جدا وانا متفق معاك تماما ربنا يباركلك

[شريف]

موضوع جميل جدا و من احسن الموضوعات اللى قراتها في الاجتماعى

[mo7amed_omara]

انا كماااااان نفسى اتجوز بس المشكلة انى لسة مش لاقى العروسة منظرى كدة حدور على موقع بنت الحلال ههههههههههههههههههه
انا عمرى 24 سنة و عايز واحدة تكون صغيرة 20 مثلا يااااترى منين هههههههههههههههههههههه

[eng.octooo]

طيب سؤال اضافى : اية رأيكم فى جواز الصالونات والجواز عن معرفة سابقة؟؟؟

[wesam_salom]

الفرق بينهم هو نفس الفرق بين واحد رايح سجن ابو غريب

وواحد رايح سجن طره

هنا السجان غريب وهنا بيتكلم عربى

[dr.amr]

الفرق بينهم هو نفس الفرق بين واحد رايح سجن ابو غريب

وواحد رايح سجن طره

هنا السجان غريب وهنا بيتكلم عربى

انا كنت بدعو للزواج
بس انا كرهته علي ايدك

[ahmed88hassan]

انا عايز اتجوز النهارده قبل بكره ومعظم اللي اعرفهم كده...ده احنا غلابة قوي ياعم الحج