مش هتبطل ندالة ؟؟؟

[م/مصطفى محمود]

السلام عليكم ورحمة الله

تخيلوا معايا اننا فى 2011

وبنفتح صحيفة المصرى اليوم لقينا خبر بعنوان (عمرو موسى والدكتور محمد البرادعى يُرشحان أنفسهم رسميا لأنتخابات الرئاسية)

طبعا هتفرح وتروح تنتخب أى منهم وفجأة يسألك الراجل على باب لجنة الأنتخابات ويقولك

-ممكن البطاقة الأنتخابية بتاعتك ؟؟

حضرتك هترد وتقول

- انا للأسف معيش البطاقة الأنتخابية ، هو انا مينفعشى أرشح من غيرها ؟؟

هيقولك - لأ طبعا مينفعشى ، ويلا بعد أذنك من هنا أحنا ورانا شغل

_______________________

بذمتك مش ساعتها هتبقى أستندلت معاهم ، مش هتبقى مكسوف أن الناس دى تحاول تصلح فى البلد بس معرفوش بسبب أنك مكنشى معاك بطاقة أنتخابية ؟؟؟؟؟

طبعا فى واحد هيقولى (يا عم دول عمرهم ما هيرشحوا نفسهم)

هقولك أنت متعرفشى الغيب وكمان حتى لو مرشحوش نفسهم ممكن ناس شُرفاء تانى يرشحوا نفسهم

واحد تانى هيقولى (ما هى كده كده بتتزور )

هقولك كل ما عددنا يكتر كل ما التزوير يقل ، زى ما كل ما عدد المُراقبين بيزيد الطلبة مبتعرفشى تغش ، وزى ما الراجل اللى بيدفع رشوة مبيعرفشى يدفعها وسط ناس كتير ميعرفهمشى

بجد يا جماعه والله صوتنا أمانة ولازم نأديها

طب واللى مش معاه بطاقة أنتخابية يعمل أية ؟؟؟؟؟؟

هتروح على القسم اللى أنت تابع لية وتسأل على البوابة على مكان أستخراج البطاقة الأنتخابية ، وتروح على المكتب اللى هيقولك علية وتقولهم على أسمك وعنوانك ورقم البطاقة

ولو أنت كنت متسجل فى الكشوف الأنتخابية هيسلمك ورقة حمراء فيها بياناتك الأنتخابية

ولو مكنتش متسجل هتملأ أستمارة وتديهم صورة من البطاقة علشان يسجلوك وهتروح بعدها بشهر تستلم البطاقة (أو هم هيحددولك الوقت)

طب ولو أنت خارج مصر ، ممكن تتوجه للسفارة وتستخرجها (ده تصريح لحبيب العادلى وهو اللى قال كده فى الأهرام)

وده كلة فى نص ساعة تقريبا وبدون أى رسوم (آخر معاد للتسجيل 31/1/2010)

بجد يا جماعه صوتنا أمانة ولازم نأديها

المصرى اللى على حق ....* يقول للغلط لأ

[wahba87]

جزاك الله خيرا

يا رب كل الناس تطلعها

[A7MED_PHARMA]

ياريت بس الواحد يتخلص من احساس انه مفيش فايده
الاحساس ده مترسخ جوانا من زمااااااااااااان

[م/مصطفى محمود]

جزاك الله خيرا يا وهبة على المُشاركة

وأن شاء الله يا أحمد هنتخلص من الأحساس ده لأننا فعلا نقدر نعمل كتير ، وهما عارفين كده كويس

والدليل أن لما شباب 6 أبريل عملوا أول أضراب الحكومة قبلها بيوم أعلنت فى المصالح الحكومية أن اللى هيغيب يوم 6 أبريل هيتحول للتحقيق ، ووزارة الداخلية نبهت بالليل على عدم التغيب عن المصالح (وانا والدتى مدير عام فى الجهاز المركزى للتنظيم والأدارة وأتنبه عليهم فعلا) ورغم كل التنبية ده الميادين كانت شبة القلاع العسكرية ، وده لأنهم فعلا كانوا خايفين ، وفعلا يوميها الشوارع كانت فاضية

الدليل التانى أن فى الأضراب التانى ليهم يوم 4 مايو الرئيس عمل زيادة 30 % قبلها علشان يحبط الأضراب

فهما فعلا عارفين ان الناس تقدر تغير بكتير

الدليل الأخير

قانونا اللى مبيشاركشى فى الأنتخابات بيتعرض لعقوبة 100 جنية ، عمرك سمعت قبل كده عن حد أتطبق علية القانون ده ، أو حتى حد أعلن عن الحوار ده ؟؟!! رغم أن الحكومة خبرة جدا فى جمع الفلوس ورغم أن نسبة المُتغيبين عن الأنتخابات الأخيرة كانت 77 % (يعنى 23 % بس هو اللى راح)

مبيطبقوش ده ولا بيهتموا بية لأنهم خايفين أن الناس كلها تروح ، لأنهم ببساطة مش هيعرفوا يزورا الأنتخابات لو الكل راح

وفى النهاية أحنا لا بنقول هنعمل أنقلاب ولا أضراب ولا ترشح واحد بعينة ولا أى حاجة ، أحنا بس عايزين الناس كلها تشارك فى تحديد مصيرها بجد (عن طريق حق مشروع ليهم أساسا)